Ang pamilya ni Lehi nagbiyahe sa disyerto

Si Lehi Nagbiyahe Duol sa Pulang Dagat, ni Gary Smith

Enero 6–12

1 Nephi 1–7

“Ako Moadto ug Mobuhat”

Ang imong pagpangandam isip usa ka magtutudlo sa Sunday School magsugod sa imong personal nga pagtuon sa mga kasulatan. Pagbantay ug irekord ang espirituhanong mga pag-aghat nga imong madawat. Ang Dali, Sunod Kanako—Alang sa mga Indibidwal ug mga Pamilya makatabang sa imong pagtuon.

Irekord ang Imong mga Impresyon

pagpaambit nga icon

Dapita ang Pagpaambit

Daghan sa mga sakop sa imong klase siguro pamilyar sa 1 Nephi 1–7, apan sa matag higayon nga mobasa kita sa mga kasulatan, makakat-on kita og mga kamatuoran nga magamit sa atong kasamtangang mga kahimtang. Sa pagsugod sa inyong panaghisgutan, tingali mahimo nimong pangutan-on ang mga sakop sa klase kon unsay ilang nakat-unan o gipahinumdom kanila samtang nagtuon sila karong semanaha.

pagtudlo nga icon

Itudlo ang Doktrina

1 Nephi 1; 3–6

Ang mga kasulatan adunay dakong bili.

• Usa ka dayag nga mensahe diha sa Basahon ni Mormon mao ang dakong bili sa pulong sa Dios. Mahimo kining usa ka maayong mensahe nga ipaambit samtang ang imong klase magsugod sa pagtuon sa Basahon ni Mormon. Mahimo nimong sugdan pinaagi sa paghangyo sa matag sakop sa klase sa pagpili og usa ka kapitulo gikan sa 1 Nephi 1; 3–6 ug sa pagbasa niini sa daklit, mangita og mga paagi nga ang pulong sa Dios nakapanalangin sa mga sakop sa pamilya ni Lehi sa direkta o sa dili direkta nga paagi. (Ang mga sakop sa klase mahimong makabenepisyo sa paghimo niining kalihokan diha sa ginagmay nga mga grupo.) Dayon dapita ang mga indibidwal sa pagpaambit sa unsay ilang makit-an. Unsay gitudlo niining mga istorya kanato mahitungod sa kaimportante sa mga kasulatan?

• Usa sa imong mga tumong isip magtutudlo mao ang pag-awhag sa mga indibidwal ug sa mga pamilya nga magtuon sa ebanghelyo sa gawas lang sa klase. Tingali mahimo nimong dapiton ang mga sakop sa klase sa pagsusi kon giunsa ni Lehi pagtuon ang mga palid nga tumbaga (tan-awa sa 1 Nephi 5:10–19), ug dayon mahimo nimong ipangutana ang sama sa mosunod: Unsa man ang kinaiya ni Lehi kalabut sa mga kasulatan? Unsay iyang nakit-an nga bililhon diha niini? Ang mga sakop sa klase mahimong mosusi usab sa mensahe ni Elder Richard G. Scott nga “Ang Gahum sa Kasulatan (Liahona, Nob. 2011, 6–8) o magbasa og kinutlo gikan niining mensahe diha sa “Dugang nga mga Kapanguhaan.” Unsaon kaha nato paggamit ang mga pagtulun-an ni Elder Scott samtang magtuon kita sa Basahon ni Mormon karong tuiga?

• Isip usa ka klase, mahimo ninyong kantahon ang usa ka himno mahitungod sa mga kasulatan. Mahimo dayon nimong dapiton ang mga sakop sa klase sa pagpaambit kon sa unsang paagi nga ang ilang personal nga pagtuon sa kasulatan nakapanalangin sa ilang kinabuhi. Mahimo usab nilang ipaambit kon sa unsang paagi nga ang mga kasulatan nakapadasig kanila sa “pagpaduol ngadto … sa Dios … ug maluwas” (1 Nephi 6:4).

1 Nephi 2:11–19; 3:28–31

Makabaton kita og atong kaugalingong mga pagpamatuod samtang atong usbon ang atong kinaiya aron makadawat og pagdasig ug paggiya.

• Nailhan si Nephi sa iyang gamhanang pagtuo diha sa Ginoo, apan mahimong makatabang nga makaamgo ang mga sakop sa klase nga kinahanglan niyang maningkamot aron makabaton sa iyang pagpamatuod—sama gayud kanatong tanan. Tingali ang mga sakop sa klase mahimo nga motino diha sa 1 Nephi 2:16–19 kon unsay nakapahimong posible nga nabatunan ni Nephi ang iyang pagsaksi. Mahimo usab nilang ribyuhon ang mga bersikulo 11–14 aron maobserbahan nganong si Laman ug si Lemuel wala makabaton og pagsaksi. Siguro usa kini ka maayong panahon sa pagdapit sa mga sakop sa klase sa pagpaambit kon giunsa nila pagkabaton ang ilang mga pagpamatuod.

• Usahay ganahan siguro kita nga adunay milagrusong kasinatian aron makabaton o mapalig-on ang atong mga pagpamatuod. Apan si Laman ug si Lemuel nakasugat og usa ka anghel, ug sa gihapon ang ilang pagtuo morag naapektuhan ra og gamay. Unsa ang makat-unan sa mga sakop sa klase gikan niining kasinatian, nga gihulagway diha sa 1 Nephi 3:28–31, mahitungod kon unsay makapalig-on sa kaugalingon natong mga pagpamatuod? (tan-awa usab sa 1 Nephi 2:16). Ikonsiderar ang pagpaambit sa kinutlo ni Presidente Harold B. Lee diha sa “Dugang nga mga Kapanguhaan.” Unsay atong mahimo aron magpabilin nga lig-on ang atong mga pagpamatuod?

1 Nephi 3–4

Ang Dios moandam og paagi aron atong mabuhat ang Iyang kabubut-on.

• Ang kasinatian sa mga anak nga lalaki ni Lehi diha sa 1 Nephi 3–4 tingali dili kasarangan, apan daghan kanato adunay mga kasinatian diin atong gisunod ang kabubut-on sa Dios bisan kon morag lisud kini. Samtang ang mga sakop sa klase magbasa sa 1 Nephi 3–4 karong semanaha, unsa nga mga kamatuoran ang ilang nakit-an nga nagpahinumdom kanila bahin sa usa ka personal nga kasinatian? Siguro mahimo nimong hangyuon ang mga sakop sa klase sa pagpaambit og mga bersikulo nga nagtudlo niining mga kamatuoran, ug dapita sila sa pagpaambit sa ilang mga kasinatian. Sa unsang paagi nga kining mga kamatuoran makatabang kanato kon kita gilauman sa Dios sa pagbuhat og butang nga morag lisud?

• Mahimo nimong bahinon ang klase ngadto sa tulo ka grupo ug sanguni ang matag grupo sa pagtuon sa usa sa mga pagsulay nga makuha ang tumbaga nga mga palid gikan ni Laban (tan-awa sa 1 Nephi 3:9–21; 1 Nephi 3:22–31; 4:1–4; ug 1 Nephi 4:5–38). Dayon mahimo nimong dapiton ang matag grupo sa pagpaambit kon unsay gitudlo kanato sa matag usa niining mga pagsulay mahitungod sa pagtuman sa kabubut-on sa Ginoo. Sa unsang paagi nga kining mga ehemplo magamit sa atong kaugalingong mga paningkamot sa pagbuhat sa kabubut-on sa Dios?

Si Lehi ug Sariah nga mitimbaya kang Nephi ug sa iyang mga igsoong lalaki

Ang Ilang Kalipay Napuno, ni Walter Rane

pagkat-on nga icon

Awhaga ang Pagkat-on diha sa Panimalay

Aron sa pagdasig sa mga sakop sa klase sa pagbasa sa 1 Nephi 8–10, mahimo nimong ipaambit kini nga pamahayag gikan ni Presidente Dieter F. Uchtdorf: “Uban sa daghang mga pwersa nga naningkamot sa pagbira kanato, unsaon nato nga ang atong mga tumong nakatutok sa mahimayaong kalipay nga gisaad ngadto sa matinud-anon? Nagtuo ko nga ang tubag makita diha sa usa ka damgo sa usa ka propeta liboan ka mga tuig na ang milabay. Ang pangalan sa propeta mao si Lehi, ug ang iyang damgo narekord diha sa bililhon ug talagsaon nga Basahon ni Mormon” (“Tulo ka Managsuong Babaye,” Liahona, Nob. 2017, 19).

mga kapanguhaan nga icon

Dugang nga mga Kapanguhaan

Mga video bahin sa Basahon ni Mormon.

Pangita og mga video nga nagpakita sa mga istorya gikan sa 1 Nephi 1–7 diha sa Book of Mormon Videos collection sa ChurchofJesusChrist.org o sa Gospel Library nga app.

Ang mga kasulatan adunay lig-ong gahum.

Si Elder Richard G. Scott mipamatuod bahin sa bili sa mga kasulatan:

“Ang mga kasulatan susama sa gagmayng kahayag nga modan-ag sa atong hunahuna ug mohatag og giya ug inspirasyon gikan sa kahitas-an. Mahimo kining yawe sa pag-abli sa dalan sa komunikasyon uban sa atong Amahan sa Langit ug sa Iyang Hinigugmang Anak, si Jesukristo.

“Ang mga kasulatan … [mahimong] matuod nga mga higala nga magamit bisan kanus-a o bisan asa. Anaa kini kanunay kon gikinahanglan. Ang paggamit niini nagsangkap og pundasyon sa kamatuoran nga ikapasabut pinaagi sa Espiritu Santo. Ang pagkat-on, pagpamalandong, pagsiksik, ug pagmemorya sa mga kasulatan sama ra sa pagdugang og mga higala, mga hiyas, ug mga kamatuoran nga masaligan bisan kanus-a, bisan asa sa kalibutan. …

“Ang pagpamalandong sa usa ka tudling sa kasulatan mahimong yawe nga makaabli sa pagpadayag ug giya ug inspirasyon sa Espiritu Santo. Ang kasulatan makahupay sa nahasol nga kalag, makahatag og kalinaw, paglaum, ug pagpahiuli sa pagsalig sa abilidad sa usa ka tawo sa pagbuntog sa mga hagit sa kinabuhi. Kini dunay kusog nga gahum nga moayo sa emosyonal nga mga hagit kon dunay hugot nga pagtuo sa Manluluwas. Makapadali kini sa pisikal nga pagkaayo” (“Ang Gahum sa Kasulatan,” Liahona, Nob. 2011, 6–7).

Ang atong mga pagpamatuod kinahanglang bag-uhon gayud kada adlaw.

Si Presidente Harold B. Lee nagtudlo, “Kanang inyong gihuptan karon nga pagpamatuod dili mainyo pagkaugma gawas kon kamo magbuhat sa butang mahitungod niini” (Mga Pagtulun-an sa mga Presidente sa Simbahan: Harold B. Lee [2000], 52).

Pagpalambo sa Atong Pagtudlo

Paggamit og mga istorya ug mga ehemplo sa pagtudlo sa mga baruganan sa ebanghelyo. Daghan sa mahangturong mga kamatuoran diha sa mga kasulatan gitudlo pinaagi sa mga kasinatian o mga istorya nga anaa niini. Samtang mangandam ka sa pagtudlo, hunahunaa ang imong mga kasinatian nga makadugang og ikaduhang pagsaksi ngadto sa mga istorya diha sa mga kasulatan ug sa mga baruganan nga gihulagway niini. (Tan-awa sa Pagtudlo sumala sa Pamaagi sa Manluluwas, 22.)