O Liae o loo vaavaai atu i le Liahona

O Liae ma le Liahona, saunia e Joseph Brickey

27 Ianuari–2 Fepuari

1 Nifae 16--22

“O Le a Ou Saunia Le Ala i o Outou Luma”

A o e faitauina le 1 Nifae 16–22, mafaufau pe mafai faapefea ona fesoasoani le faataitaiga a Nifae i le feagai ai ma luitau i tagata o lau vasega.

Tusi faamaumau Ou Lagona Uunai

aikona fefaasoaai

Valaaulia le Fefaasoaai

Na vaai Nifae i le taua o le faatatau o tusitusiga paia ia te ia lava ma lona nuu (tagai 1 Nifae 19:23). Mafaufau e valaaulia tagata o le vasega e faasoa mai mataupu faavae sa latou aoaoina mai le tala i le malaga a Nifae i le nuu folafolaina lea e fesootai ma o latou lava olaga.

aikona aoao atu

Aoao atu le Aoaoga Faavae

1 Nifae 16:10–16, 23–31; 18:10–13, 20–22

E faaaoga e le Atua mea faatauvaa e faataunuu ai mea ofoofogia.

• Pe mafai e oe po o se tasi i lau vasega ona mafaufau i se mea itiiti e mafai ona faaaogaina e faataunuu ai se mea tele? (tagai 1 Nifae 16:29). E mafai ona e valaaulia tagata o le vasega e talanoaina mea ua latou aoaoina e uiga i lenei mataupu faavae pe a uma ona faitauina e tagata taitasi po o vaega nei mau: 1 Nifae 16:25–31; Alema 37:3–8; ma le Mataupu Faavae ma Feagaiga 64:33; 123:12–17. Na faapefea ona faaaoga e le Atua mea laiti e faataunuu ai mea tetele i o tatou olaga?

• E mafai ona aoga i lau vasega le talanoaina o le auala o loo taitaia ai e le Tama Faalelagi o tatou ala. Ina ia amatalia, e mafai ona e fai i le vasega e talanoaina ia mataupu faavae na mafai ai ona galue le Liahona (tagai 1 Nifae 16:10–16, 23–31; 18:10–13, 20–22; tagai foi Alema 37:38–47). E mafai faapefea ona mafaufauina nei mataupu faavae o “ni mea iti”? E mafai e tagata o le vasega ona lisi i le laupapa mea na aumaia e le Atua e taiala ai i tatou (tagai “Punaoa Faaopoopo” mo ni manatu). O a ni nai taga iti e mafai ona tatou faia e maua ai le taitaiga a le Atua?

O Liae o loo faaaogaina le Liahona

“Afai Ua Saunia Outou, o le a Outou Le Matata’u ai Lava,” saunia e Kelley Price

1 Nifae 16:18–32; 17:7–16; 18:1–4

Pe a tatou tausia poloaiga, o le a fesoasoani le Atua ia i tatou e faafetaia’ia luitau.

• Atonu o feagai tagata o lau vasega ma ni galuega ma ni luitau e foliga mai e le mafai ona fai. E mafai faapefea ona e faaaogaina le aafiaga o Nifae i ana lava galuega sa matuai foliga mai e le mafai---o le fafagaina o lona aiga i le vao ma le fauina o se vaa---e fesoasoani ai ia i latou? Atonu e mafai e tagata o le vasega ona faitau le 1 Nifae 16:18–32; 17:7–16; ma le 18:1–4, ma vaavaai mo mataupu faavae e mafai ona fesoasoani ia i latou, pe a latou feagai ma se faigata ogaoga (mo se faataitaiga, 1 Nifae 16:24–26 ua aoao mai o le tatalo ma le lotomaualalo e mafai ai ona tatou maua musumusuga ma taitaiga mai le Atua). E mafai ona e amata i le tuuina atu ia i latou o se faataitaiga o se mataupu faavae na e mauaina i nei fuaiupu. A o latou faasoa mai mea sa latou maua, e mafai foi ona latou faasoa maia ni aafiaga patino e fesootai i ai.

1 Nifae 16:18–32; 17:7–22

O le faatuatua e taitai atu ai i le faatinoga.

• O aafiaga o Liae ma lona aiga i le vao ua faapupula mai ai le mana o le faatuatua ma taunuuga o le le talitonu. Ina ia fesoasoani i tagata o le vasega ia maua nei upumoni, e mafai ona e tusia nei fesili i le laupapa: Na faapefea ona faatino e Nifae lona faatuatua? Na faapefea ona faamanuiaina o ia e avea o se taunuuga? O a taunuuga o le le talitonu o Lamana ma Lemuelu? Valaaulia tagata o le vasega e saili o se vaega ia tali i nei fesili i le 1 Nifae 16:18–32 po o le 17:7–22 ma faasoa mai mea latou te maua.

1 Nifae 19:22–24

E mafai ona tatou faatatau tusitusiga paia ia i latou lava.

• Ina ia fesoasoani i tagata o le vasega e aoao pe faapefea ona faatatau tusitusiga paia ia i latou lava, e mafai ona latou faitauina faataitaiga o le ala na faia ai e Nifae. Mo se faataitaiga, i le 1 Nifae 4:1–3 ma le 17:23–32, 41–45, o a mataupu faavae na aoao atu e Nifae e ala i le faatatau o tusitusiga paia i le tulaga o lona aiga? O le tala na faamatala e Elder Robert D. Hales i le “Punaoa Faaopoopo” o loo faapupula mai ai le ala e mafai ai ona faamanuiaina i tatou ona o le faatatau o tusitusiga paia ia i tatou lava. Mafaufau e valaaulia tagata o lau vasega e faailoa mai luitau o latou feagai po o feagai ma tagata o o latou aiga, ona sue lea o tala faatusi paia e mafai ona latou maua ai ni malamalamaaga ma fesoasoani ai i na tulaga. E tusa ai ma le 1 Nifae 19:22–24, e mafai faapefea ona faamanuiaina i tatou ona o le faatatauina o tusitusiga paia ia i tatou lava?

• O le talanoaina o le 1 Nifae 19:22–24 e mafai ona avea o se avanoa sili mo tagata o le vasega e faasoa mai ai pe o faapefea ona latou “faatatauina tusitusiga paia” ia i latou lava ma o latou aiga, faapea foi faamanuiaga ua latou maua ona o le faia. Mafaufau e lisi i luga o le laupapa ia manatu o tagata o le vasega e uiga i le ala e faatatau ai tusitusiga paia ia i latou lava (mo nisi fautuaga, tagai i le lisi o i le “Punaoa Faaopoopo”). I se vasega i le lumanai, e mafai ona e valaaulia tagata o le vasega e faasoa mai aafiaga ina ua latou faaaogaina manatu o i le lisi.

1 Nifae 20--21

O le a faapotopotoina e le Alii le aiga o Isaraelu i aso e gata ai.

• Ina ia fautuaina tagata o le vasega e faasoa mai aoaoga anoa latou te maua i le 1 Nifae 20–21, fuafua e tusi faaulutala faapea i luga o le laupapa: Fanauga a Isaraelu, Aiga o Liae, ma le Tagata i o Tatou Aso. Tuu atu ia i latou se taimi e iloilo ai le 1 Nifae 20--21 ma lisi i lalo o ulutala taitasi pe na faapefea ona faatatau ia valoaga a Isaia i nei vaega.

aikona aoaoina

Fautuaina le Aoaoina i le Aiga

Ina ia musuia tagata o le vasega e faitau le 2 Nifae 1–5, valaaulia i latou e mafaufau e uiga i mea o le a latou ta’u atu i o latou aiga pe afai e utiuti lo latou taimi i le lalolagi. Faasino i ai o nai mataupu muamua o le 2 Nifae o loo i ai le savali faaiu na tuu atu e Liae i lona aiga.

aikona o punaoa

Punaoa Faaopoopo

Vitio o le Tusi a Mamona

Sue vitio o loo faaalia ai mea o tutupu i le 1 Nifae 16-22 i le aofaga Vitio o le Tusi a Mamona i luga o le ChurchofJesusChrist.org po o le Gospel Library app.

O a tatou “Liahona.”

Na aoao mai Elder David A. Bednar: “E patino ona galue le Agaga Paia i o tatou olaga e faapei foi ona faia e le Liahona mo Liae ma lona aiga, e tusa ai ma lo tatou faatuatua ma le filiga ma le usiusitai” (“Ina ia Tatou Maua Pea Lona Agaga e Faatasi ma i Tatou,” Ensign po o le Liahona, Me 2006, 31).

I le konafesi aoao ia Oketopa 2005, sa saunoa ai Elder Lowell M. Snow o le Fitugafulu: “O le konafesi aoao tonu lenei o se Liahona i ona po nei, o se taimi ma se nofoaga e maua ai le taitaiga musuia ma faatonuga e faamanuiaina ai i tatou” (“Tapasa a le Alii,” Ensign po o le Liahona, Nov. 2005, 97).

Na aoao mai Peresitene Thomas S. Monson: “O le Alii lava lea e tasi na tuuina atu se Liahona mo Liae ua tuuina mai mo oe ma au i aso nei se meaalofa taua tele ma le mauagata e aumai ai le taitaiga i o tatou olaga. … O le meaalofa lea ou te faasino i ai ua ta’ua o se faamanuiaga faapeteriaka” (Thomas S. Monson, “Your Patriarchal Blessing: A Liahona of Light,” Ensign, Nov. 1986, 65).

Faatatauina o tusitusiga paia ia i tatou lava

Ua aoao mai Elder Robert D. Hales:

“I le tele o tausaga ua mavae, sa ou aoaoina ai lo ma atalii laitiiti e uiga i le olaga ma aafiaga o le uso o Iareto. E ui ina sa manaia lava le tala, ae sa lei uai mai o ia. Ona ou fesili lea po o le a le uiga o le tala ia te ia lava ia. E aoga tele pe a tatou fesili ia tatou fanau, “O le a sona uiga ia te oe?” Na ia fai mai, ‘E te iloa oe, e leai a se eseesega mai le mea na faia e Iosefa Samita i le vao ina ua ia tatalo ma maua ai se tali.’

“Sa ou fai atu ‘Ua talitutusa lava lou matua ma le matua o Iosefa. Pe e te manatu o le a fesoasoani se tatalo faapea ia te oe?’ Na faafuasei, sa ma lei toe talanoa e uiga i se tala ua leva i se nuu mamao lava. Sa matou talanoa e uiga i lo ma atalii---e uiga i lona olaga, o ona manaoga, ma le ala e mafai ai ona fesoasoani le tatalo ia te ia.

“I le avea ai o ni matua, ua ia te i tatou le tiutetauave e fesoasoani ai ia tatou fanau e “faatatau i tusitusiga paia uma [ioe, vaega uma o le talalelei a Iesu Keriso] ia i tatou [ma i a tatou fanau], … mo [le] manuia ma le aoaoina [o o tatou aiga]’” (“Ma le Alofa Mutimutivale o se Matua Agamalu: O Se Savali o le Faamoemoe i Aiga,” Ensign po o le Liahona, Me 2004, 90).

Fautuaga mo le faatatauina i tusitusiga paia.

• Mafaufau e uiga i mea na tutupu poo tulaga i o tatou aso e faapei o na o loo ta’ua i tusitusiga paia o loo e faitauina.

• Vaavaai mo mea ua iloa e tagata, aoaoina, pe faia i tusitusiga paia ia e mafai ona fesoasoani ia te oe i se faafitauli po o fesili o i ai i le taimi nei.

• Faailoa mai mataupu faavae mai lena tala e mafai ona fesoasoani ia te oe i ou lava tulaga.