“Disyembre 30–Enero 5. Pasiuna nga mga pahina sa Basahon ni Mormon: ‘Lain nga Tugon ni Jesukristo,’” Dali, Sunod Kanako—Alang sa Sunday School: Basahon ni Mormon 2020 (2020)
“Disyembre 30–Enero 5. Pasiuna nga mga pahina sa Basahon ni Mormon,” Dali, Sunod Kanako—Alang sa Sunday School: 2020
Disyembre 30–Enero 5
Pasiuna nga mga pahina sa Basahon ni Mormon
“Lain nga Tugon ni Jesukristo”
Tun-i ang ulohan nga pahina ug pasiuna sa Basahon ni Mormon; ang mga pagpamatuod sa Tulo ka mga Saksi, sa Walo ka mga Saksi, ug ni Propeta Joseph Smith; ug ang “Mubo nga Pagpasabut mahitungod sa Basahon ni Mormon” Sa imong pagbuhat niini, tinguhaa ang mga pag-aghat gikan sa Espiritu Santo kon unsaon nimo pagdasig ang imong klase sa pagsugod og usa ka makahuluganong pagtuon sa Basahon ni Mormon.
Irekord ang Imong mga Impresyon
Dapita ang Pagpaambit
Sa pagsugod, mahimo nimong dapiton ang pipila ka tawo nga mopaambit og butang nga ilang nakat-unan gikan sa pasiuna nga mga pahina sa Basahon ni Mormon nga nakapalambo sa ilang pagpamatuod bahin niining sagrado nga basahon.
Itudlo ang Doktrina
Ulohan nga pahina sa Basahon ni Mormon
Ang Basahon ni Mormon makapalig-on sa atong pagtuo diha kang Jesukristo.
-
Ang pagbasa sa ulohan nga pahina sa Basahon ni Mormon, nga gisulat ni Moroni, makaandam sa mga sakop sa imong klase nga magtuon sa Basahon ni Mormon karong tuiga. Sa unsa kaha nga paagi nga ang mga mensahe diha sa ulohan nga pahina makapalambo sa ilang pagtuon? Mahimo nimong isulat ang usa o dugang pa nga mga pangutana diha sa pisara—sama sa Nganong aduna kitay Basahon ni Mormon? o Sa unsang paagi nga ang Basahon ni Mormon lahi kay sa ubang mga basahon?—ug dapita ang mga sakop sa klase sa pagpangita sa mga tubag samtang magribyu sila sa ulohan nga pahina nga magtagsa-tagsa o magpares. Mahimo dayon silang mopaambit sa mga impresyon nga miabut kanila. Mahimo usab nimong awhagon ang mga sakop sa klase sa paghisgot sa ilang mga plano alang sa pagtuon sa Basahon ni Mormon karong tuiga. Pananglitan, unsa may ilang pangitaon? Unsaon man nila sa pagkat-on gikan sa Espiritu Santo samtang magtuon sila?
-
Ang usa sa labing importante nga mga katuyoan sa Basahon ni Mormon gipahayag diha sa ulohan nga pahina niini: ang pagpamatuod “sa Judeo ug sa Hentil nga si Jesus mao ang Kristo.” Mahimo nimong dapiton ang mga sakop sa klase sa pagpaambit og mga tudling gikan sa Basahon ni Mormon nga nakapalig-on sa ilang pagtuo diha kang Jesukristo (mahimo usab silang mobasa og pipila ka tudling nga gilista diha sa “Dugang nga mga Kapanguhaan”). Ang mga sakop sa klase mahimong mobasa og pipila niining mga bersikulo kauban ang laing tawo nga naglingkod sa duol ug mopaambit kon sa unsang paagi nga ang Basahon ni Mormon nakaimpluwensya sa ilang pagpamatuod bahin sa Manluluwas.
Ang Basahon ni Mormon makatabang kanato nga “labi nga maduol sa Dios.”
-
Ang pasiuna sa Basahon ni Mormon naghatag og impormasyon nga importante nga masabtan sa mga magbabasa. Ang mga sakop sa imong klase mahimong makabenepisyo sa pagbasa og daklit sa pasiuna ug pagtino sa tulo ngadto sa lima ka punto nga mahimong makatabang nga ipaambit ngadto sa usa ka tawo nga nagbasa sa Basahon ni Mormon sa unang higayon. Ang mga sakop sa klase mahimo dayon nga mopaambit sa unsay ilang nakit-an. Mahimo pa gani nilang i-role-play ang pagpaila sa Basahon ni Mormon ngadto sa usa ka tawo. Ang mga video nga gisugyot diha sa “Dugang nga mga Kapanguhaan” mahimong makatabang usab.
-
Ang ubang mga sakop sa imong klase mahimong adunay mga kasinatian nga mikumpirmar sa kamatuoran sa mga pulong ni Joseph Smith: “Ang tawo labi nga maduol sa Dios pinaagi sa pagsunod sa mga lagda [sa Basahon ni Mormon], kay sa bisan hain nga basahon.” Mahimo nimong hangyuon ang mga sakop sa klase nga ipaambit kon sa unsang paagi nga ang pagsunod sa mga kamatuoran nga ilang nakat-unan diha sa Basahon ni Mormon nakatabang kanila nga mas maduol sa Dios. Mahimo usab nimong dapiton ang mga sakop sa klase nga ipaambit ang mga tubag niining tulo ka pangutana nga gisugyot ni Presidente Russell M. Nelson: “Una, unsa kaha ang inyong kinabuhi kon wala ang Basahon ni Mormon? Ikaduha, unsa kaha unta ang wala ninyo mahibaloi? Ug ikatulo, unsa kaha unta ang wala ninyo maangkon?” (“Ang Basahon ni Mormon: Unsa kaha ang Imong Kinabuhi Kon wala Kini?” ( Liahona, Nob. 2017, 61–62).
-
Aduna bay usa ka tawo diha sa imong klase nga nakabasa sa mga tudling sa Basahon ni Mormon nga naglangkob og lain-laing mga ngalan alang sa plano sa kaluwasan, sigun sa gisugyot diha sa Dali, Sunod Kanako—Alang sa mga Indibidwal ug mga Pamilya? Kon aduna, dapita sila nga ipaambit ang unsay ilang nakat-unan.
“Ang Pagpamatuod sa Tulo ka mga Saksi”; “Ang Pagpamatuod sa Walo ka mga Saksi”
Kitang tanan mahimong mga saksi sa Basahon ni Mormon.
-
Ang pagtuon sa mga pagpamatuod sa Tulo ug sa Walo ka mga Saksi makapalig-on sa mga pagpamatuod sa mga sakop sa imong klase ug makatabang kanila nga mamalandong kon unsaon kaha nga mapaambit nila ang ilang kaugalingong mga pagsaksi. Mahimo nimong hangyuon ang katunga sa klase sa pagbasa sa “Ang Pagpamatuod sa Tulo ka mga Saksi” ug ang laing katunga sa pagbasa sa “Ang Pagpamatuod sa Walo ka mga Saksi” ug ipaambit ang mga impresyon o mga detalye nga nakapatandog kanila. Sa unsang paagi nga ang duha ka pagpamatuod managlahi? Sa unsang paagi kini magkapareha? Unsa ang atong makat-unan gikan niining mga saksi mahitungod sa pagpaambit sa atong mga pagpamatuod? Sa pagsugod og panaghisgutan kon nganong ang Tulo ka mga Saksi importante, mahimo nimong ipaambit ang pamahayag ni Presidente Dallin H. Oaks o ang pagpamatuod ni John Whitmer diha sa “Dugang nga mga Kapanguhaan”.
Ang Tulo ka mga Saksi mipamatuod bahin sa Basahon ni Mormon.
“Ang Pagpamatuod ni Propeta Joseph Smith”
Si Joseph Smith nahimong instrumento sa mga kamot sa Dios sa pagpagawas sa Basahon ni Mormon.
-
Ang mga sakop sa klase mahimong pamilyar na sa mga panghitabo nga gihulagway diha sa “Ang Pagpamatuod ni Propeta Joseph Smith,” apan tingali mahimo nimo silang matabangan nga makakita og bag-ong mga ideya. Pananglitan, mahimo nimo silang dapiton sa paglista sa mahinungdanong mga panghitabo diha sa istorya ni Joseph Smith. Unsa man ang atong mahimong konklusyon gikan sa iyang kasinatian mahitungod sa importansya nga gihatag sa Ginoo sa Basahon ni Mormon?
-
Ang himno nga “An Angel from on High [Ang Anghel nga Gikan sa Kalangitan]” (Hymns, nu. 13) naghisgot bahin sa pagtungha sa Basahon ni Mormon. Human sa pagkanta o pagpaminaw niini nga himno, ang mga sakop sa klase mahimong mangita og mga pamahayag diha sa “Ang Pagpamatuod ni Propeta Joseph Smith” nga motakdo o mosuporta sa mga pulong diha sa kanta.
Awhaga ang Pagkat-on diha sa Panimalay
Aron madasig ang mga sakop sa klase nga mobasa sa 1 Nephi 1–7, dapita sila sa pagpangita sa mga ideya o mga kamatuoran nga makatabang kanila sa ilang kasamtangang mga kahimtang sa kinabuhi—pananglitan, usa ka hagit sa pamilya o usa ka calling sa Simbahan.
Dugang nga mga Kapanguhaan
Ang mga tudling sa Basahon ni Mormon nga nagpamatuod kang Jesukristo.
Ang kaimportante sa Tulo ka mga Saksi.
Si Presidente Dallin H. Oaks mipasabut nganong ang pagpamatuod sa Tulo ka mga Saksi makapaagni kaayo:
“Ang pagpamatuod sa Tulo ka mga Saksi sa Basahon ni Mormon nagpabilin nga lig-on kaayo. Ang matag usa sa tulo adunay daghang rason ug oportunidad nga mosalikway sa iyang pagpamatuod kon sayop pa kini, o mobati nga dili sigurado sa mga detalye kon adunay dili tukma. Sama sa nahibaloan na, tungod sa mga panagsumpaki o mga kasina sa ubang mga lider sa Simbahan, ang matag usa niining tulo ka mga saksi na-excommunicate gikan sa Ang Simbahan ni Jesukristo sa mga Santos sa Ulahing mga Adlaw mga walo ka tuig human mamantala ang ilang pagpamatuod. Ang tulo nagkabulag, nga walay komon nga tinguha sa pagsuporta og kasabutan aron manglingla. Apan hangtud sa katapusan sa ilang kinabuhi—gikan sa 12 hangtud sa 50 ka tuig human sa ilang excommunication—walay usa niini nga mga saksi ang miusab sa iyang namantala nga pagpamatuod o misulti og bisan unsa nga makapaduda sa katinuod niini” (“The Witness: Martin Harris,” Ensign, Mayo 1999, 36).
Ang pagpamatuod ni John Whitmer.
Si John Whitmer, usa sa Walo ka mga Saksi sa Basahon ni Mormon, namahayag: “Wala gayud ako makadungog nga adunay usa sa tulo o sa walo ka mga saksi ang milimud sa pagpamatuod nga ilang gihatag. … Ang among mga ngalan nakaabut na sa tanang kanasuran, mga pinulongan ug mga katawhan isip usa ka balaanong pagpadayag gikan sa Dios. Ug makapahinabo kini sa mga katuyoan sa Dios sumala sa pamahayag nga anaa niini” (sa Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).
Pagpalambo sa Atong Pagtudlo
Pagtinguha og imong kaugalingon nga inspirasyon. Imbis nga motan-aw niini nga mga outline isip mga instruksyon nga kinahanglan nimong sundon, gamita kini aron makabaton og mga ideya o makapagawas sa imong kaugalingong inspirasyon samtang mamalandong ka sa mga panginahanglan niadtong imong gitudloan.