“22–28 junio. Alma 17–22: “Laa’in texink’e choq’ k’anjeleb’aal,” ” Kim, Taaqehin—Choqʼ re li Dominkil Tzolebʼaal: Lix Hu laj Mormon 2020 (2020)
“22–28 junio. Alma 17–22,” Kim, Taaqehin—Choq’ re li Dominkil Tzoleb’aal: 2020
Laj Ammon ut li rey aj Lamoni, xbʼaan laj Scott M. Snow
22–28 junio
Alma 17–22
“Laa’in texink’e choq’ k’anjeleb’aal”
Rubʼelaj naq naru nakatenqʼahebʼ laa was aawiitzʼin chixtawbʼal li yaalil naʼlebʼ saʼebʼ li loqʼlaj hu, tento naq taataw aajunes ebʼ li yaalil naʼlebʼ aʼan. Il ru Alma 17–22 chi wanqebʼ saʼ aakʼaʼuxl li komon saʼ laa tzolebʼaal.
Xtz’iib’ankil li nakak’oxla
Xkanab’ankileb’ chi wotzok
Re xkanabʼankilebʼ li komon saʼ li tzolebʼaal chixwotzbʼal kʼaʼruhaq xeʼxtzol naq yookebʼ chi tzolok saʼ junesal malaj saʼ junkabʼal, naru taakanabʼebʼ chixsikʼbʼal ru jun kristiaan li yeebʼil resil saʼ Alma 17–22, ut chixtzʼaqobʼresinkil ru li chʼol aatin joʼ aʼin: “Li xAbix xkʼut chiwu ” malaj “Laj Lamoni xkʼut chiwu .”
Xk’utb’al li tzol’leb’
Nakawobʼresiik li qapaabʼaal naq naqayal qaqʼe chixnawbʼal li yaal.
-
Ebʼ li komon saʼ li tzolebʼaal maare ak xeʼrabʼi kʼiila sut naq aajel ru xkʼaytesinkil qibʼ rikʼin xtzolbʼal li evangelio. Alma 17:1–4 naru naxtenqʼahebʼ chixtawbʼal ru chan ru xwankil li kʼayk aʼin saʼ qayuʼam. Naru taaye re xyijach li tzolebʼaal naq teʼsikʼoq saʼebʼ li raqal aʼin re xtawbʼal kʼaʼru keʼxbʼaanu li ralal laj Moises, ut lix yijach chik chixsikʼbʼal kʼaʼru kikʼulman xbʼaan aʼan. Kʼaʼru nakʼulman xbʼaan xbʼaanunkil li kʼaʼaq re ru aʼin saʼ li qayuʼam?
-
Re aatinak chi mas wiʼchik chirix junjunq li kʼaynaqebʼ wiʼ chixbʼaanunkil li ralal laj Mosiah li xkawobʼresink rehebʼ, naru taatzʼiibʼa chiru li pizarron Xtzolbʼalebʼ li loqʼlaj hu, Tijok, ut Kuyuk saʼ. Chirix aʼan, ebʼ li komon saʼ li tzolebʼaal taaruuq teʼxsikʼebʼ li raqal saʼebʼ li loqʼlaj hu li nekeʼkʼutuk chirixebʼ li osobʼtesink li nekeʼchal xbʼaan xtzolbʼalebʼ li loqʼlaj hu, li tijok, ut li kuyuk saʼ (li Kʼutul Raqal rehebʼ li Loqʼlaj Hu naru nakatxtenqʼa). Naru nekeʼxtzʼiibʼa chiru li pizarron kʼaʼru xeʼxtaw, ut teʼxwotz chiribʼilebʼ ribʼ li naʼlebʼ chan ru xchaabʼilobʼresinkil li tzolok loqʼlaj hu, tijok, ut kuyuk saʼ, re naq nachʼ wiʼchik teʼreekʼa ribʼ rikʼin li Dios.
Li qarahom naru naxtenqʼahebʼ li qas qiitzʼin chixkʼulbʼal li evangelio.
-
Wankebʼ kʼiila naʼlebʼ chan ru xwotzbʼal li evangelio, ut chixjunilebʼ qʼaxal wiʼchik nekeʼkʼanjelak wi eekʼasinbʼilebʼ xbʼaan li rahok. Maare ebʼ li komon saʼ li tzolebʼaal teʼruuq chixtawbʼalebʼ li raqal saʼ Alma 17–18 li nekeʼxkʼut naq laj Ammon kixkʼut li evangelio xbʼaan lix rahom. Kʼaʼ chik ru chirix xwotzbʼal li evangelio naqatzol rikʼin lix bʼaanuhom aʼan? Ebʼ li komon saʼ li tzolebʼaal maare teʼruuq chixwotzbʼal li hoonal naq xbʼaan li rahok xqʼunobʼresiik xchʼool anihaq re taawanq xchʼool chixkʼulbʼal resil li evangelio. Li raatin li Awaʼbʼej Dallin H. Oaks saʼ “Xkomon chik li kʼanjelebʼaal” naru ajwiʼ naxtenqʼahebʼ li komon chixtawbʼal ru lix aajelil ru naq eekʼasinbʼilaq li qakʼanjel xbʼaan li rahok.
Laj Ammon kixkol lix ketomq li rey, xbʼaan li xMinerva K. Teichert
Li xkʼutbʼal ut xtzolbʼal chi us li evangelio naru naxkʼam saʼ xjalajik li chʼoolej.
-
Chirix naq laj Ammon ut laj Aaron keʼraheʼ xbʼaan li rey aj Lamoni ut lix yuwaʼ, keʼru chixtenqʼankilebʼ re teʼxtzolebʼ li yaalil naʼlebʼ re li evangelio. Maare usaq wi ebʼ li komon saʼ li tzolebʼaal teʼxtzʼiibʼa xtusulalebʼ li yaalil naʼlebʼ kixkʼut laj Ammon chiru laj Lamoni (chiʼilmanq Alma 18:24–39), ut il chan ru naxkʼam ribʼ rikʼinebʼ li yaalil naʼlebʼ kixkʼut laj Aaron chiru lix yuwaʼ laj Lamoni (chiʼilmanq Alma 22:1–16). Lix yijach li tzolebʼaal taaruuq taakʼanjelaq saʼ li jun tuslebʼ aatin, ut li jun yijach chik taaruuq chi kʼanjelak rikʼin li jun chik tuslebʼ aatin. Kʼaʼut naq xtawbʼalebʼ ru li yaalil naʼlebʼ aʼin kixkʼam xbʼe laj Lamoni ut lix yuwaʼ re teʼxpaabʼ ut teʼxkanabʼ ribʼ chiru li qaChoxahil Yuwaʼ ut li Jesukristo li ralal?
-
Li esil chirix laj Aaron ut laj Ammon naq keʼxtzol li rey aj Lamoni ut lix yuwaʼ naru nakʼanjelak re aatinak chirix xkʼutbʼal ut xtzolbʼal li evangelio chi chaabʼil. K’a’ruheb’ li na’leb’ chirix li k’utuk neke’xk’e reetal li komon sa’ li tzoleb’aal? (chi’ilmanq, jo’ eetalil, Alma 18:24–28 ut Alma 22:7–13). K’a’ruheb’ li na’leb’ chirix li tzolok neke’xtaw sa’ lix b’aanuhom li rey aj Lamoni ut lix yuwa’? (chi’ilmanq, jo’ eetalil, Alma 18:25–31; 22:17–18).
-
Re tzolok chirix chan ru naq li tzolʼlebʼ saʼ li evangelio naru chi kʼanjelak saʼ li qayuʼam, ebʼ li komon saʼ li tzolebʼaal teʼruuq chixtzʼilbʼal rix Alma 18:40–41; 20:1–15; ut Alma 22:15–18, 25–27 re xtawbʼal kʼaʼru keʼreekʼa li rey aj Lamoni ut lix yuwaʼ ut kʼaʼru keʼxbʼaanu chirix naq keʼxtaw ru li yaalil naʼlebʼ re li evangelio ut keʼjaleʼ xchʼool. Chan ru naq ebʼ li yaalil naʼlebʼ aʼin nokohʼextenqʼa chi chalk rikʼin li Kristo? Kʼaʼru naru taqabʼaanu re xtenqʼankil qibʼ ut ebʼ li raarookebʼ qabʼaan re taqatawebʼ ru ut taqayuʼamihebʼ li yaalil naʼlebʼ aʼin?
Lix nawom qachʼool kʼaʼjoʼ naq naru nakʼanjelak saʼ xyuʼamebʼ li qas qiitzʼin.
-
Naq yookebʼ chixtzolbʼal saʼ junesal Alma 19–22, maare ebʼ li komon saʼ li tzolebʼaal xeʼxkʼoxla chan ru xwankil lix nawom xchʼool jun li kristiaan saʼ xyuʼamebʼ li ras riitzʼin. Kanab’eb’ chixwotzb’al li k’a’ru xe’xtzol. Kʼaʼru nekeʼxkʼut li esil saʼ Alma 19–22 chirix xyalbʼal qaqʼe chixwotzbʼal li evangelio? Li raatin li Awa’b’ej Gordon B. Hinckley saʼ “Xkomon chik li kʼanjelebʼaal” naru naxkʼut xyaalal li naʼlebʼ aʼin.
-
Kʼaʼru junjunq li chaabʼil jaljookil ru aatin taaruuq taawotz re xkʼutbʼal xyaalal kʼaʼru nakʼulman wi inkʼaʼ naqawotz lix nawom qachʼool rikʼinebʼ li qas qiitzʼin? Wan li jaljookil ru aatin chirix jun pek kutbʼil saʼ xyi jun pumpuukil haʼ ut nareekʼasi xhaʼil, malaj naq li xyu li qʼem naq naxsiipobʼresi li qʼem. Chirix rilbʼal resil junjunq li kristiaan li keʼxchʼolobʼ lix nawomebʼ xchʼool saʼ Alma 19–22, ebʼ li komon saʼ li tzolebʼaal naru nekeʼxwotz chan ru naq xeʼtenqʼaak xbʼaan lix nawom xchʼoolebʼ li ras riitzʼinebʼ.
Xb’oqb’aleb’ chi tzolok sa’ kab’l
Maare naru nakapatzʼ rehebʼ li komon ma xeʼxkʼoxla jun sutaq kʼaʼru naru nekeʼxbʼaanu re naq lix jalajikebʼ xchʼool taakanaaq chi xaqxo ut chi inkʼaʼ taaʼeekʼanq. Saʼ Alma 23–29, teʼril resil jun teep chi tenamit li keʼkʼulubʼank re li evangelio, ut “maajoʼqʼe keʼxjalbʼehi ribʼ ” (Alma 23:6).
reetalil li k’anjeleb’aal
Xwotzbʼal li evangelio xbʼaan li rahok.
Li Awa’b’ej Dallin H. Oaks kixwotz jun xnimal ru naʼlebʼ kixtzol rikʼin li kʼaʼru xkʼul joʼ saaj winq:
“Xkʼeheʼ inkʼanjel re wulak rikʼin jun komon li inkʼaʼ nawulak saʼ li iglees, jun winq nim xnawom li naabʼal wiʼchik xchihabʼ chiru li we. Naq najultikoʼ we li kikʼulman, ninkʼe reetal naq kaʼchʼin ajwiʼ li rahok xweekʼa choqʼ re li winq li xwulaʼani. Xinkʼanjelak yal xbʼaan naq aʼan li tenebʼanbʼil saʼ inbʼeen, ut xwaj raj xyeebʼal resil li 100 por ciento xinbʼaanu saʼ li ulaʼanink ochoch. Saʼ jun ewu saʼ xraqik li po, xinbʼoq li winq chiru xukubʼ re xpatzʼbʼal re ma taaruuq toowulaq saʼ rochoch ut taqulaʼani. Aʼan xinixqʼus, ut rikʼin aʼan wan jun nimla naʼlebʼ xintzol.
“Inkʼaʼ nawaj naq texchalq saʼ li qʼojyin aʼin,” chan. “Lubʼluukin. Ak xinkʼe intʼikr re wark. Yookin chi ilok ru hu, ut inkʼaʼ nawaj xkanabʼankil yal re naq tatruuq chixyeebʼal naq xabʼaanu li 100 por ciento saʼ li ulaʼanink saʼ li po aʼin. Toj ra inchʼool xkʼoxlankil li raatin, xbʼaan naq xinnaw naq aʼan xkʼe reetal naq moko anchal ta inchʼool yookin chixbʼaanunkil.
“Nawaj raj naq maajun re li naqabʼoq chirabʼinkil resil li evangelio taareekʼa naq eekʼasinbʼilo xbʼaan jalan chik li ajom, kaʼajwiʼ xbʼaan li rahok naqeekʼa choqʼ rehebʼ, ut li qajom re xwotzbʼal rikʼinebʼ li kʼaʼru naqanaw naq loqʼ ” (“Compartir el Evangelio,” Liahona, enero 2002, 8).
Wan naq inkʼaʼ naqanaw kʼaʼru qawankil saʼ xyuʼam li qas qiitzʼin.
Li Awa’b’ej Gordon B. Hinckley kixye resil jun li misioneer li kixkʼe resil lix kʼanjel re li awaʼbʼej re lix mision saʼ xraqik lix mision. Li misioneer kixye:
“Inkʼaʼ mas xinʼusa saʼ lin kʼanjel. Xinsachle lin kutan ut lix tumin inyuwaʼ. Yal sachok kutan yookin. … Jun ajwiʼ li kristiaan li xkubʼe xhaʼ chiru li wiibʼ chihabʼ wanjenaqin wiʼ arin. Aʼan jun al kabʼlaju chihabʼ xyuʼam, saʼ jun chʼina kʼalebʼaal aran Tennessee.
Li awaʼbʼej saʼ li mision kixkʼe xchʼool naq tixkʼe reetal kʼaʼru taakʼulmanq rikʼin li saaj winq li kikubʼsiik xhaʼ xbʼaan li misioneer aʼan. Kikʼi, kisumla, ut kiqʼaxon aran Idaho. Ebʼ li ralal xkʼajol xkohebʼ saʼ li mision, ut li ralal xkʼajolebʼ aʼan xkohebʼ saʼ li mision. Li awaʼbʼej re li mision kiwulak Idaho ut kixpatzʼ rehebʼ li komon saʼ li junkabʼal aʼan chirixebʼ lix mision. Moqon kixye, “Xintaw naq saʼ xkʼabʼaʼ li jun kubʼihaʼ aʼan re li saaj al saʼ jun chʼina kʼalebʼaal aran Tennessee xbʼaan jun li misioneer li kixkʼoxla naq sachso lix kutan, numenaq 1,100 li kristiaan xeʼok saʼ li Iglees” (Teachings of Gordon B. Hinckley [1997], 360–361).
Xchaab’ilob’resinkil li qak’utum
Kanab’ xhoonalil re te’wotzoq li ani yookeb’ chi tzolok. “Naq eb’ li komon sa’ li tzoleb’aal neke’xwotz li k’a’ru yookeb’ chixtzolb’al, moko ka’aj ta wi’ neke’reek’a li Musiq’ej ut neke’xkawob’resi lix nawomeb’ xch’ool, neke’xwaklesi aj b’an wi’ xch’ooleb’ li jun ch’ol chik li komon sa’ li tzoleb’aal chixtawb’aleb’ li yaalil na’leb’ xjuneseb’ rib’. … K’e xhoonaleb’ li komon sa’ li tzoleb’aal chi wotzok sa’ li junjunq chi tzolok—wan naq taak’e reetal naq eb’ li hoonal chi wotzok a’in, a’aneb’ ajwi’ li tz’aqal tz’olok” (Li k’utuk jo’ li Kolonel, 30).