Jisas i stap holem wan smol sipsip

Oli No Fogetem Yu, i kam long Jon McNaughton

Jun 1–7

Alma 5–7

“?Yufala I Ting se Yufala I Bin Kasem Bigfala Jenis Ia long Hat blong Yufala?”

Taem yufala i stap rid long Alma 5–7, tingting abaot ol memba blong klas blong yu we oli stap olsem ol eksampol blong ol tijing we oli stap insaed long ol japta ia. Tingting long sam wei we yu save yusum olgeta long taem blong toktok insaed long klas long Sandei.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Givim sam minit blong ol memba blong klas oli tingbaot wanem we oli bin ridim insaed long Alma 5–7 mo faenem wan trutok we oli wantem serem insaed long klas. Afta, askem olgeta blong serem wetem wan we i stap sidaon kolosap.

tijing pikja bokis

Stap Tijim Doktrin

Alma 5:14–33

Yumi mas gat eksperiens—mo gohed blong filim—wan bigfala jenis insaed long hat.

• Oli bin askem ol memba blong klas blong tingtingbak long ol kwestin long Alma 5:14–33 we oli stap long aotlaen blong wik ia insaed long Kam Folem Mi—Blong Wanwan Man, Woman mo Famli. Bae yu save statem toktok long klas abaot ol ves ia taem yu askem ol memba blong klas blong serem wijwan kwestin, we i stap long ol ves ia, i bin gat mining long olgeta. Afta, yu save invaetem ol memba blong klas blong wok long ol grup blong luklukbak long Alma 5:14–33 mo faenemaot wanem nao hem i minim blong gotru wan jenis long hat tru long Sevya mo Atonmen blong Hem. Oli save lukluk tu blong faenem ol blesing we i kam taem wan i jenisim hat blong hem. ?Wanem nara pikja toktok we oli yusum blong tokbaot jenis ia we Alma i tokbaot? (Eksampol, luk long Jon 3:1–7; 2 Korin 5:17; Dale G. Renlund, “Preserving the Heart’s Mighty Change,” Ensign o Liahona, Nov. 2009, 97–99. ?Olsem wanem yumi holemtaet wan jenis long hat blong yumi truaot long laef blong yumi? (luk long Alma 5:26).

  wan gel we i stap prea long saed blong bed

  Taem yumi stap tanem yumi i go long God, yumi save gotru long wan “jenis long hat.”

Alma 5:44–51

Yumi save kasem witnes blong yumiwan abaot Sevya mo gospel blong Hem tru long Tabu Spirit.

• Olsem Alma, ol memba blong klas oli kasem wan testemoni blong olgeta abaot Sevya mo gospel blong Hem. Blong helpem olgeta blong lanem wanem we Alma i bin mekem blong kasem witnes blong hem tru long Spirit, yu save pasem ol pis pepa wetem toktok ia Testemoni we yu raetem antap long pej blong pepa ia. Ol memba blong klas oli save wok tutu blong luklukbak long Alma 5:44–51 mo yusum wanem we oli lanem long ol ves ia blong raetem wan “resipi” blong gat wan testemoni. Eksampol, ol “samting blong yusum” long resipi, oli ol trutok we i mekemap testemoni blong yumi. Ol “instraksen” blong mekem resipi, oli ol samting we yumi nidim blong mekem blong kasem wan testemoni. (Luk long mesej we i kam long Elda Dieter F. Uchtdorf insaed long “Sam Moa Risos” blong gat sam moa aedia.) ?Wanem “samting blong yusum” mo “instraksen” oli save ademap long resipi blong olgeta aot long eksperiens blong olgetawan, o aot long ol eksperiens we oli stap long ol skripja? Invaetem wanwan long ol smol grup blong serem wanem oli bin lanem mo wanem bae oli go mekem blong invaetem Tabu Spirit blong testifae abaot trutok long olgeta.

Alma 6

Yumi kam tugeta olsem Ol Sent blong harem toktok blong God mo mekem wok blong Hem.

• Blong rimaenem ol memba blong klas se i impoten blong kam tugeta olsem wan bodi blong Ol Sent, yu save invaetem olgeta blong tingting se, wan we oli save hem, i filim se i no nid blong stap memba blong wan jos. ?Wanem nao oli save serem aot long Alma 6 blong tijim man o woman ia abaot sam long ol blesing blong stap memba blong wan jos? ?Olsem wanem nao yumi save mekem ol stamba tingting blong kam tugeta, we Alma i tokbaot, oli kamtru?

Alma 7:7–16

Sevya i tekem long Hemwan ol sin blong yumi, ol sobodi blong yumi, mo ol hadtaem blong yumi.

• Mebi i gat ol pipol insaed long klas blong yu we i rili nidim blong save wanem nao Alma 7:7–16 i stap tijim yumi—se Sevya i bin tekem long Hemwan, i no ol sin blong yumi nomo, be tu, ol sobodi, ol sik, mo ol samting we yumi slak long olgeta. ?Olsem wanem bae yu helpem olgeta blong oli faenemaot hemia? Maet yu save mekem wan jat long bod wetem ol heding ia Wanem we Sevya i bin Safa long hem mo From Wanem Hem i bin Safa Klas i save komplitim jat ia afta we oli ridim Alma 7:7–16. Bae i help tu blong tingting long ol nara samting we Sevya i bin safa long olgeta long taem blong laef blong Hem (luk long ol eksampol we oli stap long “Sam Moa Risos”).

• Afta we yufala i toktok raon long wanem Alma i stap tijim long Alma 7:7–16, maet ol memba blong klas bae oli save serem sam eksperiens taem we Sevya i bin helpem olgeta (luk long “Sam Moa Risos” blong gat sam moa eksampol blong sam wei we Jisas i bin helpem yumi.) Yu save lukluk tu long kwot andanit we i kam long Dallin H. Oaks: “Sevya blong yumi i talemaot se “hem i kam daon i bitim evri samting’ (D&K 88:6). … Yumi save talem se from se Hem i bin kamdaon bitim evri samting, Hem i stap long stret ples blong leftemap yumi, mo givim yumi paoa ia we yumi nidim blong stap strong tru long ol hadtaem blong yumi. Be yumi nomo, yumi mas askem” (“Kam Strong Moa Tru long Atonmen blong Jisas Kraes,” Ensign o https://www.ChurchofJesusChrist.org/general-conference/2015/10/strengthened-by-the-atonement-of-jesus-christ?lang=bis, Okt 2015 ).

• Alma i talemaot se taem bae Ridima i kam, “bae hemia i moa impoten bitim” eni nara samting. Maet ol memba blong klas oli save traem tingting long maen blong olgeta se oli stap long wan histri klas, we oli toktok raon long ol moa impoten samting we i bin hapen long histri. ?Wanem ves nao long Alma 7 bae oli save serem blong sapotem wanem Alma i talem long ves 7? ?Wanem kaonsel nao Alma i bin givim long ol pipol blong hem we i save helpem yumi blong rere from taem we bae Sevya i kam?

stap lanem samting pikja bokis

Stap Leftemap Tingting blong Lanem Samting long Hom

Blong leftemap tingting blong ol memba blong klas blong ridim Alma 8–12, maet yu save serem wetem olgeta se ol japta ia oli talem stori blong tu man. Wan i no soem intres long Jos, mo wan i strong blong agensem Jos, be tufala tugeta i kam ol strong man blong difendem bilif blong Jos.

risos pikja bokis

Sam Moa Risos

Kasem ol testemoni blong yumiwan.

Elda Dieter F. Uchtdorf i givim skripja paten ia blong “kasem wan testemoni blong yuwan we rus blong hem i stap long witnes ia we i kam long Tabu Spirit”:

“Faswan: Wantem blong biliv. Buk blong Momon i leftemap tingting blong yumi olsem: ‘Be luk, sapos yufala i girap mo wekemap tingting blong yufala, blong go traem ol toktok blong mi, mo praktisim wan smol pis blong fet, yes iven sapos yufala i no save mekem moa be wantem blong biliv nomo’ (Alma 32:27). … God i promesem yumi blong kasem help we i kam long heven sapos nomo yumi wantem blong biliv, be yumi mas wantem wetem tru hat blong yumi, yumi no mas priten.

“Nambatu: Luklukgud insaed long ol skripja. Gat sam kwestin; stadi long olgeta; luklukgud insaed long ol skripja blong faenem ol ansa. Bakegen, Buk blong Momon i gat ol gudfala advaes blong yumi: ‘Nao, sapos yufala i givim ples, blong oli save planem wan sid insaed long hat blong yufala,’ tru long fasin blong wok strong blong stadi long toktok blong God, gudfala sid ia ‘hem i stat blong kam bigwan insaed long jes blong yufala,’ mo bae yufala i no stanap mo gohed blong no biliv. Gudfala sid bambae i ‘leftemap sol blong [yufala]’ mo ‘givim moa laet long save blong [yufala]’ (Alma 32:28).

“Nambatri: Mekem tingting blong God; stap obei long ol komanmen. … Yumi nidim blong kam long Kraes mo folem ol tijing blong Hem. Sevya i tijim: ‘Ol tok ia we mi stap tijim ol man long hem, oli no blong mi nomo, oli kamaot long God we i [sendem] mi mi kam. [Sapos eni man i mekem tingting blong hem, bae hem i save ol tok ia’ [Jon 7:16–17; oli ademap italik]. …

“Nambafo: Tingting hevi, livim kakae, mo prea. Blong kasem save we i kam long Tabu Spirit, yumi mas askem Papa long Heven blong kasem save ia [luk long Alma 5:45–46; Moronae 10:3–4]” (“The Power of a Personal Testimony,” Ensign o Liahona, Nov. 2006, 38–39).

?Jisas Kraes i safa long wanem?

• Temtesen (luk long Matiu 4:1–10)

• Hanggri mo tosta (luk long Matiu 4:2; Jon 19:28)

• Ded blong wan we hem i lavem (luk long Matiu 14:10–13)

• Fasin blong lego man i stap hemwan (luk long Matiu 26:55–56)

• Fasin blong jik (luk long Matiu 27:29–31, 39–44)

• Fasin blong stap pua (luk long Luk 9:58)

• Fasin blong salem man (luk long Mak 14:43–46)

• Sobodi we i bigwan moa we man i save safa long hem (luk long Luk 22:39–44; Mosaea 3:7; D&K 19:16–19)

?Wanem nara hadtaem nao Sevya i gotru long olgeta?

?Olsem wanem nao Jisas Kraes i givhan long yumi?

• I fogivim ol sin blong yumi mo i karemaot sem (luk long Inos 1:5–6)

• I mekem hat blong ol narawan i kam sofsof (luk long Mosaea 21:15)

• I mekem yumi kam strong moa blong save tekem ol trabol blong yumiwan (luk long Mosaea 24:14–15)

• I hilim yumi from ol samting we yumi slak long olgeta (luk long 3 Nifae 17:6–7)

• I mekem se yumi kam strong long ol samting we yumi no strong long olgeta, mo Hem i givim kamfot long yumi (luk long Ita 12:27–29)

• I helpem yumi blong luk ol hadtaem blong yumi long ol defren wei (luk long D&K 121:7–10

?Long wanem nara wei nao Jisas i bin givhan long yumi?

Stap Kam Antap long Fasin blong Yumi blong Stap Tij

Kam Antap olsem wan Tija we i Olsem Kraes. Olsem wan tija, hem i impoten blong tingting hevi long ol wei we yu save helpem olgeta we oli lan blong bildimap fet long Papa long Heven mo Jisas Kraes. Yusum tingting blong yuwan, mo luk blong yusum ol kwestin we oli stap long pej 37 blong Teaching in the Savior’s Way blong givim insperesen long yu.