E hōho’a nō te ha’api’ira’a

I roto i teie rāve’a tauturu, e ’ite mai ’outou i te hōho’a i muri nei i roto e toru tuha’a tei tāpitihia i roto i te arata’ira’a ato’a : Tītau i te mana’o, ha’api’i i te ha’api’ira’a tumu, ’e fa’aitoito i te ’apora’a mai i te fare. I roto e rave rahi huru, ’a ha’api’i ai ’outou, e nehenehe te mau tuha’a o teie hōho’a e ’āno’ihia ’aore rā e tupu nā roto i te tahi atu ’ana’ira’a ’ē. ’Ei hi’ora’a, e feruri ē te fa’a’itera’a ’o te hō’ē ïa rāve’a nō te ha’api’i i te ha’api’ira’a tumu, ’e i roto i te ha’api’ira’a tumu e tītauhia te anira’a ’ia fa’a’ite mai. ’Oia ato’a, e nehenehe te fa’aitoitora’a i te ’apora’a mai i te fare e tupu i te roara’a o te hō’ē tāu’ara’a parau i roto i te piha ha’api’ira’a. ’A fa’ati’a i teie mau fa’atanora’a o teie hōho’a ’ia tupu noa, mai te pe’era’a i te mau muhumuhu a te Vārua nō te pāhono i te mau hina’aro o te mau tamari’i tā ’outou e ha’api’i ra.

Tītau i te mana’o

’Ei tuha’a nō te piha ha’api’ira’a tāta’itahi, e ani i te mau tamari’i ’ia fa’a’ite mai i tō rātou mau mana’o, mau hi’ora’a, ’e mau ’itera’a nō ni’a i te mau parau tumu tā ’outou e ha’api’i ra. I roto i tā rātou mau parau, tē vai ra te mau ’itera’a tā rātou i ’apo mai i te fare. E nehenehe ato’a ’outou e hi’o fa’ahou mai i te mau mea tā rātou i ’apo mai i te hepetoma i ma’iri, ’e e ui e mea nāhea te reira i te fa’aurura’a i tō rātou orara’a.

Ha’api’i i te ha’api’ira’a tumu

E nehenehe te Mai, pe’e mai—nō te ta’ata hō’ē ’e te ’utuāfare e tauturu ia ’outou ’ia hāro’aro’a maita’i a’e i te ha’api’ira’a tumu tā ’outou e ha’api’i i te mau tamari’i. ’A feruri e aha te mau ’īrava pāpa’ira’a mo’a, te mau fa’ahitira’a parau, te mau ’itera’a, te mau uira’a ’e te tahi atu mau rāve’a tauturu, e ti’a ia ’outou ’ia fa’a’ite, nō te tauturu i te mau tamari’i ’ia ’apo mai, ’e ’ia ha’a i ni’a i te mau parau tumu o te ’evanelia tā rātou i ’apo mai. ’A tauturu ia rātou ’ia ’ite i te fa’aurura’a a te Vārua Maita’i ’a fa’a’ite pāpū ai ’Oia nō ni’a i te parau mau. ’A ’imi i te mau rāve’a hāmani ’e te fa’auru nō te tauturu ia rātou ’ia ’ana’anatae i te mau mea tā rātou e ’apo mai nei.

Nō te mau mana’o nō te fa’a’ohipara’a i te pehe nō te ha’api’i i te ha’api’ira’a tumu, ’a hi’o i te mau tuha’a « Fa’a’ohipa i te pehe nō te ha’api’i i te ha’api’ira’a tumu » ’e « Tauturu i te mau tamari’i ’ia ha’api’i ’e ’ia ha’amana’o i te mau hīmene Paraimere ’e te mau hīmene purera’a » i roto i te « Mau arata’ira’a nō te taime hīmenera’a ’e te fa’anahora’a hīmene a te tamari’i nō te ’ōro’a mo’a » i ni’a i te tua o te ’api hōpe’a o teie nei buka.

Fa’aitoito i te ha’api’ira’a i te fare

Nō te mea ’o te ’utuāfare te pū nō te ’apora’a mai i te ’evanelia, hō’ē o tā ’outou mau ’ōpuara’a ’ei ’orometua ha’api’i nō te Paraimere ’o te fa’aitoitora’a ïa i te ’apora’a mai i te fare. Nāhea ’outou i te tauturu i te mau tamari’i ’ia fa’a’ite i tō rātou ’utuāfare i te mau mea tā rātou i ’apo mai i roto i te piha ha’api’ira’a ? Nāhea ’oe i te fa’aitoito i te mau tamari’i ’e tō rātou ’utuāfare ’ia tāmau noa i te ha’api’i mai, i roto i te Faufa’a Tahito i te fare ?

Nō te mau mana’o nō te fa’a’ohipara’a i te pehe nō te ha’api’i i te ha’api’ira’a tumu, ’a hi’o i te mau tuha’a « Fa’a’ohipa i te pehe nō te ha’api’i i te ha’api’ira’a tumu » ’e « Tauturu i te mau tamari’i ’ia ha’api’i ’e ’ia ha’amana’o i te mau hīmene Paraimere ’e te mau hīmene purera’a » i roto i te « Mau arata’ira’a nō te taime hīmenera’a ’e te fa’anahora’a hīmene a te tamari’i nō te ’ōro’a mo’a » i ni’a i te tua o te ’api hōpe’a o teie nei buka.