“13–19 Julae. Alma 32–35: ‘Planem Toktok Ia insaed long Hat blong Yu,’” Kam Folem Mi—Blong Sandei Skul: Buk blong Momon 2020 (2020)
“13–19 Julae. Alma 32–35,” Kam Folem Mi—Blong Sandei Skul: 2020
13–19 Julae
Alma 32–35
“Planem Toktok Ia insaed long Hat blong Yu”
I nomata hamas taem yu bin ridim Alma 32–35, ridim olgeta skripja ia taem yu stap rere blong tij. Mekem maen blong yu i open long ol niu tingting we oli kam long Spirit.
Raetemdaon Ol Filing mo Tingting blong Yu
Invaetem Ol Man blong Serem Wanem Oli Gat
Blong helpem ol memba blong klas blong oli serem wanem oli bin lanem taem oli bin stap ridim Alma 32–35 long hom, yu save givim olgeta sam minit blong oli luklukbak long ol japta ia mo raetem antap long bod eni stamba toktok, o topik we oli bin luksave. Olsem wan klas, toktok raon long risen we i mekem se ol stamba toktok ia, o ol topik ia oli gat mining long olgeta.
Stap Tijim Doktrin
Yumi save jusum blong putum tingting i stap daon.
-
Blong lidim wan toktok raon long fasin blong putum tingting i stap daon, olsem we oli tijim long Alma 32:1–16, yu save stat wetem wan invitesen we i go long ol memba blong klas blong oli talem sam eksperiens we i save mekem wan man o woman i putum tingting blong hem i stap daon. (Alma 32:2–5 i givim wan eksampol). Maet sam memba blong klas blong yu bae oli glad blong serem eksperiens blong olgeta we, tru long hemia, oli bin lanem fasin blong putum tingting i stap daon. ?Olsem wanem nao taem oli “mekem [yumi] putum tingting blong [yumi] i stap daon (Alma 32:12), hem i wan blesing? Ol toktok abaot fasin blong putum tingting i stap daon we oli stap long “Sam Moa Risos,” oli save help blong statem wan toktok raon long topik ia insaed long klas. Mo tu, yu save ridim Doktrin mo Ol Kavenan 112:10 o, olsem wan klas, singsing wan hym abaot fasin blong putum tingting i stap daon, olsem “Be Thou Humble” (Hymns, no. 130).
Yumi praktisim fet long Jisas Kraes taem yumi planem mo fidim hat blong yumi wetem toktok blong Hem.
-
Samtaem, yumi tingting long wosip olsem se hem i ol samting we yumi stap mekem long ol ples olsem wan bilding blong jos (luk long Alma 32:5, 9, 11), be mining blong Alma i tokbaot wosip, i bigwan moa. Eksampol. Hem i tijim se blong developem mo stap praktisim fet long Jisas Kraes, hem i wan impoten wei blong wosip we i save tekem ples aotsaed long wan ples olsem jos. Blong helpem klas blong yu blong andastanem prinsipol ia, yu save droem wan pikja blong wan sid mo wan tri antap long bod, mo toktok raon long ol kwestin olsem olgeta ia: ?Wanem nao sid ia i ripresentem? (Luk long Alma 32:28; 33:22–23). ?Olsem wanem nao yumi save planem sid ia—o testemoni blong yumi abaot Jisas Kraes mo Atonmen blong Hem—insaed long hat blong yumi, mo stap fidim? (luk long Alma 32:36–43; 33). ?Wanem eksperiens nao yumi save serem, we insaed long olgeta, ol traehad blong yumi blong folem Sevya i tekem ol gudfala frut i kam? ?Olsem wanem ol tijing blong Alma oli lidim wei we yumi stap wosipim Papa long Heven mo Jisas Kraes?
-
“Traem o tes” ia we Alma i tokbaot blong helpem Ol Man blong Soram blong oli gat fet long Jisas Kraes, i save helpem yumi tu blong lanem sapos ol nara prinsipol blong gospel oli tru. Blong helpem klas blong andastanem tes blong Alma, yu save tokbaot tu se, wan tes, o blong traem, i wanem stret. Maet i gat wan insaed long klas we i bin traem wan samting bifo, mo i save help blong eksplenem. ?Wanem nao i stamba tingting blong traem wan samting? ?Olsem wanem, we, blong traem wan samting, i semmak long wanem Alma i bin invaetem ol pipol blong mekem long Alma 32:26–36? Maet ol memba blong klas oli save serem ol defren wei we oli bin “traem o testem” toktok blong God. ?Olsem wanem nao oli kam blong save se “toktok blong God i gud”? (Alma 32:28).
-
?Wanem nao Alma i save talem long wan we i wantem kasem wan testemoni, o mekem wan testemoni abaot Jisas Kraes i kam strong moa? Blong luklukgud long kwestin ia, yu save serem klas long tu grup. Wan grup bae i ridim Alma 32:26–36 blong faenemaot wanem Alma i save talem long wan we i stap traem blong kasem wan testemoni, mo nara grup bae i save ridim Alma 32:36–43 blong faenemaot wanem Alma i save talem long wan we testemoni blong hem i go slak. Afta, wan long wanwan grup i save kam blong ripresentem Alma, mo i rolplei long wei blong helpem wan blong kasem o mekem wan testemoni i kam strong moa.
Alma 31:13–23; 33:2–11; 34:17–29
Yumi save wosipim God long prea, long eni taem, mo long eni ples.
-
Yu save helpem klas blong luk wanem i defren long ol tijing blong Alma mo Amulek long saed blong prea mo wosip, wetem ol rong tingting blong Ol Man blong Soram. Ol memba blong klas oli save luklukbak long Alma 31:13-23 mo afta, oli save raetem long bod wanem we Ol Man blong Soram oli bin biliv abaot prea mo wosip. Afta, oli save lukaotem ol trutok insaed long Alma 33:2–11 mo 34:17–29 we i defren long olgeta bilif ia. ?Wanem nao ol ves ia oli stap tij abaot wei we yumi abaot wei we yumi save mekem ol prea mo wosip blong yumi oli kam gud moa?
-
Yu save mekem oli toktok raon long prea sapos yu raetem ol toktok olsem ?Huia? ?Wanem? ?Wetaem? ?Weaples? ?From Wanem? Mo ?Olsem Wanem? antap long bod. Ol memba blong klas oli save luklukgud insaed long Alma 33:2–11 mo 34:17–29 blong faenem ol ansa long ol kwestin ia long saed blong prea. Eksampol, oli save ansarem ol kwestin olsem: ?Weaples mi save go long hem blong prea? ?Wanem nao yumi save prea from? Oli save faenem ol ansa tu insaed long ol toktok blong wan hym, abaot prea, olsem “?Yu Bin Mekem Prea?” o “Sweet Hour of Prayer” (Hymns, nos. 140, 142). ?Olsem wanem nao yumi save kam gud moa blong talem prea blong yumi?
Sakrifaes blong Sevya we i pem praes from sin blong yumi, “i no gat en mo i no save finis.”
-
Amulek i yusum ol toktok ia, “we i no gat en,” mo “i no save finis,” plante taem blong tokbaot sakrifaes we Jisas Kraes i bin mekem blong pem praes from ol sin blong yumi. Yu save invaetem ol memba blong klas blong faenem ol toktok ia long Alma 34:9–14 mo afta, lukluk mining blong olgeta insaed long diksonari o long Gaed blong Ol Skripja sapos i gat. ?Long wanem wei nao sakrifaes blong Sevya i no gat en, o i no save finis? (luk long Hibrus 10:10; 2 Nifae 9:21; Mosaea 3:13). Folem wanem we i stap long Alma 34:15–17, ?wanem nao yumi mas mekem blong kasem olgeta blesing blong sakrifaes blong Sevya? ?Hem i minim wanem blong “praktisim fet blong yufala, blong yufala i sakem sin”? (Alma 34:17).
“No pusumbak dei blong sakem sin blong yufala.”
-
Wan stadi we i komperem olgeta samting ia i save helpem ol memba blong klas blong tingting hevi long ol denja blong stap pusumbak dei blong sakem sin blong yumi: invaetem olgeta blong traem tingting se oli kasem wan invitesen blong tekpat long wan samting we i nidim blong gat plante yia blong trening mo stap rere, olsem wan Olimpik kompetisen, o wan miusik so (jusum wan samting we bae i gat mining long klas blong yu), be taem ia, bae i hapen tumoro nomo. Toktok raon long klas from wanem bae oli no save winim wanem samting long taem ia sapos oli spenem haf dei blong rere from. ?Olsem wanem eksampol ia i go wetem ol woning blong Amulek we i stap long Alma 34:32–35? ?From wanem bae i wan denja blong stap pusumbak taem blong traehad blong sakem sin mo mekem jenis? Invaetem ol memba blong klas blong tingting hevi long wanem oli save mekem blong “rere blong taem we i no save finis” (ves 33) mo mekem plan blong mekem samting ia naoia mo nomo wet blong mekem.
Stap Leftemap Tingting blong Lanem Samting long Hom
Blong givim insperesen long ol memba blong klas blong ridim Alma 36–38 long wik ia, yu save poenemaot se Alma “i bin harem nogud from rabis fasin blong ol pipol blong hem,” mekem se hem i pulum tugeta ol boe blong hem mo hem i tijim olgeta “long saed blong ol samting blong stret mo gud fasin” (Alma 35:15–16). Ol nekis nara japta blong Alma, oli givim stori blong wanem Alma i bin kasem insperesen blong tijim long ol boe blong hem.
Sam Moa Risos
?Hem i minim wanem blong putum tingting i stap daon?
“Blong gat tingting we i stap daon i blong luksave wetem fasin blong tangkyu se yu stap dipen long Lod—i blong andastanem we yu gat nid oltaem blong gat sapot blong Hem. … Hem i no wan saen we i soem we yu no strong, se yu sem, o se yu fraet; hem i wan saen we i soem se yu save weaples nao tru paoa blong yu i stap long hem” (Stap Tru long Fet [2004], 38).
Elda Kwentin L. Kuk i eksplenem: “Taem yumi rili lukluk long God Papa mo Kraes we i Pikinini, mo huia Tufala, mo wanem Tufala i bin mekem from yumi, hemia i fulumap yumi wetem respek, sapraes, tangkyu mo tingting i stap daon. … Fasin blong gat tingting i stap daon, hem i tu blong stap talem tangkyu long ol plante blesing mo help we i kam long heven. Fasin blong gat tingting i stap daon i no blong mekem wan bigfala samting i kamtru, o blong winim sam bigfala jalenj. Hem i wan saen blong stap strong long spirit. Hem i blong gat kwaet tras long yuwan se, dei afta dei, aoa afta aoa, yumi save dipen long Lod, wok blong Hem, mo mekem ol tingting blong Hem oli kamtru” (“Evri Dei Ia we I No Save Finis,” https://www.ChurchofJesusChrist.org/general-conference/2017/10/the-eternal-everyday?lang=bis o Liahona, Nov. 2017, 52, 54).
Skripja abaot fet.
Stap Kam Antap long Fasin blong Yumi blong Stap Tij
Lukluk nomo long ol skripja. Nomata se i gat fulap nara risos blong yusum blong mekem toktok long klas i rij, tingbaot se ol skripja oli stamba ples blong karem doktrin. Helpem ol memba blong oli faenem ol trutok aot long ol skripja. (Luk long Teaching in the Savior’s Way,21.)