Abinadae i stap testifae long King Noa

Abinadae long Fored blong King Noa, i kam long Andrew Bosley

4–10 Mei

Mosaea 11–17

“Wan Laet … we I No Save Kam Tudak”

Tingting long eksampol blong Abinadae blong stap tijim gospel. ?Wanem nao yu faenem long Mosaea 11–17 we i save helpem yu blong kam wan tija we i gud moa?

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Blong givim spes long ol memba blong klas blong oli serem wan samting we oli bin lanem long stadi blong olgetawan, o long famle skripja stadi, yu save invaetem olgeta blong komplitim sentens ia: Sapos bae mi pikimap wan ves long Mosaea 11–17 blong mi serem wetem wan we mi lavem, bae hem i .

tijing pikja bokis

Stap Tijim Doktrin

Mosaea 11–13; 17

Yumi save stanap from trutok, iven taem yumi stap stanap yumiwan.

• Nomata we bae ol memba blong klas blong yu oli no kasem ol strong tok blong kilimded olgeta from testemoni blong olgeta, bae oli save fesem fasin blong agensem ol bilif blong olgeta. Maet oli save faenem sam samting we i bin hapen, o sam skripja long Mosaea 11–13 mo 17 we i givim olgeta sam moa paoa long tingting blong stanap from trutok. ?Wanem nao i bin givim strong paoa long tingting long Abinadae mo Alma blong tufala i tok stret? ?Olsem wanem yumi save strong moa mo no muvmuv blong stap difendem trutok? Ol toktok ia insaed long “Sam Moa Risos” oli save givim sam moa tingting.

• Blong helpem klas blong yu blong lan aot long ol nara eksampol blong gat strong paoa long tingting blong difendem trutok, yu save raetem Ol Pipol we Oli Bin Stanap from Trutok antap long bod. Yu save stat blong toktok raon long Abinadae, mo invaetem ol memba blong klas blong serem sam samting we i bin sapraesem olgeta abaot Abinadae taem oli bin stap rid abaot hem long wik ia. Afta, oli save givim nem blong ol nara man o woman—insaed long ol skripja, insaed long famli blong olgeta, o aot long eksperiens blong olgetawan—we oli bin filim se oli ol eksampol blong stanap from trutok. ?Wanem nao yumi filim insperesen blong go mekem from olgeta eksampol ia?

Mosaea 12:19–37

Taem yumi stap stadi long toktok blong God, yumi nid blong mekem hat blong yumi i open blong andastanem ol samting.

• Taem oli bin stap stadi long Mosaea 12:19–37 long wik ia, maet ol memba blong klas oli bin gat ol niu tingting abaot mining blong mekem hat blong yumi i open blong andastanem toktok blong God. Tingting blong askem sam long olgeta blong serem ol tingting blong olgeta. O mebi yu save yusum sam taem long klas blong lukluk tru long ol ves ia tugeta mo toktok raon long wanem tingting oli givim long saed blong mekem gospel stadi i gat moa mining. Eksampol; ?From wanem hem i impoten blong andastanem tugeta ia, loa blong God mo “obei long hem”? (Mosaea 12:29).

• ?Wanem nao ol memba blong klas blong yu oli save lanem taem oli komperem ol fasin mo praktis blong ol pris blong Noa wetem wei we yumi sapos blong tekem gospel stadi blong yumi? Invaetem olgeta blong ridim Mosaea12:19–37, mo lukaotem hao Abinadae i tokbaot ol pris blong Noa. ?Wanem nao bae Abinadae i save talem abaot fasin blong yumi blong mekem gospel stadi? Askem ol memba blong klas blong serem wanem oli stap mekem we i stap helpem olgeta blong mekem hat blong olgeta i open blong andastanem mo ademap moa mining long wok blong olgeta blong lanem gospel.

  Papa mo pikinini, tufala i stap ridim olgeta skripja

  Gospel stadi we i wok gud long laef i taem wan i openem hat blong hem blong andastanem samting.

Mosaea 13:28–15:11

Fasin blong sevem man i kam tru long Jisas Kraes mo Atonmen blong Hem.

• Blong winim tingting blong wan grup we i gat tu tingting se Sevya bae i kambak, Abinadae i talem wan profesi we i mekem man i tingting, we i kam long Aesea (luk long Mosaea 14). I gat plante wei we ol memba blong klas oli save luklukbak long japta ia. Oli save ridim samfala ves long wan taem mo toktok raon long olgeta, o, yu save serem klas long ol smol grup blong tokbaot sam ves we i gat mining, wetem ol futnot we i go wetem blong faenemaot moa niu tingting. Leftemap tingting blong olgeta blong serem wanem we oli lanem abaot Sevya, aot long japta ia.

• ?Olsem wanem? ?Ol memba blong klas blong yu oli andastanem se i minim wanem se Jisas Kraes “i stretem wanem we jastis i askem”? (Mosaea 15:9). Blong helpem olgeta blong andastanem gud moa hemia, yufala i save stat blong ridim tugeta “Jastis” mo “Sore, Stap Sore” insaed logn Gaed blong Ol Skripja (scriptures.ChurchofJesusChrist.org) o “Jastis” mo “Sore” long topics.ChurchofJesusChrist.org. Maet wan i save volontia blong givim wan sot mining blong wanwan toktok ia antap long bod. Afta, yu save ridim Mosaea 15:1–9 tugeta. ?Olsem wanem nao Jisas Kraes i stretem wanem we jastis i bin askem? ?Olsem wanem nao Hem i mekem se yumi kasem sore blong Hem? Ol vidio we oli putum i stap long “Sam Moa Risos,” oli yusum ol stori mo ol tok blong komperem samting blong tokbaot gud sore blong Sevya; blong wajem wan long ol vidio ia i save helpem ol memba blong klas blong tingting abaot ol nara tok we i komperem samting we i soem olsem wanem Jisas Kraes i bin stretem wanem we jastis i bin askem.

Mosaea 11; 12:33–37; 13:11–26

Loa blong Hem, yumi mas raetem insaed long hat blong yumi.

• Yu save helpem ol memba blong klas blong andastanem olsem wanem i impoten blong mas “raetem ol komanmen insaed long hat” blong yumi taem yu askem olgeta se oli ting se sentens ia i minim wanem. Afta, invaetem olgeta blong komperem wanem i defren ol komanmen we Abinadae i bin tijim long Mosaea 12:33–37 mo 13:11–26 wetem ol sin we King Noa mo pipol blong hem i stap mekem (luk long Mosiah 11:1–7, 14–15). ?Olsem wanem nao we taem yumi “raetem olgeta insaed long hat” blong yumi i defren long taem we yumi save gud olgeta nomo? (Mosaea 13:11). ?Olsem wanem nao yumi save se yumi bin raetem ol komanmen insaed long hat blong yumi? ?Wanem eksampol nao yumi save serem?

stap lanem samting pikja bokis

Stap Leftemap Tingting blong Lanem Samting long Hom

?Olsem wanem? ?Ol memba blong klas oli eva filim olsem we Abinadae i bin filim— ol hadwok blong olgeta blong serem gospel i go nating nomo? Talem long olgeta se long Mosaea 18–26 bae oli rid abaot ol plante frut we oli kamkamaot from ol hadwok blong Abinadae.

risos pikja bokis

Sam Moa Risos

Ol tijing blong ol profet abaot fasin blong stanap from trutok.

Presiden Russell M. Nelson i tijim: “Ol tru disaepol blong Jisas Kraes oli wantem blong oli luk olgeta, oli toktok, mo oli defren long ol pipol blong wol ia. … I no gat wan samting we i isi, o i otomatik blong kam ol strong disaepol olsem. Lukluk blong yumi i mas stap long Sevya mo gospel blong Hem. Long saed blong tingting, hem i wan wok blong traem stap lukluk long Hem long evri tingting we yumi gat. Be taem yumi mekem, bae ol tu tingting blong yumi bambae oli go lus” (“Pulum Paoa blong Jisas Kraes Insaed long Laef blong Yumi,” Ensign o https://www.ChurchofJesusChrist.org/languages/bis/content/general-conference/2017/04/drawing-the-power-of-jesus-christ-into-our-lives, Epril 2017).

Presiden Thomas S Monson i talem: “Bae yumi gat strong paoa long tingting oltaem, mo bae yumi rere blong stanap from wanem we yumi biliv long hem, mo sapos yumi mas stanap yumiwan long rod ia, bae yumi mekem wetem strong paoa long tingting, we yumi kasem paoa tru long save ia se, long tru laef, yumi neva stanap yumiwan taem yumi stanap wetem Papa blong yumi we i stap long Heven.” (“Dare to Stand Alone,” Ensign o Liahona, Nov. 2011, 67).

Presiden Gordon B. Hinckley i tijim: Paul i bin raet i go long Timoti, i talem se: ‘Spirit we God i givim long yumi, i no blong mekem yumi fraet, nogat. Spirit ia i blong mekem yumi gat paoa, blong mekem yumi lavem ol man, mo i blong mekem yumi naf blong blokem ol samting we yumi nomo i wantem. Nao, from samting ia, bambae yu no sem blong tokbaot Masta blong yumi.’ (2 Tim 1:7–8). Mi wantem tumas se evri memba blong jos ia bae i putum ol toktok ia long wan ples we bae hem i luk olgeta long evri moning taem hem i statem dei blong hem. Bae ol toktok ia i givim yumi strong paoa long tingting blong toktok laod, bae oli givim yumi fet ia blong traem, bae i mekem tingting blong yumi i kam strong moa long Lod Jisas Kraes” (Teachings of Presidents of the Church: Gordon B. Hinckley [2016], 338).

Ol vidio long saed blong jastis mo sore oli stap long ChurchofJesusChrist.org.

• “Handel’s Messiah: Debtor’s Prison” (Kalabus blong Man we I Gat Kaon)

• “The Mediator” (Man we I Stanap long Medel)

• “Where Justice, Love, and Mercy Meet” (Ples we Jastis, Lav mo Sore oli Mit”