“25–31 Mei. Mosaea 29–Alma 4: ‘Oli Stanap Strong mo Oli No Muvmuv’” Kam Folem Mi—Blong Sandei Skul: Buk blong Momon 2020 (2020)
“25–31 Mei. Mosaea 29–Alma 4,” Kam Folem Mi—Blong Sandei Skul: 2020
Yangfala Alma i stap prij, i kam long Gary L. Kapp
25–31 Mei
Mosaea 29–Alma 4
“Oli Stanap Strong mo Oli No Muvmuv”
Long taem blong Alma, oli stap lukluk se gospel tija “i no moa gud bitim man we i stap lan; mo, olsem ia nao yumi luk se olgeta evriwan oli semmak” (Alma 1:26). Taem yu stap rere blong tij, tingting hevi long hao nao, prinsipol ia, hem i blong yu mo blong klas blong yu.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Maet ol memba blong klas oli luk se i gat sam samting oli semsemmak bitwin ol samting we oli hapen we oli tokbaot insaed long Mosaea 29–Alma 4 mo ol samting we oli stap hapen long wol blong yumi tedei, o insaed long laef blong olgeta. Givim sam minit long olgeta blong luklukbak long ol japta ia blong faenem wan eksampol. Invaetem olgeta blong serem wanem oli faenem wetem wan we i sidaon kolosap long hem.
Stap Tijim Doktrin
Yumi save stap olsem wan gud paoa blong lidim man blong mekem gud insaed long ol komuniti blong yumi.
-
Sapos ol memba blong klas bae oli lanem wan samting sapos yufala i toktok raon long wei blong lidim tingting blong sosaeti blong mekem gud, yu save invaetem olgeta blong tingting long sam problem we komuniti blong olgeta oli fesem, mo raetemdaon long lis long bod (no go tumas long ditel blong ol problem ia long taem blong toktok insaed long klas). Ol memba blong klas oli save luklukbak long Alma 2:1–7 blong faenem wanem problem nao Ol Man blong Nifae oli bin fesem mo wanem nao oli bin mekem abaot hemia. ?Wanem nao bae i bin save hapen sapos “ol pipol blong jos” oli no toktok bigwan blong man i harem voes blong olgeta? ?Wanem moa yumi stap lanem abaot fasin blong stap ol gud sitisen, aot long stori ia we i stap long Mosaea 29:26–27, mo aot long stori we i stap long “sam Moa Risos”? Maet ol memba blong klas oli wantem tingting long wan samting we bae oli mekem blong lidim tingting blong komuniti blong olgeta blong mekem gud long saed blong wan long ol problem ia we i stap long bod.
Yumi save luksave mo sakemaot ol giaman tijing.
-
Eksampol blong Gidion we i stanap agensem Nehor, i save givim insperesen long klas blong yu. Mebi bifo taem blong klas, yu save askem wan blong luklukbak long histri blong Gidion mo serem hemia wetem klas (luk long Mosaea 19:1–8; 20:15–22; 22:1–9; mo Alma 1:2–9). Folem hemia, ol memba blong klas oli save mekem wan lis blong sam long gudfala samting abaot Gidion. Eksampol: taem Gidion i bin harem ol giaman tijing blong Nehor, Gidion i agensem Nehor “wetem ol toktok blong God” (ves 9). Long skripja stadi blong olgetawan, maet ol memba blong klas oli faenem ol skripja we oli sakemaot ol tijing blong Nehor we oli stap long Alma 1:3–6. Invaetem olgeta blong serem ol skripja we oli faenem. I gat sam skripja tu we oli putum i stap long “Sam Moa Risos” blong lukluk long olgeta. ?Olsem wanem yumi save stap moa olsem Gidion taem yumi stap difensem trutok?
-
Ol giaman tijing blong Nehor oli stap long Alma 1:3–6, mo oli save helpem yumi blong luksave ol teknik we Setan i stap yusum blong giaman long yumi. Eksampol, hem i stap haedem ol giaman blong hem insaed long ol trutok. Tingting blong invaetem ol memba blong klas blong luklukgud insaed long Alma 1:3–4 mo faenemaot ol giaman we Setan i talem mo ol trutok we hem i stap yusum blong mekem se i pulum tingting blong yumi. ?Wanem nao sam long ol giaman we oli miks wetem trutok we i stap trikim nogud ol pipol tedei? ?Olsem wanem yumi stap helpem ol famli blong yumi mo olgeta we yumi lavem blong oli luksave bitwin wanem we hem i tru mo wanem we i rong?
-
Ol memba blong klas oli save singsing o ridim wan hym abaot fasin blong putum tingting i stap daon, olsem “Be Thou Humble” (Hymns, namba 130), mo toktok raon long olsem wanem nao mesej blong hym ia i defren olgeta long mesej blong Nehor we i stap long Alma 1:2–9. Oli save komperem wanem i defren long wanem we Nehor i bin tijim abaot ol gospel tija wetem wanem we Alma mo ol nara lida blong Jos oli tijim mo givim eksampol long laef blong olgeta (luk long Alma 1:26; 4:15–20). ?Wanem nao hem i stap pusum Nehor? ?Olsem wanem nao hemia i defren long Alma? Leftemap tingting blong ol memba blong klas blong tingting hevi long wanem i stap pusum olgeta blong givim seves insaed long Jos. ?Wanem nao Alma 1:26 i talem se yumi save mekem long saed blong responsabiliti blong yumi olsem ol pipol we i stap lanem samting?
Hae tingting i save mekem se yumi “stop blong muv i go fored.”
-
Blong toktok raon long Alma 1 mo Alma 4 i save helpem ol memba blong klas blong oli andastanem olsem wanem hae tingting i jenisim wanwan man, woman mo Jos. Yu save serem klas long tufala grup mo askem wan grup blong lan abaot wanem situesen Jos i stap long hem, olsem we oli tokbaot insaed long Alma 1:19–30, mo nara grup i lanem situesen blong Jos sam yia afta, olsem we oli tokbaot long Alma 4:6–15. Askem wanwan grup blong serem se Jos mo ol memba blong hem oli bin olsem wanem folem wanem we oli ridim long ol ves ia. Maet, oli save mekem plan blong mekem hemia long wan wei we i smat—eksampol, oli save droem wan pikja, o rere long wan sot drama plei. Afta we ol grup oli serem samting wetem wanwan long olgeta, askem olgeta blong toktok raon long wanem we oli bin lanem abaot ol samting we hae tingting i mekem long Jos mo ol memba blong Jos, mo ol blesing blong putum tingting i stap daon. ?Wanem lesen nao ol stori ia oli gat we yumi save yusum tedei?
“Toktok blong God” mo “klin testemoni” i save jenisim hat.
-
Plante pipol oli save komperem olgeta long wanem we Alma i bin filim taem hem i bin “harem bigfala harem nogud” (Alma 4:15) from fasin nogud mo ol hadtaem blong ol pipol blong hem. Mebi ol memba blong klas oli save tingting abaot wan we oli lavem, we oli stap wari long hem, mo kipim hem i stap long maen taem oli stap ridim Alma 4:12–20. Afta we ol memba blong klas oli rid, yu save askem ol kwestin olsem olgeta ia we i mekem se bae i gat toktok raon long ol ves ia: ?Wanem nao i tekem glad i kam long ol pipol ia long taem ia we i bin had tumas long olgeta? ?Wanem nao sentens ia, “Spirit blong Lod i no livim hem” i minim long yu? (Alma 4:15). ?Wanem sakrifaes nao Alma i bin mekem blong helpem ol pipol blong hem, mo wanem sakrifaes nao bae, samtaem, oli askem yumi blong mekem? ?Wanem eksampol nao yumi bin luk abaot paoa blong “klin testemoni”? (Alma 4:19). ?Olsem wanem yumi save serem ol testemoni blong yumi we yumi no stap tok long man, o yumi no stap jajem olgeta? Yu save givim taem long memba blong oli raetemdaon wan mesej we i wan testemoni i go long olgeta we oli lavem.
-
Maet ol memba blong klas oli lanem samting sapos oli toktok raon long wanem nao hem i wan “klin testemoni.” Vidio ia, “Apostle Testimony Montage” (ChurchofJesusChrist.org) i gat sam gudfala eksampol insaed long hem. ?Olsem wanem ol testemoni ia, o ol narawan we yumi bin harem finis, “oli stretem [yumi] blong [yumi] tingbaot wok blong [yumi]”? (Alma 4:19). ?Olsem wanem ol testemoni ia oli stap helpem yumi blong winim hae tingting mo fasin blong stap raorao?
Stap Leftemap Tingting blong Lanem Samting long Hom
Yu save eksplenem long ol memba blong klas se long Alma 5–7 bambae oli ridim “klin testemoni” blong Alma mo luk olsem wanem hem i wok long laef blong ol pipol (luk long Alma 4:19).
Sam Moa Risos
“Mekem se man i filim paoa blong toktok blong yu.”
I no longtaem afta we oli singaotem Belle S. Spafford olsem Jeneral Presiden blong Rilif Sosaeti long 1945, oli bin invaetem ol lida blong Rilif Sosaeti blong go long wan miting blong wan bigfala nasonal kaonsel blong ol woman. Ol jeneral lida blong Rilif Sosaeti, oli bin memba blong kaonsel ia blong plante yia, be oli bin filim se kaonsel ia i no bin mekem gud long olgeta. Afta we hem i toktok raon wetem ol kaonsela blong hem, Sista Spafford i talem long Presiden George Albert Smith, we i Presiden blong Jos, se Rilif Sosaeti i mas kanselem membasip blong hem insaed long kaonsel ia.
Taem oli toktok raon long tingting ia, Sista Spafford i talem: “Yu save Presiden Smith, Kaonsel ia i no givim eni samting long yumi.”
Afta, hem i storian long hemia se:
“Presiden i lukluk mi, i sapraes long mi. Hem i talem: “Sista Spafford, ?yu yu stap lukluk nomo long saed blong wanem samting bae yu yu kasem? ?Yu yu no ting se i gud, we, samtaem, yumi lukluk samting long saed blong wanem samting yumi gat blong givim? Hem i gohed: “Mi biliv se ol Momon woman oli gat wan samting blong givim i go long ol woman blong wol ia, mo bae oli lanem samting aot long olgeta tu. Bae yufala i no kanselem membasip blong yufala, be mi givim tingting se yufala i tekem sam memba blong bod we oli save mekem samting, mo gobak long miting ia.’
“Afta, hem i talem ol toktok ia we i poenemaot gud olgeta: ‘Mekem se man i filim paoa blong toktok blong yu’” (Belle S. Spafford, A Woman’s Reach [1974], 96–97).
Sista Spafford i bin obei long kaonsel ia. Hem i bin givim seves blong plante yia insaed long kaonsel ia, mo long en, oli bin jusum hem olsem wan lida blong kaonsel ia.
Ol skripja we oli sakemaot ol giaman blong Setan.
Stap Kam Antap long Fasin blong Yumi blong Stap Tij
Yu meksua se yu stap tijim tru doktrin. “Gohed blong askem yuwan: ‘?Hao nao wanem we mi stap tijim, bae i helpem ol memba blong klas blong mi blong oli bildimap fet blong olgeta long Kraes, sakem sin, mekem mo kipim ol kavenan wetem God, mo kasem Tabu Spirit?’” (Teaching in the Savior’s Way, 20).