mga tawo nga nangaon sa bunga sa kahoy sa kinabuhi

Mas Tam-is Kay sa Tanang Katam-is, ni Miguel Ángel González Romero

Enero 20–26

1 Nephi 11–15

“Gisangkapan sa Katarung ug uban sa Gahum sa Dios”

Sugdi ang imong pagpangandam sa pagtudlo pinaagi sa pagbasa sa 1 Nephi 11–15. Irekord ang imong mga hunahuna ug mga impresyon mahitungod sa mga tudling ug mga baruganan nga imong i-awhag nga hisgutan sa mga sakop sa klase. Ang mga ideya sa ubos makatabang.

Irekord ang Imong mga Impresyon

pagpaambit nga icon

Dapita ang Pagpaambit

Kining mga kapitulo naglangkob sa mga baruganan nga tingali gustong ikonsiderar sa mga sakop sa klase samtang mopaambit sila sa ebanghelyo ngadto sa uban. Ikonsiderar ang pagsulat sa mga pangutana sama sa mosunod diha sa pisara ug dapita ang mga sakop sa klase nga ipaambit ang mga butang nga ilang nakit-an sa ilang pagbasa karong semanaha nga makatabang nga matubag kining mga pangutana:

• Unsa ang Apostasiya ug ang Pagpahiuli?

• Nganong ang Basahon ni Mormon gikinahanglan man?

• Unsaon nako pagkahibalo sa mga kamatuoran bahin sa Dios alang sa akong kaugalingon mismo?

pagtudlo nga icon

Itudlo ang Doktrina

1 Nephi 11:1–5, 13–33

Gipadala sa Dios si Jesukristo isip usa ka pagpahayag sa Iyang gugma.

• Usa ka anghel ang mipakita kang Nephi sa mga simbolo ug mga panghitabo gikan sa kinabuhi sa Manluluwas nga nagpakita sa gugma sa Dios. Mahimo nimong makita nga makatabang ang pagsusi niining mga simbolo ug mga panghitabo isip usa ka klase ug hisgutan kon giunsa niini pagpakita sa gugma sa Dios alang kanato. Aduna bay bisan unsa nga mga litrato, mga video, o uban pang mga visual aid nga imong mapakita nga naghulagway sa pipila ka panghitabo niini nga mga bersikulo? (tan-awa, pananglitan, sa biblevideos.ChurchofJesusChrist.org). Sa unsang paagi ang kinabuhi ug Pag-ula sa Manluluwas makatabang nga imong masabtan ang gugma sa Dios alang kanimo?

1 Nephi 12–15

Ang Dios motabang kanato sa pagbatok sa impluwensya ni Satanas.

• Ang mga sakop sa imong klase mahimong usahay mobati sama sa mga tawo diha sa panan-awon ni Nephi kinsa nangawala diha sa mga gabon sa kangitngit o nakasinati sa pagbiay-biay niadtong anaa sa dako ug lapad nga gambalay. Mahimo nimong pangutan-on ang klase nganong ang mga gabon sa kangitngit usa ka maayong simbolo alang sa tintasyon (tan-awa sa 1 Nephi 12:17) ug nganong ang dako ug lapad nga gambalay usa ka maayong simbolo alang sa kawang nga mga paghanduraw ug sa garbo sa kalibutan (tan-awa sa 1 Nephi 12:18). Mahimo dayon nimong bahinon ang mga kapitulo 12–15 sa mga sakop sa klase ug dapita sila sa pagsiksik sa mga bersikulo nga nagtudlo kon unsaon sa Dios pagtabang nato nga mabuntog ang tintasyon, kahilayan, ug garbo (tan-awa, pananglitan sa, 1 Nephi 13:34–40; 14:14).

• Unsaon nimo pagtabang ang mga sakop sa imong klase nga mas makasabut sa gahum nga magagikan sa pulong sa Dios? (tan-awa sa 1 Nephi 15:24). Mahimo nimo silang dapiton sa paghisgot sa mga pangutana sama sa mosunod: Unsa may nakat-unan ni Nephi mahitungod sa gahum sa pulong sa Dios? Giunsa man sa pagsulay ni Satanas sa pagtuis ang pulong sa Dios? (tan-awa sa 1 Nephi 13:26–29). Unsa ang gibuhat sa Ginoo ug sa Iyang mga propeta aron mapreserbar ang Iyang pulong? Isip kabahin sa inyong panaghisgutan, mahimo nimong hangyuon ang pipila ka sakop sa klase nga ipaambit kon giunsa nila pagtuon sa mga kasulatan ug unsay ilang gibuhat aron mahimong kabahin sa ilang inadlaw-adlaw nga pagpakabuhi ang pulong sa Dios.

1 Nephi 13

Nag-andam ang Ginoo og paagi alang sa Pagpahiuli sa Iyang Simbahan.

• Siguro ang usa ka han-ay sa panghitabo [time line] makatabang sa mga sakop sa klase nga makasabut sa panan-awon ni Nephi bahin sa mga panghitabo sa Pagpahiuli. Mahimo nimong dapiton ang mga sakop sa klase nga magbuhat og usa diha sa pisara, uban sa mga panghitabo nga ilang nakita nga gihulagway sa 1 Nephi 13. Hain niining mga panghitabo ang nahitabo na? Hain ang nangahitabo karon? Ikonsiderar ang pagpaambit sa kinutlo diha sa “Dugang nga mga Kapanguhaan” ni George Washington, unang presidente sa Estados Unidos, nga nagpakita nga iyang giila ang impluwensya sa Dios diha sa Rebolusyon sa Amerika, usa ka panghitabo nga miandam og paagi alang sa Pagpahiuli.

• Unsaon kaha sa mga sakop sa klase sa paggamit sa 1 Nephi 13 aron sa pagpasabut ngadto sa usa ka tawo nga sakop sa laing tinuohan kon nganong gikinahanglan ang Pagpahiuli? (pananglitan, tan-awa sa 1 Nephi 13:26–29, 35–42). Unsa nga ubang mga kasulatan ang magamit sa mga sakop sa klase aron makatabang sa uban nga masabtan nganong kinahanglan ang Pagpahiuli? (alang sa pipila ka mga sanglitanan, tan-awa sa Topical Guide, “Restoration of the Gospel”). Ang mga sakop sa klase mahimong makabenepisyo gikan sa pag-role-play kon unsaon nila sa pagpasabut ngadto sa usa ka tawo ang panginahanglan alang sa Pagpahiuli ug sa unsang paagi kini nakapanalangin kanila.

1 Nephi 13:20–41

Ang Basahon ni Mormon nagtudlo og yano ug bililhon nga mga kamatuoran.

• Mahimong makatabang ang paggamit sa 1 Nephi 13:20–41 sa pagsugod og panaghisgutan kon nganong gikinahanglan nato ang Basahon ni Mormon. Ang mga sakop sa klase mahimong molista og pipila ka “yano ug bililhon nga mga butang” nga nawala gikan sa Biblia ug gipahiuli pinaagi sa Basahon ni Mormon (alang sa pipila ka sanglitanan, tan-awa sa mga bersikulo 26 ug 39 o sa mga lista diha sa “Dugang nga mga Kapanguhaan”). Mahimo usab nimong dapiton ang mga sakop sa klase sa pagpaambit kon sa unsang paagi nga kining gipahiuli nga “yano ug bililhon nga mga butang” nakatabang kanila aron mas mahiduol ngadto sa Dios.

  usa ka pamilya nga nagbasa sa mga kasulatan

  Ang Espiritu makatabang kanato aron madiskubrihan ang “yano ug bililhon nga mga butang” alang sa atong kaugalingon.

• Ikonsiderar ang pagpasalida sa video nga “Ang Basahon ni Mormon—Basahon gikan sa Dios” (ChurchofJesusChrist.org), ug dapita ang mga sakop sa klase sa pagpaambit kon unsay gitudlo niini nga video kon nganong gikinahanglan nato ang Basahon ni Mormon. O mahimo nimong dapiton ang usa ka sakop sa klase sa pagdrowing diha sa pisara sa gihulagway sa kinutlo ni Elder Tad R. Callister diha sa “Dugang nga mga Kapanguhaan.” Mahimo dayon nga ipaambit sa mga sakop sa klase kon sa unsang paagi nga ang Basahon ni Mormon nakatabang kanila nga mas masabtan ang ebanghelyo ni Jesukristo.

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase nga mobasa sa 1 Nephi 16–22 atol sa umaabut nga semana, mahimo nimong hisgutan nga naglakip kini og usa ka istorya nga makapadasig ug makatabang kanila kon kinahanglan silang mobuhat og butang nga morag imposible.

mga kapanguhaan nga icon

Dugang nga mga Kapanguhaan

Mga Video bahin sa Basahon ni Mormon.

Pangita og mga video nga nagpakita sa mga istorya gikan sa 1 Nephi 11–15 diha sa Book of Mormon Videos collection sa ChurchofJesusChrist.org o sa Gospel Library app.

Kamot sa Dios diha sa Rebolusyon sa Amerika.

Si George Washington miingon: “Ang tawo sa pagkatinuod dautan gayud kinsa makatan-aw sa mga panghitabo sa Rebolusyon sa Amerika nga dili mobati og labing sinsero nga pasalamat ngadto sa bantugang Tigpasiugda sa Universo kansang balaanon nga mapanalipdong impluwensya kanunay gayud nga gipadayag alang kanato” (Sulat ngadto ni Samuel Langdon, Sept. 28, 1789, founders.archives.gov/documents/Washington/05-04-02-0070).

Mga lista ni Presidente Russell M. Nelson sa Basahon ni Mormon.

Gikan sa “Ang Basahon ni Mormon: Unsa kaha ang Imong Kinabuhi Kon wala Kini?” (Liahona, Nob. 2017, 60–63).

Ang Basahon ni Mormon misupak sa ideya nga:

• Ang pagpadayag natapos diha sa Biblia.

• Ang masuso nga mga bata kinahanglan nga mabunyagan.

• Ang kalipay mahimong makaplagan diha sa pagkadautan.

• Ang indibidwal nga kabuotan igo na alang sa kaluwasan (ang mga ordinansa ug mga pakigsaad gikinahanglan).

• Ang Pagkapukan ni Adan milama sa katawhan og “orihinal nga sala.”

Ang Basahon ni Mormon miklaro sa panabut mahitungod sa:

• Atong pagpakabuhi sa wala pa dinhi sa yuta.

• Kamatayon. Usa kini ka gikinahanglan nga bahin sa dakong plano sa Dios mahitungod sa kalipay.

• Pagpakabuhi human dinhi sa yuta, nga magsugod sa paraiso.

• Sa unsang paagi nga ang pagkabanhaw sa lawas, nga mahiusa sa espiritu niini, mahimong usa ka imortal nga kalag.

• Sa unsang paagi nga ang paghukom sa Ginoo kanato magdepende sa atong mga binuhatan ug mga tinguha sa atong kasingkasing.

• Sa unsang paagi nga ang mga ordinansa tukma nga mapahigayon: pananglitan, bunyag, sakramento, pagtugyan sa Espiritu Santo.

• Ang Pag-ula ni Jesukristo.

• Ang Pagkabanhaw.

• Ang importante nga tahas sa mga anghel.

• Ang mahangturong kinaiyahan sa pagkapari [priesthood].

• Sa unsang paagi nga ang kinaiya sa tawo mas maimpluwensyahan sa gahum sa pulong kay sa gahum sa espada.

Nagkinahanglan kita sa Basahon ni Mormon.

Si Elder Tad  R. Callister mitudlo:

“Ang Biblia usa ka saksi ni Jesukristo; ang Basahon ni Mormon lain nga saksi. Ngano nga ang ikaduhang saksi importante man kaayo? Ang mosunod nga paghulagway makatabang: Pila ka tul-id nga linya ang inyong madrowing sa usa ka tulbok diha sa papel? Ang tubag walay katapusan. Sa makadiyot, ibutang ta nga ang usa ka tulbok nagrepresentar sa Biblia ug ang gatusan ka tul-id nga linya nga madrowing agi niana nga tulbok nagrepresentar sa lain-laing paghubad sa Biblia ug ang kada hubad nagrepresentar og laing simbahan.

“Unsay mahitabo, kon nianang piraso sa papel adunay ikaduha nga tulbok nga nagrepresentar sa Basahon ni Mormon? Pila man ka tul-id nga linya ang inyong madibuho [drawing] tali niining duha ka mga tulbok: ang Biblia ug ang Basahon ni Mormon? Usa lang. Usa lang ka hubad sa mga doktrina ni Kristo ang makuha sa pagpamatuod niining duha ka mga saksi” (“Ang Basahon ni Mormon—Basahon gikan sa Dios,” Liahona, Nob. 2011, 75).

Pagpalambo sa Atong Pagtudlo

Pangulohi ang dinasig nga mga diskusyon. Ang tanan adunay ikatampo sa mga diskusyon sa klase, apan usahay dili tanan ang mahatagan og kahigayunan. Pangita og mga paagi nga madugangan ang mga oportunidad sa mga sakop sa klase sa pagpakigbahin sa ilang mga pagpamatuod. (Tan-awa sa Pagtudlo sumala sa Pamaagi sa Manluluwas, 33.)