E ’orometua ha’api’i ’oe nō te mau tamari’i

’Ua pi’ihia ’outou e te Atua nō te ha’api’i i tāna mau tamari’i mai tā te Fa’aora i ha’api’i. ’Ua fa’ata’ahia ’outou i teie pi’ira’a nā roto i te mana o tāna autahu’ara’a mo’a. Noa atu ē, e ’ere ’oe i te hō’ē ’orometua ha’api’i ’aravihi, ’ia ora parau-ti’a rā ’oe, ’ia pure ’oe i te mau mahana ato’a, ’e ’ia tuatāpapa ’oe i te mau pāpa’ira’a mo’a, e hōro’a mai te Metua i te ao ra i te fa’aurura’a ’e te mana o te Vārua Maita’i ia ’oe ’ia tauturu ia ’oe ’ia manuia (hi’o 2 Nephi 33:1).

Te feiā tei tu’uhia mai i roto i tā ’outou ’atu’atura’a, e mau tamari’i ïa nā te Metua i te Ao ra, ’e ’ua ’ite ’oia e aha tō rātou mau hina’aro ’e e nāhea e tae’a atu ia rātou. Nā roto i te Vārua Maita’i, e arata’i te Atua ia ’oe i roto i tā ’oe fa’aineinera’a ’e i te taime ’a ha’api’i ai ’oe. E heheu mai ’oia ia ’oe i te mea e parau ’e te mea e rave (hi’o 2 Nephi 32:5).

Te fā faufa’a mau o te ha’api’ira’a ’evanelia, ’e te ’apora’a mai ’oia ho’i nō te fa’ahōhonu ïa i te fa’afāriura’a i te Metua i te ao ra ’e ia Iesu Mesia. Tā ’oe fā ’ei ’orometua ha’api’i o te tauturura’a ïa i te feiā tā ’oe e ha’api’i ra ’ia rave i te mau mea ato’a ia rahi atu ā tō rātou fa’afāriura’a—e tauto’ora’a ’o te tupu nei hau atu i rāpae i te taime o te piha ha’api’ira’a. E ani i te feiā tā ’oe e ha’api’i ra ’ia ’āmui itoito mai i roto i te ha’api’ira’a mai nō ni’a ia Iesu Mesia ’e i Tāna ’evanelia ’e ’ia rave mai te au i tā rātou i ’apo mai. ’A fa’aitoito ia rātou ’ia fa’ariro i tā rātou iho tuatāpapara’a ’e te tuatāpapara’a ’utuāfare i rāpae’au i te piha ha’api’ira’a ’ei fā mātāmua nō tā rātou tuatāpapara’a ’evanelia. ’Ia tuatāpapa ana’e rātou rātou iho ’e rātou ’e tō rātou ’utuāfare ma te fa’aro’o, e tītau manihini rātou i te Vārua i roto i tō rātou orara’a, ’e nā te Vārua e fa’atupu i te fa’afāriura’a mau. Te mau mea ato’a tā ’oe e rave ’ei ’orometua ha’api’i, nō taua fā mo’a nei ïa.

’A ha’api’i noa i te ha’api’ira’a tumu o te ’evanelia a Iesu Mesia i fa’aho’ihia mai, mai tei ’itehia i roto i te mau pāpa’ira’a mo’a ’e i roto i te mau parau a te mau peropheta o te mau mahana hope’a nei. E tītau manihini te ha’api’ira’a tumu ateate—te parau mau mure ’ore ’e te tāuiui ’ore tei ha’api’ihia e te Atua ’e tāna mau tāvini—i te Vārua ’e e mana ho’i tō te reira nō tē fa’ataui i te mau orara’a.

Te pi’ira’a ia ha’api’i e ti’aturira’a mo’a ïa, ’e i te tahi mau taime e tae mai iho ā te mana’o ē, e’ita e mara’a ia ’oe. ’A ha’amana’o rā ē, nā tō ’oe Metua i te Ao ra i pi’i ia ’oe, ’e e ’ore roa ’oia e fa’aru’e ia ’oe. E ’ohipa teie nā te Fatu, ’e ’a tāvini ai ’oe « ma tō ’ā’au atoa, ma tō itoito ato’a, ma tō mana’o atoa, ’e tō pūai ato’a » (Te Parau Ha’api’ira’a ’e te mau Parau Fafau 4:2) e fa’arahi ’oia i tō ’oe mau ’aravihi, mau hōro’a ’e mau tārēni ’e e ha’amaita’i tā ’oe tāvinira’a i te orara’a o te feiā tā ’oe e ha’api’i ra.