30 Tesema---6 Ianuari

Itulau Tomua o le Tusi a Mamona

“O Se Tasi Molimau ia Iesu Keriso”

Suesue le itulau autu o le Tusi a Mamona ma le faatomuaga; o molimau a Molimau e Toatolu, o Molimau e Toavalu, ma le Perofeta o Iosefa Samita; ma “Se Faamalamalamaga Puupuu e uiga i le Tusi a Mamona.” A o e faia, saili ia uunaiga mai le Agaga Paia e uiga i le ala e mafai ai ona e musuia lau vasega e amata se suesuega ‘anoa o le Tusi a Mamona.

Tusifaamaumau Ou Lagona Uunai

Valaaulia le Fefaasoaaiga

Ina ia amata, e mafai ona e valaaulia ni nai tagata e faasoa mai se mea sa latou aoaoina mai itulau tomua o le Tusi a Mamona sa faateleina ai la latou molimau i lenei tusi paia.

Aoao Atu le Aoaoga Faavae

Itulau autu o le Tusi a Mamona

E mafai e le Tusi a Mamona ona faamalosia lo tatou faatuatua ia Iesu Keriso.

• O le faitauina o le itulau autu o le Tusi a Mamona, na tusia e Moronae, e mafai ona saunia ai tagata o lau vasega e suesue le Tusi a Mamona i lenei tausaga. E mafai faapefea e savali o i le itulau autu ona faaleleia la latou suesuega? Atonu e mafai ona e tusia se fesili se tasi pe sili atu i luga o le laupapa---e pei o le Ua tatou maua i se a le Tusi a Mamona? po o le Ua ese faapefea le Tusi a Mamona mai isi tusi?---ma valaaulia tagata o le vasega e vaavaai mo tali a o iloiloina e le tagata lava ia pe i ni paga le itulau autu. Ona mafai lea ona latou faasoa mai lagona e oo atu ia i latou. E mafai foi ona e fautuaina tagata o le vasega e talanoaina a latou fuafuaga mo le suesueina o le Tusi a Mamona i lenei tausaga. Mo se faataitaiga, o a mea o le a latou sailia? O le a faapefea ona latou aoao mai le Agaga Paia a o latou suesue?

• O se tasi o faamoemoega aupito taua o le Tusi a Mamona o loo ta’ua i lona itulau autu: ia faatalitonuina “Iutaia ma Nuu Ese o Iesu o le Keriso.” E mafai ona e valaaulia tagata o le vasega e faasoa mai ni fuaitau mai le Tusi a Mamona na faamalolosia ai lo latou faatuatua ia Iesu Keriso (e mafai foi ona latou faitauina ni nai fuaitau o loo lisiina i le “Punaoa Faaopoopo”). E mafai e tagata o le vasega ona faitauina faatasi ma se tasi o nofo i ona talaane ma fefaasoaai pe na faapefea e le Tusi a Mamona ona tosinaina a la’ua molimau i le Faaola.

Faatomuaga i le Tusi a Mamona

E mafai e le Tusi a Mamona ona fesoasoani ia i tatou e “latalata atili ai i le Atua.”

• O le faatomuaga i le Tusi a Mamona o loo aumai ai faamatalaga e taua mo le aufaitau e malamalama ai . E mafai ona faamanuiaina tagata o lau vasega mai le faitau faatopetope i le faatomuaga ma faailoa mai ni itu se tolu pe lima foi o le a fesoasoani e faasoa atu i se tasi o loo faitauina le Tusi a Mamona mo le uluai taimi. Ona mafai lea e tagata o le vasega ona faasoa mai mea latou te maua. Atonu foi latou te mananao e faatino i taga le folasia atu o le Tusi a Mamona i se tasi. O vitio o loo fautuaina mai i le “Punaoa Faaopoopo” e mafai foi ona fesoasoani.

• Atonu ua i ai ni aafiaga na faamautu ai le moni o upu a Iosefa: “E sili ona latalata atili atu o le tagata i le Atua i lona ola ai i mataupu [o le Tusi a Mamona], nai lo se isi lava tusi.” E mafai foi ona e fesili atu i tagata o le vasega e faasoa mai pe faapefea e le ola ai i upumoni ua latou aoaoina i le Tusi a Mamona ona fesoasoani ia i latou e latalata atili atu ai i le Atua. E mafai foi ona e valaaulia tagata o le vasega e faasoa mai a latou tali i nei fesili e tolu na fautuaina mai e Peresitene Russell M. Nelson: “Muamua, faamata e faapei lou olaga e aunoa ma le Tusi a Mamona? Lua, o le a se mea o le a e le iloaina? Ma le tolu, o le a se mea o le a e le mauaina?” (“O Le Tusi a Mamona: Faamata e Faapei Lou Olaga e aunoa ma Ia?” Ensign po o le Liahona, Nov. 2017, 61).

• Pe na i ai se tasi i lau vasega na faitauina ia fuaitau o le Tusi a Mamona o loo i ai igoa eseese mo le ata o le faaolataga, e pei ona fautuaina ai i le Sau, Mulimuli Mai ia te Au—Mo Tagata Taitoatasi ma Aiga? Afai o lea, valaaulia i latou e faasoa mai mea sa latou aoaoina.

“O Le Molimau a Molimau e Toatolu”; “O Le Molimau a Molimau e Toavalu”

E mafai ona avea i tatou uma ma molimau o le Tusi a Mamona.

• O le suesueina o molimau a Molimau e Toatolu ma le Toavalu e mafai ona faamalolosia ai molimau a tagata o lau vasega ma fesoasoani ai ia te i latou e mafaufau loloto pe mafai faapefea ona latou faasoa mai a latou lava molimau. E mafai ona e fai i le afa o le vasega e faitau le “O Le Molimau a Molimau e Toatolu” ae faitau e le isi afa le “O Le Molimau a Molimau e Toavalu” ma faasoa mai o latou lagona uunai po o faamatalaga e tulaga ese mai ia i latou. E faapefea ona eseese ia molimau e lua? E faapefea ona tutusa ia molimau? O a ni mea tatou te aoaoina mai i nei molimau e uiga i le faasoa atu o a tatou molimau? Ina ia amata le talatalanoaga e uiga i le mafuaaga e taua ai Molimau e Toatolu, e mafai ona e faasoa atu le saunoaga a Peresitene Dallin H. Oaks po o le molimau a Ioane Uitimera i le “Punaoa Faaopoopo,” pe e mafai foi ona e faaali atu le vitio “O Le Molimau a Molimau e Toatolu” (LDs.org).

Na tuuina atu e Molimau e Toatolu le molimau i le Tusi a Mamona.

“O Le Molimau a le Perofeta o Iosefa Samita”

O Iosefa Samita o se meafaigaluega i aao o le Atua e faataunuuina le Tusi a Mamona.

• Atonu ua masani ia tagata o le vasega i mea na tutupu o loo faamatalaina i le “O Le Molimau a le Perofeta o Iosefa Samita,” ae atonu e mafai ona e fesoasoani ia i latou e saili ni malamalamaaga fou. Mo se faataitaiga, e mafai ona e valaaulia i latou e lisi mai mea autu na tutupu o i le tala a Iosefa Samita. O le a se tatou faaiuga mai lona aafiaga e uiga i le taua na tuuina e le Alii i le Tusi a Mamona?

• O le viiga “Se Agelu mai Luga ” (Viiga, nu. 8) o loo ta’u mai ai le oo mai o le Tusi a Mamona. A uma ona usuina pe faalogologo i lenei viiga, e mafai e tagata o le vasega ona sue ia faamatalaga o i le “O Le Molimau a le Perofeta o Iosefa Samita” e fetaui pe lagolago ai fasifuaitau o i le pese.

Fautuaina le Aoaoina i le Aiga

Ina ia musuia tagata o le vasega e faitau le 1 Nifae 1–7, valaaulia i latou e vaavaai mo manatu po o ni upumoni e fesoasoani ai ia te i latou i le tulaga o i ai nei o latou soifuaga---mo se faataitaiga, o se luitau faaleaiga po o se valaauga i le Ekalesia.

Punaoa Faaopoopo

O fuaitau o le Tusi a Mamona o loo molimau ia Iesu Keriso.

• Mosaea 3:5–8

• Alema 5:48; 7:10–13

• Helamana 5:12

• 3 Nifae 9:13–18; 11:6–14

• Moronae 10:32–33

Vitio e uiga i le Tusi a Mamona i luga o le ChurchofJesusChrist.org.

• “Faatomuaga o le Tusi a Mamona”

• “O le a le Tusi a Mamona? O se Vaaiga Aoao e 60-Sekone”

• “O Se Tala o le Tusi a Mamona”

Mo nisi faaopoopoga, tagai i le aofaga o Vitio o le Tusi a Mamona i luga o le ChurchofJesusChrist.org po o le app o le Gospel Library.

O le taua o Molimau e Toatolu

Sa faamalamalama mai e Peresitene Dallin H. Oaks le mafuaaga e matuai malosi ai le molimau a Molimau e Toatolu.

“O le molimau a Molimau e Toatolu o le Tusi a Mamona ua tulai mai i le malosi maoae lava. Na tofu maua taitoatasi e le toatolu se mafuaaga ma se avanoa tele e tauseseina ai lana molimau pe ana faapea e sese, pe faalualuagia ia faamatalaga pe a na i ai se mea e le sa’o. E pei ona lausilafia, ona o feeseeseaiga po o le lotovale na aofia ai isi taitai o le Ekalesia, o nei molimau uma e toatolu na tapeina o latou igoa mai Le Ekalesia a Iesu Keriso o le Au Paia o Aso e Gata Ai e tusa lea o le valu tausaga talu ona faasalalauina la latou molimau. Na taitasi le tagata o le toatolu lenei ma alu i lona lava ala, ma le leai o se manatu e tasi e lagolago se taumafaiga taupulepule e faaleaga. Ae i le iuga o o latou soifua---o vaitau mai le 12 i le 50 tausaga ina ua mavae le tapeina o latou igoa mai le ekalesia---e leai se tasi o nei molimau na faatuiese mai lana molimau na faasalalauina, pe fai atu se mea e faapuaoa ai lona moni” (O Le Molimau: Matini Harisi,” Ensign, Me 1999,  36).

O Le Molimau a Ioane Uitimera.

O Ioane Uitimera o se tasi o Molimau e Toavalu o le Tusi a Mamona, ma sa tautino mai: “Ou te lei faalogo lava i se tasi o molimau e toatolu po o le toavalu o faafitia le molimau sa o latou tuuina atu. … Ua oo atu o matou igoa i atunuu uma, o gagana ma tagata e fai ma faaaliga paia mai le Atua. Ma o le a faataunuuina ai mamanu a le Atua e tusa ai ma le tautinoga o loo i ai i totonu” (i le Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).

Faaleleia o Lo Tatou Aoao Atu

Sailia au lava musumusuga. Nai lo le vaai i nei otootoga faapea o ni faatonuga e tatau ona e mulimuli ai, faaaoga e maua mai ai ni manatu e faamatua’ia ai au lava musumusuga a o e mafaufau loloto i manaoga o i latou o loo e aoaoina.