“15-21 Jun. Alma 13–16: ‘Go Insaed long Kingdom blong Lod,’” Kam Folem Mi—Blong Sandei Skul: Buk blong Momon 2020 (2020)
“15-21 Jun. Alma 13-16,” Kam Folem Mi—Blong Sandei Skul: 2020
Pikja i soem Alma mo Amulek we tufala i kam fri long kalabus, i kam long Andrew Bosley
15-21 Jun
Alma 13–16
“Go Insaed long Kingdom blong Lod”
Fasin blong jenisim laef we i stap oltaem i nidim moa bitim wan gudfala Sandei Skul lesen wan taem long wan wik. Leftemap tingting blong ol memba blong klas blong lukaotem blong gat ol eksperiens long saed blong spirit truaot long wik ia.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
?Wanem i save pusum ol memba blong klas, blong serem wetem klas, ol eksperiens blong olgeta wetem fasin blong lanem samting mo stap laef folem gospel? Mebi yu save invaetem olgeta blong serem wan niu samting insaed long Alma 13–16 we i bin mekem olgeta oli sapraes, o oli no bin tingting long wei ia bifo. Taem oli stap serem eksperiens blong olgeta, askem olgeta olsem wanem oli filim abaot niu lukluk ia mo olsem wanem bae i mekem wan samting i defren insaed long laef blong olgeta.
Stap Tijim Doktrin
Ol prishud odinens oli helpem ol pikinini blong God blong Jisas Kraes i pemaot olgeta.
-
Sam memba blong klas blong yu oli maet faenem wan samting we i mekem we oli glad moa from prishud afta we oli stadi long Alma 13. Invaetem olgeta blong serem wanem we oli bin faenem. Mo tu, yufala i save rid tugeta ol ves 2 mo 16 mo askem wan kwestin olsem: “?Hao nao prishud mo ol odinens blong hem i helpem yu blong lukluk i go long Pikinini blong God blong Hem i pemaot yu?” Sapos i save help, raetemdaon wan lis blong ol odinens we oli save faenem insaed long Stap Tru long Fet, 122–123.
Ol prishud odinens oli helpem yumi blong lukluk i go long Jisas Kraes blong kasem fasin blong pemaot man.
-
Plante pipol long Amonaeha oli bin stap folem Nehor, we i bin stap tijim ol giaman tingting abaot rol blong ol pris. Blong helpem ol memba blong klas blong oli lanem tru fasin blong prishud, yu save askem olgeta blong oli komperem tingting blong Nehor abaot wanem ol pris oli mas mekem (luk long Alma 1:3–6) wetem wanem we Alma i stap tijim (luk long Alma 13:1–12). ?Long wanem wei nao ol tijing blong Nehor oli semmak long tingting blong wol abaot paoa mo lidasip? ?Long wanem wei nao tijing blong Alma i defren?
-
Maet sapos oli ridim Alma 13:1–19 i save lidim storian blong olgeta abaot “i bin rere bifo long stat blong wol” long saed blong ol responsabiliti blong yumi insaed long wok blong Lod. ?Wanem nao Alma 13:3 i talem abaot wei we yumi sapos blong lukluk o stat wok long ol responsabiliti ia? (luk tu long D&K 138:56).
Lod i stap invaetem yumi blong go insaed long kingdom blong Hem.
-
Alma i tijim se prishud i helpem yumi blong “go insaed long kingdom blong Lod” (Alma 13:16). Blong statem toktok raon long klas abaot aedia ia, yu save askem ol memba blong klas blong ridim Alma 13:6, 12–13, 16, mo 29 mo serem wanem we ol ves ia oli stap tij abaot “kingdom blong Lod.” Oli save faenemaot ol fasin blong ol pipol we oli stap “go insaed long kingdom blong Lod.” ?Wanem nao yumi save mekem blong gat eksperiens ia blong go insaed long kingdom blong Lod long taem blong laef blong yumi long wol ia?
Long ol taem blong tes mo bigfala aksiden o trabol, yumi mas trastem Lod.
-
Alma 14 i save kam olsem wan janis blong toktok raon long hao yumi gohed blong stap fetful taem yumi, o olgeta we yumi lavem oli fesem agens, o tes iven taem oli stap traem blong kam stret mo gud. Yu save stat mo invaetem ol memba blong klas blong tingting se oli ol junalis we oli stap mekem ripot abaot wan samting we i bin hapen long Alma 14. ?Wanem kaen kwestin nao bae oli save askem Alma o Amulek abaot taem ia? Eksampol: “?From wanem Lod i letem yufala mo ol nara stret mo gud pipol blong safa?” o “?Wanem advaes yu gat blong olgeta we oli stap gotru ol had tes long laef?” Folem wanem we yumi save aot long Alma 14, ?olsem wanem nao bae Alma mo Amulek bae tufala i ansarem ol kwestin ia?
-
Plante long yumi i save filim wanem we Amulek i bin filim taem hem i bin witnesem safaring blong ol fetful pipol blong Amonaeha: yumi tu “i harem i soa” (Alma 14:10), mo yumi wantem blong mekem wan samting from hemia. ?Wanem nao yumi lanem aot long wanem we Alma i talem long kaen situesen olsem? (luk long Alma 14:8–13). Yu save serem toktok we i kam long Presiden Spencer W. Kimball we i stap long “Sam Moa Risos.” Maet sam memba blong klas oli save talem sot stamba mesej blong Presiden Kimball.
Fasin blong stap olsem disaepol i nidim blong mekem sakrifaes.
-
Aotlaen blong wik ia, insaed long Kam Folem Mi—Blong Wanwan Man, Woman mo Famli i givim tingting blong mekem wan lis long wanem Amulek i givap long hem mo wanem hem i kasem taem hem i akseptem gospel. Mebi ol memba blong klas oli save serem lis we oli mekem, o oli save mekem ol lis ia insaed long klas. Ol skripja ia oli save help: Alma 10:4–5; 15:16, 18; 16:13–15; mo 34:8. ?From wanem Amulek i glad blong mekem olgeta sakrifaes ia? ?From wanem yumi glad blong mekem ol sakrifaes? ?Olsem wanem yumi save folem eksampol blong Alma we i bin mekem Amulek i “strong moa long Lod”?
Ol toktok blong ol profet bambae oli kamtru.
-
Alma 16 i givim sam eksampol blong wan we i bin trastem wan profet mo olgeta we oli no bin trastem profet. Blong helpem ol memba blong klas blong lanem samting aot long ol eksampol ia, yu save raetem antap long bod: Soram mo Pipol blong Amonaeha. Ol memba blong klas oli save ridim Alma 16:1–10 mo raetem andanit long wanwan heding ol toktok mo ol sentens we i tokbaot fasin we olgeta pipol ia oli bin gat taem oli harem ol toktok blong profet Alma. ?Wanem nao yumi, yumi stap mekem blong soem long Papa long Heven se yumi gat fet long ol toktok blong ol profet we oli laef?
Stap Leftemap Tingting blong Lanem Samting long Hom
Tingting blong askem ol memba blong klas sapos oli bin wantem tumas se bae oli kam gud moa blong stap serem gospel. Sapos yufala i ridim Alma 17–22, hem i save givim insperesen long olgeta blong gat ol aedia blong helpem olgeta blong mekem gol ia i kamtru.
Sam Moa Risos
God i no blokem oltaem ol aksiden o bigfala trabol.
Wan taem, Presiden Spencer W. Kimball i bin talem abaot ol plante aksiden o trabol we i stap hapen long wol:
“?Be Lod i save blokem olgeta nogud taem o trabol ia? Ansa hem i, Yes. Lod i gat ol paoa, wetem evri paoa blong kontrolem laef blong yumi, i sevem yumi long sobodi, i save stopem evri aksiden, … iven i save protektem yumi long ded, sapos hem i wantem. Be Hem i no mekem. …
“Sapos evri sikman we yumi stap prea from oli kam gud bakegen, sapos evri stret mo gud man mo woman oli gat proteksen mo ol nogud man oli lus, bae ful program blong Papa bae i no wok, mo stamba prinsipol blong gospel, fridom blong joes, bae i stop. Bae i no gat man we bae i nid blong laef wetem fet. …
“ … Sapos bae yumi klosem doa long harem nogud mo safaring, bae yumi stap sarem doa long ol bigfala fren mo olgeta we oli sapotem yumi. Safaring i save mekem ol pipol oli kam ol sent taem oli lanem blong gat fasin blong save wet longtaem, taem oli save stap strong longtaem tru long hadtaem, mo taem oli save kontrolem olgeta. …
“ … Mi talem tangkyu se, iven tru long prishud, mi no save hilim evri sik. Nogud bae mi hilim ol pipol we oli sapos blong ded. Nogud bae mi helpem ol pipol long safaring we oli mas gotru long hem. Mi fraet se bae mi spolem ol tingting blong God.
“Sapos mi gat paoa we i no gat limit, be mi gat visen mo andastanem we i sot nomo, maet bae mi bin save sevem Abinadae aot long ol flem blong faea taem oli bonem nogud hem, mo sapos mi bin mekem olsem, maet bae mi prapa spolem hem evriwan. Hem i ded olsem wan we i ded from ol bilif blong hem, mo hem i go kasem praes blong hem olsem wan we i ded from bilif blong hem—i kam olsem wan god.
“Maet bae i protektem Pol agensem ol trabol blong hem sapos paoa blong mi i no gat limit. I tru nomo se bae mi hilim hem long “nil blong aranis, we i stap stikim [hem].” [2 Korin 12:7.] Sapos mi bin mekem olsem, bae mi spolem program blong Lod. …
“Mi fraet se sapos mi bin stap long Katej Kalabus long 27 Jun 1844, maet bambae mi mekem bolet we i sperem bodi blong Profet Joseph Smith mo Petriak Haeram Smit, i fas long wan samting i go. Maet bae mi sevem hem blong hem i no safa mo harem nogud, be bae mi mekem tufala i lusum praes blong tufala mo fasin blong save ded from bilif blong tufala. …
“Wetem kaen paoa olsem we mi no save kontrolem, i tru, bae mi filim blong protektem Kraes we i stap harem nogud long Getsemane, blong hem i no fesem ol swea, o hat blong ropnil, ol sem long kot, mo ol kil long bodi. Bae mi lukaotgud long ol soa blong hem mo hilim ol soa ia, bae mi givim kolkol wota long hem be i no viniga. Maet bae mi sevem hem blong hem i no safa mo ded, be bae mi mekem wol i mestem sakrifaes blong Hem we i pemaot ol sin blong yumi. …
“Taem yumi stap fesem ol bigfala trabol, yumi mas putum tras blong yumi long God, mo save se, nomata ae blong yumi i no save luk evri samting, be bae ol stamba tingting blong Hem bae oli kamtru” (Teachings of Presidents of the Church: Spencer W. Kimball [2006], 14–17, 20).
Stap Kam Antap long Fasin blong Yumi blong Stap Tij
Invaetem fasin blong stap strong blong stap lanem samting. “Taem yu stap rere blong tij, yu no tingting se: ‘?Bae mi tijim wanem?’ be yu askem yuwan: ‘?Wanem nao ol memba blong klas blong mi oli nidim blong lanem?’” (Teaching in the Savior’s Way, 29).