laj Alma naq yoo chi jultikank aatin

Xjultikankil li yaalil tzol’leb’, xb’aan laj Michael T. Malm

8–14 junio

Alma 8–12

Li Jesukristo taachalq chixtojb’al rix lix tenamit

Re xtikib’ankil lix kawresinkil aawib’ re k’utuk, il ru Alma 8–12. Chirix a’an, il ru li tusleb’ aatin a’in re xtawb’al chik li na’leb’ li taatenq’anq reheb’ li komon sa’ li tzoleb’aal chixwotzb’al k’a’ru xe’xtzol sa’ li tzolok.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chiru junpaat chixk’oxlankil li k’a’ru xe’xtzol sa’ junkab’al malaj sa’ junesal chiru li xamaan a’in. Chan ru naq li k’a’ru xe’xtzol xwan xwankil sa’ li k’a’ru xe’xsik’ ru xb’aanunkil chiru li xamaan a’in? Kanab’eb’ junjunq li komon sa’ li tzoleb’aal chixyeeb’al lix k’oxlahomeb’.

reetalil li k‘utuk

Xk’utb’al li tzol’leb’

Alma 8

Wan naq re xwotzb’al li evangelio na’ajman ru oyb’enink ut li kuyuk.

• Wankeb’ ani ch’a’aj chiruheb’ xwotzb’al li evangelio—ut mas wi’chik wi neke’reek’a naq xe’tz’eqtaanaak, jo’ laj Alma. Li kixb’aanu laj Alma naru naxtenq’aheb’ chixkanab’ankil rib’eb’ chiru li Dios, ut chixtawb’al xkawileb’ xch’ool re naq toj te’xwotz lix nawomeb’ xch’ool rik’ineb’ li ras riitz’in. K’oxlaheb’ li patz’om a’in: K’a’ru naqatzol rik’in li raatin li anjel re laj Alma sa’ Alma 8:15? Chan ru naq li kixb’aanu laj Alma chirix rab’inkil li esil a’an, jo’ tawb’il sa’ Alma 8:14–32, naxwaklesi qach’ool re naq ink’a’ taqakanab’ xwotzb’al li evangelio us ta xqak’ul li tz’eqtaanaak? K’a’ru li na’leb’ taqak’e raj re anihaq li xyal xq’e chixwotzb’al li evangelio, a’ut xtz’eqtaanaak? Li raatin li Elder Jeffrey R. Holland sa’ “Xkomon chik li k’anjeleb’aal” maare taatenq’anq sa’ li aatinak a’in.

• Li esilal chirix laj Alma ut laj Amulak naxk’ut chan ru xnimaleb’ ru lix b’aanuhomeb’ li komon sa’ li k’anjel re xjultikankil li evangelio. K’a’ru neke’xtzol li komon sa’ Alma 8:19–30 chirix lix k’anjeleb’ li komon sa’ li Iglees rik’ineb’ li misioneer? (chi’ilmanq ajwi’ Alma 10:1–12).

  wiib’ li junkab’al li ch’utch’uukeb’

  Naru nawan choq’ sahil ch’oolejil xwotzb’al li evangelio rik’ineb’ li ani neke’qara.

Alma 9:18–30

Li Dios naxraq aatin chirixeb’ li ralal xk’ajol a’ yaal li saqen ut nawom li xe’xk’ul.

• Wan jun kawil q’usuk sa’eb’ li raqal a’in choq’ re chixjunileb’ li komon sa’ li Iglees—chirix naq xqak’ul li saqen ut li nawom, tento sa’ qab’een naq taqak’uula, taqach’olani, taqayu’ami, ut taqoksi re rosob’tesinkil lix yu’ameb’ li qas qiitz’in. Re xtenq’ankileb’ li komon sa’ li tzoleb’aal chixtz’ilb’al rix li teneb’ank a’in, naru taaye reheb’ naq te’ril li k’a’ru kixk’ut laj Alma sa’ Alma 9:18–30, ut te’xwotz li na’leb’ neke’xtaw chirix li teneb’ank li wan sa’ xb’eeneb’ sa’ xk’a’b’a’ li k’a’ru neke’xnaw. K’a’ut naq nim wi’chik li tojb’a-maak wi nim wi’chik li saqen xqak’ul naq nokomaakob’? K’e xhoonaleb’ li komon sa’ li tzoleb’aal re te’xk’oxla k’a’ru naru te’xb’aanu re naq tiikaqeb’ chixpaab’ankil li saqen ut li nawom li ak xe’xk’ul. Naru taaye reheb’ naq te’ril ru Tzol’leb’ ut Sumwank 50:24 naq yookeb’ chixk’oxlankil.

Alma 11–12

Lix k’uub’anb’il na’leb’ li Dios a’an jun k’uub’anb’il na’leb’ re tojok-ix.

• Naru taatikib’ li seraq’ chirix li tzol’leb’ a’in rik’in xyeeb’al re jun komon naq tixyiib’ xjalam-uuch li k’uub’anb’il na’leb’ re li kolb’a-ib’ chiru li pizarron. Chirix a’an naru taajacheb’ ru li raqal sa’ Alma 11–12 sa’ xyanqeb’ li komon sa’ li tzoleb’aal, ut taaye reheb’ naq te’xsik’eb’ li yaalil na’leb’ li naru neke’xtiq sa’ li jalam-uuch. Qayehaq, k’a’ru li natoje’ rix choq’ qe sa’ lix k’uub’anb’il na’leb’ li Dios? (chi’ilmanq Alma 11:38–45). Chan ru naq xnawb’al li yaalil na’leb’ a’in chirix li k’uub’anb’il na’leb’ re li kolb’a-ib’ narosob’tesi li qayu’am?

• Re xtenq’ankileb’ li komon sa’ li tzoleb’aal chixwotzb’al k’a’ru neke’xtzol sa’ Alma 11–12 chirix li k’uub’anb’il na’leb’ re li tojok-ix, naru taatz’iib’aheb’ li jolomil aatin a’in chiru li pizarron: Li t’ane’k, Li Kolonel, Li jalb’a-k’a’uxlej, Li kamk, Li wakliik chi yo’yo, ut Li raqb’a-aatin. Eb’ li komon sa’ li tzoleb’aal naru te’xsik’ ru jun reheb’ li jolomil aatin a’an, ut te’sik’oq sa’ Alma 11–12 re xtawb’aleb’ li yaalil na’leb’ neke’xtzol chirix. Kanab’eb’ li komon sa’ li tzoleb’aal chixtz’iib’ankileb’ li yaalil na’leb’ neke’xtaw, rochb’een li raqal wan wi’, rub’el li jolomil aatin sa’ li pizarron. Jo’ tzoleb’aal, aatinanqex chirix chan ru naq xnawb’aleb’ li yaalil na’leb’ a’in nokoxtenq’a sa’ li qayu’am, ut sa’ li k’a’ru naqasik’ ru xb’aanunkil.

• Maare usaq choq’ reheb’ li komon sa’ laa tzoleb’aal aatinak chirix Alma 12:31–32, b’ar wi’ laj Alma kixk’ut naq chirix li t’ane’k, li Dios kixk’eheb’ li taqlahom re laj Adan ut li xEva—a’ut ka’ajwi’ chirix xk’utb’al lix k’uub’anb’il na’leb’ chiruheb’. Chan ru naq xnawb’al chirix li k’uub’anb’il na’leb’ naxjal chan ru naq naqileb’ ut k’a’ru naqeek’a chirixeb’ li taqlahom? Maare taaruuq tex’aatinaq chirix junjunqeb’ li taqlahom; qayehaq, chan ru naq xnawb’al chirix lix k’uub’anb’il na’leb’ li Dios nokoxtenq’a chiroxloq’inkil li hilob’aal kutan, malaj chixpaab’ankil li chaq’rab’ re li saq ru ch’oolej?

• Maare wankeb’ li komon sa’ li tzoleb’aal li te’wanq xpatz’om chirix Alma 11:26–39, b’ar wi’ laj Amulek kixye naq jun ajwi’ li Dios wan. Eb’ li raqal a’in sa’eb’ li loq’laj hu neke’xkutanob’resi chan ru naq eb’ li roxichal chi Dios wankeb’ choq’ “jun Dios” naq toj jalan jalanqeb’: Jwan 17:20–23; 2 Nefi 31:21; ut 3 Nefi 19:29. Li aatin a’in yeeb’il xb’aan li Elder Jeffrey R. Holland naru ajwi’ chi k’anjelak: “Naqapaab’ naq junajeb’ ru sa’ chixjunil li k’a’ru naru chi k’oxlamank, ka’ajwi’ naq ink’a’ naqapaab’ naq a’aneb’ oxib’ chi kristiaan junajinb’il sa’ jun chi winq” (“El único Dios verdadero, y a Jesukristo, a quien Él ha enviado,” Liahona, noviembre 2007, 40).

Alma 12:9–14

Wi ink’a’ naqakawob’resi li qach’ool, naru naqak’ul xkomon chik li raatin li Dios.

• Jun esil ke’xk’ut laj Alma ut laj Amulek k’iila sut, a’an chan ru naq lix wanjik li qach’ool wan rilom rik’in jo’ nimal li yaal naru naqak’ul rik’in li Qaawa’. Re xtenq’ankileb’ li komon sa’ li tzoleb’aal chixtawb’al li yaal chirix li na’leb’ a’in, naru taaye reheb’ naq te’ril ru Alma 12:9–14 sa’ ka’kab’il malaj sa’ kok’ ch’uut, ut te’aatinaq chirix k’a’ru nak’ulman naq kaw li raam anihaq. (Naru ajwi’ taaye reheb’ naq te’ril ru Alma 8:9–11; 9:5, 30–31; ut 10:6, 25.) K’a’ru naraj naxye naq q’un xch’ool junaq? (chi’ilmanq Jeremias 24:7; Alma 16:16; Helaman 3:35). Chan ru naq li wank chi q’un qach’ool nokoxtenq’a chixtawb’al ru chi us wi’chik li raatin li Dios?

• Laj Alma kixye naq wi naqakawob’resi li qaam, naqak’ul li jun raqal re li raatin li Dios “li yal ka’ch’in” (Alma 12:10). Maare eb’ li komon sa’ li tzoleb’aal te’ruuq chixwotzb’al k’a’ru xk’ulumeb’ sa’ xtzolb’aleb’ li loq’laj hu li naxk’ut xyaalal li na’leb’ a’in. Chan ru naq li Qaawa’ naxq’unob’resi qach’ool re tooruuq chi tzole’k xb’aan a’an? Ma wan k’a’ru xqak’ul laa’o li nokoru chixwotzb’al?

• Re xtenq’ankileb’ li komon sa’ li tzoleb’aal chixtawb’al ru k’a’ru xyaalalil naq q’unaq qach’ool, naru nakawotz li k’a’ru wan sa’ “Xkomon chik li k’anjeleb’aal.”

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru Alma 13–16 chiru li xamaan a’in, naru taaye reheb’ naq te’xtaw chan ru naq kitz’aqlok ru li raatin laj Alma sa’ xyu’am laj Tzeesrom ut eb’ laj Ammonihah.

reetalil li k’anjeleb’aal

Xkomon chik li k’anjeleb’aal

Xaqab’ankil qib’ rik’in kawil ch’oolej.

Li Elder Jeffrey R. Holland kixk’e li na’leb’ a’in reheb’ li neke’hob’e’ xb’aan xwotzb’al malaj xkolb’al rix li evangelio:

“Wi ink’a’ ak xak’ul, toj tatb’oqe’q sa’ junaq kutan chixkolb’al rix laa paab’aal malaj ut maare chixkuyb’al junaq aarahob’tesinkil yal xb’aan naq laa’at jun xkomon Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Sa’ xk’ulb’al a’an taa’ajmanq xkawil aach’ool jo’ ajwi’ roxloq’inkil laa was aawitz’in.

“… Maare tapatz’ ma tixk’e ta li us wi kawaq aawib’ choq’ re li tiikilal sa’ laa tzoleb’aal, malaj wi tatxik sa’ laa mision b’ar wi’ taajite’q laa paab’ahom, malaj ut wi taayal aawu rik’in naab’al li k’a’ru sa’ qatenamit li nareetz’u xnumsinkil jun yu’am re q’axtesink-ib’ sa’ paab’ank. Yaal, tixk’e li us. …

“Ex was wiitz’in, laa’ex li saaj, kawaq eech’ool. Li saq ruhil rahok jo’ li Kristo chalenaq chaq sa’ li tiikilal tz’aqal yaal naru tixjal li ruchich’och’. 

“Kawaq aawib’. Yu’ami li evangelio rajlal, us ta li ani wankeb’ chasutam maajo’q’e neke’xb’aanu. Koleb’ rix laa paab’ahom chi oxloq’inb’il laa was aawiitz’in, a’b’an toj koleb’ li rix” (”Li tojok tz’aq—ut li osob’tesink—re wank choq’ tzolom,“ Jolomil ch’utub’aj-ib’ re abril 2014).

Ke’q’unob’resiik xch’ool.

Eb’ li aatin a’in isinb’ileb’ sa’eb’ li jolomil ch’utub’aj-ib’ neke’xye resileb’ li ani ke’q’unob’resiik xch’ool xb’aan li Qaawa’:

• Li esil chirix lix junkab’aleb’ laj Hatfield sa’ li raatin li Awa’b’ej Russell M. Nelson “Lix tz’aq lix wankilal li tijonelil” (Jolomil ch’utub’aj-ib’ re abril 2016, 66–67).

• Li esil chirix laj Harold Gallacher sa’ li raatin li Awa’b’ej Thomas S. Monson “El sagrado llamamiento del servicio” (Liahona, mayo 2005, 55).

• Li esil chirix laj David sa’ li raatin li Awa’b’ej Dieter F. Uchtdorf “zol li na’leb’ rik’in laj Alma ut laj Amulek” (Jolomil ch’utub’aj-ib’ re octubre ).

Xchaab’ilob’resinkil li qak’utum

Tat-iloq rik’in xnaq’ ru li Dios. K’e aach’ool chirilb’aleb’ li komon sa’ laa tzoleb’aal jo’ chanru naq ilb’ileb’ xb’aan li Dios, ut li Musiq’ej tixk’ut chawu lix choxahil loq’aleb’ ut li k’a’ru te’ruuq chixb’aanunkil. Naq nakab’aanu chi jo’kan, k’amb’ilaq aab’e naq nakayal aaq’e chixtenq’ankileb’ (chi’ilmanq Li k’utuk jo’ li Kolonel, 6).