Jisas mo Meri

Woman, ?Yu Yu Krae From Wanem? i kam long Mark R. Pugh

27 Julae–2 Ogis

Alma 39-42

“Bigfala Plan blong Hapines”

Ol tijing blong Alma long Alma 39-42 oli rij long doktrin mo oli mekem ol impoten trutok oli kam klia. Taem yu stap stadi long ol japta ia, tingting hevi long wijwan trutok nao bae i gat moa mining long klas blong yu, mo wanem nao yu save mekem blong helpem olgeta blong faenemaot ol trutok ia.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Blong helpem ol memba blong klas blong serem ol tingting mo ol niu tingting abaot Alma 39–42, yu save Invaetem olgeta blong oli luklukbak long ol japta ia mo raetem wan samting we Alma i bin talem o mekem we i bin tajem olgeta.

tijing pikja bokis

Stap Tijim Doktrin

Alma 39

Sin long saed blong seks i wan rabis sin long ae blong Lod.

• ?Wanem nao yumi save lanem aot long eksperiens blong Korianton wetem sin mo fasin blong sakem sin? Maet ol memba blong klas oli save ridim Alma 39:1–14, mo sam long olgeta oli stap lukaotem wanem nao Korianton i mekem we i rong, mo ol narawan oli lukaotem wanem i lidim hem blong mekem sin, mo ol narawan moa oli lukaotem kaonsel we Alma i bin givim long hem. Taem oli stap serem wanem we oli bin faenem, oli save toktok raon blong faenemaot olsem wanem nao yumi save stap longwe blong mekem ol semmak mistek.

• Taem ol pipol oli mekem ol sin long saed blong seks, plante taem, oli gat oli filim blong slakem tingting, o oli nomo gat hop, mo oli filim se oli no impoten tumas. ?Wanem ol prinsipol insaed long Alma 39–42 we i givim insperesen long ol memba blong klas blong filim hop ia we i lidim man long fasin blong sakem sin? Sapos yu serem toktok ia blong Sista Joy D. Jones insaed long “Sam Moa Risos” i save helpem ol memba blong andastanem wanem i defren bitwin fasin blong stap klin inaf, mo hamas nao yumi impoten long ae blong God. (luk long Lynn G. Robbins, “Fogivim Hem Olwe Gogo I No Save Finis,” Ensign o Liahona, Mei 2018, 21–23.)

• Olsem pat blong toktok insaed long klas, bae i help blong ol memba blong klas oli toktok raon long ol standet blong Lod long saed blong loa blong jastiti. Toktok blong yufala raon long topik ia bae i help moa sapos hem i lukluk moa long ol prinsipol, be i no wan lis blong ol samting blong mekem, o blong no mekem. Eksampol: yu save stat mo invaetem ol memba blong klas blong oli faenem ol prinsipol we Alma i bin tijim Korianton long Alma 39. Antap long hemia, oli save luklukbak long “Stap Klin long Saed blong Seks” insaed long buklet Blong Ol Yut Oli Kam Strong wetem ol kwestin ia i stap long maen blong olgeta: “Sapos bae yu mas talem sot evriwan long ol kaonsel ia wetem wan prinsipol, ?bae i wijwan prinsipol?” o, ?Wanem prinsipol nao yu faenem long ples ia we i stap helpem yu blong laef folem loa blong jastiti?” Ol memba blong klas oli save luklukbak long seksen ia insaed long smol buk ia, Blong Ol Yut Oli Kam Strong, mo lukaotem ol blesing blong stap laef folem loa blong jastiti mo ol risal blong no stap obei long loa ia. ?Olsem wanem ol prinsipol ia oli defren long wanem we wol i stap tijim? ?Olsem wanem ol prinsipol ia oli jenisim wei we yumi tingting abaot loa blong jastiti? Klas blong yu bae i save lanem moa taem oli ridim toktok blong Sista Wendy Nelson we i stap long “Sam Moa Risos” taem oli stap ansarem ol kwestin ia.

• Samtaem, hem i isi blong biliv se joes blong yumi i no jenisim laef blong ol narawan—se sin blong yumi, oli praevet, oli blong yumi nomo. ?Wanem nao Alma i tijim Korianton long Alma 39:11–12 abaot wei we ol joes blong hem i tajem ol narafala pipol? Invaetem ol memba blong klas blong tingting hevi long joes we oli stap mekem, mo hu nao ol joes ia oli stap tajem olgeta, long gud wei mo long nogud wei. Oli save serem tu olsem wanem aksen mo eksampol blong ol narawan oli bin helpem olgeta blong oli jusum raet.

Alma 40–42

Atonmen blong Jisas Kraes i mekem plan blong fasin blong pemaot man i posibol.

• Alma i bin tijim Korianton long saed blong ol trutok we yumi evriwan i nidim blong andastanem, hemia wetem ol trutok long saed blong stamba tingting blong laef, spirit wol, laef bakegen long ded, mo jajmen. Tingting blong pikimap wan long ol tijing blong Alma mo givim tu minit long ol memba blong klas blong luklukgud insaed long Alma 40–42 (wanwan o tutu) mo raetemdaon evri trutok we oli save faenem abaot topik ia. Afta, ol memba blong klas oli save serem wetem wanwan long olgeta, o wetem klas, wanem we oli bin faenem. Yu save ripitim hemia long ol nara topik, sapos i gat taem. ?From wanem ol trutok ia oli impoten long boe blong Alma, Korianton, blong hem i mas andastanem?

• Wanem we Alma i tokbaot abaot weaples sol blong ol man oli stap long hem afta long laef ia, i save pusum maen blong ol memba blong klas blong tingting long hamas i impoten blong go kolosap long Sevya, mo hamas i impoten blong stap sakem sin long laef ia. Yu save raetem Stret mo Gud (we i stap sakem sin) mo Nogud (we i no stap sakem sin) antap long bod, mo invaetem ol memba blong klas blong luklukgud insaed long Alma 40:11–26 mo raetem long bod ol toktok, o ol sentens we Alma i stap yusum blong tokbaot wanem i hapen long wanwan long ol grup blong ol pipol ia afta we oli ded. ?Olsem wanem ol tijing ia oli givim insperesen long yumi blong sakem sin? Blong save moa abaot wanem i stap hapen long spirit wol, luk long 1 Pita 3:18–20; 4:6 mo Doktrin mo Ol Kavenan 138:29–37.

• ?Wanem nao i stap kam long maen blong ol memba blong klas blong yu taem oli harem toktok ia, “putumbak,” o “restoresen”? Invaetem olgeta blong luklukgud insaed long Alma 41 mo luk olsem wanem nao Alma i bin yusum ol toktok ia. ?Wanem nao hem i minim blong talem tru long ol toktok ia? ?Wanem nao bae oli putumbak long yumi? ?From wanem nao bae i help blong luk long plan blong Papa long Heven olsem wan “plan blong putumbak ol samting long stret ples we oli bin stap long hem bifo”? (ves 2).

• Sam memba blong klas blong yu oli save gat sem kwestin we i bin stap long maen blong Korianton—?bae i stret o i gud blong wan God we i gat lav blong i panisim ol pikinini blong Hem? (Luk long Alma 42:1). Mebi yu save askem ol memba blong klas blong tingting hevi long hao nao bae oli ansarem kwestin ia, mo blong oli lukaotem ol ansa long Alma 42:7–26.

• Sapos yu filim se i stret, ol memba blong klas blong yu bae oli lanem moa sapos oli faenem wan ves insaed long Alma 42 we oli save soem tru long wan droing, o simbol we i eksplenem from wanem yumi nidim Atonmen blong Sevya. Ol memba blong klas oli save serem wanem we oli bin droem, mo haf blong klas oli save traem faenem ves ia we oli bin droem. Afta, oli save toktok raon long wanem oli bin lanem abaot hamas sakrifaes blong Sevya i impoten.

  woman i stap prea

  Yumi save kasem wan testemoni abaot Jisas Kraes olsem Sevya blong yumi.

risos pikja bokis

Sam Moa Risos

Praes blong sol blong yumi i bigbigwan tumas.

Sista Joy D. Jones i bin tijim:

Mi mas talem se i nid blong mi soem wanem i defren bitwin tufala impoten toktok ia: valiu o “worth” long Inglis, mo fasin blong stap klin inaf, o “worthiness” long Inglis. Tufala i no semmak. Blong gat valiu long saed blong spirit i minim blong tekem yuwan i impoten, semmak olsem we Papa long Heven i tekem se yu impoten, be i no olsem we wol i tekem yu i impoten. Valiu blong yumi, oli putum finis bifo yumi kam long wol ia. ‘Lav blong God i no gat en mo bae i stap blong oltaem.’

Long nara saed, fasin blong stap klin inaf i kam tru long fasin blong stap obei. Sapos yumi sin, yumi no klin inaf evriwan, !be yu gat valiu i stap! Yumi gohed blong sakem sin mo wokhad blong kam olsem Jisas wetem valiu blong yumi we i stap nomo. Olsem we Presiden Brigham Yang i tijim: ‘Wan spirit we i no strong, we i no gat paoa long wol ia …, valiu blong hem i semmak long olgeta blong wol.” Nomata wanem, yumi oltaem gat valiu long ae blong Papa long Heven. (“Valiu we I Bitim Praes blong Pem,” Ensign o https://www.ChurchofJesusChrist.org/general-conference/2017/10/value-beyond-measure?lang=bis, Okt 2017).

Olsem wanem wol i stap lukluk praevet laef blong wan man mo woman, i no go stret wetem tingting blong God.

Sista Wendy Nelson i talem mo komperem olsem wanem wol i stap lukluk long fasin blong gat seks—“seks long fasin blong wol”—wetem wanem hem i singaotem “seks insaed long mared we God i odenem”:

Wetem seks long fasin blong wol, eni samting i oraet nomo. Wetem seks insaed long mared, man i mas lukaot gud blong stap longwe long eni samting mo evri samting—stat long lanwis i go kasem miusik, i go kasem ol muvi—we i mekem Spirit i harem nogud, i mekem spirit blong yu i harem nogud, o i mekem waef o hasban i harem nogud.

“Seks long fasin blong wol i folem rabis tingting, i kilimded lav, be long narasaed, seks insaed long mared i mekem se i gat moa lav.

“Seks long fasin blong wol i daonem ol man, mo ol woman, mo bodi blong olgeta, be seks insaed long mared, i givim ona long man, mo ol woman, mo i selebretem bodi, i tekem se bodi i wan long ol bigfala praes blong laef long wol ia.

“Wetem seks long fasin blong wol, wanwan man o woman, i filim se oli yusum hem, oli abiusum hem, mo long en, man o woman i filim se hem i stap hemwan. “Wetem seks insaed long mared, waef mo hasban i filim se oli moa wan, mo oli lavlavem tufala moa, mo oli fidim tufala moa, mo oli andastanem wanwan long tufala moa.

“Seks long fasin blong wol, i swipim, mo long en, i prapa spolem gud ol rilesensip. “Seks insaed long mared i mekem ol mared oli kam strong moa. Hem i sapotem, i hilim, mo mekem laef blong hasban mo waef, mo mared blong tufala, i kam moa klin mo tabu. …

“Seks long fasin blong wol, i kam wan samting we i prapa spolem hed blong man, from se i neva mekem wan promes i kamtru. Seks insaed long mared we God i odenem, i gat glori long hem, mo bae i gohed blong taem we i no save finis, hemia blong olgeta hasban mo waef we oli kipim kavenan blong olgeta (“Love and Marriage” [wol divosen, 8 Jen 2017], broadcasts.ChurchofJesusChrist.org).

Stap Kam Antap long Fasin blong Yumi blong Stap Tij

Rere fastaem. Taem yu tingting hevi long olsem wanem nao ol gospel prinsipol we yu stap tijim i save blesem ol memba blong klas blong yu, ol tingting mo ol filing bae i kam long yu evri dei truaot long evri dei laef blong yu—taem yu stap travel i go long wok, taem yu stap mekem ol wok long haos, o stap wetem ol famli o ol fren. Yu no tekem se blong rere long saed blong spirit se i wan samting we yu mas mekem taem from, be tekem se i wan samting we yu stap mekem oltaem” (Teaching in the Savior’s Way, 12).