“3–9 Ogis. Alma 43–52: ‘Stanap Strong long Fet long Kraes,’” Kam Folem Mi—Blong Sandei Skul: Buk blong Momon 2020 (2020)
“3–9 Ogis. Alma 43–52,” Kam Folem Mi—Blong Sandei Skul: 2020
From Ol Blesing blong Fridom, i kam long Scott M. Snow
3–9 Ogis
Alma 43–52
“Stanap Strong long Fet long Kraes”
Luklukbak long ol aktiviti we oli putum i stap long ples ia, mo tu, lukaotem insperesen blong yuwan taem yu stap stadi wetem prea long Alma 43–52 mo tingting long wei blong helpem ol memba blong klas blong faenemaot doktrin we oli stap tijim.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Blong invaetem ol ol memba blong klas blong serem wanem we oli stap lanem aot long Alma 43–52, yu save askem olgeta olsem wanem bae oli ansa long wan we i talem: “Mi jes no luk nomo olsem wanem ol wo insaed long Buk blong Momon oli go wetem laef blong mi tedei.”
Stap Tijim Doktrin
Ol faet insaed long Buk blong Momon, oli tijim yumi abaot ol faet blong yumi agensem ivel.
-
Insaed long stadi blong olgetawan mo wetem famli long wik ia, ol memba blong klas oli save tingting hevi, o oli save raetemdaon ol tingting blong olgeta long saed blong hao nao Ol Man blong Nifae oli bin difendem olgeta agensem Ol Man blong Leman, mo olsem wanem nao Ol Man blong Leman oli bin faet agensem Ol Man blong Nifae. Sapos ol memba blong klas oli bin mekem hemia long hom blong olgeta, invaetem olgeta blong serem wanem oli bin faenem. O, yu save givim taem long ol memba blong klas blong faenem ol niu tingting ia long taem blong klas, mo semtaem yusum ol skripja olsem ol skripja ia we oli stap long aotlaen blong wik ia insaed long Kam Folem Mi—Blong Wanwan Man, Woman mo Famli. Taem ol ol memba blong klas oli serem wanem we oli faenem, leftemap tingting blong olgeta blong toktok raon long, hao nao, yumi save folem eksampol blong Ol Man blong Nifae blong stap difendem yumiwan agensem ivel, mo olsem wanem nao yumi save luksave ol atak long saed blong spirit we Setan i stap mekem agensem yumi.
Sapos yumi stap gat strong paoa long tingting blong stap difendem fet blong yumi, bambae yumi givim insperesen long ol narawan blong stap fetful.
-
?Olsem wanem nao yu save helpem ol memba blong klas blong folem eksampol blong Moronae blong gat strong paoa long tingting blong stap difendem fet blong olgeta insaed long gospel we i kambak we i gospel blong Jisas Kraes. Ol memba blong klas oli save rid long Alma 46:11-22 blong faenem wanem Moronae i bin mekem, mo wanem hem i bin tijim we i bin givim insperesen long ol pipol blong hem blong oli stap moa fetful. Yu save raetem ol samting ia antap long bod andanit long heding ia, Eksampol blong Moronae. Afta, yu save askem ol memba blong klas blong tingting hevi long ol aksen blong Moronae mo givim sam tingting long wanem yumi save mekem tedei blong save difendem ol bilif blong yumi. Yu save raetem ol niu tingting blong olgeta andanit long heding ia Gat Strong Paoa long Tingting blong Difendem Gospel Tedei. ?Wanem trutok mo valiu nao profet blong yumi i bin tijim yumi i no longtaem, we yumi save tijim mo difendem tu?
-
?Olsem wanem nao yu save helpem ol memba blong klas blong yu blong oli praktisim wanem Moronae i bin mekem wetem taetol blong fridom, insaed long laef blong yumiwan? Invaetem olgeta blong ridim Alma 46:11–22 mo faenemaot ol trutok we Moronae i bin stap tijim mo stap askem ol pipol blong hem blong sapotem. ?Wanem trutok mo valiu nao ol lida blong Jos blong yumi oli stap tokbaot bigwan long taem blong yumi tedei? (Yu save luklukbak long olgeta insaed long Blong Ol Yut Oli Kam Strong, “Famli: Wan Ofisol Toktok I Go long Wol,” o ol mesej blong las jeneral konfrens.) ?Wanem jalenj nao yumi gat blong stap difendem ol bilif blong yumi long wol blong tedei? ?Wanem nao yumi save lanem aot long eksampol blong Moronae? Givim wan janis long ol ol memba blong klas blong oli krietem taetol blong fridom blong olgetawan, we i save mekem olgeta oli tingbaot blong stap gat strong paoa long tingting blong laef folem mo difendem ol bilif blong olgeta.
Minerva K. Teichert (1888–1976), Difendem Wan Siti blong Ol Man blong Nifae 1935, oel peinting antap long mesonaet, 36 x 48 inj. Brigham Yang Yunivesiti Miusiom blong Art
Setan i temtem mo i giaman long yumi smol smol i go.
-
Klas blong yu bae i lanem fulap samting taem bae hem i stadi long Alma 47, we i stap soem olsem wanem ol trik blong Amalekaea i semmak long wanem Setan i stap mekem blong giaman long yumi. Yu save stat taem yu askem wan i talem sot stori ia we i stap long Alma 47. Blong ademap intres long hemia, yu save invaetem tu memba blong klas blong traem tingting se oli Amalekaea mo Lihontae, mo tufala nao i stap talem stori ia. ?Wanem nao Amalekaea i mekem blong mekem yumi tingting abaot ol samting we Setan i stap mekem blong temtem mo giaman long yumi? Leftemap tingting blong ol memba blong klas blong gobak longol spesifik ves taem oli stap toktok raon long kwestin ia. Kwot we i stap long “Sam Moa Risos” i gat wan nara gudfala eksampol blong, hao nao, Setan i stap giaman long yumi. ?Wanem advaes yumi save givgivim long wanwan long yumi blong helpem yumi lukaot gud long wei we Setan i stap temtem yumi? ?Wanem nao yumi save mekem blong protektem yumi?
Taem yumi stap traehad blong stap fetful olsem Moronae, bambae yumi kam moa olsem Sevya.
-
Sapos yu mekem ol memba blong klas oli toktok raon long ol fasin blong Moronae, hemia i save givim insperesen blong ol memba blong traehad blong folem eksampol blong hem. Yu save stat blong soem wan pikja blong Moronae, olsem hemia we i stap long aotlaen blong wik ia insaed long Kam Folem Mi—Blong Wanwan Man, Woman mo Famli. Afta, invaetemol memba blong klas blong stadi long Alma 44:3–4 mo 48:7–13 mo raetem antap long bod ol toktok mo sentens we i tokbaot Moronae. Afta, yufala i save ridim Alma 48:17 tugeta mo toktok long, olsem wanem, ol fasin blong Moronae, olsem olgeta ia we oli stap long bod, i letem hem blong winim paoa blong Setan long maen blong hem, mo i kam olsem Jisas Kraes. ?Olsem wanem nao yumi save kam olsem Moronae?
Yumi save mekem yumiwan mo ol famli blong yumi oli kam strong moa blong fesem enemi.
-
Ol memba blong klas oli save lanem samting sapos oli harem wanwan i tokbaot olsem wanem oli stap protektem olgetawan, mo olsem wanem oli stap protektem ol famli blong olgeta agensem ol giaman mo ol temtesen blong Setan. Blong givim insperesen blong save toktok raon long hemia, yufala i save ridim tugeta Alma 48:7–9; 49:1–9; mo 50:1–6. Taem yumi stap tingting abaot nid blong difendem yumi long saed blong spirit agensem sin, ?wanem nao yumi lanem aot long ol traehad blong Ol Man blong Nifae blong oli stap difendem olgetawan? ?Olsem wanem yumi save bildim ol fanis long saed blong spirit blong protektem yumi, mo protektem ol famli blong yumi agensem sin mo ol paoa blong ivel? Leftemap tingting blong ol memba blong klas blong serem ol aedia we i wok long olgeta. ?From wanem hem i impoten blong “no stop blong mekem rere”? (Alma 50:1).
Stap Leftemap Tingting blong Lanem Samting long Hom
Wan wei blong leftemap tingting blong ol memba blong klas blong ridim Alma 53–63, hem i blong talem long olgeta se stori insaed long ol japta ia bae i save givim, long olgeta mo long ol famli blong olgeta, insperesen blong stap obei moa, mo blong stap developem wan fet we i strong moa.
Sam Moa Risos
Ol risal blong stap folem ol smol temtesen.
Blong tijim se “sin we i series i kam insaed long laef blong yumi long fas taem we yumi letem temtesen i kam insaed,” Presiden Spencer W. Kimball i bin serem stori ia:
“Wan kamel mo ona blong hem, … tufala i stap travel krosem ol hil blong sanbij long draeples, mo wan strong win i kam. Man ia we i travel, kwiktaem i stanemap tenet blong hem, mo i muv i go insaed, i sarem ol kaliko blong protektem hem long sanbij we i save katem hem, mo strong win ia. Kamel, i stap aotsaed, mo strong win ia i sakem sanbij agensem bodi blong hem, i go long ae blong hem, long nus blong hem, mo hem i harem se hem i no save tekem i go moa nao, hem i stap askem blong go insaed long tenet.
“‘ I gat rum blong miwan nomo,’ man we i travel i talem.
“‘ ?Be mi save pusum nus blong mi nomo i kam insaed blong mi save pulum win we i no fulap long sanbij? kamel i askem.
“‘ Ale, i stret, yu save mekem,’ man we i travel i ansa; mo hem i openem kaliko smol, mo longfala nus blong kamel i kam insaed. !Kamel i harem gud nao! Be i no longtaem kamel i taet long sanbij we i stap flae go long ae mo sora blong hem. …:
“‘ Sanbij ia we win i stap sakem i stap sikrasem hed blong mi. ?Mi save putum hed blong mi nomo i kam insaed?’
“ Bakegen, man we i travel i faenem eskius se, blong hem i agri, bae i no save spolem hem, from se hed blong kamel bae i save stap long spes antap long tenet, we hemwan i no stap yusum. Mekem se kamel i putum hed insaed mo animol ia i glad bakegen—be blong sot taem nomo.
“‘ Be ol leg blong mi long fored nomo’ hem i plis, mo bakegen, man we i travel i letem, mo i no longtaem, ful leg long fored mo solda i stap insaed long tenet. Long en, wetem sem fasin ia blong stap plis mo askem samting, bodi blong kamel, biaen blong hem mo ful bodi i stap insaed long tenet. Be naoia, ples i smol evriwan blong tufala, mo kamel i kikimaot man we i travel i go long win mo strong win” (Teachings of Presidents of the Church: Spencer W. Kimball [2006], 106–7).
Kam Antap long Fasin blong Yumi blong Stap Tij
Koling blong yu i kam tru long insperesen. Koling blong yu blong stap tij, i kam long Lod. … Oli setem yu apat anda long daereksen blong olgeta we oli holem ol ki blong prishud; from hemia, yu gat raet blong kasem revelesen blong yuwan, we yu nidim blong gat sakses. Olgeta blesing ia, oli blong yu sapos yu stap lukaotem olgeta, stap gohed blong stap fetful, mo stap traehad blong stap klin inaf” (Teaching in the Savior’s Way, 5).