laj Alma ut laj Amulek naq ke’el chaq sa’ tz’alam

Xjalam-uuch laj Alma ut laj Amulek naq ke’kole’ chiru preexil, xb’aan laj Andrew Bosley

15–21 junio

Alma 13–16

“Ok sa’ xhilob’aal li Qaawa’ ”

Re taa’uxq li jalok ch’oolej, moko tz’aqal ta jun chaab’il tzolok sa’ li Dominkil Tzoleb’aal rajlal xamaan. Waklesiheb’ xch’ool li komon sa’ li tzoleb’aal re te’xsik’ li musiq’ejil na’leb’ chiru chixjunil li xamaan.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

K’a’ru taareek’asiheb’ li komon sa’ li tzoleb’aal re xwotzb’al chirib’ileb’ rib’ lix numsihomeb’ sa’ xtzolb’al ut xyu’aminkil li evangelio? Maare taaruuq taakanab’eb’ chixwotzb’al junaq na’leb’ xe’xtaw sa’ Alma 13–16 li xsach wi’ xch’ooleb’, malaj li maji’ okenaq sa’ xk’a’uxleb’. Naq yookeb’ chixwotzb’al, patz’ reheb’ chan ru naq li ak’ na’leb’ a’in taak’anjelaq sa’ xyu’ameb’.

reetalil li k‘utuk

Xk’utb’al li tzol’leb’

Alma 13:1–9

Eb’ li k’ojojb’anb’il k’anjel re li tijonelil neke’xtenq’aheb’ li ralal xk’ajol li Dios chixk’ulb’al xtojb’aleb’ rix xb’aan li Jesukristo.

• Maare wankeb’ li komon sa’ laa tzoleb’aal li xe’xtaw k’a’ruhaq li xchamob’resink re lix tawomeb’ ru chirix li tijonelil naq xe’xtzol Alma 13. Kanab’eb’ chixwotzb’al li k’a’ru xe’xtaw. Naru ajwi’ teeril ru sa’ komonil eb’ li raqal 2 ut 16, ut oksi jun patz’om jo’ “Chan ru naq li tijonelil ut eb’ li k’ojob’anb’il k’anjel re a’an nakate’xtenq’a re “taawil chi uub’ej li Ralal li Dios re taatoje’q aawix?” Wi na’ajman, wan xtusulaleb’ li k’ojob’anb’il k’anjel sa’ Leales a la Fe, 134–135.

  eb’ li saaj winq sa’ xmeexul li loq’laj wa’ak

  Eb’ li k’ojob’anb’il k’anjel re li tijonelil nokohe’xtenq’a chi ilok rik’in li Jesukristo re xk’ulb’al lix tojb’al qix.

• Naab’aleb’ li tenamit sa’ Ammonihah neke’taaqenk re laj Nehor, li kik’utuk re b’alaq’il na’leb’ chirix lix k’anjeleb’ laj tij. Re xtenq’ankileb’ li komon sa’ li tzoleb’aal chi tzolok chirix chan ru tz’aqal wan li tijonelil, naru taaye reheb’ naq te’xye k’a’ru xjalanil lix na’leb’ laj Nehor chirix li k’a’ru tento te’xb’aanu laj tij (chi’ilmanq Alma 1:3–6) rik’in li k’a’ru kixk’ut laj Alma (chi’ilmanq Alma 13:1–12). Chan ru naq li na’leb’ k’utb’il xb’aan laj Nehor chanchan lix na’leb’ li ruchich’och’ chirix li wankilal ut li jolomink? Chan ru naq jalan li k’a’ru kixk’ut laj Alma?

• Rik’in rilb’al ru Alma 13:1–19, naru tex’aatinaq chirix li wank chi “kawresinb’il chalen chaq xk’ojlajik li ruchich’och’ ” choq’ re li qateneb’ankil sa’ lix k’anjel li Qaawa’. Jo’ naxye sa’ Alma 13:3, chan ru naq tento taqil li teneb’ank a’in? (chi’ilmanq ajwi’ Tzol’leb’ ut Sumwank 138:56).

Alma 13

Li Qaawa’ naxk’e qab’oqb’al chi ok sa’ lix hilob’aal.

• Laj Alma kixk’ut naq li tijonelil nokoxtenq’a “chi ok sa’ xhilob’aal li Qaawa’ ” (Alma 13:16). Re xtikib’ankil jun seraq’ chirix li na’leb’ a’in, naru taaye reheb’ li komon naq te’ril ru Alma 13:6, 12–13, 16, ut 29, ut te’xwotz k’a’ru neke’xk’ut li raqal a’in chirix “lix hilob’aal li Qaawa’.” Te’ruuq ajwi’ chixk’eeb’al reetal chan ruheb’ li ani “neke’ok sa’ xhilob’aal li Qaawa’.” K’a’ru naru naqab’aanu re xk’ulb’al lix hilob’aal li Qaawa’ sa’ li qayu’am sa’ ruchich’och’?

Alma 14

Sa’ xkutankil li ch’a’ajkilal, tento taqakanab’ qib’ chiru li Qaawa’.

• Li aatin sa’ Alma 14 naru nak’anjelak re aatinak chirix chan ru naru naqasume chi tiik qapaab’aal naq laa’o, malaj eb’ li raarookeb’ qab’aan, naqak’ul li rahob’tesiik malaj lix yalb’al qix, us ta yooko chixyalb’al qaq’e chi wank sa’ tiikilal. Maare naru nakatikib’ rik’in xkanab’ankileb’ li komon sa’ li tzoleb’aal chixk’oxlankil naq a’aneb’ aj tz’iib’anel re periodico li yookeb’ chixtz’iib’ankil resil li k’a’ru kik’ulman sa’ Alma 14. K’a’ raj ru te’xpatz’ re laj Alma malaj laj Amulek chirix li k’a’ru kik’ulman? Qayehaq, “K’a’ut naq li Qaawa’ xexxkanab’ laa’ex ut xkomoneb’ chik li tiikeb’ xch’ool chixk’ulb’al li rahilal?” malaj “K’a’ru li na’leb’ taak’e raj reheb’ li yookeb’ chixnumsinkil ninqi ch’a’ajkilal?” Rik’in li k’a’ru naqil sa’ Alma 14, chan raj ru naq laj Alma ut laj Amulek te’xsume raj li patz’om a’in?

• Lix k’ihal qe naqanaw b’ayaq k’a’ru kireek’a laj Amulek naq kiril lix rahileb’ li ani tiikeb’ xch’ool sa’ Ammoniah: wan naq “nokoraho’ ” ajwi’ laa’o (Alma 14:10), ut naqaj raj xb’aanunkil k’a’ruhaq. K’a’ru naqatzol rik’in li kixye laj Alma re laj Amulek sa’ li hoonal a’an? (chi’ilmanq Alma 14:8–13). Naru ajwi’ taawoksi li raatin li Awa’b’ej Spencer W. Kimball sa’ “Xkomon chik li k’anjeleb’aal.” Maare eb’ li komon te’ruuq chixk’osb’al ru lix na’leb’ li Awa’b’ej Kimball rik’in tz’aqal li raatineb’.

Alma 15:16, 18

Re wank choq’ tzolom, na’ajman ru li mayejak.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, na’aatinak chirix xtz’iib’ankil xtusulal li k’a’ru kisach chiru laj Amulek ut li k’a’ru kixk’ul naq kixpaab’ li evangelio. Maare eb’ li komon sa’ li tzoleb’aal te’wanq xch’ool chixwotzb’al li tusulal xe’xtz’iib’a, malaj ut te’ruuq chixtz’iib’ankil li tusulal sa’ li tzoleb’aal. Eb’ li raqal a’in naru neke’k’anjelak: Alma 10:4–5; 15:16, 18; 16:13–15; ut 34:8. K’a’ut naq laj Amulek kiwan xch’ool chixb’aanunkil li mayej a’in? K’a’ru wan qach’ool chixb’aanunkil laa’o? Chan ru naru naqataaqe lix b’aanuhom laj Alma, naq “kixkawob’resi laj Amulek chirix li Qaawa’ ”?

Alma 16:1–10

Li raatinebʼ li profeet te’tz’aqloq ru.

• Sa’ Alma 16 naxye resil jun kristiaan li kixkanab’ rib’ chiru jun li profeet, ut xkomoneb’ chik li ink’a’ ke’xb’aanu. Re xtenq’ankileb’ li komon sa’ li tzoleb’aal chi tzolok rik’ineb’ li kristiaan a’in, naru taatz’iib’a chiru li pizarron wiib’ jolomil aatin: Laj Tzoram ut Eb’ laj Ammonihah. Eb’ li komon sa’ li tzoleb’aal naru neke’ril ru Alma 16:1–10 ut te’xtz’iib’a rub’el li junjunq jolomil aatin eb’ li aatin ut li ch’ol aatin li neke’aatinak chirix chan ru naq eb’ li kristiaan a’an ke’xk’ul li raatin li profeet aj Alma. K’a’ru yooko chixb’aanunkil re xk’utb’al chiru li qaChoxahil Yuwa’ naq naqapaab’ li raatineb’ li yo’yookil profeet?

reetalil li tzolok

Xb’oqb’aleb’ chi tzolok sa’ kab’l

Naru taapatz’ reheb’ li komon sa’ li tzoleb’aal ma wan naq te’raj raj naq chaab’ilaqeb’ wi’chik chixwotzb’al li evangelio. Rilb’al ru Alma 17–22 maare tixwaklesiheb’ xch’ool ut tixk’e li na’leb’ re xtenq’ankileb’ chixb’aanunkil.

reetalil li k’anjeleb’aal

Xkomon chik li k’anjeleb’aal

Li Dios ink’a’ junelik naxram li rahilal.

Li Awa’b’ej Spencer W. Kimball jun sut ki’aatinak chirixeb’ li ninqi rahilal neke’k’ulman sa’ li ruchich’och’:

“Ma naru li Qaawa’ chixramb’aleb’ li ninqi rahilal a’in? Yaal naq naru chiru. Li Qaawa’ chixjunil naru chiru, wan xwankil chixb’eresinkil li qayu’am, chiqakolb’al chiru li rahilal, chixramb’al ru chixjunileb’ li rahilal … ut chiqakolb’al chiru li kamk, wi jo’kan li rajom. A’b’anan ink’a’ naxb’aanu. …

“Wi ta te’k’iraaq raj chixjunileb’ li yaj li nokotijok chirixeb’, wi ta te’kole’q raj rix chixjunileb’ li tiikeb’ xch’ool ut te’sachmanq raj laj maak, chixjunil lix k’uub’anb’il na’leb’ li Yuwa’b’ej taasache’q raj xwankil, ut li xnimal ru na’leb’ sa’ li evangelio, lix taql qach’ool, taa’oso’q raj. Maajun winq taa’ajmanq ru naq taab’eeq rik’in paab’aal. …

“… Wi ta taatz’apmanq raj li okeb’aal chiru li rahilal ut li ch’a’ajkilal, maare yooqo raj chixtz’eqtaanankil li qamiiw ut laj tenq’ahom qe li mas chaab’il. Xnumsinkil li rahilal naru naxyiib’eb’ li kristiaan jo’ aj santil paab’anel naq neke’xtzol li kuyuk, li najtil oyb’enink, ut li xramb’al rib’. …

“… Ninb’antioxi naq us ta wan wik’in li tijonelil, ink’a’ naru nink’irtesi chixjunileb’ li yaj. Maare tink’irtesi raj li ani tento raj taakamq. Maare tinwisi raj xrahileb’ li ani tento raj te’xnumsi li rahilal. Maare tinsach raj li rajom li Dios.

“Wi ta wan wik’in wankilal chixb’aanunkil chixjunil, a’ut chi moko tz’aqal ta li wilom ut lin tawom ru, maare raj tinkol raj laj Abinadi chiru raq’ li xam naq kik’ate’, ut rik’in xb’aanunkil, maare raj kinb’aanu nimla rahilal re. A’an kikam xb’aan xpaab’aal, ut kixk’ul xq’ajkamunkileb’ li neke’kam xb’aan xpaab’aaleb’—li taqenaqil loq’al.

“Maare tinkol raj laj Pablo chiruheb’ lix ch’a’ajkilal wi ta maak’a’ xraqik lin wankilal. Ch’olch’o naq xink’irtesi raj li “tiq’leb’ sa’ lix junxaqalil.” [2 Korintios 12:7.] Ut sa’ xb’aanunkil chi jo’kan, maare raj xinsach xwankil lix k’uub’anb’il na’leb’ li Qaawa’. …

“Ninxuwa naq wi ta xinwan sa’ li tz’alam re Carthage sa’ li 27 junio, 1844, maare raj xinrameb’ raj lix naq’ puub’ li ke’xk’ob’ lix tib’el li profeet aj Jose Smith, ut li yuwa’il aj k’anjel, aj Hyrum Smith. Maare xinkoleb’ raj chiru li rahilal ut li sachk, a’ut ink’a’ raj xe’xk’ul xq’ajkamunkil li ani nakam xb’aan xpaab’aal. …

“Wi ta xk’eeman we li wankilal chi maak’a’ roso’jik, ch’olch’o naq xinraj raj xkolb’al rix li Kristo chiru li rahilal sa’ Getsemani, chiru li eetz’uuk, li koroon k’ix, li hob’e’k sa’ li raqleb’aal aatin, ut xrahil li tib’elej. Xinb’an raj lix k’ob’olal ut xink’irtesi raj, xink’e raj re li ha’ ruuchil li vinagre. Maare xinkol raj chiru li rahilal ut li kamk, ut xsachman raj chiru li ruchich’och’ lix mayej re xtojb’al rix li maak. …

“Chiru li ninqi rahilal tento taqakanab’ qib’ chiru li Dios, rik’in xnawb’al naq us ta moko tz’aqal ta li qilom laa’o, ink’a’ taasachmanq li rajom xch’ool a’an” (Enseñanzas de los Presidentes de la Iglesia: Spencer W. Kimball (2006), 16–19, 22–23).

Xchaab’ilob’resinkil li qak’utum

Bʼoqebʼ re teʼxyal xqʼe chi tzolok. “Naq nakakawresi aawib’ chi k’utuk, sa’ xna’aj xk’oxlankil, “K’a’ru tink’ut?” patz’ b’an aawib’, “K’a’ru te’xb’aanu li komon sa’ li tzoleb’aal re naq te’tzoloq?” ” (Li k’utuk jo’ li Kolonel, 29).