“22–28 Jun. Alma 17–22: ‘Bae Mi Mekem Yufala I Kam Wan Tul long Ol Han blong Mi,’” Kam Folem Mi—Blong Sandei Skul: Buk blong Momon 2020 (2020)
“22–28 Jun. Alma 17–22,” Kam Folem Mi—Blong Sandei Skul: 2020
Amon mo King Lamonae, i kam long Scott M. Snow
22–28 Jun.
Alma 17–22
“Bae Mi Mekem Yufala I Kam Wan Tul long Ol Han blong Mi”
Bifo yu save helpem ol narawan blong faenemaot ol trutok we oli stap long ol skripja, yu nidim blong faenemaot, blong yuwan, se ol toktok ia oli tru o no. Ridim Alma 17–22 wetem ol memba blong klas blong yu i stap long maen blong yu.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Blong givim janis long ol memba blong klas blong oli serem wan samting we oli bin lanem long stadi blong olgetawan, o long famli skripja stadi, yu save invaetem olgeta blong jusum wan we oli tokbaot long Alma 17–22 mo komplitim wan sentens olsem ia: “Abis i tijim mi ” o “Lamonae i tijim mi .”
Stap Tijim Doktrin
Fet blong yumi i kam strong moa taem yumi stap lukaotem blong save trutok.
-
Maet ol memba blong klas oli bin harem plante taem se i impoten blong gat ol simpol gospel fasin. Alma 17:1–4 i save helpem olgeta blong luk strong paoa we ol evri dei fasin ia oli gat insaed long laef blong yumiwan. Yu save askem haf blong klas blong luklukgud insaed long ol ves ia blong faenem wanem we ol boe blong Mosaea oli bin mekem, mo nara haf i lukaotem ol risal blong wanem nao oli bin mekem. ?Wanem nao ol risal blong mekem olgeta samting ia insaed long laef blong yumi?
-
Blong toktok moa long sam long ol evri dei fasin we i bin mekem ol boe blong Mosaea oli kam strong moa, yu save raetem antap long bod Luklukgud long Ol Skripja, Prea mo Fasin blong Livim Kakae. Afta, ol memba blong klas oli save luklukgud insaed long ol skripja blong lukaotem ol blesing we oli kam from skripja stadi, prea, mo fasin blong livim kakae ( Topical Guide o Gaed long Ol Skripja i save help). Oli save raetem long bod wanem we oli faenem mo serem wetem wanwan long olgeta ol aedia long wei blong kam antap long skripja stadi, prea mo fasin blong oli livim kakae long wan wei we i pulum olgeta i go kolosap moa long God.
Lav blong yumi i save helpem ol narawan blong oli rere blong kasem gospel.
-
I gat plante wei blong serem gospel, mo evriwan long olgeta oli wok gud moa taem lav nao i pusum olgeta. Maet ol memba blong klas oli save faenem ol ves ia long Alma 17–18 we oli soem olsem wanem lav i bin pusum Amon blong serem gospel. ?Wanem narafala trutok abaot fasin blong serem gospel we yumi stap lanem aot long eksampol blong hem? Ol memba blong klas oli save serem ol eksperiens abaot ol taem we tru lav i bin mekem hat blong wan i sofsof mo i letem hem i save akseptem moa mesej blong gospel. Toktok ia blong Presiden Dallin H. Oaks insaed long “Sam Moa Risos” i save helpem ol memba blong andastanem hamas i impoten blong meksua se lav i stap biaen long evri hadwok blong yumi.
Amon I Sevem Ol Sipsip blong King, i kam long Minerva K. Teichert
Blong stap tijim mo lanem ol trutok blong gospel long wan wei we i wok gud i save lidim hat blong i jenis.
-
Taem we Amon mo Eron, tufala i winim tras blong King Lamonae mo blong papa blong hem, tufala i bin save helpem tufala blong andastanem ol stamba trutok blong gospel. Maet bae i help sapos ol memba blong klas oli mekem wan lis blong trutok we Amon i tijim long Lamonae (luk long Alma 18:24–39), mo komperem wetem wan lis blong ol trutok we Eron i bin tijim long papa blong Lamonae (luk long Alma 22:1–16). Haf blong klas i save wok long wan lis, mo nara haf i wok long nara lis. ?From wanem nao we taem tufala i bin andastanem ol trutok ia, i lidim Lamonae mo papa blong hem blong bilivim mo trastem Papa long Heven mo long Pikinini blong Hem, Jisas Kraes?
-
Ol stori blong Eron mo Amon we tufala i stap tijim King Lamonae mo papa blong hem, oli givim wan gud janis blong toktok raon long fasin we i wok gud blong stap tijim mo lanem gospel. ?Wanem prinsipol blong tijing nao ol memba blong klas oli luksave? (eksampol, luk long Alma 18:24–28 mo Alma 22:7–13). ?Wanem prinsipol blong lanem samting nao oli bin faenem long ol eksampol blong King Lamonae mo papa blong hem? (eksampol, luk long Alma 18:25–31; 22:17–18).
-
Blong lanem olsem wanem doktrin blong gospel i save lidim laef blong yumi, ol memba blong klas oli save luklukgud insaed long Alma 18:40–41; 20:1–15; mo Alma 22:15–18, 25–27 blong faenemaot olsem wanem King Lamonae mo papa blong hem oli filim mo mekem afta we tufala i bin andastanem ol trutok blong gospel mo jenisim laef blong tufala. ?Olsem wanem ol trutok ia oli stap helpem yumi blong kam long Kraes? ?Wanem nao bae yumi mekem blong helpem yumiwan mo olgeta we yumi lavem blong oli andastanem mo laef folem ol trutok ia?
Ol testemoni blong yumi oli save lidim bigwan ol narawan.
-
Taem oli stadi olgetawan long Alma 19–22, maet ol memba blong klas oli tingting hevi long hamas nao testemoni blong wan i save jenisim ol narawan. Leftemap tingting blong olgeta blong serem wanem oli bin lanem. ?Ol stori insaed long Alma 19–22 oli talem wanem abaot traehad blong yumiwan blong stap serem gospel? Stori blong Presiden Gordon B. Hinckley insaed long “Sam Moa Risos” i save help blong tokbaot bigwan poen ia.
-
?Wanem nao sam long ol gudfala wei blong komperem samting we yu save serem blong soemaot wanem i save hapen taem yumi serem ol testemoni blong yumi wetem ol narawan? Sam eksampol oli, wan smol ston we i mekem wef antap long wota, o yis we i stap help blong mekem flaoa blong bred i raesap. Afta we yu luklukbak long sam eksampol ia blong ol pipol we oli stap serem testemoni blong olgeta long Alma 19–22, ol memba blong klas oli save serem olsem wanem testemoni blong ol narawan i bin helpem olgeta.
Stap Leftemap Tingting blong Lanem Samting long Hom
Yu save askem ol memba blong klas sapos oli bin askem olgetawan olsem wanem blong mekem se jenis insaed long laef blong olgeta i stap gogohed mo i stap kasem en. Long Alma 23–29, bambae oli rid abaot wan grup blong ol pipol we oli bin akseptem gospel, mo “oli neva foldaon” (Alma 23:6).
Sam Moa Risos
Serem gospel from yu gat lav.
Presiden Dallin H. Oaks i bin serem wan gudfala lesen we hem i bin lanem aot long wan eksperiens taem hem i bin wan yang man:
“Oli putum mi blong go visitim wan memba we i lesaktiv, wan profesenol we i gat sakses, we i olfala long mi. Taem mi luklukbak long wanem mi mekem, mi luksave se mi no gat lav mo wari long man ia we mi bin stap go visitim. Mi mekem hemia from i bin diuti blong mi, mo mi wantem ripotem 100 pesen long hom tijing blong mi. Wan naet, kolosap long en blong wan manis, mi ring blong askem sapos kompanion blong mi mo mi, i save go luk hem kwik mo visitim hem. Ansa blong hem, we i stretem mi, i tijim mi wan lesen we bae mi neva fogetem.
“ ‘No. Mi no ting se mi wantem yu blong kam tedei long naet,’ hem i talem. ‘Mi mi taet. Mi dresap finis blong mi go slip. Mi stap rid mo mi no wantem stop blong rid blong mekem se yu save ripotem 100 pesen long hom tijing blong yu long manis ia.’ Ansa ia, i stap stikim mi yet from se mi save se hem i filim se mi mi gat selfis tingting.
“Mi hop se i no gat wan we yumi go kolosap long hem wetem wan invitesen blong harem mesej blong gospel we i kambak, i filim se yumi stap mekem samting from wan risen we i no tru lav long olgeta, mo from yumi selfis blong serem wan samting we yumi save se i impoten tumas” (“Sharing the Gospel,” Ensign, Nov. 2001, 8).
Paoa blong yumi blong lidim man, plante taem yumi no save long hem.
Presiden Gordon B. Hinckley i talem wan stori abaot wan misinari we oli stap mekem ripot blong hem long misin presiden long en blong seves blong hem. Misinari ia i talem:
“Mi no luk eni risal blong wok blong mi. Mi westem taem blong mi mo mane blong papa blong mi. Hemia mi westem taem nomo. … Mi baptaesem wan man nomo long tu yia we mi bin stap long ples ia. I bin gat wan boe blong 12 yia long ol ples long Tenesi.”
Misin presiden i disaed blong folemap boe ia we misinari ia i bin baptaesem. Hem i bin groap, i mared, mo i muv i go long Aedaho. Ol pikinini blong hem oli go long ol misin, mo ol pikinini blong olgeta ia oli bin go long ol misin. Misin presiden i bin travel i go long Aedaho mo i bin askem ol memba blong famli ia abaot misin blong olgeta. Samtaem afta hem i bin talem: “Mi faenemaot se, risal blong baptaes blong wan smol boe long ol bak strit blong Tenesi tru long wan misinari we i ting se hem i no bin mekem gud wok, i endap blong gat moa long 1,100 pipol oli bin kam insaed long Jos” (Teachings of Gordon B. Hinckley [1997], 360–61).
Stap Kam Antap long Fasin blong Yumi blong Stap Tij
Putum wan taem i stap blong olgeta we oli lanem samting, oli serem wanem oli lanem. “Taem olgeta we oli lanem samting oli serem wanem we oli stap lanem, oli no filim Spirit nomo mo mekem testemoni blong olgeta i kam strong moa, be tu, oli stap leftemap tingting blong ol nara memba blong klas blong faenemaot ol trutok olgetawan. … Putum sam taem i stap blong studen i serem samting long evri lesen—long sam kes, bae yu faenem se ol toktok insaed long klas ia, oli lesen ia nao” (Teaching in the Savior’s Way, 30).