Pipol blong Limhae oli ronwe

Minerva K. Teichert (1888-1976), King Limhae mo Ol Pipol blong Hem oli Ronwe, 1949–1951 oel long mesonaet, 35 7/8 x 48 inj. Brigham Yang Yunivesiti Miusiom blong Art, 1969

11–17 Mei.

Mosaea 18–24

Mifala I Bin Mekem Wan Kavenan wetem Hem

Taem yu stap ridim Mosaea 18–24, tingting abaot ol pipol we yu stap tijim. . ?Wanem nao yu save abaot olgeta? Tabu Spirit i save givim insperesen long ol tingting blong yu, mo i save helpem yu blong faenem ol trutok blong gospel we oli nidim blong save moa long olgeta.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Invaetem ol memba blong klas blong givim sam prinsipol, o sam toktok we oli tru, we oli bin faenem long taem blong stadi blong olgeta long Mosaea 18–24. (Oli listimdaon samfala prinsipol long aotlaen blong wik ia we i stap long Kam Folem Mi—Blong Wanwan Man, Woman mo Famli. Leftemap tingting blong olgeta blong serem sam ves long Mosaea 18–24 we i stap tijim olgeta prinsipol ia. ?Wanem eksperiens nao oli bin gat wetem ol trutok ia?

tijing pikja bokis

Stap Tijim Doktrin

Mosaea 18:1–16

Baptaes hem i wan kavenan blong wok blong God mo stanap olsem wan witnes blong testifae abaot Hem.

• Taem yu stap ridim Mosaea 18 mo rere blong stap tij, yu save gat insperesen blong helpem klas blong yu blong luklukbak mo tingting hevi long kavenan blong baptaes blong olgeta. Hemia i wan wei we yu save mekem hemia: Invaetem ol memba blong klas blong wok tugeta blong listimdaon long bod plante sentens, olsem we oli save rimemba, we i tokbaot olsem wanem Alma i tokbaot kavenan blong baptaes. Taem oli finis, ol memba blong klas oli save ridim Mosaea 18:8–10 mo ademap eni samting long ol lis ia we oli ting se i no gat yet. (Oli save ademap tu ol sentens we oli kam long D&K 20:37, 77, mo 79.) Bae i save help blong askem olgeta wanem nao wan sentens i minim mo wanem oli save mekem blong kipim pat ia blong kavenan blong baptaes blong olgeta. ?Olsem wanem nao Lod i stap blesem yumi taem yumi stap traehad blong kipim pat blong yumi long kavenan ia?

• Taem we olgeta we oli bin stap folem Alma oli bin stap rere blong baptaes, Alma i tijim olgeta se blong “ kam long yad blong God,” wan i mas mekem wan kavenan blong folem God mo blong kea long ol pikinini blong Hem (luk long Mosaea 18:8–9). Maet ol memba blong klas oli save serem eksperiens blong olgeta abaot taem we wan narawan i bin mekem olgeta i kam strong moa from hem i mekem pat blong hem long kavenan blong baptaes olsem we i stap long Mosaea 18:8–10. Eksampol, olsem long taem we wan i kamfotem olgeta o helpem olgeta blong tekem ol trabol blong olgeta. ?Olsem wanem ol eksperiens ia oli givim insperesen long yumi blong kipim kavenan blong yumi? Yu save rimaenem ol memba blong klas abaot hao Abinadae i bin stanap olsem wan witnes blong God long evri taem, mo long evri samting” (ves 9). ?Wanem nao yumi save lanem aot long eksampol blong hem taem yumi stap lukaot blong fulfilim pat ia blong kavenan blong baptaes blong yumi?

baptaes long bigfala solwota

Taem yumi baptaes, yumi mekem kavenan blong stap wok blong God, mo wok blong ol narafala man.

Mosaea 18:17–31

Pipol blong God oli yunaet.

• Mosaea 18:17–31 i tokbaot ol komanmen we Alma i bin givim long ol pipol blong hem blong helpem olgeta blong oli kam wan o yunaet, olsem ol memba blong Jos blong Kraes. Blong helpem ol memba blong klas blong tingting abaot hao ol komanmen ia i blong olgeta tu, yu save askem olgeta blong luklukgud insaed long ol ves ia, we oli serem olgeta long ol smol grup, mo oli mekem wan lis blong ol komanmen we oli faenem. ?Olsem wanem nao we taem oli folem olgeta komanmen ia, i save helpem ol memba blong wod blong filim moa yunaet? ?I gat eni gol we ol memba blong klas blong yu oli save mekem wanwan, o olsem wan grup, blong folem eksampol blong ol pipol blong Alma?

• Sam pipol oli save askem olgetawan: ?From wanem yumi nidim wan jos? Blong helpem ol memba blong klas blong ansarem kwestin ia, yu save droem wan aotlaen blong wan bilding blong Jos, antap long bod, mo raetem kwestin ia long bod ia. Afta, ol memba blong klas oli save luklukgud insaed long Mosaea 18:17–31 mo raetem long bod, sam ansa we oli ting blong faenem insaed long ol ves ia. Oli save faenem tu ol ansa insaed long sot toktok blong Elda Christofferson we i stap insaed long “Sam Moa Risos.” Maet yu save letem samfala memba blong klas oli rolplei long hao bae oli ansa long wan fren we i no biliv se i nid blong gat wan jos we i oganaes. ?From wanem yumi glad tumas blong yumi pat blong Jos?

• I stret blong tingting se evriwan i filim se hem i welkam long jos, be sore tumas, i no evriwan i filim olsem. ?Wanem nao yumi stap lanem aot long ol pipol blong Alma insaed long Mosaea 18:17–31 we i save helpem yumi blong krietem wan ples we evriwan i filim se hem i blong ples ia?

Mosaea 21–24

Lod i save mekem ol trabol blong yumi oli nomo hevi.

• Ol trabol we ol memba blong klas blong yu oli tekem, oli defren long hemia we ol pipol blong Limhae o Alma oli tekem taem we oli bin stap slef. Be ol mesej blong ol stori ia oli blong eniwan we i filim se hem i fasfas tumas wetem wanem i kam agens, o ol had situesen. Invaetem ol memba blong klas blong serem wanem we oli lanem aot long Mosaea 21–24 abaot wei we God i save helpem yumi long medel blong ol tes blong yumi. (Blong gat wan sot lukluk long stori ia, luk long L. Tom Perry, “The Power of Deliverance,” Ensign o Liahona, May 2012, 94–97.) Ol memba blong klas oli save serem tu ol taem we, olsem ol pipol blong Alma, oli gat eksperiens long promes blong God se bae Hem i mekem ol trabol blong olgeta oli nomo hevi, mo i bin visitim olgeta long taem we oli bin gat hadtaem (luk long Mosaea 24:14).

• Maet bae i gat moa mining long ol memba blong klas blong yu blong spenem sam minit blong raetemdaon ol jalenj blong olgetawan, we oli bin fesem, mo tingting hevi long ol wei we Lod i bin helpem olgeta blong oli tekem ol trabol blong olgeta. ?I gat eni skripja long Mosaea 21–24 we i givim insperesen long olgeta blong tanem olgeta long Lod long taem blong hadtaem? ?Olsem wanem nao promes blong Lod long ol pipol blong Alma long Mosaea 24:14 i go wetem kavenan ia we yumi mekem wetem Lod long taem blong baptaes blong yumi? (luk long Mosaea 18:8–10).

lanem samting pikja bokis

Stap Leftemap Tingting blong Lanem Samting long Hom

Blong givim insperesen blong ol memba blong klas oli ridim Mosaea 25–28, askem olgeta blong tingbaot wan we oli save hem, we i bin aot long rod blong gospel. Talem long olgeta se, taem oli ridim ol skripja ia, oli maet faenem sam niu tingting long wei blong helpem man o woman ia blong kambak.

risos pikja bokis

Sam Moa Risos

?From wanem yumi nidim Jos?

Elda D. Todd Christofferson i bin talem: “Mi luksave se i gat olgeta we oli tekem se oli folem relijin, o oli folem gud Spirit, be yet, oli no wantem blong kam pat blong wan jos, o iven oli no luk nid blong gat wan institusen olsem. Blong praktisim relijin, long olgeta, i wan desisen blong yuwan nomo. Yet, Jos nao i kriesen blong Hem we yumi stap biliv long Hem, Jisas Kraes. Hem i gud blong tingting se from wanem Jisas Kraes i jusum blong yusum wan jos, Jos blong Hem, Jos Ia blong Jisas Kraes blong Ol Lata-dei Sent, blong kareaot wok blong Hem mo wok blong Papa blong Hem.”

Afta Elda Christofferson i serem ol risen we Lod i bin oganaesem wan Jos (luk long “Why the Church,” Ensign o Liahona, Nov. 2015, 108–11):

• “Blong stap prijim gud nius blong gospel blong Jisas Kraes, mo blong mekem ol odinens blong fasin blong sevem man—long nara toktok, blong tekem ol pipol oli kam long Kraes.”

• “Blong krietem wan komuniti blong Ol Sent we bae oli sapsapotem wanwan long olgeta long ‘rod we i stret mo i no isi we i lid i go long laef we i no save finis’ [2 Nifae 31:18]. … Taem yumi joen wan long fet, yumi stap tijim mo leftemap wanwan long yumi, mo traehad blong kam kolosap ful mak blong stap olsem wan disaepol.”

• Blong “givim wan taem blong kam tugeta evri wik blong spel mo kam niu bakegen, wan taem mo ples blong livim wol i stap biaen—Sabat dei.”

• “Blong mekem ol samting we i nid blong mekem we wanwan man, woman o smol grup [iven] blong lukluk long ol pua pipol, … blong tekem gospel i go long ful wol … [blong bildim mo mekem ol tempol we oli wok ,, we oli ol haos blong Lod, ples ia we oli stap givimaot o mekem ol stamba odinens mo kavenan.”

• Blong mekem ol prishud ki oli stap oltaem; wetem ol ki ia, “ol prishud ofisa blong Jos oli holemtaet stret mo klin doktrin blong Sevya, mo tru fasin blong mekem ol odinens blong sevem man … oli help blong mekem rere olgeta we oli wantem kasem ol odinens ia; oli jajem se olgeta we oli wantem ol odinens ia oli klin inaf blong laef folem mo karemaot wok ia mo oli faenemaot tugeta, wanem i trutok mo wanem i giaman tok.”