“6–12 Julae. Alma 30-31: ‘Paoa mo Atoriti blong Toktok blong God’” Kam Folem Mi—Blong Sandei Skul: Buk blong Momon 2020 (2020)
“6–12 Julae. Alma 30–31,” Kam Folem Mi—Blong Sandei Skul: 2020
Evri Samting I Talem se I Gat Wan God (Alma mo Koriho), i kam long Walter Rane
6–12 Julae
Alma 30–31
“Paoa mo Atoriti blong Toktok blong God”
Afta we yu ridim Alma 30–31 mo yu lukaotem insperesen blong laef blong yuwan bakegen, lisin long ol kwaet toktok blong Spirit abaot wanem mesej nao bae i blesem ol memba blong klas blong yu.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Sapos yu filim se ol memba blong klas oli fraet blong serem wanem we oli gat, maet bae yu save givim sam minit blong luklukbak long Alma 30–31 o eni not we oli bin tekem taem oli bin stadi long hom long wik ia. Afta, oli save serem wan strong mesej we oli bin faenem, oli serem wetem wan patna, o wetem klas.
Stap Tijim Doktrin
Enemi i stap traem blong giaman long yumi wetem ol giaman doktrin.
-
Taem yu stap tingting long ol nid blong klas blong yu, ?bae i helpem olgeta blong andastanem wanem i defren bitwin ol trutok blong gospel mo ol giaman kopi blong Setan, sapos yu stap yusum wan samting insaed long lesen? Sapos i olsem, yu save soem olgeta sam giaman samting, olsem blong plei mane, o giaman kaekae, wetem tu sam ril mane mo tru kaekae. ?Olsem wanem nao yumi save talem se wijwan nao i giamanwan? Klas i save faenem afta, ol giaman tijing blong Koriho insaed long Alma 30:6–31. ?Wanem nao bae i save switim yu long olgeta tijing ia? ?Wanem trutok blong gospel nao we ol giaman tijing blong Setan i no save givim? Invaetem ol memba blong klas blong serem wanem i bin helpem Alma blong luksave wanem i tru doktrin mo wanem i giaman doktrin (luk long Alma 30:32–54). ?Wanem nao ol nara wei we ol memba blong klas oli faenem we i stap help?
-
Blong helpem ol memba blong klas blong oli lanem olsem wanem blong protektem olgeta long ol risal blong giaman doktrin, yu save luklukbak long hao nao oli tokbaot wan we i agensem Kraes, we i stap long aotlaen blong wik ia insaed long Kam Folem Mi—Blong Wanwan Man, Woman mo Famli. ?Wijwan ves long Alma 30:6–31 nao i soem se Koriho i stret wanem we oli tokbaot ia? ?Wanem tijing blong Koriho we i semmak long ol giaman tijing blong taem blong yumi tedei? (luk long Alma 30:12–18, 23–28). ?Olsem wanem nao yumi save stap longwe long ol giaman tijing ia?
Evri samting i testifae abaot God.
-
From se yumi stap laef long wan wol we i semmak long hemia blong Alma, we i gat samfala pipol we oli stap tijim se i no gat wan God i stap, testemoni blong Alma long Alma 30:39–44 i save helpem ol memba blong klas blong yu. Yu save invaetem ol memba blong klas blong ridim ol ves ia, mo afta, mekem wan lis long bod, abaot ol trutok mo ol pruf we Alma i givim we oli stap testifae se i gat wan God i stap. ?Wanem ol nara testemoni we yumi gat we i talem se God i stap laef? Olsem pat blong toktok long klas, tingting blong serem toktok ia we i kam long Presiden M. Russell Ballard we i stap long “Sam Moa Risos.” Yu save invaetem wan, we bae i kam we i rere blong singsing wan hym abaot gud fasin blong God, olsem “How Great Thou Art” (Hymns, no.86), o yu save singsing hym ia tugeta.
-
Taem we Alma i bin stap toktok wetem Koriho, hem i bin luksave se Koriho i bin “sakemaot Spirit blong God blong hem i no save gat ples insaed long [Koriho]” (Alma 30:42). Tingting blong aksem ol memba blong klas blong luklukgud insaed long Alma 30:39–46, mo lukaotem ol nara refrens we i tokbaot Tabu Spirit. ?Wanem rol nao Tabu Spirit i gat blong stap testifae long yumi se God mo Jisas Kraes, Tufala i ril? ?Olsem wanem nao yumi save helpem olgeta we oli gat tu tingting, o gat ol kwestin blong oli lukaotem trutok tru long Tabu Spirit?
Koriho I Fesem Alma i kam long Robert T. Barrett
Toktok blong God i gat paoa blong lidim ol pipol i go long stret mo gud fasin.
-
?I gat sam memba blong klas blong yu we oli save serem wan eksperiens taem we “paoa blong toktok blong God” (Alma 31:5) i bin helpem olgeta o wan we oli save blong oli jenisim laef blong olgeta? Maet yu wantem kontaktem ol memba blong klas longtaem bifo klas i stat blong oli save rere blong serem eksperiens blong olgeta. Leftemap tingting blong olgeta blong serem sam ves long Alma 31 we i go wetem eksperiens ia blong olgeta. Ol nara memba blong klas oli save serem samfala wei we toktok blong God i bin “gat moa bigfala paoa long tingting blong [olgeta]” (Alma 31:5). Ol memba bae oli save lanem samting taem oli ridim ol nara skripja we oli stap testifae abaot paoa blong toktok blong God (luk long “Sam Moa Risos” blong gat samfala eksampol).
-
Taem ol memba blong klas blong yu oli bin stadi long Alma 31 long wik ia, maet bae oli kasem insperesen tru long eksampol blong Alma blong stap prea from Ol Man blong Soram. Tingting blong askem olgeta wanem nao oli bin lanem aot long japta ia abaot fasin blong go luk ol memba blong famli, o ol fren we oli bin aot long rod blong gospel, o oli stap traehad wetem fet blong olgeta. Yu save askem tu long ol memba blong klas blong luklukgud insaed long Alma 31 tugeta, mo listim long bod olgeta samting we oli bin luk abaot Alma we i bin helpem hem blong sevem Ol Man blong Soram. ?Olsem wanem nao yu save yusum toktok blong God i moa, long ol traehad blong yu blong sevem ol narafala man? (Blong kasem sam moa niu tingting, yu save serem toktok blong Elda Jeffrey R. Holland we i stap long “Sam Moa Risos.”)
-
?Wanem nao ol memba blong klas oli faenem long Alma 31: 30 -38 we i save helpem olgeta we oli stap harem nogud from ol sin blong ol narawan, semmak olsem Alma?
Stap Leftemap Tingting blong Lanem Samting long Hom
Askem ol memba blong klas se wanem doktrin o gospel prinsipol nao oli save tijim blong katemdaon ol giaman prijing we Alma i bin faenem long medel blong Ol Man blong Soram. Talem long olgeta se taem oli stap ridim Alma 32–35, bambae oli faenem olsem wanem Alma i bin yusum toktok blong God blong helpem Ol Man Soram blong luk se i nid blong oli mas jenis.
Sam Moa Risos
Ol skripja we oli tokbaot paoa blong toktok blong God.
Evri samting i soem se i gat wan God.
Presiden M. Russell Ballard i bin tijim se “ol pruf we oli no save finis,” we Alma i givim blong pruvum se God i ril, “oli gohed blong testifae long yumi tedei” (luk long Alma 30:44):
Ol astronot (olgeta we oli stap flae i go long spes), we oli stap long spes mo luk i kam long wol ia, oli talem se wol ia i naes gogo, mo i luk se hem i laef. Senata Jake Garn, blong Yunaeted Stet, i bin raetem eksperiens blong hem long spes: ‘hem i no posibol blong mi raetemdaon se wol ia i naes olsem wanem. I wan eksperiens long saed blong spirit we i sarem win blong yu, i mekem maot mo ae i open gud, taem yu stap long spes mo luk wol ia mo semtaem yu travel long spid blong twantefaef taem spid blong saon. Mi bin save lukluk tu long ol ples we oli tudak long emti spes ia mo luk ol bilian mo ol bilian blong ol sta, mo ol galaksi blong laet we oli stap longlongwe. Yunives ia i bigbigwan tumas we i no posibol blong andastanem evri samting. Be mi mi andastanem se hem i han blong God we i stap long evri samting. Mi bin filim se Hem i stap, hemia long evri seven dei we mi stap long spes. Mi save se God i bin krietem wol ia mo yunives ia. … Mi save se God i stap laef mo Hem i Krieta blong yumi evriwan (leta i go long Masta Russell Ballard, 3 Maj 1988)” (“God’s Love for His Children,” Ensign, May 1988, 58).
Fidim ol narawan wetem toktok blong God.
Elda Jeffrey R. Holland i tijim:
“?I tru se yumi stap fidim ol yut blong yumi mo ol niu memba blong yumi long wan wei we bae i sapotem olgeta taem we ol hadtaem blong laef oli stat kamkamaot? ?O yumi stap givim olgeta wan kaen tingting nomo we oli harem se i swit—be i emti, i no gat paoa long saed blong spirit? … Long taem blong wan strong winta, sam yia i pas, Presiden Boyd K. Packer i talem se wan bigfala namba blong ol dia (wan animol) oli bin ded blong oli hanggri tumas, be bel blong olgeta i bin fulap long drae gras. Wetem gud tingting blong help, sam kampani oli bin givim wanem we i no nid, long wan taem ia we oli bin nidim wanem i impoten. Sore tumas, oli bin fidim ol dia, be oli no bin givim kaekae long olgeta. …
“Setan i no sopsop long ol tijing blong hem: ?from wanem bae yumi sopsop? I nomata se yumi stap tijim ol pikinini blong yumi long hom, o stap stanap long fored blong wan grup blong ol pipol, bae yumi neva mekem se i had blong faenemaot fet blong yumi. … Mekem ol toktok we i gat skripja insaed long hem. Tijim doktrin we i kam tru long revelesen” (“A Teacher Come from God,” Ensign, May 1998, 26–27).
Stap Kam Antap long Fasin blong Yumi blong Stap Tij
Helpem olgeta we oli stap lan blong oli faenemaot trutok olgetawan bakegen. Wan long ol rol blong yu olsem tija, i blong gaedem olgeta we oli stap lan wetem yu, blong oli faenem ol trutok ia insaed long ol skripja. Bae yu luk se oli andastanem mo holemtaet moa gud olgeta prinsipol ia sapos oli faenem olgeta prinsipol ia olgetawan bakegen, be i no blong harem nomo wan tija i tokbaot ol prinsipol ia.