Pikja blong Nifae insaed long wan taoa long garen we i kam long Jerry Thompson

24–30 Ogis

Hileman 7–12

“Tingbaot Lod”

Nifae i leftemap tingting blong ol pipol blong hem blong tingbaot Lod. Yu save mekem semmak wetem olgeta we yu stap tijim. Taem yu stap ridim Hileman 7–12, raetemdaon ol tingting mo ol filing blong yu abaot ol wei we yu save helpem ol memba blong klas blong tingbaot Lod.

Raetemdaon Ol Filing mo Tingting blong Yu

Invaetem Ol Man blong Serem Wanem Oli Gat

Invaetem ol memba blong klas blong raetem, antap long bod, samfala gospel prinsipol we oli faenem insaed long Hileman 7–12, wetem ol refrens blong ol ples we oli save faenem olgeta prinsipol ia. Afta, yu save disaed, olsem wan klas, wijwan long olgeta prinsipol ia mo ves bambae yufala i toktok raon long ol.

Stap Tijim Doktrin

Hileman 7–11

Ol profet oli talemaot tingting blong God long ol pipol.

• Blong helpem klas blong yu blong lanem samting aot long Hileman 7–11 abaot ol rol mo ol responsabiliti blong ol profet, yu save stat blong ridim tugeta, mining blong “Profet” insaed long Gaed long Ol Skripja (scriptures.ChurchofJesusChrist.org). Ol memba blong klas oli save faenem ol rol blong ol profet we oli tokbaot mo raetem lis antap long bod. Afta, yu save askem ol memba blong klas blong wanwan long olgeta i luklukbak long wan japta insaed long Hileman 7–11. Askem olgeta blong lukaotem olsem wanem Nifae i bin mekem olgeta rol ia we i stap long lis we i stap antap long bod. ?Olsem wanem nao ol profet mo ol aposol we oli stap laef tedei, oli stap mekem olgeta rol ia? ?Olsem wanem nao yumi save sapotem olgeta long ol responsabiliti blong olgeta?

• ?From wanem, samtaem, ol profet oli mas tok stret mo klia, olsem we Nifae i bin mekem? Tingting blong invaetem ol memba blong klas blong ridim Hileman 7:11–29, mo faenem ol woning we Nifae i bin givim, mo ol risen from wanem hem i mas tok stret mo klia taem hem i bin givim olgeta. ?Wanem woning we i kam long profet we i bin givim insperesen long yumi blong sakem sin, mo kam long Lod? Insaed long “Sam Moa Risos,” bambae yu faenem wan pikja toktok we Elda Neil L. Andersen i bin yusum blong helpem yumi andastanem ol denja blong no wantem save ol woning we oli kam long ol profet.

Hileman 9:1–20; 10:1, 11–15

Fet, yumi mas bildimap antap long samting moa bitim ol saen mo ol merikel.

• Wan wei blong toktok raon long ol ves ia, hem i blong serem klas long tufala grup, mo invaetem wanwan grup blong ridim Hileman 9:1–20 mo oli traem tingting se olgeta nao oli stap long ples blong ol faef man ia, o oli stap long ples blong ol jif jaj. ?Wanem nao ol pipol ia oli bin filim? ?Wanem nao i mekem se wanwan grup i mekem samting i defren, nomata we olgeta evriwan oli harem semmak merikel profesi ia? ?Olsem wanem nao yumi meksua we ol merikel oli bildimap testemoni blong yumi, be oli no kam olsem stamba blong ol testemoni blong yumi? ?Olsem wanem yumi save talem se ol toktok blong ol profet, long taem blong yumi tedei, oli tru?

Hileman 10:1–12

Lod i givim paoa long olgeta we oli lukaotem tingting blong Hem, mo oli obei ol komanmen blong Hem.

• Stori blong Lod we i blesem Nifae long Hileman 10 i save givim insperesen long ol memba blong klas blong yu blong oli wok strong moa blong oli lukaotem o stadi mo mekem tingting blong Lod. Ol memba blong klas oli save rid long ol ves 1 kasem 12, blong faenem wanem Nifae i bin mekem blong winim tras blong Lod, mo olsem wanem nao Lod i bin blesem hem. Afta, oli save serem ol nara eksampol blong ol pipol we oli bin lukaotem mo oli bin mekem folem tingting blong Lod, be oli “no slak” blong mekem ol tingting ia (Hileman 10:4); oli lukaotem ol eksampol ia long ol skripja, o long laef blong olgetawan. ?Olsem wanem nao Lod i blesem ol pipol ia wetem paoa blong mekem ol bigfala hil oli “foldaon” insaed long laef blong olgeta (Hileman 10:9) ? Givim taem long ol memba blong klas blong oli tingting hevi long ol wei we oli save stadi long tingting blong Lod mo obei ol komanmen blong Hem.

Hileman 12

Lod i wantem yumi blong tingbaot Hem.

• Plante long ol memba blong klas blong yu oli bin mekem ol kavenan blong oltaem tingbaot Jisas Kraes. Maet oli save serem, wetem klas, sam samting we i bin helpem olgeta blong “oltaem tingbaot hem” (Moronae 4:3; D&K 20:77), long tugeta taem ia, long taem blong gudtaem, mo long taem blong hadtaem. Afta, ol memba blong klas oli save luklukgud insaed long Hileman 12 mo faenem sam risen from wanem ol pipol oli gat fasin ia blong stap fogetem Lod. ?Olsem wanem yumi save winim ol kaen fasin olsem we oli stap tokbaot insaed long japta ia? ?Olsem wanem nao, wanem i kam agensem yumi, i helpem yumi blong tingbaot God? (luk long Hileman 11:4–7).

• Blong soemaot hamas traehad wan i mas mekem blong tingbaot wan samting, yu save givim sam minit long ol memba blong klas blong lukluk tru long Hileman 12. Afta, yu save askem sam kwestin abaot japta ia blong luk wanem nao oli tingbaot. Mebi oli save serem wanem oli stap mekem blong tingbaot ol infomesen we oli nidim blong mekem wan tes. ?Olsem wanem nao hemia i semmak long ol traehad we yumi nid blong mekem blong “tingbaot Lod”? (Hileman 12:5). ?Wanem nao i defren? Invaetem klas blong faenem wan ves o sentens we i kam long Hileman 12 we oli save raetem mo hangem insaed long hom blong olgeta, o oli save lanem baehat blong tingbaot gud fasin mo paoa blong God.

Stap Leftemap Tingting blong Lanem Samting long Hom

Blong leftemap tingting blong ol memba blong klas blong ridim Hileman 13–16, yu save talemaot bigwan se ol profesi blong Samuel, wan Man blong Leman, abaot ol samting we oli hapen long taem we Sevya i bon mo taem we bae oli hangem Hem long kros, oli save komperem wetem ol samting we oli stap hapen long taem blong yumi, we bae oli kam fastaem long Seken Kaming blong Sevya.

Sam Moa Risos

Lisin long advaes blong ol profet.

Elda Neil L. Andersen blong Kworom blong Olgeta Twelef Aposol i bin serem eksperiens ia:

“Olgeta we oli givim seves long Lod, oltaem bae oli lisin gud, speseli long Profet. …

“ … bae mi talem wan eksperiens. Famli blong mifala i bin laef blong plante yia long stet blong Florida. From se Florida i gat fulap sanbij long graon blong hem, gras longwe, oli stap plante wetem wan nara gras we oli singaotem Sent Ogustin. Bigfala enemi blong gras blong Florida, hem i wan smol braon bebet, we oli singaotem mol kriket.

“Wan naet, taem mi mo neba i stanap long ol step long fored, hem i bin luk smol bebet ia i krosem smol rod long fored blong haos. ‘I moa gud yu spre long gras blong yu,’ hem i wonem mi. ‘I gat wan mol kriket.’ Mi bin spre long gras ia wetem meresin blong gras sam wik i jes pas, mo mi filim se mi no gat taem o mane blong mekem bakegen.

“Wetem laet long nekis moning, mi luklukgud gras ia bakegen. Hem i naes mo i grin gud. Mi lukluk i go insaed long gras blong luk sapos mi luk eni smol bebet. Mi no save luk wan. Mi tingbaot, mi tingting se: “Ah, oraet nomo; ating mol kriket ia i jes stap pas long fored blong yad blong mi i go long yad blong neiba.’ …

“Be stori ia, en blong hem i nogud. Mi kamaot mi kam long fored blong doa long wan moning, samples 10 dei afta we mi storian wetem neba blong mi. Mi sek. I olsem se i hapen truaot long naet; ol braon ples oli kavremap gras blong mi. Mi ron i go long stoa, pem meresin blong gras, mo spre long hem kwiktaem, be i let tumas. Gras ia i nogud evriwan, mo i gobak olsem i stap fastaem, we i nidim blong statem wok long siro, niufala graon, longfala aoa blong wok, mo bigfala mane blong spendem.

“Woning blong neba blong mi, i from gudlaef blong gras blong mi. Hem i bin luk ol samting we mi mi no save luk. Hem i bin save wan samting we mi mi no bin save. Hem i bin save se ol mol kriket oli stap laef andanit long graon, mo oli stap wokbaot nomo long naet, mekem se, taem mi jekem gras long deitaem, i blong nating. Hem i bin save se ol mol kriket ia oli no kakae ol lif blong gras, be oli stap kakae rus blong hem. Hem i bin save se ol smosmol bebet ia oli save kakae plante rus bifo bae mi luk risal blong hem antap long graon. Mi pem bigfala praes from se mi wantem dipen long miwan. …

“ … I gat ol spirit mol kriket we oli stap wokbaot andanit long ol wol we oli stap protektem yumi, mo oli stap kakae gud ol rus blong yumi. Plante long ol bebet ia, blong fasin nogud, oli kamkamaot we yu luk se oli smol, mo samtaem, yumi no luk olgeta. …

“Bae yumi no folem paten we mi bin soem blong lukluk long ol Florida mol kriket ia. Yumi no mas sarem ae long ol woning. Yumi no mas flas tumas long indipenden laef blong yumi. Bae yumi lisin oltaem mo stap lanem samting wetem tingting we i stap daon, mo wetem fet, mo yumi wantem tumas blong sakem sin sapos i nid” (“Prophets and Spiritual Mole Crickets,” Ensign, Nov. 1999, 16–18).

Stap Kam Antap long Fasin blong Yumi blong Stap Tij

Soemaot lav. “Folem ol situesen blong yufala, blong soemaot lav long olgeta we yu stap tij, i save minim blong talem ol gud toktok long olgeta we i kam long hat, hem i blong gat intres long laef blong olgeta, blong lisin wetem kea long olgeta, blong yusum olgeta long ol lesen, blong mekem ol aksen blong seves blong olgeta, o simpol nomo, blong welkamem gud o toktok gud long olgeta taem yu luk olgeta (Teaching in the Savior’s Way, 6).