Ol Antae-Nifae-Lihae Oli Berem Ol Tul blong Faet blong Olgeta i kam long Jody Livingston

29 Jun–5 Julae

Alma 23–29

Oli “Neva Foldaon I Go Lus”

Taem yu stap ridim Alma 23–29, tingbaot se blong save helpem ol narawan blong oli lanem ol trutok long ol japta ia, yuwan, yu nidim blong gat ol eksperiens we oli gat mining wetem ol trutok ia.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Yu save askem ol memba blong klas blong oli raetem, antap long bod, ol ves we i tajem olgeta long taem blong stadi blong olgetawan o long taem blong famli stadi. Spenem sam minit blong stap invaetem sam pipol blong toktok raon wan trutok we oli bin lanem aot long ol ves we oli bin raetem.

Stap Tijim Doktrin

Alma 23–25; 27

Taem yumi tanem yumi long Jisas Kraes mo gospel blong Hem, hemia i jenisim laef blong yumi.

• Olsem ol disaepol blong Jisas Kraes, yumi evriwan i stap traehad blong jenisim moa laef blong yumi. Maet stori blong Ol Antae-Nifae-Lihae i save leftemap tingting blong olgeta we yu stap tijim blong mekem moa long saed ia. Yu save stat blong raetem long bod wan kwestin we i go olsem: ?Hem i minim wanem blong jenisim laef? o ?Wanem kaen jenis i hapen long laef blong ol pipol taem oli jenisim laef blong olgeta? Ol memba blong klas oli save lukaotem ol ansa insaed long ol skripja ia: Alma 23:6–7, 17–18; 24:17–19; 25:15–16; mo 27:26–30. Bae oli save serem ol niu tingting we oli kasem aot long ol nara ves we oli bin ridim long Alma 23–25 mo 27. Ol memba blong klas oli save faenem sam ansa, we i save help, long ol kwestin ia insaed long mesej blong Elda David A. Bednar “Converted unto the Lord” (Ensign o Liahona, Nov. 2012, 106–9; luk tu long “Sam Moa Risos”). ?Wanem jenis nao Ol Antae-Nifae-Lihae oli bin mekem from se oli bin jenisim laef blong olgeta? ?Olsem wanem nao eksampol blong olgeta i givim insperesen long yumi blong jenisim moa laef blong yumi i go long Jisas Kraes mo gospel blong Hem?

• ?Olsem wanem yu save givim insperesen long ol memba blong klas blong lego eni giaman kastom mo berem ol tul blong olgeta blong stap agens, semmak olsem Ol Antae-Nifae-Lihae oli bin mekem? Tingting blong luklukbak long Alma 23:5–7 tugeta. ?Wanem nao sam long ol gudfala tradisen we gospel i helpem yumi blong developem? Long taem blong yumi tedei, ?wanem nao i save ripresentem “ol tul blong faet” blong Ol Man Leman? ?Olsem wanem nao yumi save “berem olgeta dip long graon”? (Alma 24:17). Invaetem ol memba blong klas blong tingting hevi long wanem ol giaman kastom, o ol tul blong faet nao oli nidim blong lego i stap blong oli save stap laef mo fulwan folem gospel.

Alma 24:7–16

Tru long Atonmen blong Jisas Kraes, yumi save kasem fogivnes taem yumi sakem sin.

• Sapos Spirit i talem long yu blong toktok raon, insaed long klas, abaot fasin blong sakem sin, bae stori blong Ol Antae-Nifae-Lihae insaed long Alma 24 i wan eksampol blong insperesen we yu save yusum. Yu save givim wok long wanwan memba blong klas blong ridim wan ves long Alma 24:7–16 mo askem olgeta blong raetem wan samting, antap long bod, we oli bin lanem aot long ves blong olgeta, long saed blong fasin blong sakem sin. Afta, oli save lukluk gud long olgeta skripja ia blong oli faenem sam moa tingting abaot fasin blong sakem sin: Aesea 53:5–6; 2 Nifae 2:6–8; mo Mosaea 5:2.

Alma 24:13–15; 26; 29

Gospel i givim hop.

• Long Alma 23–29, toktok ia, “glad” i kamaot 24 taem, mo i mekem se olgeta japta ia oli wan gudfala ples blong lanem olsem wanem blong laef folem gospel—blong serem gospel—i stap tekem glad i kam. Yu save seraotem ol memba blong klas long ol grup mo askem wanwan grup blong luklukbak long sam long ol ves ia, mo lukluk long ol risen from wanem Amon, ol boe blong Mosaea, mo Alma, oli stap glad tumas: Alma 24:13–15; 26:12–22; mo 29:1–17. Ol memba blong klas oli save listimdaon long bod wanem we oli faenem. ?Wanem nao yumi lanem aot long ol ves ia abaot wei we gospel i stap tekem glad i kam long yumi?

• Presiden Russel M. Nelson i tijim: “Taem we, long laef blong yumi, yumi stap lukluk nomo long plan blong God blong fasin blong sevem man… mo Jisas Kraes mo gospel blong Hem, yumi save filim glad nomata wantem i stap hapen—o i no stap hapen—long laef blong yumi. Glad i kam long Hem mo from Hem. Hem i stamba blong evri glad” (“Joy and Spiritual Survival,” Ensign o Liahona, Nov. 2016, 82). Maet ol memba blong klas oli save serem ol eksperiens we i bin helpem olgeta blong andastanem trutok we i stap long ol toktok blong Presiden Nelson.

• Alma mo Amon, tufala i faenem bigfala glad blong stap serem gospel. Yu save invaetem ol memba blong klas blong faenem ol ves insaed long Alma 26 mo 29 we i save givim insperesen long wan yangfala blong hem i go long wan misin—o blong givim insperesen long eniwan blong serem gospel wetem ol narafala. Tingting blong givim sam minit blong ol memba blong klas oli mekem plan long wan samting we oli save mekem blong serem gospel. Invaetem olgeta blong tekem aksen i folem plan blong olgeta, mo long sam fiuja klas, yu save leftemap tingting blong olgeta blong tokbaot ol traehad blong olgeta.

• Taem Alma i bin helpem ol narawan blong sakem sin, oli mekem hem i tingbaot gudfala fasin blong God (luk long Alma 29:10–13). Maet yu save givim smol taem long ol memba blong klas blong oli stadi long olgeta ves ia mo oli raetem lis blong olgeta samting we Alma i tingbaot. ?Wanem nao i mekem yumi tingbaot gudfala fasin blong God? ?Long wanem wei nao yumi bin luk gudfala fasin blong God insaed long laef blong yumi?

Alma 26–27

Yumi save stap olsem ol tul long han blong God.

• Blong helpem ol memba blong klas blong oli lukluk gud se i minim wanem blong stap olsem “ol tul long han blong God” (Alma 26:3), yu save soem ol defren kaen tul we i stap. Yu save invaetem tu sam memba blong klas blong tekem sam tul we oli yusum. ?Olsem wanem ol tul ia oli save help? ?Olsem wanem nao yumi stap olsem ol tul insaed long wok blong God? Yu save invaetem ol memba blong klas blong faenemaot ol wei we Amon mo ol fren misinari blong hem oli bin ol tul long ol han blong God, (eksampol, luk long Alma 26:1–5, 11–12). ?Wanem nao yumi save lanem aot long Doktrin mo Ol Kavenan 4 abaot fasin blong stap olsem ol tul long han blong Hem? Ol memba blong klas oli save serem tu ol eksperiens taem oli filim glad ia we i kam taem oli stap olsem wan tul long ol han blong God.

Stap Leftemap Tingting blong Lanem Samting long Hom

Plante long ol giaman tingting we i lidim ol pikinini blong God oli go mestem rod tedei, oli bin stap tu long taem blong Alma. Talem long ol memba blong klas se Alma 30–31, bambae oli luk olsem wanem Alma mo ol narawan oli fesem olgeta giaman tijing ia.

Sam Moa Risos

Jenisim Laef i go long Lod.

Elda David A. Bednar i tijim:

“Stamba blong gospel blong Jisas Kraes i askem wan strong jenis we i stap, long fasin blong yumi tru long Atonmen blong Sevya. Tru fasin blong jenisim ol bilif, hat, mo laef blong wan blong hem i save akseptem mo folem tingting blong God (luk long Ol Wok 3:19; 3 Nifae 9:20) mo i tekem tu, fasin ia blong save komitim yumi, wetem ful tingting, blong kam wan disaepol blong Kraes.”

Afta we hem i kwotem Alma 23:6–8, Elda Bednar i gohed blong eksplenem:

“I gat tufala bigfala samting we oli tokbaot long ol ves ia: (1) save long trutok, we yu save talem se i testemoni, mo (2) jenisim laef i go long Lod, we mi mi andastanem se hem i taem yumi tanem yumi i go long Sevya mo gospel blong Hem. Long wei ia nao, taem yu joenem tugeta, testemoni mo jenisim laef i go long Lod, i mekem yu yu stap strong mo yu stanap strong mo yu gat proteksen long saed blong spirit.

“Oli neva foldaon i go lus mo oli bin putum daon ‘ol tul blong faet blong olgeta, we oli yusum taem oli tanem olgeta agensem man, blong oli no bin faet agensem God bakegen.’ Blong putum “ol tul blong faet’ we oli laekem tumas, olsem fasin blong stap selfis, hae tingting, mo fasin blong no stap obei, i nidim moa bitim jes fasin blong stap biliv mo save samting. Wanem i kam fastaem long hemia i, strong tingting we i winim evri samting, fasin blong putum tingting i stap daon, fasin blong sakem sin, mo save lisin; evri samting ia i kam fastaem long fasin blong lego ‘ol tul blong faet’ blong yumi. ?Yu mo mi i stil gat ol tul blong faet we i holemtaet yumi blong jenisim yumi i go long Lod? Sapos yes, yumi nid blong sakem sin naoia.

“Tekem not se Ol Man blong Leman, oli no jenisim laef blong olgeta i go long ol misinari we oli bin tijim olgeta, o long ol gudfala program blong Jos. Mo oli no jenisim laef blong olgeta i go long fasin blong ol lida blong olgeta, o long fasin blong holemtaet kalja blong olgeta, o kastom blong ol papa blong olgeta. Oli bin jenisim laef blong olgeta i go long Lod—long Hem olsem Sevya, mo long tabu fasin mo doktrin blong Hem—mo oli neva foldaon i go lus” (“Converted unto the Lord,” Ensign o Liahona, Nov. 2012, 107–9).

Stap Kam Antap long Fasin blong Yumi blong Stap Tij

Askem ol lida blong yu blong oli lidim yu. “Ol prishud mo okseleri lida blong yu oli wantem helpem yu blong win long laef. Askem kaonsel blong olgeta taem yu traehad, olsem wan tija, mo taem yu stap tingting hevi long ol nid blong olgeta we yu stap tijim” (Teaching in the Savior’s Way, 5).