wan man i stap prea

Ol Pikja i oli kam long Joshua Dennis

20–26 Julae.

Alma 36–38

“Yu Luk long God mo Stap Laef”

Taem yu stap rere blong tij, tingbaot se ol memba blong klas bae oli gat ol gud eksperiens wetem Alma 36–38. ?Wanem nao yu save mekem blong bildimap olgeta antap long ol eksperiens ia?

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Wan wei blong leftemap tingting blong ol memba blong klas blong serem wanem we oli stap lanem insaed long ol skripja, hem i blong serem olgeta i go long tri grup, mo givim wok long wanwan blong ridim wan japta aot long Alma 36–38. Invaetem wanwan grup blong faenem mo serem wan ves we i givim insperesen aot long japta we oli bin ridim.

tijing pikja bokis

Stap Tijim Doktrin

Alma 36

Yumi save bon long God taem yumi putum tingting i stap daon mo sakem sin.

• Sam memba blong klas blong yu, maet oli stap askem olgetawan se from wanem oli neva gat wan bigfala samting we i hapen long taem oli bin jenisim laef blong olgeta, semmak olsem Alma. Bae i save helpem olgeta sapos yu serem wanem we Elda David A. Bednar i bin tijim: “Long plante long yumi, fasin blong jenisim laef i wan samting we i gogohed, i no wan samting we i hapen long wan taem nomo we i mekem se yu gat wan bigfala samting i hapen long laef blong yu” (“Converted unto the Lord,” Ensign o Liahona, Nov. 2012, 107–8). I nomata se sam samting long eksperiens blong Alma taem hem i jenisim laef, oli no hapen evri taem, eksperiens blong hem i stap tijim ol prinsipol we yumi evriwan i nidim blong yusum blong yumi gogohed blong stap jenisim laef blong yumi. Yu save invaetem ol memba blong klas blong luklukgud insaed long Alma 36 blong faenem olgeta prinsipol mo listim olgeta antap long bod. ?Wanem moa i bin helpem yumi blong jenisim laef blong yumi i go long gospel blong Jisas Kraes?

• Alma i bin yusum toktok ia, “bon long God” blong tokbaot jenis ia long laef. Blong helpem ol memba blong klas blong oli andastanem tingting ia, yu save invaetem olgeta blong ridim olgeta ves ia, oli save rid wanwan o tutu, mo lukaotem wanem i minim blong bon long God: 1 Jon 4:7; Mosaea 5:7; 27:25–26; mo Alma 5:14; 22:15. Askem ol memba blong klas blong serem wanem we oli bin lanem. Afta, oli save luklukgud insaed long Alma 36, oli lukaotem ol ansa long kwestin ia: ?Olsem wanem nao ol pipol oli filim mo mekem samting taem oli bon long God? Blong helpem ol memba blong klas blong oli tingting hevi long hao nao oli bon long God, yu save serem toktok ia blong Presiden Esra Taf Benson, we i stap long “Sam Moa Risos.”

Alma 37

Olgeta skripja, oli bin holemtaet olgeta “from wan waes stamba tingting.”

• Maet blong stadi long ol toktok we Alma i talem taem hem i stap givim ol histri ia long boe blong hem, Hileman, bae i save helpem ol memba blong klas blong serem olsem wanem oli bin filim paoa blong ol skripja insaed long laef blong olgeta. Leftemap tingting blong olgeta blong luklukbak long Alma 37 blong faenem ol mesej we Alma i bin givim long Hileman abaot ol skripja (speseli luk long ol ves 1–19 mo 43–47). Olsem wanem nao yumi soem se, long yumi, ol skripja oli tabu? ?Olsem wanem nao, yumi, semmak olsem Alma, i save tijim olgeta we yumi lavem blong oli “kipim ol samting ia oli tabu”? (Alma 37:2). ?Olsem wanem nao ol skripja oli “soem paoa blong [God]” long yumi? (Alma 37:14).

• Wan wei blong lanem abaot ol blesing blong gat ol skripja, hem i blong stadi long wanem Alma i bin talem long Alma 37 abaot ol tabu histri mo ol nara samting we hem i putum i stap long han blong Hileman. Yu save mekem wan lis antap long bod, blong ol tabu samting ia: ol buk blong Nifae mo ol buk we oli wokem long bras (Alma 37:2–20), olgeta twantefo buk blong Ita mo ol intepreta (Alma 37:21–37), mo Liahona (Alma 37:38–47). Ol memba blong klas oli save ridim olgeta ves ia blong lanem wanem we Alma i bin tijim abaot wanwan long ol samting ia. ?Long wanem wei nao ol skripja oli save mekem memori blong yumi i kam bigwan? (luk long Alma 37:8). ?Wanem nao yumi save lanem aot long ol toktok blong Alma abaot ol blesing blong gat ol skripja insaed long laef blong yumi tedei?

  woman i stap ridim ol skripja

  Ol skripja oli tijim yumi olsem wanem blong folem God.

Alma 37:6–7, 41–42

“Tru long ol smol mo simpol samting, ol bigfala samting oli kam blong hapen.”

• Blong tijim abaot hamas “ol smol mo simpol samting” long wok blong God oli impoten, Alma i givim tufala eksampol ia: ol skripja mo Liahona (luk long Alma 37:6–7, 41–42; luk tu long 1 Nifae 17:41). Afta we oli luklukbak long olgeta eksampol ia, maet ol memba blong klas oli save serem sam samting we i kamaot long laef blong olgeta nomo, abaot ol smol mo simpol samting insaed long wok blong God. Maet yu wantem blong kontaktem wan o tu memba blong klas longtaem bifo klas, mo askem olgeta blong tekem wan samting i kam long klas, we i smol, mo i bin mekem plante bigfala samting insaed long laef blong olgeta. Yu save serem toktok we i kam long Presiden Dallin H. Oaks we i stap long “Sam Moa Risos.” Blong helpem ol memba blong klas blong yu blong mekem prinsipol ia i kam long olgetawan, yu save askem ol kwestin olsem ia: ?From wanem nao, samtaem, yumi no stap mekem ol smol mo simpol samting ia? ?Olsem wanem yumi save givim insperesen long yumiwan mo ol famli blong yumi blong winim kaen fasin ia?

Alma 37:38–47

Ol toktok blong Kraes oli save lidim yumi, dei afta dei.

• Sapos yu komperem toktok blong God long Liahona, yu save givim insperesen long ol memba blong klas blong oli wok strong moa mo oli gat moa fasin ia blong stap ridim ol skripja. Blong lidim wan toktok raon long hemia, yu save invaetem ol memba blong klas blong ridim Alma 37:38–47; oli save stap tutu blong ridim mo lukaotem ol semfala samting bitwin Liahona mo toktok blong God. Maet yu save givim jalenj long olgeta blong faenem wan samting we i semmak long wanwan ves we i stap. Afta, yu save raetem wanwan namba blong ves antap long bod, mo askem ol memba blong klas blong raetem long saed blong ol namba, ol samting we oli semsemmak, we oli faenem. Taem yumi stap komperem ol samting ia, ?hem i stap talem wanem long yumi abaot wei we yumi sapos blong lukluk o mekem skripja stadi?

Alma 38

Taem yumi serem testemoni blong yumi abaot Jisas Kraes, hem i save mekem olgeta we yumi stap lavem oli kam strong moa.

• Toktok blong Alma long boe blong hem, Siblon, i givim wan gudfala eksampol long wei blong mekem olgeta we yumi lavem, oli kam strong moa blong laef folem gospel, mo tu, blong yumi leftemap tingting blong olgeta blong laef folem gospel. Mebi ol memba blong klas oli save ridim japta ia mo faenemaot olsem wanem Alma i mekem Siblon i kam strong moa. Alma 38 i wan sot japta—yu save disaed blong ridim ful japta olsem wan klas. Afta, ol memba blong klas oli save serem ol ples we oli faenem se oli gat mining, o i givim olgeta ol aedia blong mekem famli blong olgetawan, mo ol fren oli kam strong moa.

lanem samting pikja bokis

Stap Leftemap Tingting blong Lanem Samting long Hom

?Olsem wanem? ?Ol memba blong klas oli tingting finis long wei blong givim advaes long wan we oli lavem we i bin mekem wan bigfala mistek? Eksplenem se bae oli faenem ol niu tingting we bae i helpem olgeta insaed long Alma 39–42.

risos pikja bokis

Sam Moa Risos

Fasin blong jenisim laef i olsem we yu bon bakegen.

Presiden Esra Taf Benson i bin tijim: “Taem yumi gotru wan bigfala jenis, we i save kam nomo tru long fet long Jisas Kraes, mo tru long wok blong Spirit long yumi, hem i olsem se yumi kam wan niu man o wan niu woman. From hemia, jenis ia i olsem we yu bon bakegen. Plante long yufala i gotru long jenis ia. Yu lego fogud, laef ia blong stap mekem sin, samtaem ol sin we oli bigwan, we i mekem man i harem nogud tumas, mo tru long fasin blong yusum blad blong Kraes insaed long laef blong yumi, yumi kam klin. Yu nomo wantem nating blong gobak long ol olfala rod blong yu. Wanem i ril i we yu yu wan niu man, o wan niu woman. Hemia nao wanem i minim blong gat wan jenis long hat” (“A Mighty Change of Heart,” Ensign, Oct. 1989, 4).

Ol smol mo simpol samting.

Presiden Dallin H. Oaks i tijim:

“Lod i rimaenem mi long paoa blong ol smol mo simpol samting ova long plante taem, tru long wan samting we mi bin luk long wan moning wokbaot. Tik mo strong simen ples blong wokbaot ia i stat blong brokbrok. ?Hemia i risal blong sam bigfala mo strong fos? No, i brokbrok from sloslo, smol rus blong ol tri long saed i stap kamaot.

“I semmak wetem strong paoa, ova wan longfala taem, blong ol smol mo ol simpol samting we ol skripja, mo tu, ol profet we oli stap laef, oli tijim yumi. Tingting long skripja stadi we oli tijim yumi blong putum insaed long evri dei laef blong yumi. O tingting long prea blong yuwan, mo nildaon long famli prea, we i nomol praktis blong ol fetful Ol Lata-dei Sent. Nomata se wanwan long ol praktis ia, bae yumi luk se oli smol mo simpol, ova long longfala taem, oli kamaot olsem ol strong paoa long spirit, blong leftemap yumi mo mekem yumi gro. Hemia i hapen from se wanwan long ol smol mo simpol samting ia i stap invaetem kampani blong Tabu Spirit, Man we I Testifae, we i givim moa laet, mo i soem rod long yumi i go long trutok” (“Ol Smol mo Simpol Samting,” Ensign o Liahona, Mei 2018, 89).

Stap Kam Antap long Fasin blong Yumi blong Stap Tij

Invaetem olgeta we oli stap lanem samting blong oli stap tij tijim wanwan long olgeta bakegen. Taem ol memba blong klas oli serem testemoni blong olgeta, o oli serem sam niu tingting, bae oli save tajem o givim insperesen long wan nara memba blong klas long wan wei we bae yu yu no save mekem. (Luk long Teaching in the Savior’s Way,30