Atamu ma Eva ua tuua le Faatoaga o Etena

Atamu ma Eva, saunia e Douglas Fryer

3--9 Fepuari

2 Nifae 1--5

“Na Matou Ola e tusa ma le Ala o le Fiafia”

Amata au tapenapenaga faaleagaga i le faitauina o le 2 Nifae 1–5 ma tusifaamaumau ou lagona uunai. E tele atu mataupu faavae i nei mataupu nai lo le taimi e talanoaina ai i se vasega e tasi, o le mea lea ia mulimuli i le Agaga i au tapenaga ma gauai atu i malamalamaaga e faasoa mai e tagata o le vasega e fesoasoani ia te oe e fuafua ai pe o a mataupu faavae e taulai i ai ma pe faapefea ona taiala le talatalanoaga.

Tusi faamaumau Ou Lagona Uunai

aikona fefaasoaai

Valaaulia le Fefaasoaai

E foliga mai ua maka e tagata o lau vasega pe ua fai ni tusigamanatu e uiga i se fuaiupu e tasi i le 2 Nifae 1--5. Ina ia amatalia le vasega, e mafai ona e valaaulia tagata o le vasega e faasoa mai fuaiupu sa anoa ia i latou. Valaaulia le vasega e aotele mai se mataupu faaleaoaoga faavae ua latou aoao mai i fuaiupu na faasoa mai.

aikona aoao atu

Aoao atu le Aoaoga Faavae

2 Nifae 2:11--30

Ua tatou saoloto e galulue ai mo i tatou lava.

• Ua tele naua taimi, e faaaoga ai e tagata lo latou faitalia ua fai ma mafuaaga o mafatiaga i isi. Aisea la e matua taua ai le faitalia i le Tama Faalelagi? Atonu e mafai ona e tusia le fesili lenei i le laupapa, ma e mafai e tagata o le vasega ona sailia ia tali i le 2 Niae 2:11--30 ma tusi a latou tali i le laupapa. O faapefea ona taumafai le fili e aveesea lo tatou faitalia? E faapefea ona fesoasoani le Faaola ia i tatou e “filifili le saolotoga ma le ola e faavavau”? (2 Nifae 2:27). Mafaufau e usu faatasi se viiga e uiga i le faitalia, e pei o le “Know This, That Every Soul Is Free” (Viiga, nu. 240), ma valaaulia tagata o le vasega e faaopoopo i a latou lisi isi malamalamaaga ua latou maua mai le viiga.

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo faailoa mai ai tulaga taua e fa ua mafai ai ona i ai le faitalia. O se tasi lenei o auala e mafai ai ona e atiina ae i luga o mea atonu ua aoaoina e tagata o le vasega i le fale: Tusi tulaga ia e fa i luga o le laupapa. Ona valaaulia lea o tagata o le vasega e faasoa mai faamatalaga mai le 2 Nifae 2 o loo aoao mai ai le mafuaaga e taua ai nei tulaga e ausia ai lo tatou gafatia faalelagi.

2 Nifae 2:15–29

O le Pau ma le Togiola a Iesu Keriso o ni vaega taua o le fuafuaga a le Tama Faalelagi.

• E toatele Kerisiano e talitonu faapea o le Pau o se mala ma na faia e Eva se mea sese matautia. O nei fuaiupu i le 2 Nifae 2 ua faamanino mai ai upumoni e uiga i le Pau o Atamu ma Eva, ma ua latou molimau mai ai ua togiolaina i tatou e Iesu Keriso mai le Pau. O se tasi auala e talanoaina ai nei manatu o le valaaulia lea o tagata o le vasega e sailiili le 2 Nifae 2:15--25 ma faia se lisi o upumoni latou te aoaoina e uiga i le mea na tupu i le Faatoaga o Etena. O a isi malamalamaaga latou te maua i le saunoaga a Peresitene Dallin H. Oaks i le “Punaoa Faaopoopo”? Na faapefea ona laveaiina i tatou e Iesu Keriso mai le Pau? (tagai 2 Nifae 2:6–8, 26–29).

• A uma ona fai se gaoioiga e pei o lea na mavae atu, e mafai ona e faaalia ni fesili e pei o lenei ma valaaulia tagata o le vasega e faasoa mai o latou malamalamaaga.

  • E faapefea e aoaoga a Nifae i nei fuaiupu ona faasao ai nisi o le le malamalama masani e uiga i le Pau?

  • O faapefea ona avea le Pau ma se faamanuiaga?

  • E fesoasoani faapefea ia i tatou le malamalama sao i le Pau e malamalama atili ai i lo tatou manaomia o le Togiola a Iesu Keriso?

  • O le a le mafuaaga e tasi e te faafetai ai i le filifiliga a Atamu ma Eva i le Faatoaga o Etena?

  • E faapefea ona tutusa lau filifiliga e sau i le lalolagi i le filifiliga a Atamu ma Eva e aai i le fua o le laau e iloa ai le lelei ma le leaga?

  • O le a le faamoemoega o le olaga? Aisea na manaomia ai le Pa’u e ausia ai lea faamoemoega?

2 Nifae 4:15–35

E mafai ona liliu atu i le Atua i o tatou vaivaiga.

• O tusitusiga a Nifae i le 2 Nifae 4:15--35 e mafai ona aumaia ia i tatou le faamoemoe ma le mafanafana pe a tatou lagonaina le lofituina ia tatou tauiviga ma vaivaiga. Atonu e mafai e tagata o le vasega ona iloilo nei fuaiupu i paga ma sue fuaitau e mafai ona latou faaaogaina e faamafanafana ai se tasi e lagonaina le mamafatu ona o ona mafatiaga. Ona mafai lea e paga taitasi ona faasoa mai nei fuaitau i le vasega. Atonu e mafai e se tasi o le vasega ona faamatala mai se aafiaga sa ia maua ai le mafanafana i le liliu atu i le Atua, e pei ona sa faia e Nifae.

• O se tasi auala e iloilo ai le 2 Nifae 4 o le vave valaaulia lea o ni nai tagata o le vasega e o mai sauniuni e faasoa mai ni fuaiupu mai le mataupu lenei sa taua tele ia i latou. Fai i ai e faasoa mai mea latou te faia pe a lagonaina le lofituina i o latou vaivaiga. O se viiga e uiga i le faamafanafana ma le faamoemoe, e pei o le “O Fea Ou te Maua ai le Filemu?” (Viiga, nu. 129), e mafai ona faaopoopo i lenei talanoaga. Mo se faataitaiga, e mafai e tagata o le vasega ona faasoa mai le auala o loo lagolago ai e le viiga le faataitaiga a Nifae o le faalagolago i le Alii i taimi o le lotovaivai.

2 Nifae 5

E maua le fiafia i le ola ai i le talalelei.

• E ui i luitau na feagai ma Nifae ma lona nuu, sa mafai ona latou atiina ae se sosaiete e faavae i luga o mataupu faavae ia e tau atu ai i le fiafia. O a mataupu faavae na maua e tagata o le vasega ia latou suesuega o le 2 Nifae 5 ia na saofaga i le fiafia na oo i ai Nifae? E mafai ona e tuuina atu se fasipepa i tagata o le vasega ma valaaulia i latou e sailiili le 2 Nifae 5 mo mataupu faavae e taitai atu ai i le fiafia ma tusia i lalo. E ese faapefea auala o loo sailia ai e le lalolagi le fiafia mai mea ua tatou maua i le 2 Nifae 5? O a ni sini e mafai e tagata o le vasega ona faatutu e faaaoga ai se tasi o nei mataupu faavae?

aikona aoaoina

Fautuaina le Aoaoina i le Aiga

Tau i tagata o le vasega e faapea o le 2 Nifae 6--10 o loo i ai se tasi o lauga aupito sili e uiga i le Togiola a Iesu Keriso i tusitusiga paia uma. E mafai foi ona e faasoa atu se fuaiupu e te mauaina i nei mataupu e faaosofia ai lou fiafia e faitauina.

aikona o punaoa

Punaoa Faaopoopo

O Le Pa’u o se vaega o le fuafuaga a le Atua.

Na aoao mai Peresitene Dallin H. Oaks:

“Ina ua maua e Atamu ma Eva le uluai poloaiga, sa i ai i laua i se tulaga faalefesuiaiga, ua le o toe i ai i le lalolagi o agaga ae ua i ai tino faitino ae e lei mafai ona oo i ai le oti ma e lei mafai foi ona foafoaina le ola. Sa lei mafai ona la faataunuuina le uluai poloaiga a le Tama e aunoa ma le solia o le papupuni i le va o le olioli i le Faatoaga o Etena ma tofotofoga matautia ma avanoa ofoofogia o le olaga faitino. …

“… Sa faamalamalama mai e le Perofeta o Liae e faapea ‘Ana le solitulafono Atamu e le pau o ia’ (2 Ni. 2:22), ae semanu e tumau pea o ia i le tulaga lava e tasi lea na foafoaina ai o ia.

“… Sa fuafuaina le Pa’u, ua faaiu e Liae, aua ‘ua faia mea uma e tusa ma le poto o ia o le ua silafia mea uma’ (2 Ni. 2:24).

“O Eva na muamua solia tapulaa o Etena ina ia mafai ona amatalia tuutuuga o le olaga faitino. O lana gaoioiga, po o le a lava lona natura, sa o se solitulafono i lea taimi, ae o le faavavau o se mea alagatatau matagofie e tatala ai le faitotoa e agai atu i le ola faavavau. Sa faaalia e Atamu lona atamai e ala i le faia o lea mea e tasi. Ma o lea la, ‘Na pa’ū Atamu ma Eva ina ia i ai le tagata’ (2 Ni. 2:25).

“Ua tausalaina e nisi o tagata Kerisiano ia Eva ona o lana gaoioiga lena, ma faaiuina ai e faapea, o lea mea ua sasi ai o ia ma ana tama teine. Ae le [o lagona na] o le Au Paia o Aso e Gata Ai! O le faailoaina mai e ala i faaaliga, tatou te patipatia ai le gaoioiga a Eva ma faamamalu ai lona poto ma le lototele i le vaega maoae ua taua o le Pa’u. …

“Ua faaali mai i faaaliga o ona po nei sa malamalama o tatou uluai matua i le tatau ai o le Pau. Na tautino mai e Atamu, ‘Ia viia lava le suafa o le Atua, aua ua pupula o’u mata ona o la’u solitulafono, ma o le a ou maua le olioli i le olaga nei, ma o le a ou toe vaai i le Atua i le tino’ (Mose 5:10)” (“O Le Fuafuaga Sili o le Fiafia,” Liahona, Nov. 1993, 72–73).

Faaleleia o Lo Tatou Aoao Atu

Aapa atu ia i latou e le o auai mai. O le aoao atu e sili i lo le na ona taitai o se talanoaga i le Aso Sa; e aofia ai le auaunaga faatasi ma le alofa ma faamanuiaina isi i le talalelei. Atonu e mafai ona e mafaufau i se tasi e le o auai mai ma avatu ia te ia se valaaulia patino e auai i se lesona o le a sosoo ai. (Tagai Aoao Atu i le Ala a le Faaola, 8–9.)