wan enjel i kamkamaot long Alma mo ol boe blong Mosaea

Taem Yangfala Alma I Jenisim Laef blong Hem, i kam long Gary L. Kapp

18–24 Mei

Mosaea 25–28

“Oli Singaotem Olgeta Ol Pipol blong God”

Bes wei blong rere blong tij abaot Mosaea 25–28 hem i blong ridim olgeta japta ia mo laef folem olgeta prinsipol we oli stap tijim. Taem yu stap mekem hemia, Spirit i save givim insperesen long yu blong tijim wanem i moa impoten long ol memba blong klas blong yu.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Mebi sam long ol memba blong klas blong yu oli stap traehad blong gat skripja stadi blong olgetawan mo wetem famli. ?Olsem wanem? ?Bae eksperiens blong ol nara memba blong klas i save help? Maet yu save statem klas blong yu wetem wan invitesen long ol memba blong klas blong oli serem wan samting we oli bin mekem long skripja stadi blong olgetawan mo wetem famli, we i bin wok gud long olgeta.

tijing pikja bokis

Stap Tijim Doktrin

Mosaea 26:15–31; 27:23–37

God i givim fulap i fri long olgeta we oli sakem sin.

• Fasin blong sakem sin, mo fogivnes, oli ol stamba toktok we oli kamkamaot oltaem long ol japta ia. Yu save lukluk moa long ol stamba toktok ia taem yu raetem Fasin blong Sakem Sin mo Fogivnes antap long bod, mo askem ol memba blong klas blong mekem lis, andanit long ol heding ia, long wanem i kam long maen blong olgeta taem oli tingting long ol toktok ia. Oli save luklukgud insaed long Mosaea 26:22–24, 29–31; mo 27:23–37 blong kasem ol toktok mo ol sentens we i stap tijim olgeta abaot fasin blong sakem sin mo fogivnes. Ol memba blong klas oli save ademap ol toktok we oli faenem long lis long bod. ?Olsem wanem nao God i filim abaot olgeta we oli sakem sin mo oli stap lukaotem blong kasem fogivnes?

• Sam pipol oli save askem olgetawan sapos fasin blong sakem sin i inaf blong God i stap fogivim olgeta. Blong helpem eniwan long klas blong yu we i save filim olsem, yu save invaetem ol memba blong klas blong traem tingting se oli Olfala Alma, mo wan memba blong Jos long Sarahemla i askem olgeta olsem wanem blong kasem fogivnes from ol sin blong hem (mebi yu save rolplei long hemia). Wanem nao Alma i bin lanem long Lod insaed long Mosaea 26:15–31 we i save helpem memba blong Jos ia? (luk long Moronae 6:8; D&K 58:42–43). Toktok ia we i kam long Presiden Henry B. Eyring i save help tu: “Sapos yu bin filim Tabu Spirit i lidim tingting blong yu tedei, yu save tekem se hemia i wan pruf se Atonmen i stap wok insaed long laef blong yu” (“Gifts of the Spirit for Hard Times,” Ensign, Jun 2007, 23).

Mosaea 27:8–24

God i stap harem ol prea mo bae i ansarem olgeta folem tingting blong Hem.

• Plante long yumi i save tingting long hemwan taem i tingting long ol filing blong Olfala Alma, we boe blong hem i “stap go agensem God” (Mosaea 27:11). Maet ol memba blong klas oli save toktok raon long olsem wanem oli save yusum stori we i stap long Mosaea 27:8–24 blong givim hop long wan we i gat wan famli we i mestem rod. Wetem andastaning ia se yumi no save askem wan merikel, o go ova long fridom blong joes blong eniwan, ?wanem nao i stret blong prea from taem wan i mestem rod? (luk tu long Alma 6:6).

Mosaea 27:8–28:4

Evri man mo woman i mas bon bakegen.

• Hemia sam kwestin we i save helpem ol memba blong klas blong lanem abaot fasin blong bon bakegen: ?Hem i minim wanem blong bon bakegen long saed blong spirit? (luk long Bible Dictionary, “Conversion”). Taem yumi bon bakegen long saed blong spirit, ?bae yumi traehad blong tritim ol narawan olsem wanem? Blong helpem ol memba blong klas blong ansarem ol kwestin ia, yu save invaetem olgeta blong luklukgud insaed long Mosaea 27:22–28:4 blong faenem ol saen we i soem se ol boe blong Mosaea oli bin bon bakegen long saed blong spirit.

• Evriwan i gat wan stori we hem i jenisim laef blong hem, from se, olsem we Alma i bin talem: “evri man … i mas bon bakegen” (Mosaea 27:25; oli ademap italik). Mebi sam memba blong klas nomo oli save serem olsem wanem oli kam blong jenisim laef blong olgeta long gospel blong Jisas Kraes—sapos hem i wan bigfala taem long saed blong spirit long laef blong olgeta, o sapos hem i tru long rod we i sloslo, we man i no save luksave, be yu save luksave nomo afta we hem i hapen. Yu save givim taem long memba blong oli raetemdaon eksperiens blong olgeta. (Sapos i no gat taem long klas blong mekem hemia, yu save askem blong oli mekem hemia long haos blong olgeta.) Blong tokbaot bigwan se fasin blong jenisim laef blong yumi i mas gogohed nomo, yu save talem long ol memba blong klas blong oli luklukbak wanwan taem wanem we oli bin raetem mo ademap sam niu eksperiens.

• Alma mo ol narawan, truaot long ol skripja, oli yusum pikja toktok ia blong stap bon bakegen blong tokbaot jenis ia we gospel blong Jisas Kraes i stap tekem i kam insaed long laef blong yumi. Elda David A. Bednar i komperem jenis ia long wan kukamba we i kam wan pikol (konkon mo swit smol kukamba) (luk long “Sam Moa Risos”). Blong helpem ol memba blong klas blong tingting hevi long, wanem we oli komperem ia, se i tijim olgeta wanem abaot fasin blong jenisim laef; yu save tekem wan kukamba mo wan pikol i kam long klas. O, yu save invaetem wan blong tekem wan bebi i kam mo toktok raon se from wanem taem wan i bon i kam long wol i wan gud wei blong komperem wetem wanem we i hapen long Alma mo ol boe blong Mosaea. (Luk long Mosaea 27:23–28:7.)

Yangfala Alma we oli tekem hem i go long haos blong papa blong hem.

Papa blong Hem i bin Stap Glad, i kam long Walter Rane

stap lanem samting pikja bokis

Stap Leftemap Tingting blong Lanem Samting long Hom

Blong givim insperesen long ol memba blong klas blong ridim Mosaea 29–Alma 4 long nekis wik, yu save talem long olgeta se, long ol japta ia, ol pipol blong Nifae oli bin gat wan voes insaed long gavman blong olgeta. ?Wanem nao yumi save lanem aot long eksperiens blong olgeta taem yumi stap traem blong lidim tingting blong ol komuniti blong yumi blong mekem gud?

risos pikja bokis

Sam Moa Risos

Wan rod we i tekem ful laef.

Elda D. Todd Christofferson i tijim: “Blong bon bakegen, i no olsem taem yumi bon i kam long wol ia, be i moa olsem wan rod, wan samting we i stap gogohed blong hapen. Mo blong tekem rod ia, hem i stamba tingting blong laef blong yumi long wol ia” (“Born Again,” Ensign o Liahona, May 2008, 78).

Fasin blong jenisim laef mo ol pikol.

Elda David A. Bednar i bin serem toktok ia we hem i komperem fasin blong bon bakegen long saed blong spirit long fasin blong mekem ol pikol kukamba:

“Wan pikol i wan kukamba we i jenis folem wan stret resipi, mo folem samfala step. Ol fas step long rod blong jenisim wan kukamba i kam pikol, hem i blong mekem rere mo blong klinim. …

“Ol nekis step long rod ia blong jenisim kukamba, hem i blong draonem mo mekem ol kukamba oli fulap gud long sol (blong kakae), mo lego oli stap long sol ia blong wan longfala taem. … Ol kukamba oli save kam pikol nomo taem oli draon fulwan insaed long sol wota ia blong wan longfala taem. Rod ia, we hem i stap tan sloslo long hem, i stap jenisim wanem i stap insaed long kukamba, mo i mekem se i luk olsem oli save luk tru long hem, mo i mekem se i gat spesel tes ia blong pikol. Sapos oli draonem kukamba ia wanwan taem, o sapos oli sakem sol ia antap long hem, bae i no save mekem kukamba ia i jenis. Be, i nid blong oli draonem fulwan, mo i stap oltaem, mo i gat inaf wota we i sol oltaem blong mekem se jenis ia i hapen.

“Las step blong rod ia, i nidim blong oli silim ol pikol ia we oli tan insaed long ol glas botel we oli klinim gud mo i kam klin evriwan we i no gat doti long olgeta. Oli putum ol pikol ia insaed long ol glas botel, oli kavremap wetem hot sol wota we i boel, mo oli draonem ol glas botel ia insaed long wan bigfala sospen blong hot wota we i stap boel. Evri samting we i no klin, i mas kamaot long ol pikol mo botel ia blong mekem se prodak we bae i kamaot, i gat proteksen mo i save stap longtaem. …

“Semmak olsem we oli mas rere mo klinim gud wan kukamba bifo hem i save jenis i kam pikol, yu mo mi, i save rere wetem ol toktok blong bilif mo ol toktok blong gudfala doktrin (luk long1 Timoti 4:6) mo oli mas klinim yumi faswan wetem ol odinens mo ol kavenan we atoriti blong Aronik Prishud nao i givimaot. …

“Semmak olsem we wan kukamba i jenis i kam pikol taem hem i draon insaed long wan wota we i fulap gud long sol blong kakae, yu mo mi, i bon bakegen taem yumi draon insaed long gospel blong Jisas Kraes. Taem ia blong stap jenis, i nidim taem, fasin blong gogohed, mo fasin blong save wet longtaem. …

“… Bigfala wota ia we i stap boel, i mekem se ol pikol ia oli kasem proteksen mo oli save stap blong wan longlongfala taem. Long wan semmak wei, yu mo mi i kam klin mo kam tabu sloslo taem oli wasem yumi long blad blong Smol Sipsip, mo yumi bon bakegen, mo yumi kasem ol odinens mo yumi ona long ol kavenan we atoriti blong Melkesedek Prishud i givimaot” (“Ye Must Be Born Again,” Ensign o Liahona, May 2007, 19–21).

Stap Kam Antap long Fasin blong Yumi blong Stap Tij

Yu rere wetem ol pipol i stap long maen blong yu. “Taem yu rere, yu mas save andastanem ol pipol ia we yu stap tijim olgeta blong hemia i gaedem ol plan blong yu. … Ol tija we oli olsem Kraes, oli no stap putum olgeta blong stap folem wan sem kaen stael o fasin blong tij; oli putum tingting blong olgeta blong helpem ol pipol blong bildimap fet long Jisas Kraes mo kam moa olsem Hem” (Teaching in the Savior’s Way, 7).