O le faaaliga a Liae o le laau o le ola

Miti a Liae, saunia e Steven Lloyd Neal

13–19 Ianuari

1 Nifae 8–10 

“O Mai ma Aai i le Fua”

A o lei faitauina manatu o i lenei otootoga, faitau le 1 Nifae 8–10 ma mafaufau e uiga i luitau ma avanoa o feagai ma tagata o e aoaoina atu. Tusi faamaumau ou lagona uunai pe o a mataupu faavae mai nei mataupu e tatau ona e taulai i ai i le vasega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E tele faatatauga o le faaaliga a Liae mo o tatou taimi. I le amataga o le vasega, atonu e te manao e valaaulia tagata o le vasega e faasoa mai o latou malamalamaaga a o latou faitau e uiga i lenei faaaliga. Fautuaina i latou e faasoa mai fuaiupu patino ma faauigaga latou te mauaina mo o latou olaga.

aikona aoao atu

Aoao Atu le Aoaoga Faavae

1 Nifae 8:10–16

Pe a tatou iloaina le alofa o le Atua, tatou te mananao e fesoasoani i isi ia latou iloaina foi.

• O se mea masani le faasoa o mea tatou te fiafia i ai i tagata tatou te alolofa i ai, ae o nisi taimi e faigata ia i tatou ona faasoa atu le talalelei. E mafai ona fesoasoani se talanoaga e uiga i le faaaliga a Liae i tagata o le vasega ia maua avanoa e faasoa atu ai le talalelei. E mafai ona e tuu atu i se tagata o le vasega se fasi fualaau aina ma fai atu ia te ia e tauanau isi tagata uma o le vasega e taumamafa e le aunoa i lea fualaau aina. E tutusa faapefea lenei lesona faatino i le aafiaga o Liae i le 1 Nifae 8:10–16? O le a se mea ua tatou aoao mai le aafiaga o Liae o le a fesoasoani ia i tatou a o tatou faasoa atu le talalelei? E avea o se vaega o le talanoaga, atonu e te manao e faasoa atu le vitio “Good Things to Share” (ChurchofJesusChrist.org).

• Na aoao mai e Elder David A. Bednar, “O le fua i luga o le laau o se faatusa o faamanuiaga o le Togiola” (“Miti a Liae: Piimau Pea i le Ai Uamea,” Ensign po o le Liahona, Oke. 2011, 34). Mafaufau e faafesootai vave ni nai tagata o le vasega ma fai i ai e toe manatunatu i le 1 Nifae 8:11–16 ma mafaufau e uiga i fesili e pei o nei: E faapefea ona ou faamatalaina le suamalie ua aumaia e le Togiola a Iesu Keriso i lo’u olaga? O faapefea ona ou talotalo atu i isi ia tofo i lona suamalie? (tagai i le fuaiupu e 15). Na faapefea ona valaaulia au e isi e saili i faamanuiaga o le Togiola a le Faaola? O le a le mea ua musuia au e fai a o ou faitauina le 1 Nifae 8:11–16? Valaaulia nei tagata e faasoa mai a latou tali i le taimi o le vasega, ma valaaulia isi tagata uma o le vasega e faamatala atu o latou malamalamaaga i le taimi o le talanoaga.

O le faaaliga a Liae o le laau o le ola

MinervaK. Teichert (1888–1976), O Le Fale o le Lalolagi, 1945, suauu i luga o le laupapa, 36 x 48 inisi. Falemataaga mo Faatufugaga a le Iunvesite a Polika Iaga

1 Nifae 8:19–38

O le afioga a le Atua e taitai atu ai i tatou i le Faaola ma fesoasoani ia i tatou ia lagonaina Lona alofa.

• O se tasi auala e amata ai se talanoaga e uiga i le faaaliga a Liae o le valaaulia lea o tagata o le vasega e tusi se faatusa o le faaaliga i luga o le laupapa, e faaaoga ai le 1 Nifae 8:19–38 o se taiala. Pe e mafai foi ona e faaalia le ata o le faaaliga a Liae mai le otootoga o le vaiaso lenei i le Sau, Mulimuli Mai ia te A’u—Mo Tagata Taitoatasi ma Aiga. Ona mafai lea ona e valaaulia tagata taitasi o le vasega e sue ia fuaiupu o loo aumai ai se faamatalaga o se tasi o faatusa i le atatusi po o le ata—o loo mafai ona maua nei faamatalaga i le 1 Nifae 11:4–25, 35–36; 12:16–18; ma le 15:21–33, 36. A o faasoa mai e tagata o le vasega mea sa latou maua, valaaulia i latou e talanoaina mea ua aoao mai e nei faatusa ia i tatou. Mo se faataitaiga, o le a se mea ua aoao mai ia i tatou e le fale ateatea e uiga i le faamaualuga? O le a se mea ua aoao mai e se ai uamea ia i tatou e uiga i le afioga a le Atua? E mafai foi ona latou talanoa e uiga i le ala na fesoasoani ai le faaaliga a Liae ia i latou e o mai ia Keriso. O faapefea ona tatou vaai ia i tatou lava i le faaaliga?

• O se savali iloga e tasi i le faaaliga a Liae o le taua o le afioga a le Atua, ua faatusa i le ai uamea. Ina ia fesoasoani e faamamafa atu lena savali, e mafai ona e vaevaeina le vasega i ni vaega se fa ma tofi vaega taitasi e aoao e uiga i vaega e fa o tagata na vaai i ai Liae, pei ona faamatala mai i le “Punaoa Faaopoopo” ma i le 1 Nifae 8:21–23, 24–28, 30, ma le 31–33. Ona tuu lea i le vasega e fefaasoaai o le tasi i le isi mea na latou aoaoina. E mafai foi ona e tuuina atu ni nai minute i tagata o le vasega e mafaufau loloto ai i mea sa latou lagonaina le uunaiga e fai ia mautinoa ai o loo latou “pipiimau i le ai uamea” (1 Nifae 8:30).

1 Nifae 10:17–19

O le a faaalia e le Atua le upumoni ia i tatou pe afai tatou te sailia ma le filiga.

• O se puao o le pogisa tele e ufitia ai lo tatou ala ma leo faatauemu mai le fale tele ma le ateatea e mafai ona faigata ai ia i tatou ona maua le upumoni. O le faitau faatasi e uiga i le faataitaiga a Nifae o se tagata saili o le upumoni e mafai ona fesoasoani. E mafai ona e amataina le talanoaga i le fai atu i tagata o le vasega e faailoa mai nisi o savali fenumiai o loo auina mai e le lalolagi. Mo se faataitaiga, o a manatu faalelalolagi na lapataia ai i tatou e perofeta ma aposetolo i le konafesi faatoa tea atu nei? Mafaufau e fai se lisi i le laupapa o laasaga na faia e Nifae e maua ai lana ia lava molimau i le moni o le faaaliga a lona tama (tagai 1 Nifae 10:17–19; 11:1). E mafai faapefea ona tatou mulimuli i Lana faataitaiga a o tatou sailia le upumoni?

aikona o le aoaoina

Fautuaina le Aoaoina i le Aiga

Ina ia musuia tagata o le vasega e faitau le 1 Nifae 11--15, valaaulia i latou e sue po o le a le faia a nei ata ma le miti a Liae: o le tamameamea o Iesu, o se satauro, o le tina o fafine talitane, motu o tagata ua faapotopoto i le taua, ma tusi.

aikona o punaoa

Punaoa Faaopoopo

Vitio o le Tusi a Mamona

Mafaufau e faaali se vitio o loo faaalia ai mea na tutupu mai nei mataupu (tagai i le aofaga Vitio o le Tusi a Mamona i luga o le ChurchofJesusChrist.org po o le app o le Gospel Library).

O vaega e fa o tagata i le miti a Liae.

Vaega 1.“I le 1 Nifae 8:21--23 tatou te aoao ai e uiga i le vaega muamua o tagata o e sa fetaomi atu i luma ma amata i luga o le ala e tau atu i le laau o le ola. Peitai, a o fetaiai tagata ma le ao pogisa, lea e faatusa ‘i faaosoosoga a le tiapolo’ (1 Nifae 12:17), na le iloa lo latou ala, feseseai, ma ua leiloloa. Matau e le o ta’ua i nei fuaiupu le ai uamea. O i latou o e le amana’iaina pe vaai faatauvaa i le afioga a le Atua latou te le maua lena faasinoala paia lea e faasinoina atu le ala i le Faaola.”

Vaega 2.“I le 1 Nifae 8:24-28 tatou te faitau ai e uiga i le vaega lona lua o tagata o e sa maua le ala sao ma le vaapiapi e tau atu i le laau o le ola. Sa ‘fetaomi mai i luma lea vaega e ala atu i le puao o le pogisa, ma fepiiti i le āi u’amea, seia oo lava ina latou oo mai ma aai i le fua o le laau’ (fuaiupu 24). Peitai, a o tauemu mai i latou sa ofu lelei i le fale tele ma le ateatea i le vaega lona lua lea o tagata, ‘sa maasiasi i latou’ ma ‘sa latou pauu ese atu ai i ala faasaina ma ua leiloloa ai’ (fuaiupu 28). … E tusa lava pe na i ai le faatuatua, tautinoga, ma le afioga a le Atua, ae na iu lava ina le iloa le vaega lea—masalo ona sa na o sina taimi na faitau ai pe na suesue ai pe na sailiili ai i tusitusiga paia.”

Vaega 3.“I le fuaiupu 30 ua tatou faitau ai i se vaega lona tolu o tagata o e sa fetaomi mai i luma, ‘ma piimau pea i le āi uamea, seia oo ina latou o mai i luma ma faapauu i lalo ma aai i le fua o le laau.’ O le fasifuaitau autu i lenei fuaiupu o le piimau pea i le āi u’amea. O le vaega lona tolu sa fetaomi atu foi i luma ma le faatuatua ma le talitonuga mautu; peitai, e leai se mea o ta’u mai ai faapea sa latou se ese, pauu i ala faasaina, pe sa leiloloa ai. Atonu o lenei vaega lona tolu o tagata sa faitau pea lava e le aunoa ma suesue ma sailiili i tusitusiga paia. … O le vaega lea e tatau ona e taumafai ma ou taumafai e auai.”

Vaega 4.“O se vaega lona fa sa lei saili atu i le laau, nai lo lena sa latou mananao i le fale tele ma le ateatea e avea ma o latou taunuuga faaiu (tagai 1 Nifae 8:31–33).”

(David A. Bednar, “Miti a Liae: Piimau Pea i le Ai Uamea,” Ensign po o le Liahona, Oke. 2011, 34–36.)

Faaleleia o Lo Tatou Aoao Atu

Faaali atu le talitonuga mautinoa e ala i faamoemoega maualuluga. O nisi tagata aoao e le talitonu mautinoa i lo latou tomai e aoao ai le talalelei e i latou lava. Folafola atu i tagata o le vasega a latou taumafai e aoao i latou lava, o le a faiaoga le Agaga Paia ia i latou. Atonu e te manao e fautua atu ni auala e fesoasoani ai ia i latou ia amatalia ai. (Tagai Aoao Atu i le Ala o le Faaola, 29–30.)