Panan-awon ni Lehi sa kahoy sa kinabuhi

Ang Damgo ni Lehi, ni Steven Lloyd Neal

Enero 13–19

1 Nephi 8–10

“Moduol ug Mokaon sa Bunga”

Sa dili pa mobasa sa mga ideya niini nga outline, basaha ang 1 Nephi 8–10 ug hunahunaa ang mahitungod sa mga hagit ug mga oportunidad nga gisagubang sa mga tawo nga imong gitudloan. Irekord ang imong mga impresyon kon unsa nga mga baruganan gikan niining mga kapitulo ang kinahanglan nimong tutukan diha sa klase.

Irekord ang Imong mga Impresyon

pagpaambit nga icon

Dapita ang Pagpaambit

Ang panan-awon ni Lehi adunay daghang kagamitan sa atong panahon. Sa pagsugod sa klase, mahimo nimong dapiton ang mga sakop sa klase nga ipaambit ang ilang mga ideya samtang magbasa sila mahitungod niining panan-awon. Awhaga sila nga ipaambit ang piho nga mga bersikulo ug ang kahulugan nga ilang nakita alang sa ilang kinabuhi.

pagtudlo nga icon

Itudlo ang Doktrina

1 Nephi 8:10–16

Kon makasinati kita sa gugma sa Dios, magtinguha kita nga motabang sa uban aron makasinati niini.

• Natural lang kini nga mopaambit og mga butang nga atong ganahan ngadto sa mga tawo nga atong gimahal, apan usahay maglisud kita sa pagpaambit sa ebanghelyo. Ang panaghisgutan mahitungod sa panan-awon ni Lehi mahimong makatabang sa mga sakop sa klase nga makakita og mga oportunidad sa pagpaambit sa ebanghelyo. Mahimo nimong hatagan ang usa ka sakop sa klase og usa ka piraso sa prutas ug hangyoa siya nga agnihon ang klase nga kanunayng mokaon niini nga prutas. Sa unsang paagi nga kining leksyon nga naggamit og butang [object lesson] susama sa kasinatian ni Lehi diha sa 1 Nephi 8:10–16? Unsa ang atong makat-unan gikan sa kasinatian ni Lehi nga makatabang kanato samtang mopaambit kita sa ebanghelyo?

• Si Elder David A. Bednar nagtudlo, “Ang bunga sa kahoy mao ang simbolo sa mga panalangin sa Pag-ula” (“Damgo ni Lehi: Hugot nga Paggunit sa Gunitanan,” Liahona, Okt. 2011, 34). Ikonsiderar ang pagkontak daan sa pipila ka sakop sa klase ug hangyoa sila sa pagpamalandong sa 1 Nephi 8:11–16 ug sa paghunahuna mahitungod sa mga pangutana nga sama niini: Unsaon nako paghulagway ang kaanindot nga dala sa Pag-ula ni Jesukristo sa akong kinabuhi? Giunsa nako sa pagtawag ang uban aron makatilaw sa kaanindot niini? (tan-awa sa bersikulo 15). Giunsa sa uban sa pagdapit kanako nga magtinguha sa mga panalangin sa Pag-ula sa Manluluwas? Unsa man ang nadasig nakong buhaton samtang nagbasa ko sa 1 Nephi 8:11–16? Dapita kining mga sakop sa pagpaambit sa ilang mga tubag atol sa klase, ug dapita ang tanang sakop sa klase sa paghatag sa ilang mga ideya atol sa panaghisgutan.

Panan-awon ni Lehi sa kahoy sa kinabuhi

Minerva K. Teichert (1888–1976), The House of the World, 1954, oil on board, 36 x 48 inches. Brigham Young University Museum of Art

1 Nephi 8:19–38

Ang pulong sa Dios mogiya kanato ngadto sa Manluluwas ug makatabang kanato nga mobati sa Iyang gugma.

• Usa ka paagi sa pagsugod og panaghisgutan mahitungod sa panan-awon ni Lehi mao ang pagdapit sa pipila ka sakop sa klase sa pagdrowing og usa ka representasyon sa panan-awon diha sa pisara, gamit ang 1 Nephi 8:19–38 isip giya. O mahimo nimong ipakita ang hulagway sa panan-awon ni Lehi gikan sa outline niini nga semana sa Dali, Sunod Kanako—Alang sa mga Indibidwal ug mga Pamilya. Mahimo dayon nimong dapiton ang matag sakop sa klase sa pagpangita sa mga bersikulo nga naghatag og interpretasyon sa usa sa mga simbolo diha sa drowing o sa hulagway—kining mga interpretasyon mahimong makita diha sa 1 Nephi 11:4–25, 35–36; 12:16–18; ug 15:21–33, 36. Samtang mopaambit ang mga sakop sa klase sa unsay ilang nakit-an, dapita sila sa paghisgot kon unsay gitudlo niining mga simbolo ngari kanato. Pananglitan, unsay gitudlo ngari kanato sa usa ka dako ug lapad nga gambalay mahitungod sa garbo? Unsay gitudlo ngari kanato sa gunitanan nga puthaw mahitungod sa pulong sa Dios? Mahimo usab nilang hisgutan kon sa unsang paagi nga ang panan-awon ni Lehi nakatabang nila nga moduol ngadto ni Kristo. Sa unsang paagi nga atong nakita ang atong kaugalingon diha sa panan-awon?

• Usa ka mahinungdanong mensahe diha sa panan-awon ni Lehi mao ang kaimportante sa pulong sa Dios, nga gisimbolo sa gunitanan nga puthaw. Aron matabangan nga mahatagan og gibug-aton kana nga mensahe, mahimo nimong bahinon ang klase ngadto sa upat ka grupo ug sangunan ang matag usa nga makakat-on mahitungod sa upat ka grupo sa katawhan nga nakita ni Lehi, sama sa gihulagway diha sa “Dugang nga mga Kapanguhaan” ug sa 1 Nephi 8:21–23, 24–28, 30, ug 31–33. Dayon tuguti ang mga sakop sa klase nga mopaambit sa usag usa kon unsa ang ilang nakat-unan. Mahimo usab nimong hatagan og pipila ka minuto ang mga sakop sa klase nga makapamalandong kon unsay ilang gibati nga ilang buhaton aron masiguro nga sila “naggunit sa gunitanan nga puthaw” (1 Nephi 8:30).

1 Nephi 10:17–19

Ang Dios mopadayag sa kamatuoran ngari kanato kon makugihon kitang magtinguha niini.

• Ang mga gabon sa kangitngit nga motabon sa atong agianan ug ang mabiay-biayon nga mga tingog gikan sa dako ug lapad nga gambalay makapahimo niini nga lisud alang kanato sa pagpangita sa kamatuoran. Ang pagbasa og dungan mahitungod sa ehemplo ni Nephi isip usa ka tigpangita sa kamatuoran mahimong makatabang. Mahimo nimong sugdan ang panaghisgutan pinaagi sa paghangyo sa mga sakop sa klase sa pagtino sa pipila ka makapalibug nga mga mensahe nga gipadangat sa kalibutan. Pananglitan, unsa nga kalibutanong mga ideya ang gipasidaan kanato sa mga propeta ug mga apostoles sa pinakabag-o nga kinatibuk-ang komperensya? Ikonsiderar ang pagbuhat og lista diha sa pisara bahin sa mga lakang nga gihimo ni Nephi aron makabaton sa kaugalingon niyang pagsaksi bahin sa kamatuoran sa panan-awon sa iyang amahan (tan-awa sa 1 Nephi 10:17–19; 11:1). Unsaon nato pagsunod ang iyang ehemplo samtang mangita kita sa kamatuoran?

pagkat-on nga icon

Awhaga ang Pagkat-on diha sa Panimalay

Aron madasig ang mga sakop sa klase nga mobasa sa 1 Nephi 11–15, dapita sila sa pagpangita kon unsay kalabutan sa mosunod nga mga imahe ngadto sa damgo ni Lehi: ang batang masuso nga si Jesus, usa ka krus, ang inahan sa mga babaye nga nagbaligya sa ilang dungog, katawhan nga nagpundok aron makiggubat, ug mga basahon.

mga kapanguhaan nga icon

Dugang nga mga Kapanguhaan

Mga video bahin sa Basahon ni Mormon.

Ikonsiderar ang pagpasalida og video nga nagpakita sa mga panghitabo gikan niining mga kapitulo (tan-awa sa Book of Mormon Videos nga koleksyon diha sa ChurchofJesusChrist.org o sa Gospel Library nga app).

Upat ka grupo sa mga tawo diha sa damgo ni Lehi.

1 nga Grupo.“Sa 1 Nephi 8:21–23 atong nahibaloan ang mahitungod sa unang grupo sa mga tawo nga mipadayon sa unahan ug misugod og lakaw diha sa dalan paingon sa kahoy sa kinabuhi. Apan, samtang ang mga tawo nakasugat sa gabon sa kangitngit, nga nagrepresentar sa ‘mga pagtintal sa yawa’ (1 Nephi 12:17), nawala sila sa ilang agianan, nahisalaag, ug nangawala gayud. Timan-i nga wala hisguti dinhi niini nga mga bersikulo ang kabahin sa gunitanan nga puthaw. Kadtong mibaliwala o wala mohatag og importansya sa pulong sa Dios wala makagamit nianang balaan nga kompas nga nagpunting sa dalan paingon sa Manluluwas.”

2 nga Grupo.“Sa 1 Nephi 8:24–28 mabasa ang mahitungod sa ikaduhang grupo sa mga tawo nga nakabaton sa higpit ug pig-ot nga dalan paingon ngadto sa kahoy sa kinabuhi. Kini nga grupo ‘mipadayon paingon sa unahan lahus sa gabon sa kangitngit, nanggunit sa gunitanan nga puthaw, hangtud nga sila miabut ug mikaon sa bunga sa kahoy’ (bersikulo 24). Bisan pa niana, sa dihang ang nindot og mga sinina nga anaa sa dako ug halapad nga gambalay mibugal-bugal niining ikaduhang grupo sa mga tawo, ‘sila nangaulaw’ ug ‘nangahulog ngadto sa gidili nga mga dalan ug nangawala’ (bersikulo 28). … Bisan adunay hugot nga pagtuo, pasalig, ug pulong sa Dios, kini nga grupo sa katapusan nangawala—tingali tungod kay sila panagsa ra nga nagbasa o nagtuon o nagsiksik sa mga kasulatan.”

3 nga Grupo.“Sa bersikulo 30 atong mabasa ang mahitungod sa ikatulong grupo sa mga tawo nga mipadayon sa unahan ‘nga sa kanunay naggunit sa gunitanan nga puthaw, hangtud nga sila miabut ug natumba ug mikaon sa bunga sa kahoy.’ Ang mahinungdanon nga hugpong sa mga pulong niini nga bersikulo mao ang kanunay nga naggunit sa gunitanan nga puthaw. Ang ikatulo nga grupo mipadayon usab sa unahan nga adunay hugot nga pagtuo ug lig-ong pagsalig; bisan pa niana, walay timailhan nga sila nahisalaag, nangahulog ngadto sa gidili nga mga dalan, o nangawala. Tingali kining ikatulong grupo sa mga tawo makanunayong nagbasa ug nagtuon ug nagsiksik sa mga kasulatan. … Kini ang grupo nga ikaw ug ako kinahanglang maningkamot sa pag-apil.”

4 nga Grupo.“Ang ikaupat nga grupo wala magtinguha sa kahoy, apan nagtinguha hinoon sa dako ug lapad nga gambalay isip ilang katapusang padulngan (tan-awa sa 1 Nephi 8:31–33).”

(David A. Bednar, “Damgo ni Lehi: Hugot nga Paggunit sa Gunitanan Liahona, Okt. 2011, 32–37.)

Pagpalambo sa Atong Pagtudlo

Ipahayag ang pagsalig pinaagi sa pagsulti og taas nga mga ekspektasyon. Ang pipila ka mga tigkat-on dili masaligon sa ilang abilidad sa pagtuon sa ebanghelyo sa ilang kaugalingon. Isaad sa mga sakop sa klase nga samtang maningkamot sila sa pagkat-on sa ilang kaugalingon, ang Espiritu Santo motudlo kanila. Mahimo usab nga mosugyot ka og mga paagi aron matabangan sila nga makasugod. (Tan-awa sa Pagtudlo sumala sa Pamaagi sa Manluluwas, 29–30.)