ol wef we oli brok long ston

17–23 Ogis

Hileman 1–6

“Strong Ston blong Ridima blong Yumi”

?Yu yu rili save se huia i stap long klas blong yu? Traem blong kam blong save gud moa, wan memba blong klas, evri wik. Taem yu mekem olsem, yu save kam blong save kipim nid blong olgeta i stap long maen blong yu taem yu stap rere blong tij.

Raetemdaon Ol Filing mo Tingting blong Yu

serem pikja bokis

Invaetem Ol Man blong Serem Wanem Oli Gat

Tingting blong invaetem ol memba blong kam long ol miting, we oli rere blong kam wetem wan samting we oli save yusum blong tij abaot wan prinsipol we oli bin lanem long ol japta ia. ?Wanem nao samfala wei we yumi save tijim ol prinsipol ia long ol narawan?

tijing pikja bokis

Stap Tijim Doktrin

Hileman 1–6

Hae tingting i seperetem yumi long Spirit mo long paoa blong Lod.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i tokbaot wan “raon rod blong hae tingting” we i spolem Ol Man blong Nifae. Maet i gat wan long klas we i save mekem jat blong raon rod ia antap long bod. Ol memba blong klas oli save faenem ol ves insaed long Hileman 1–6 we oli filim se oli soem ol defren pat blong raon rod ia, mo oli raetem olgeta long saed blong ol pat ia long jat ia. (Sapos ol memba blong klas oli nidim help, yu save talem olgeta blong lukluk insaed long Hileman 3:24–36; 4:11–26.) ?Weswe? ?Yumi tu, samtaem, yumi olsem Ol Man blong Nifae? ?Olsem wanem nao yumi save stap longwe long fasin blong olgeta blong gat hae tingting? Yu save serem tu samfala pat blong “Chapter 18: Beware of Pride” (Teachings of Presidents of the Church: Ezra Taft Benson [2014], 229–40).

  Raon rod blong hae tingting

  “Raon rod blong hae tingting.”

• Yu save invaetem ol memba blong klas blong ridim Hileman 4:13 mo 24–26 mo faenem wan hym we i stap tijim yumi se yumi mas dipen long God; wan hym olsem “Mi Nidim Yu Oltaem” (STSP, pej 12). ?From wanem nao fasin blong gat hae tingting i seperetem yumi long God? ?Olsem wanem yumi save luksave se yumi mas dipen long God? Ol memba blong klas oli save serem ol eksperiens blong olgeta long wei we Spirit mo paoa blong Lod i bin mekem olgeta oli kam strong moa from se oli bin putum tingting blong olgeta i stap daon.

• Ol memba blong Jos we oli tokbaot olgeta long Hileman 3:33–34, oli bin stap mekem nogud long ol nara memba blong Jos. From hae tingting blong olgeta, oli bin mekem i nogud long olgeta we oli pua, mo oli bin mekem eni kaen blong ol nara sin (luk long Hileman 4:11–13). Tingting blong ridim tugeta Hileman 3:33–34 mo 4:11–13 mo askem ol memba blong klas blong toktok raon long ol wei we yumi save soem moa kaen fasin mo respek long ol narawan, mo hemia i tekem tu ol nara memba blong klas we oli defren long yumi. Yu save invaetem tu ol memba blong klas blong oli tingting long wan we oli save, we i stap safa from sam pipol oli mekem nogud long olgeta, mo tingting hevi long olsem wanem nao bae oli help blong leftemap tingting mo mekem man o woman ia i kam strong moa.

Hileman 3:33–35

Blong kam tabu, hem i taem yumi givim hat blong yumi long God.

• Hileman 3:33–35 i save givim plante kamfot long olgeta, insaed long klas blong yu, we oli stap gotru long “ol bigfala hadtaem” (ves 34). Yu save invaetem ol memba blong klas blong stadi gud long ol ves ia blong faenem advaes we oli save givim long wan we i stap fesem plante hadtaem. O mebi ol memba blong klas oli save serem olsem wanem oli bin faenem “glad mo fasin blong leftemap tingting blong harem gud bakegen,” long taem blong hadtaem, taem oli bin mekem olgeta samting we oli tokbaot long ves 35.

• Tingting blong invaetem klas blong stadi long Hileman 3:33–35 mo ol toktok mo ol refrens abaot fasin blong kam tabu we oli stap long “Sam Moa Risos.” ?Wanem nao ol ves mo toktok ia oli stap tij long saed blong fasin blong kam tabu? ?Olsem wanem fasin blong livim kakae mo prea oli tekem olgeta blesing oli kam, olsem we oli tokbaot long Hileman 3:35? ?Olsem wanem nao yumi givim hat blong yumi long God? (Luk long Hileman 3:35). ?Olsem wanem nao hemia i helpem yumi blong kam tabu? Yu save rere mo serem ol pis pepa wetem wan long ol toktok o refrens we oli stap long “Sam Moa Risos” we yu raetem long ol pepa ia; afta invaetem ol memba blong klas blong pikimap wan blong stadi long hem. Afta, oli save serem wanem we oli bin lanem abaot fasin blong kam tabu wetem wanwan long olgeta.

Hileman 5:12

Sapos yumi mekem Jisas Kraes i fandesen blong yumi, yumi no save foldaon.

• Setan i stap sendem “ol strong win” blong hem insaed long laef blong yumi evriwan. I gat plante pipol insaed long klas blong yu we oli gotru long hemia finis, mo i gat moa strong win we bae oli kam yet long fiuja. ?Wanem nao yu save mekem blong helpem ol memba blong klas blong oli rere from ol strong win ia taem oli bildim laef blong olgeta long Jisas Kraes?

  Blong statem toktok insaed long klas, yu save soem ol pikja blong ol tempol, o ol nara bilding, mo komperem laef blong yumi long wan bilding. ?Wanem joes nao wan man blong bildim haos i mas mekem? ?Wanem joes nao yumi mekem we i jenisim fasin we yumi stap bildimap laef blong yumi? Afta, yufala i save ridim Hileman 5:12 tugeta, mo toktok raon long wanem nao mining blong bildimap laef blong yumi long Jisas Kraes. ?Olsem wanem nao we taem yumi gat Hem olsem fandesen blong yumi, i lidim ol nara joes we yumi mekem taem yumi stap bildimap laef blong yumi?

  Ol memba blong klas oli save serem olsem wanem nao we, taem oli gat Sevya olsem fandesen blong olgeta, i bin helpem olgeta blong stanap agensem ol strong win blong laef. Givim taem long ol memba blong klas blong oli tingting hevi long kaen laef we oli stap bildim, mo olsem wanem oli save meksua se oli stanap strong long Kraes. Stori abaot Sol Lek Tempol we i stap long “Sam Moa Risos,” i save help blong gat toktok insaed long klas.

Hileman 5:14–50

Fet blong yumi i kam strong moa tru long “ol bigfala pruf we yumi bin kasem.”

• Wan long ol blesing blong kam tugeta long Sandei Skul, hem i janis blong mekem fet blong wanwan long yumi i kam strong moa—semmak olsem Ol Man blong Leman oli bin mekem, we yumi save ridim long Hileman 5:50. Maet yufala i save ridim Hileman 5:50 tugeta, mo askem klas blong faenemaot “ol samting we [Ol Man blong Leman] oli bin harem mo luk” we oli stap long ol ves 20 kasem 49. Afta, ol memba blong klas oli save serem wetem wanwan long olgeta sam long ol eksperiens long saed blong spirit, we i bin winim tingting blong olgeta se gospel i tru—iven sapos oli no bin luk ol enjel, o ol longfala faea we i stat antap i kam daon. ?Wanem pruf we i winim tingting blong olgeta se gospel blong Jisas Kraes i kambak long wol ia?

lanem samting pikja bokis

Stap Leftemap Tingting blong Lanem Samting long Hom

Hileman 7–12 i tokbaot olsem wanem Nifae i winim tras blong Lod, mo i kasem bigfala paoa. Yu save givim tingting long klas blong yu se, taem oli ridim ol japta ia, oli save lanem olsem wanem blong kasem moa tras blong God insaed long laef blong olgeta.

risos pikja bokis

Sam Moa Risos

Kam tabu tru long Jisas Kraes.

• Fasin blong mekem i kam tabu, “ i rod ia blong mekem wan i kam fri long sin, i klin gud, i klin, mo i tabu tru long Atonmen blong Jisas Kraes ” (Gaed long Ol Skripja, “Tabu, Fasin blong mekem i kam,” scriptures.churchofjesuschrist.org).

• “Taem yumi sakem sin tru, bae Kraes i tekemaot samting ia we i hevi long yumi, we yumi stap filim rong from ol sin blong yumi. Yumi save kam blong save, yumiwan, se Hem i bin fogivim yumi, mo i bin mekem yumi kam klin. Tabu Spirit bae i talemaot hemia long yumi; Hem i Man we i Mekem Man i Kam Tabu. I no gat wan nara testemoni abaot fogivnes we i hae moa” (Dieter F. Uchtdorf, “Point of Safe Return,” Ensign o Liahona, May 2007, 101).

• “Blong kam tabu tru long blad blong Kraes, hem i blong kam klin, kam klin gud, mo tabu. Sapos jastis i karemaot panismen blong ol sin we oli pas finis, nao fasin blong mekem man i kam tabu i karemaot mak o risal blong sin” (D. Todd Christofferson, “Justification and Sanctification,” Ensign, June 2001, 22).

• “Taem we tingting, ol strong filing, mo ol filing blong wan man o woman, oli folem fulwan tingting blong God mo wanem Hem i putum se wan i mas mekem, nao man o woman ia, i kam tabu” (Brigham Young, “Discourse,” Deseret News, Sept. 7, 1854, 1).

• Paoa blong Tabu Spirit i mekem yumi kam tabu from Atonmen blong Jisas Kraes (luk long Hibrus 13:12; Alma 13:10–12; 3 Nifae 27:19–20; Moronae 10:32–33; D&K 76:40–42).

• Iven afta we oli bin mekem yumi kam tabu, hem i posibol yet blong foldaon, blong kamaot long tabu gladhat blong Hem (luk long D&K 20:30–34).

Wan sua fandesen.

Long taem we oli stap bildim Sol Lek Tempol, ol ston fandesen we i bin stap, oli faenem se i gat bigfala ples we oli brokbrok i stap. Iven we i bin tekem kolosap naen yia blong kasem ples we oli stap long hem, Presiden Brigham Yang i talem se ol ples blong fandesen we oli brokbrok, bae oli karemaot mo bae oli putum ol ston we kwaliti blong olgeta i moa gud. I tekem wan nara faef yia blong karemaot fandesen ia we i nogud, mo bildimap bakegen wan stat long stat bakegen. Presiden Yang i talem: Mi wantem luk se tempol ia, oli mas bildim blong hem i mas stanap i go kasem taem blong mileniom (“Remarks,” Deseret News, 14 Okt 1863, 97).

Stap Kam Antap long Fasin blong Yumi blong Stap Tij

Talem testemoni blong yu abaot Jisas Kraes. Aminadab i no filim se hem, hem i wan man we i kwalifae gud blong tijim Ol Man blong Leman blong sakem sin mo gat fet long Kraes (luk long Hileman 5:35–41). Be hem i bin serem wanem we hem i bin save, mo testemoni blong hem i bin tajem plante. ?Wanem nao yu lanem aot long eksampol blong hem?