I roto i te tāvinira’a i tō ʼoutou Atua, nā Walter Rane

20-26 nō ’Ēperēra.

Mosia 4–6

« Fa’ahuru ’ē [rahi] »

E tai’o Mosia 4–6, ʼe e pāpa’i i tō ’outou mana’o pae vārua e tae mai. ’A fāri’i ai ’outou i tō ’outou mau fa’a’itera’a, e nehenehe tā ’outou e ui, mai tā Elder Richard G. Scott i parau, « te vai atu ā ānei te mau mea e ti’a iā’u ’ia ’ite ? » (« ’Ia noa’a te arata’ira’a Vārua », Ensign aore rā Liahona,Novema 2009, 8).

Pāpa’i i te mau mana’o e tae mai

Fa’a’ite mai i te mana’o

E hina’aro paha ’outou e ha’amata i tā ’outou tāu’ara’a parau i roto i te piha, ma te ani i te mau pīahi ’ia fa’a’ite mai hō’ē o te mau ha’api’ira’a a te ari’i Beniamina i roto i te Mosia 4–5 ’o tā rātou e hina’aro e fa’a’ohipa maita’i i roto i tō rātou orara’a.

Ha’api’i i te ha’api’ira’a tumu

Mosia 4:1–12

Nā roto ia Iesu Mesia, e fāri’i ’e e vai noa te matarara’a o tā tātou mau hara.

• Te manaʼo hape nei te tahi mau ta’ata ē e mea ʼiti roa te tautoʼoraʼa e tītauhia e te tātarahaparaʼa ; tē mana’o nei vetahi ē e tauto’ora’a rahi roa tō te reira. Nō te tauturu i te mau pīahi ’ia māramarama maita’i e aha te tītauhia nō te fāri’i i te matarara’a hara, e ani ’ia rātou ’ia ’imi i te mau ha’api’ira’a a te ari’i Beniamina i roto i te Mosia 4:1–12, ’ia hi’o mai i te mau tītaura’a ’ei reira te Metua i te Ao ra e ha’amatara ai i tā tātou mau hara. ’Ia tāpura mai te mau pīahi i te mea tā rātou i ʼite i ni’a i te tāpura ’ere’ere. Ani ia rātou ʼia feruri i te hōʼē faʼahōhoʼaraʼa nō te tauturu i te tātara i te mea tā rātou i haʼapiʼi mai. ʼEi hiʼoraʼa, e nehenehe rātou e faʼaau i te matararaʼa hara i te hōʼē taʼata tārahu tei « tātara » ʼaore rā tei faʼaʼore i te hōʼē tārahu. ʼAore rā e faʼaau rātou i te vai matararaʼa i te hara, i te ʼatuʼaturaʼa i te tahi mea e tītauhia ʼia haʼapaʼo-tāmau-hia, mai te hōʼē ʼaua ʼaore rā te hōʼē fare.

• Feruri e ani i te mau pīahi e aha tā rātou e parau i te tahi taʼata ’o te ui nei mea hoʼona ānei te tautoʼoraʼa nō te tātarahaparaʼa. Nāhea rātou e tauturu i te tahi taʼata te hepohepo ra ʼe tē manaʼo ra eʼita e maraʼa iāna te haʼavīraʼa i te hara ʼe te paruparu ? E tauturu i te faʼaineinera’a i te mau pīahi nō taua mau ’āparaura’a ra ma te ani ia rātou ia rave i te tahi tau minuti nō te ʼimi i te mau parau a te ariʼi Beniamina i roto i te Mosia 4:1–12 nō te mau parau mau e nehenehe e tauturu i te tahi taʼata i roto i te hōʼē o teie mau fifi. E fa’a’ite mai te mau pīahi i muri iho i te mau parau mau tā rātou i ʼite mai i te tahi pīahi e pārahi ra i piha’i iho mai.

Mosia 4:11–27

ʼIa tātarahapa anaʼe tātou, e ’ī tātou i te aroha o te Atua.

• Nāhea tātou e ʼite ai ’ua fāriʼi tātou te matararaʼa o tā tātou mau hara ? ʼUa faʼata’a mai te ariʼi Beniamina i te tahi o te mau hope’a nō te tātarahaparaʼa mau—ani i te mau pīahi ʼia ʼimi i te reira i roto i te Mosia 4:13–16. E ani atoʼa ia rātou ʼia feruri i tō rātou iho oraraʼa ʼe ʼia fa’aau e aha te fāito e ora ai rātou i te mau haʼapiʼiraʼa i roto i teie mau ʼīrava. E aha te mau tāpaʼo tā te mau pīahi i ʼite ē ’ua faʼafāriuhia rātou ? Nāhea tō tātou mau auraʼa ’e o vetahi ʼē e taui ai ’a haere ai tātou i te Mesia ra nā roto i te tātarahapa ? Penei a’e e fa’a’ite mai te mau pīahi, nāhea tō rātou ʼiteraʼa i te reira i te tupuraʼa i roto i tō rātou oraraʼa.

• E nehenehe Mosia 4:11–12 ʼe 14–16 e faʼatupu i te hōʼē tāu’aparaura’a nō niʼa e aha te mea e faʼauru ʼia riro ʼei metua parau-tiʼa. E aha tā teie mau ʼīrava e ha’api’i nei, e nāhea ʼia riro ʼei mau metua maitaʼi aʼe ?

• Mai te mea e faʼauruhia ʼoutou ’ia faʼatere i te hōʼē tāuʼaraʼa parau nō niʼa i te mau haʼapiʼiraʼa a te ariʼi Beniamina nō niʼa i te aupururaʼa i tei vēvē ’e tei navaʼi ʼore, e ani i te mau pīahi ʼia taiʼo te tahi i muri mai i te tahi te mau ʼīrava i roto i te Mosia 4:16–27. I muri aʼe i te taiʼoraʼa i te ʼīrava tātaʼitahi, e ha’apoto noa mai te piāhi tei taiʼo, nā roto i tāna iho mau parau e aha tā te ariʼi Beniamina i haʼapiʼi. E fa’a’ohipa i te poroʼi a Elder Jeffrey R. Holland « E ’ere ānei tātou pā’āto’a e mau ta’ata tao’a ore ra ? » » (Ensign ’aore rā Liahona, Novema 2014, 40–42) nō te tauturu i teie tauʼaraʼa parau. Nāhea tātou ʼia peʼe i te aʼo a te ariʼi Beniamina ʼia ʼore tātou e « horo ʼoiʼoi e au ʼore i [tō tātou] ra pūai » ? (Mosia 4:26–27). Nāhea te faʼaueraʼa ʼia « hōroʼa i tā [tātou] taoʼa na te mau taʼata vēvē » e tūʼati ai i te matararaʼa o tā tātou mau hara ?

Mosia 4:29–30

E tiʼa ia tātou ʼia hiʼopoʼa i tō tātou mau manaʼo, mau parau ʼe mau ʼohipa.

• I te tahi taime, e au ra e mea ʼōhie aʼe ʼāhani te Fatu i hōroʼa mai ia tātou i te hōʼē tāpura o te mau hara atoʼa. ʼAita ra, ʼua parau mai ʼoia ia tātou, « ia hiʼopoʼa ia ʼoutou iho… ’e e mau pāpū i te faʼaroʼo i tei faʼaroʼohia e ʼoutou nō te taeraʼa mai o tō tātou Fatu ra » (Mosia 4:30). Nō te tauturu i tā ʼoutou mau pīahi ’ia tāu’aparau i teie parau tumu, e ui ia rātou i teie mau huru uiraʼa : Nāhea tō tātou mau manaʼo, mau parau, ʼe mau ʼohipa e faʼahuru ʼē ai ia tātou iho ʼe ia vetahi ʼē ? E aha te auraʼa « e mau pāpū i te faʼaroʼo » ? E aha te aʼo tā tātou e faʼaʼite i te tahi ʼe te tahi nō te tauturu ia tātou ʼia « hiʼopoʼa ia tātou iho » ?

Mosia 5:1–7

E nehenehe te Vārua o te Fatu e faʼatupu i te hōʼē tauiraʼa rahi i roto i tō tātou ʼāʼau.

• Nō te haʼamata i te hōʼē tāu’ara’a parau nō niʼa i te tauiraʼa fāito ʼore tā te ʼevanelia a Iesu Mesia e nehenehe e ʼāfaʼi mai i roto i tō tātou oraraʼa, e ani i te mau pīahi ʼia faʼaʼite mai i te tahi mau tumu nō te aha e mea fifi pinepine te ravera’a i te mau tauiraʼa tāmau i roto i tō tātou oraraʼa. Ani ia rātou i muri iho ʼia taiʼo te Mosia 5:1–5, nō te hi’o mai i te « tauiraʼa rahi » tā te nūnaʼa o te ariʼi Beniamina i fa’aruru. E aha te mau parau mau nō niʼa i te hō’ē tauiraʼa o te ʼāʼau, tā tātou i haʼapiʼi mai nā roto mai i te ’ohipa tei tupu ia rātou ? E feruri e ani i te tahi mau pīahi ʼia faʼaʼite mai, nāhea te Vārua Maitaʼi i te tautururaʼa ia rātou ʼia taui tō rātou ʼāʼau. E nehenehe atoʼa ʼoutou e mātaʼitaʼi i te hōʼē o te mau video tei faʼaʼitehia i roto i « Te tahi atu ā mau mātēria ».

  

  E nehenehe te Faʼaora e taui i tō tātou ʼāʼau ’e tō tātou oraraʼa. Mau rima faʼaora, nā Adam Abram

• I muri iho i te tāu’aparaura’a i te mau parau mau i roto i te Mosia 5:1–7, ʼe uiui te tahi mau pīahi, nō te aha tō rātou tauiraʼa o te ʼāʼau i ʼore i tupu rahi ʼaore rā i vitiviti mai tei tupu i te nūnaʼa o te ariʼi Beniamina. Tē tātara nei te faʼahitiraʼa parau a Elder D. Todd Christofferson i roto i « Te tahi atu ā mau mātēria » i teie uiraʼa. E aha tā tātou e ʼapo mai nā roto mai ia Elder Christofferson nō niʼa i te faʼafāriuraʼa ?

Mosia 5:5–15

Tē ani nei te Atua iāʼu ’ia rave i te mau fafauraʼa ’e ʼōna.

• E tauturu te Mosia 5:5–15 i te mau pīahi ʼia māramarama i te mau haʼamaitaʼiraʼa tā rātou e fāriʼi nei ʼia rave ʼe ʼia haʼapaʼo anaʼe rātou i te mau fafauraʼa ʼe te Atua. E ani ia rātou ʼia hi’o faʼahou i teie mau ʼīrava ma te mau fafauraʼa nō te bāpetizoraʼa ʼe te ʼōroʼa nō te pane ʼe te pape i roto i te ferurira’a ʼe ʼia faʼaʼite mai i te mea tā rātou i haʼapiʼi mai. (Hiʼo atoʼa PH&PF 20:77, 79.)

Faʼaitoito i te haʼapiʼiraʼa i te fare.

E rave rahi mau pīahi tei faʼaruru paha ʼaore rā tei faʼaruru iho nei i te hōʼē fifi ʼaore rā te tāmataraʼa. E parau ia rātou ē i roto i te Mosia 7–10 e tai’o rātou nō niʼa i te hōʼē pupu taʼata tei ha’api’i mai nāhea i te tiʼaturi i te Fatu i roto i tō rātou tau tāmataraʼa.

Te tahi atu ā mau mātēria

Mau Video i niʼa i te ChurchofJesusChrist.org nō niʼa i te hōʼē « tauiraʼa rahi » (Mosia 5:2).

• « Māʼa i te mau mahana atoʼa : Tauiraʼa »

• « Hōʼē tauiraʼa o te ʼāʼau »

• « Hōʼē tauiraʼa rahi : Faʼafāriuraʼa »

E mea pinepine te tauiraʼa i te riro ’ei hōʼē raveraʼa.

ʼUa aʼo Elder D. Todd Christofferson nō niʼa i te tauiraʼa rahi o te ʼāʼau tei faʼaʼitehia i roto i te mau pāpaʼiraʼa moʼa :

« E ui paha ʼoutou, nō te aha hoʼi teie tauiraʼa rahi i ʼore i tupu ʼoiʼoi mai iāʼu nei ? E tiʼa ia ʼoutou ’ia haʼamanaʼo ē te mau hiʼoraʼa faʼahiahia o te nunaʼa a te ariʼi Beniamina, Alama, ʼe te tahi atu mau taʼata i roto i te pāpaʼiraʼa moʼa—e mea faʼahihia e ʼere rā i te mea mātauhia. Nō te rahiraʼa o tātou, e haere marū noa ʼe e tupu mai te mau tauira’a i muri iho. ’Ua riro te fānau-fa’ahou-raʼa, tei ta’a ’ē i tō tātou fānauraʼa tino, ʼei hōʼē rāvera’a hau atu i te hōʼē ʼohipa tei tupu. ’E te tomoraʼa i roto i taua rāvera’a ra o te fā tumu ïa o te oraraʼa tāhuti nei.

« I te reira ato’a taime, ’eiaha tātou e faʼatiʼa ia tātou iho i roto i te hō’ē tautoʼoraʼa haʼumani. ʼEiaha tātou e ʼoaʼoa noa ʼia tāpeʼa i te hinaʼaro e rave i te ’ino. E ʼamu ana’e mā te ʼāʼau ti’amā i te ʼōro’a mo’a i te mau hepetoma atoʼa, e ʼia ti’aturi tāmau noa i ni’a i te Vārua Mo’a nō te ʼīriti hope roa i te mau hu’ahu’a atoʼa o te viʼiviʼi i roto ia tātou Tē faʼaʼite pāpū nei au ē ʼa tāmau noa ai ʼoutou i te ʼē’a o te fānau-faʼahou-raʼa i te pae vārua, e ʼīritihia tā ʼoutou mau hara e te tāraʼehara a Iesu Mesia ʼe te tāfetafeta o te hara i ni’a ia ʼoutou, ’e e mo’e te mau piʼiraʼa a te faʼahemaraʼa, ’e e riro mai ʼoutou ʼei mea mo’a i te Mesia, mai iāna ʼe tō tātou Metua i mo’a ra ». (« Fānau-fa’ahou-hia », Ensign ʼaore rā Liahona, Mē 2008, 78).

Ha’amaita’ira’a i tā tātou ha’api’ira’a

E ʼimi i te mau hiʼoraʼa maitaʼi i roto i te mau pāpaʼiraʼa moʼa. ’A tai’o ai ’outou i te aʼoraʼa a te ariʼi Beniamina i tōna nūnʼa, ’a hi’o i te mau ha’api’ira’a i roto i tōna hi’ora’a maita’i ’o te nehenehe e tauturu ia ’outou ’ia riro ’ei ’orometua maita’i a’e. ʼEi hiʼoraʼa, e aha tā te ariʼi Beniamina i rave nō te ʼite ē ʼua taʼa i tōna nūnaʼa te mea tāna i haʼapiʼi ?