E Sili Atu le Suamalie i Lo Fua Suamalie Uma, saunia e Miguel Ángel González Romero

20--26 Ianuari

1 Nifae 11–15

“Faaauupegaina i le Amiotonu ma le Mana o le Atua”

Amata lau tapenapenaga e aoao atu i le faitauina o le 1 Nifae 11–15. Tusi faamaumau ou mafaufauga ma uunaiga e uiga i fuaitau ma mataupu faavae o le a e fautuaina tagata o le vasega e talanoaina. E mafai ona fesoasoani manatu nei.

Tusi Faamaumau Ou Lagona Uunai

Valaaulia le Fefaasoaai

O nei mataupu o loo i ai mataupu faavae atonu e mananao tagata o le vasega e mafaufau i ai a o latou faasoa atu le talalelei i isi. Fuafua e tusi ia fesili pei o nei i le laupapa ma valaaulia tagata o le vasega e faasoa mai ni mea na latou mauaina ia latou faitauga i lenei vaiaso e mafai ona fesoasoani e tali ai fesili nei:

• O le a le Liliuese ma le Toefuataiga?

• Aisea na tatau ai ona i ai le Tusi a Mamona?

• E mafai faapefea ona ou iloa upumoni a le Atua mo a’u lava ia?

Aoao Atu le Aoaoga Faavae

1 Nifae 11:1–5, 13--33

Na auina mai e le Atua ia Iesu Keriso o se faailoaga o Lona alofa.

• Sa faaali atu e se agelu ia Nifae ia faatusa ma mea na tutupu mai le soifuaga o le Faaola o loo faaalia ai le alofa o le Atua. E mafai ona e iloa e fesoasoani tele le iloiloina e le vasega o nei faatusa ma mea na tutupu ma talanoaina pe na faapefea ona latou faaalia le alofa o le Atua mo i tatou. Pe o i ai ni ata, vitio, po o isi fesoasoani vaaia e mafai ona e faaali atu o loo faaalia ai nisi o mea na tutupu i fuaiupu nei? (tagai, mo se faataitaiga, biblevideos.ChurchofJesusChrist.org). O faapefea ona fesoasoani le soifuaga o le Faaola ma le Togiola ia te oe ia malamalama ai i le alofa o le Atua mo oe?

1 Nifae 12–15

O le a fesoasoani le Atua ia i tatou e tetee atu i aafiaga a Satani.

• Atonu e i ai nisi taimi e lagona ai e tagata o lau vasega faapei o tagata i le faaaliga a Nifae, o e sa se i le puao o le pogisa pe sa feagai ma tauemuga a i latou sa i le fale tele ateatea. E mafai ona e fesili i le vasega pe aisea ua avea ai ia puao o le pogisa ma faatusa lelei mo faaosoosoga (tagai 1 Nifae 12:17) ma pe aisea ua avea ai le fale tele ateatea ma faatusa lelei mo manatunatuga faivavale ma le faamaualuga o le lalolagi (tagai 1 Nifae 12:18). Ona mafai lea ona e vaevaeina le mataupu 12–15 i tagata o le vasega ma valaaulia i latou e saili mo fuaiupu o loo aoao mai ai pe faapefea ona fesoasoani mai le Atua ia i tatou e faatoilalo ia faaosoosoga, faasausili, ma le faamaualuga (tagai, mo se faataitaiga, 1 Nifae 13:34–40; 14:14).

• E mafai faapefea ona e fesoasoani i tagata o lau vasega ia malamalama atili i le mana e sau mai le afioga a le Atua? (tagai 1 Nifae 15:24). E mafai ona e valaaulia i latou e talanoaina fesili e pei o nei: O le a se mea na aoao e Nifae e uiga i le mana o le afioga a le Atua? E faapefea ona taumafai Satani e faavaivaia le afioga a le Atua? (tagai 1 Nifae 13:26–29). O le a le mea na fai e le Alii ma Ana perofeta e faasaoina ai Ana afioga? E avea o se vaega o la outou talanoaga, e mafai ona e fai atu i ni nai tagata o le vasega e faasoa mai pe o faapefea ona latou suesueina ia tusitusiga paia ma pe o le a se mea o loo latou faia ia avea ai le afioga a le Atua o se vaega o o latou olaga i aso taitasi.

1 Nifae 13

Na saunia e le Alii le ala mo le Toefuataiga o Lana Ekalesia.

• Atonu o le a fesoasoani i tagata o le vasega se faasologa o taimi e malamalama ai i le faaaliga a Nifae o mea e tutupu i le Toefuataiga. E mafai ona e valaaulia tagata o le vasega e fatufatu se faasologa o taimi i luga o le laupapa, ma mea tutupu latou te maua o faamatala mai i le 1 Nifae 13. O le fea o nei mea ua uma ona tupu? O le fea o tutupu i le taimi nei? Mafaufau e faasoa atu le saunoaga o i le “Punaoa Faaopoopo” a Siaosi Uosigitone, le uluai peresitene o le Iunaite Setete, o loo faaalia ai na ia faailoa aloaia le aafiaga a le Atua i le Taua na Faaeaina ai Amerika, o se mea na tupu na saunia ai le ala mo le Toefuataiga.

• E faapefea ona faaaoga e tagata o le vasega le 1 Nifae 13 e faamalamalama ai i se tasi o se isi faatuatuaga le alagatatau ona i ai o le Toefuataiga? (mo se faataitaiga, tagai 1 Nifae 13:26–29, 35–42). O a isi mau e mafai ona faaaoga e tagata o le vasega e fesoasoani ai i isi ia malamalama i le mafuaaga na tatau ai ona i ai le Toefuataiga? (mo nisi faataitaiga, tagai i le Topical Guide, “Restoration of the Gospel”). E mafai ona aoga i tagata o le vasega le faatino i taga le ala o le a latou faamalamalama atu ai i se tasi le manaomia o le Toefuataiga ma pe ua faapefea ona faamanuiaina ai i latou.

1 Nifae 13:20–41

O loo aoao mai e le Tusi a Mamona upumoni faigofie ma taua.

• E mafai ona fesoasoani le faaaogaina o le 1 Nifae 13:20–41 e amata ai se talanoaga e uiga i le mafuaaga tatou te manaomia ai le Tusi a Mamona. E mafai e tagata o le vasega ona lisi mai ni nai mea “faigofie ma taua” sa leiloloa mai le Tusi Paia ma ua toefuatai mai e ala i le Tusi a Mamona (mo ni nai faataitaiga, tagai fuaiupu 26 ma le 39 po o lisi i le “Punaoa Faaopoopo”). Atonu foi e te manao e valaaulia tagata o le vasega e faasoa mai pe faapefea e nei “mea faigofie ma taua” ua toefuatai mai ona fesoasoani ia i latou e latalata atili ai i le Atua.

  

  E mafai ona fesoasoani le Agaga ia tatou iloaina “mea faigofie ma taua” mo i tatou lava.

• Fuafua e faaali le vitio “O le Tusi a Mamona—o se Tusi mai le Atua” (ChurchofJesusChrist.org), ma valaaulia tagata o le vasega e faasoa mai mea o loo aoao mai i lenei vitio e uiga i le mafuaaga tatou te manaomia ai le Tusi a Mamona. Pe e mafai foi ona e valaaulia se tagata o le vasega e tusi i luga o le laupapa le ata o loo faamatala mai i le saunoaga a Elder Tad R. Callister i le “Punaoa Faaopoopo.” Ona mafai lea e tagata o le vasega ona faasoa mai pe na faapefea ona fesoasoani le Tusi a Mamona ia i latou e malamalama atili ai i le talalelei a Iesu Keriso.

Fautuaina le Aoaoina i le Aiga

Ina ia fautuaina tagata o le vasega e faitau le 1 Nifae 16–22 i le vaiaso a sau, e mafai ona e ta’ua faapea o loo aofia ai se tala e mafai ona musuia ma fesoasoani ia i latou pe a manaomia i latou e faia se mea e foliga mai e le mafai ona fai.

Punaoa Faaopoopo

Vitio o le Tusi a Mamona.

Sue vitio o loo faaalia ai mea o tutupu i le 1 Nifae 11-15 i le aofaga Vitio o le Tusi a Mamona i luga o le ChurchofJesusChrist.org po o le app o le Gospel Library.

O le aao o le Atua i le Taua e Faaeaina ai Amerika.

Na saunoa Siaosi Uosigitone: “Ai lava se matuai leaga o le tagata e mafai ona mafaufau i mea na tutupu i le Taua o le Faaeaina o Amerika e aunoa ma se lagonaina o le lotofaafetai faamaoni aiai i le Tufuga sili o le Atulaulau sa matuai faaalia soo lana aafiaga faalelagi e puipuia ai i tatou” (Letter to Samuel Langdon, Sept. 28, 1789, founders.archives.gov/documents/Washington/05-04-02-0070).

O lisi o le Tusi a Mamona a Peresitene Russell M. Nelson.

Mai le “O Le Tusi a Mamona: Faamata e Faape’i Lou Olaga e aunoa ma Ia?” (Ensign po o le Liahona, Nov. 2017, 60–63).

O Le Tusi a Mamona ua faamaoniaina le sese o manatu e faapea:

• Na muta faaaliga i le Tusi Paia.

• E manaomia ona papatisoina tamaiti laiti.

• E mafai ona maua le fiafia i le amioleaga.

• Ua lava le lelei o tagata taitasi mo le faaeaga (e manaomia sauniga ma feagaiga).

• O le Pa’ū o Atamu ua leaga ai tagata uma i le “uluai agasala.”

Ua faamanino e le Tusi a Mamona malamalamaaga e uiga i:

• I lo tatou muai olaga.

• Oti. O se vaega taua o le fuafuaga sili o le fiafia a le Atua.

• O le olaga pe a oo mai le oti, lea e amata i le parataiso.

• Pe faapefea e le toetu o le tino, toe tuufaatasia ma lona agaga, ona avea ma agaga ola pea.

• Pe faapefea e lo tatou faamasinoga e le Alii e tusa i a tatou galuega ma manaoga o o tatou loto.

• Pe faapefea ona faatinoina ma le tatau sauniga: mo se faataitaiga, papatisoga, faamanatuga, faaeega o le Agaga Paia.

• O Le Togiola a Iesu Keriso.

• O Le Toetu.

• O le matafaioi taua a agelu.

• O le natura faavavau o le perisitua.

• Pe faapefea ona faaaafia atili amioga faaletagata soifua e le mana o le upu nai lo le malosi o le pelu.

Tatou te manaomia le Tusi a Mamona.

Na aoao mai e Elder Tad R. Callister:

“O le Tusi Paia o se tasi lea o molimau ia Iesu Keriso; o le Tusi a Mamona o le isi lea. Aisea e matuai taua ai lenei molimau lona lua? Atonu o le a fesoasoani le faataitaiga vaaia lenei: E fia ni laina sasao e mafai ona e tusia e ui atu i se vaega se tasi i luga o se fasipepa? O le tali e le mafaitaulia. A faapea la mo se taimi, o lena vaega e tasi ua faatusa i le Tusi Paia, ma o le faitau selau o na laina sasao e tusia e ui atu i lena vaega e faatusa i faauigaga eseese o le Tusi Paia, ma o na faauigaga taitasi e faatusa i ekalesia eseese.

“Ae peitai, o le a se mea e tupu, pe afai e i ai se vaega lona lua i luga o lena fasipepa, e faatusa i le Tusi a Mamona? E fia ni laina sasao e mafai ona e tusia i le va o nei vaega e lua: le Tusi Paia ma le Tusi a Mamona? E na o le tasi lava. E na o le tasi le faauigaga o aoaoga faavae a Keriso e mafai ona i ai ona o le mau a nei molimau e lua” (“O le Tusi a Mamona—o se Tusi Mai le Atua,” Ensign po o le Liahona, Nov. 2011, 75).

Faaleleia o Lo Tatou Aoao Atu

Taitaia ni talanoaga musuia. E tofu tagata uma ma se mea e saofaga ai i talanoaga a le vasega, ae o nisi taimi e le maua uma e tagata le avanoa. Vaavaai ni auala e faateleina ai avanoa o tagata o le vasega e faasoa mai ai a latou molimau. (Tagai Aoao Atu i le Ala a le Faaola, 33.)