O le aiga o Liae o loo malaga i le toafa

Liae O Loo Faimalaga Latalata i le Sami Ulaula saunia e Gary Smith

6–12 Ianuari

1 Nifae 1–7

“Ou Te Alu ma Faia”

O lau tapenaga o se faiaoga o le Aoga Sa e amata i lau lava suesuega faaletagata ia o tusitusiga paia. Ia gauai atu ma tusifaamaumau ia uunaiga faaleagaga e te mauaina. . O le Sau, Mulimuli Mai ia te A’u—Mo Tagata Taitoatasi ma Aiga e mafai ona faaopoopo i au suesuega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O le toatele o tagata o lau vasega atonu ua masani i le 1 Nifae 1–7, ae o taimi taitasi tatou te faitau ai mau, e mafai ona tatou aoaoina upumoni e faatatau i o tatou tulaga o i ai nei. Ina ia amata lau talanoaga, atonu e mafai ona e fesili i tagata o le vasega po o a mea na latou aoaoina pe o faamanatu atu ai ia te i latou a o latou suesue i lenei vaiaso.

aikona aoao atu

Aoao Atu le Aoaoga Faavae

1 Nifae 1; 3–6

E taua tele tusitusiga paia.

• O le savali iloga e tasi i le Tusi a Mamona o le taua tele lea o le afioga a le Atua. E mafai ona avea lea o se savali lelei e faasoa atu a o amata e lau vasega ona suesue i le Tusi a Mamona. E mafai ona e amata i le fesili atu i tagata taitasi o le vasega e filifili se mataupu mai le 1 Nifae 1; 3–6 ma faitau faatopetope i ai, ma vaavaai mo auala na faamanuiaina tonu ai pe na auala mai ai faamanuiaga o tagata o le aiga o Liae. (E mafai ona aoga i tagata o le vasega le faia o lenei gaoioiga i ni vaega toalaiti.) Ona valaaulia lea o tamaiti aoga e faasoa atu ni mea latou te mauaina. O a mea ua aoaoina ai i tatou e nei tala e uiga i le taua o tusitusiga paia?

• O se tasi o a tatou sini o se faiaoga, o le fautuaina lea o tagata taitoatasi ma aiga e suesue le talalelei i fafo atu o le vasega. Atonu e mafai ona e valaaulia tagata o le vasega e suesue pe na faapefea e Liae ona suesue i papatusi apamemea (tagai 1 Nifae 5:10--19), ona mafai lea ona e fai atu ni fesili e pei o nei: O a ni uiga na faaalia e Liae e faatatau i tusitusiga paia? O le a se mea taua na e maua mai ai? E mafai foi e tagata o le vasega ona sailiili i le savali a Elder Richard G. Scott “O Le Mana o Tusitusiga Paia” (Ensign po o le Liahona, Nov. 2011, 6–8) pe faitau se vaega mai lenei savali i le “Punaoa Faaopoopo.” E mafai faapefea ona e faaaogaina aoaoga a Elder Scott a o tatou suesueina le Tusi a Mamona i lenei tausaga?

• I le avea ai ma se vasega, e mafai ona outou usuina se viiga e uiga i tusitusiga paia e pei o le “A Ou Su’esu’e i Mau Paia” (Viiga, nu. 174). E mafai foi ona e valaauliaina tagata o le vasega e faasoa mai pe na faapefea ona faamanuiaina o latou olaga ia latou suesuega faaletagata lava ia o tusitusiga paia. E mafai foi ona latou faasoa mai pe na faapefea ona musuia i latou e tusitusiga paia e “o mai i le … Atua … ma faasaoina ai” (1 Nifae 6:4).

1 Nifae 2:11–19; 3:28–31

E mafai ona maua a tatou lava molimau pe a tatou faamaluluina o tatou loto.

• Ua lauiloa Nifae i lona faatuatua mamana i le Alii, ae e mafai ona fesoasoani mo tagata o le vasega ia iloa e tatau ona ia galue ia maua lana molimau—e faapei ona faia e i tatou uma. Atonu e mafai e tagata o le vasega ona faailoa mai i le 1 Nifae 2:16–19 le mea na mafai ai e Nifae ona maua lana molimau. E mafai foi ona latou iloiloina ia fuaiupu 11–14 e matau ai pe aisea na lei maua ai e Lamana ma Lemuelu se molimau. Atonu o se taimi lelei lenei e valaaulia ai tagata o le vasega e faasoa mai le ala na latou maua ai a latou molimau.

• O nisi taimi tatou te mananao ai ia maua se aafiaga ofoofogia ina ia maua pe faamalolosia ai a tatou molimau. Ae sa fetaiai Lamana ma Lemuelu ma se agelu, ae sa foliga mai na itiiti lava se aafiaga o lo la’ua faatuatua. O le a se mea e mafai e tagata o le vasega ona aoao mai lenei aafiaga, o loo faamatala mai i le 1 Nifae 3:28–31, e uiga i mea e faamalolosia ai a tatou lava molimau? (tagai foi i le 1 Nifae 2:16). Mafaufau e faasoa atu le saunoaga a Peresitene Harold B. Lee i le “Punaoa Faaopoopo.” O a ni mea e mafai ona tatou faia e tausisia ai le malosi o a tatou molimau?

1 Nifae 3–4

O le a saunia e le Atua se ala mo i tatou e faia ai Lona finagalo.

• O le aafiaga o atalii o Liae i le 1 Nifae 3–4 atonu e foliga maoae, ae o le toatele o i tatou ua maua aafiaga sa tatou mulimuli ai i le finagalo o le Atua tusa lava pe sa foliga e faigata. A o faitauina e tagata o le vasega le 1 Nifae 3–4 i lenei vaiaso, o a upumoni sa latou maua na faamanatu atu ai ia te i latou i se aafiaga patino? Atonu e mafai ona e fesili atu i tagata o le vasega e faasoa mai fuaiupu o loo aoao mai ai nei upumoni, ma valaaulia i latou e faasoa mai o latou aafiaga. E faapefea ona fesoasoani nei upumoni ia i tatou pe afai o faamoemoe mai le Atua ia i tatou e faia se mea e foliga e faigata?

• E mafai ona e vaevaeina le vasega i ni vaega se tolu ma tofi atu i vaega taitasi e suesue se tasi o taumafaiga e aumai ia papatusi apamemea mai ia Lapana (tagai 1 Nifae 3:9–21; 1 Nifae 3:22–31; 4:1–4; ma le 1 Nifae 4:5–38). Ona mafai lea ona e valaaulia vaega taitasi e faasoa mai mea na aoao mai e nei taumafaiga taitasi e uiga i le faataunuuina o le finagalo o le Alii. E faapefea e nei faataitaiga ona aoga ia tatou lava taumafaiga e faia le finagalo o le Atua?

O Liae ma Sarai o loo faafeiloai atu ia Nifae ma ona uso

Sa Faatumulia Lo Latou Olioli, saunia e Walter Rane

aikona o le aoaoina

Fautuaina le Aoaoina i le Aiga

Ina ia uunaia tagata o le vasega e faitau le 1 Nifae 8–10, e mafai ona e faasoa atu le faamatalga lenei mai ia Peresitene Dieter F. Uchtdorf: “Faatasi ai ma le tele o malosiaga o loo taumafai e toso ese atu i tatou, e faapefea la ona tatou faatumauina ma le mausali la tatou vaaiga mamao i le fiafia mamalu na folafolaina mai i e faatuatua? Ou te talitonu e mafai ona maua le tali i se miti sa faia e se perofeta i le faitau afe o tausaga ua alu. O le igoa o le perofeta o Liae, ma o loo faamaumauina lana miti i le Tusi a Mamona taua ma ofoofogia” (“O Le Auuso e Toatolu,” Ensign po o le Liahona, Nov. 2017, 18–19).

aikona o punaoa

Punaoa Faaopoopo

Vitio o le Tusi a Mamona.

Sue vitio o loo faaalia ai tala mai le 1 Nifae 1–7 i le aofaga Vitio o le Tusi a Mamona i luga o le ChurchofJesusChrist.org po o le Gospel Library app.

Ua i ai i tusitusiga paia le mana faatauanau.

Na molimau mai Elder Richard G. Scott i le taua o tusitusiga paia:

“O tusitusiga paia e pei lava o ni tamai sulu e faamalamalama ai o tatou mafaufau ma saunia i tatou mo taitaiga ma musumusuga mai lugā. E mafai ona avea i latou ma ki e tatala ai ala i fesootaiga ma lo tatou Tama oi le Lagi ma Lona Alo Pele, o Iesu Keriso.

“O tusitusiga paia … e mafai ona avea ma ni uo faamaoni e le faatapulaaina i nofoaga poo taimi. E maua pea i latou pe a manaomia. O lo latou faaaogaaga ua aumai ai se faavae o upumoni ia e mafai ona fagua e le Agaga Paia. O le aoaoina, mafaufau loloto, sailiili, ma le taulotoina o mau ua faapei o se faatumuina o se kapeneta o faila i uo, tulaga faatauaina, ma upumoni ia e mafai ona tapa i ai i soo se taimi, i soo se mea i le lalolagi. …

“O le mafaufau loloto i se savali mai se mau e mafai ona avea ma se ki e tatala ai faaaliga ma taitaiga ma musumusuga a le Agaga Paia. E mafai e se mau ona faatoafilemuina se agaga le fiafia, tuu atu le filemu, faamoemoe, ma se toefuataiga o le talitonuina o tomai o se tasi e faatoilalo ai luitau o le olaga. Ua i ai ia i latou se mana malosi e faamalolo ai luitau faalelagona pe afai o i ai le faatuatua i le Faaola. E mafai ona faatelevaveina ai le faamalologa faaletino” (“O Le Mana o Tusitusiga Paia,” Ensign po o le Liahona, Nov. 2011, 6).

E tatau lava ona faafouina a tatou molimau i aso taitasi.

Na aoao mai e Peresitene Harold B. Lee, “O mea ua outou umia i le aso i le molimau o le a le faia mou i le aso a taeao sei vagana ua e faia i ai se mea” (Aoaoga a Peresitene o le Ekalesia: Harold B. Lee [2000], 43).

Faaleleia o Lo Tatou Aoao Atu

Faaaoga tala ma faataitaiga e aoao atu ai mataupu faavae o le talalelei. O le tele o upumoni faaleagaga i tusitusiga paia e aoao mai e ala i aafiaga po o tala o loo i ai. A o e sauniuni e aoao atu, mafaufau i ni ou aafiaga e mafai ona faaopoopo i se molimau lona lua i tala o i tusitusiga paia ma mataupu faavae o loo faapupula mai ai. (Tagai Aoao Atu i le Ala a le Faaola, 22.)