te mau tamari’i e ’āfa’i ra i te rima i ni’a i roto i te piha ha’api’ira’a

Pāhono i te mau hina’aro o te mau tamari’i ri’i

’Ua ineine ’e e hina’aro rahi tō te mau tamari’i ’ia ha’api’i mai i te ’evanelia mai te mea ē, e vauvauhia te reira ma te māramarama. Mai te mea iho ā rā e ha’api’i ’outou i te mau tamari’i ’āpī a’e, e feruri ’ia fa’a’ohipa i teie huru ’ohipara’a i muri nei nō te tauturu ia rātou ’ia ’apo mai.

• Hīmene. E ha’api’i te mau hīmene ’e te mau pehe i roto i te Chants pour les enfants i te ha’api’ira’a tumu ma te pūai. ’A fa’a’ohipa i te fa’ahorora’a nō te mau tumu parau i muri i te Chants pour les enfants nō te ’ite mai i te mau hīmene e tū’ati i ni’a i te mau parau tumu o te ’evanelia tā ’outou e ha’api’i ra. Tauturu i te mau tamari’i ’ia fa’atū’ati i te parau poro’i o te mau hīmene i ni’a i tō rātou orara’a. ’Ei hi’ora’a, e nehenehe ’outou e ui i te mau uira’a nō ni’a i te mau ta’o ’aore rā te mau pereota i roto i te mau pāpa’ira’a. Ta’a ’ē atu i te hīmenera’a, e nehenehe tā te mau tamari’i e ha’uti mai i te mau hīmene, ’e ’aore rā, e fa’aro’o noa i te mau hīmene ’a rave noa ai rātou i te tahi mau ’ohipara’a. Nō te tahi atu mau mana’o, ’a hi’o i te mau tuha’a « Fa’a’ohipa i te pehe nō te ha’api’i i te ha’api’ira’a tumu » ’e « Tauturu i te mau tamari’i ’ia ha’api’i ’e ’ia ha’amana’o i te mau hīmene Paraimere ’e te mau hīmene purera’a » i roto i te « Mau arata’ira’a nō te taime hīmenera’a ’e te fa’anahora’a hīmene a te tamari’i nō te ’ōro’a mo’a » i roto i teie buka.

• Fa’aro’o ’aore rā ha’uti ta’ata ora i te hō’ē ’ā’amu. E mea au nā te mau tamari’i ri’i te mau ’ā’amu—nō roto mai i te mau pāpa’ira’a mo’a, nō roto mai i tō ’outou orara’a, nō roto mai i te ’ā’amu o te ’Ēkālesia, ’aore rā nō ’ō mai i te Church magazines. E ’imi i te mau rāve’a nō te fa’aō mai ia rātou i roto i te fa’ati’ara’a ’ā’amu. E nehenehe rātou e tāpe’a i te mau hōho’a ’aore rā te mau tao’a, e pāpa’i i te mau hōho’a o te mau mea tā rātou e fa’aro’o rā, e ha’uti i te ’ā’amu, ’aore rā, e tauturu i te fa’ati’ara’a i te ’ā’amu. E tauturu i te mau tamari’i ’ia ’ite i te mau parau mau o te ’evanelia i roto i te mau ’ā’amu tā ’outou e fa’ati’a atu.

• Tai’o i te hō’ē pāpa’ira’a mo’a. E’ita paha te mau tamari’i e ’ite i te tai’o, e nehenehe rā ’outou e tītau ia rātou ’ia ha’api’i mai i te mau pāpa’ira’a mo’a. E hina’aro paha ’outou e rōtahi i ni’a i te hō’ē ’īrava, hō’ē pereota faufa’a, ’aore rā, hō’ē ta’o. ’A tai’o pūai ai ’outou i te hō’ē pāpa’ira’a mo’a, e nehenehe ’outou e ani i te mau tamari’i ’ia ti’a ’aore rā, ’ia ’āfa’i i tō rātou rima i ni’a ’ia fa’aro’o ana’e rātou i te hō’ē ta’o ’aore rā, hō’ē pereota ta’a ’ē tā ’outou e hina’aro e rōtahi i ni’a iho. E ti’a ato’a ia rātou ’ia tāmau ’ā’au i te mau pereota poto o te mau pāpa’ira’a mo’a mai te mea e fa’ahiti rātou i te reira e rave rahi taime. ’Ia fa’aro’o ana’e rātou i te parau a te Atua, e ’ī rātou i te Vārua.

• ’Ia ’ohipa. Nō te mea e mea pinepine te mau tamari’i ’āpī a’e i te ha’uti’uti noa, e fa’anaho i te mau rāve’a nō te fa’aha’uti ia rātou—hāhaere, ’ōu’au’a, pi’o i raro, ’e te tahi atu ā mau ravera’a e tū’ati i ni’a i te parau tumu ’aore rā, i te ’ā’amu tā ’outou e ha’api’i ra. E mea maita’i ato’a teie mau ’ohipa mai te mea e hīmene ’āmui ’outou.

• E hi’o i te hō’ē hōho’a ’aore rā, e māta’ita’i i te hō’ē video. ’Ia fa’a’ite ana’e ’outou i te mau tamari’i i te hō’ē hōho’a ’aore rā video, ’a ani i te mau tamari’i i te mau uira’a e tauturu ia rātou ’ia ’ite nāhea te reira e tū’ati i te hō’ē parau tumu o te ’evanelia ’aore rā te ’ā’amu o te pāpa’ira’a mo’a. ’Ei hi’ora’a, e nehenehe ’outou e ui, « E aha tē tupu ra i roto i teie hōho’a ’aore rā, video ? » ’aore rā, « E aha te mana’o e tae mai ? » Te vaira’a buka ’evanelia, medialibrary.ChurchofJesusChrist.org, e children.ChurchofJesusChrist.org e mau vāhi maita’i nō te ’imi i te mau video.

• Fa’a’ite i te mau ’itera’a. ’Aita paha e rahi te mau mea tā te mau tamari’i ’āpī a’e e fa’a’ite mai, mai te mau tamari’i pa’ari a’e, terā rā, mai te mea e hōro’a ’outou ia rātou i te tahi arata’ira’a, e fa’a’ite mai rātou i tō rātou mau mana’o ’e te mau ’itera’a nō ni’a i te mea tā rātou e ’apo mai.

  tamari’i e fa’a’ūra’a i roto i te piha ha’api’ira’a a te ’Ekālesia

• Hāmani. E nehenehe te mau tamari’i e patu, e pāpa’i hōho’a, ’aore rā, e fa’a’ū i te hō’ē mea e tū’ati i ni’a i te ’ā’amu ’aore rā, i te parau tumu tā rātou i ’apo mai. E fa’aitoito ia rātou ’ia ’āfa’i i tā rātou ’ohipa i hāmani i te fare ’e ’ia fa’a’ite i te mau melo o te ’utuāfare nō te tauturu i te mau tamari’i ’ia ha’amana’o i te mea tā rātou i ’apo mai.

• Fa’aō mai i roto i te mau ha’api’ira’a tao’a. E nehenehe hō’ē ha’api’ira’a tao’a ’ōhie roa e tauturu i te mau tamari’i ’ia hāro’aro’a i te hō’ē parau tumu o te ’evanelia e ’ere i te mea ’ōhie ’ia māramarama. ’Ia fa’a’ohipa ana’e ’outou i te ha’api’ira’a tao’a, e ’imi i te mau rāve’a nō te fa’aō mai i te mau tamari’i. E ’apo hau atu ā mai rātou nā roto mai i te ’āmuira’a i roto i te ’ohipara’a, i te māta’ita’i noa i te hō’ē fa’a’ite’itera’a.

• Ha’utira’a ta’ata ora. ’Ia ha’uti ta’ata ora te mau tamari’i i te hō’ē ’ohipa i tupu ’o tā rātou i ora i roto i te orara’a nei, e māramarama maita’i a’e rātou e nāhea te hō’ē parau tumu o te ’evanelia e tano ai i tō rātou orara’a.

• E nā ni’a iho fa’ahou te mau ’ohipara’a. E hina’aro te mau tamari’i ’āpī a’e e fa’aro’o i te mau tumu parau e rave rahi taime nō te hāro’aro’a i te reira. ’Eiaha e taiā i te ha’apinepine-noa-ra’a i te fa’ati’a i te mau ’ā’amu ’aore rā, te mau ’ohipara’a, noa atu i roto i taua ā ha’api’ira’a ra. ’Ei hi’ora’a, e nehenehe ’outou e fa’a’ite i te hō’ē ’ā’amu nō te pāpa’ira’a mo’a e rave rahi taime na roto i te mau ravera’a rau, i te roara’a o te hō’ē ha’api’ira’a—ma te tai’ora’a i te mau pāpa’ira’a mo’a, ha’apotora’a nā roto i tā ’outou iho mau parau, fa’a’itera’a i te hō’ē video, te vaiihora’a i te mau tamari’i ’ia tauturu ia ’outou ’ia fa’ati’a i te ’ā’amu, te anira’a ia rātou ’ia ha’uti i te ’ā’amu, ’e tē vai atu ra. Mai te mea e fa’a’ohipa-fa’ahou-hia i te fare, te hō’ē ’ohipara’a tei ravehia i roto i te piha ha’api’ira’a, e tauturu te reira i te mau tamari’i ’ia ’apo mai ’e ’ia ha’amana’o noa.

• E rave ’e ’o vetahi ’ē. E fa’ananea te mau tamari’i i te mau ’aravihi tōtiare, ’e e pinepine ato’a i te fāna’o i te ’apo mai ’e i te ha’uti ’e tō rātou mau hoa. E fa’atupu i te mau rāve’a nō rātou nō te fa’a’ite mai, nō te rave i tō rātou taime, ’e nō te ’ohipa ’āmui, ’a ha’api’i mai ai rātou.

• ’Āmui mai i roto i te mau ’ohipara’a rau. Te rahira’a o te mau tamari’i ’āpī a’e e mea poto roa tō rātou taime ’ana’anatae, ’e ’ua rau ato’a tā rātou huru ’apora’a mai. E fa’a’ohipa i te mau ’ohipara’a rau, ’e e ha’apa’o maita’i i te mau tāpa’o fa’a’itera’a ē, tē hina’aro ra te mau tamari’i ’ia taui te ’ohipara’a. ’Ei hi’ora’a, e ti’a ia ’outou ’ia taui pinepine te mau ’ohipara’a pe’epe’e ’ore i te mau ’ohipara’a pe’epe’e.

Te hō’ē tuha’a o tō ’outou ti’ara’a ’ei ’orometua ha’api’i nō te mau tamari’i ’āpī a’e—ta’a ’ē atu te ha’api’ira’a i te mau parau tumu o te ’evanelia—’o te tauturura’a ïa i te mau tamari’i ’ia ha’api’i mai, e nāhea ’ia ’āmui tano mai i roto i te ’ohipara’a a te hō’ē piha ha’api’ira’a a te ’Ēkālesia. ’Ei hi’ora’a, e hina’aro paha rātou ’ia ha’api’i mai nō ni’a i te ravera’a i tō rātou taime, te fa’a’itera’a, te fa’aturara’a ia vetahi ’ē, ’e tē vai atu ra. E hāmani te tahi mau ’orometua ha’api’i i te mau tāpura fa’ata’ara’a ’ohipa nā te tamari’i tāta’itahi nō te ’āmui mai i roto i te piha ha’api’ira’a ma te hō’ē ravera’a ta’a ’ē (mai te paraura’a i te hō’ē pure, te tāpe’ara’a i te hō’ē hōho’a, ’aore rā, te ’ōperera’a i te mau ’api parau). E nehenehe te fa’ata’ara’a ’ohipa e tāui i te hepetoma tāta’itahi. E tauturu te reira i te mau tamari’i ’ia rave i tō rātou taime ’e ’ia rōtahi i ni’a i te peu tano nō te piha ha’api’ira’a.

Pinepine te mau tamari’i—te mau tamari’i ’āpī a’e iho ā rā—i te fana’o i te hō’ē peu tāmau ’ite-ātea-hia. Nō te poto o te taime ’ana’anataera’a o te mau tamari’i ’āpī a’e, ’e i te tahi taime, e iti roa tō rātou rōtahira’a nō te tā’āto’ara’a o te ha’api’ira’a, e mea maita’i a’e i roto i teie peu tāmau ’ia taui-pinepine-hia te huru ’ohipara’a i te tahi huru ’ohipara’a. ’Ei hi’ora’a, e nehenehe e tu’u i roto i te peu tāmau o tā ’outou piha te tahi mau taime fa’afa’aeara’a nō te pēni i te hō’ē hōho’a, hīmene i te hō’ē hīmene, ’e tē vai atu ra.