Eb’ laj Anti-Nefi-Lehi neke’xmuqeb’ lix k’anjeleb’aal re pleet sa’ li ch’och’

Eb’ laj Anti-Nefi-Lehi neke’xmuqeb’ lix k’anjeleb’aal re pleet sa’ li ch’och’, xb’aan laj Jody Livingston

29 junio–5 julio

Alma 23–29

“Maajo’q’e ke’xjalb’ehi rib’ ”

Naq nakawil ru Alma 23–29, chijultiko’q aawe naq re xtenq’ankileb’ jalan chixtzolb’aleb’ li yaalil na’leb’ sa’eb’ li ch’ol a’in, tento taayal xyu’aminkil aajunes li na’leb’ a’an.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Taaruuq taakanab’eb’ li komon sa’ li tzoleb’aal chixtz’iib’ankil chiru li pizarron eb’ li raqal xe’wulak chiruheb’ naq xe’tzolok sa’ junesal malaj sa’ junkab’al. Kanab’eb’ junpaataq li komon chi aatinak chirix jun yaalil na’leb’ xe’xtzol rik’ineb’ li raqal xe’xtz’iib’a.

reetalil li k’utuk

Xkʼutbʼal li tzolʼlebʼ

Alma 23–25; 27

Lix jalajik qach’ool rik’in li Jesukristo ut lix evangelio naxjal li qayu’am.

• Jo’ xtzolom li Jesukristo, chiqajunil naqayal qaq’e chixnimob’resinkil lix jalajik qach’ool. Maare li seraq’ chirixeb’ laj Anti-Nefi-Lehi naru tixwaklesi xch’ooleb’ li tzolb’ileb’ aab’aan naq yookeb’ chixyalb’aleb’ xq’e chixb’aanunkil a’an. Re xtikib’ankil a’an, naru taatz’iib’a jun patz’om chiru li pizarron jo’ a’in: K’a’ru naraj naxye li jalok ch’oolej? malaj K’a’ paay chi jalaak na’uxman sa’ xyu’ameb’ li neke’jale’ xch’ool? Eb’ li komon sa’ li tzoleb’aal taaruuq te’xsik’ xsumenkileb’ li patz’om a’an sa’eb’ li raqal a’in: Alma 23:6–7, 17–18; 24:17–19; 25:15–16; ut 27:26–30. Maare taaruuq te’xwotz li na’leb’ li xe’ril ru sa’ xkomoneb’ chik li raqal sa’ Alma 23–25 ut 27. Eb’ li komon sa’ li tzoleb’aal taaruuq ajwi’ te’xtaw xsumenkileb’ li patz’om a’in sa’ li raatin li Elder David A. Bednar “Convertidos al Señor” (Liahona, noviembre 2012, 106–109; chi’ilmanq ajwi’ “Xkomon chik li k’anjeleb’aal”). K’a’ru ke’xjal laj Anti-Nefi-Lehi sa’ xyu’ameb’ xb’aan lix jalajikeb’ xch’ool? Chan ru naq lix b’aanuhomeb’ a’an nokoreek’asi chixnimob’resinkil lix jalajik qach’ool chirix li Jesukristo ut lix evangelio?

• Chan ru naru taawaklesi xch’ooleb’ li tzolb’ileb’ aab’aan chixtz’eqtaanankil yalaq b’alaq’il na’leb’ kanab’anb’il reheb’ ut chixmuqb’aleb’ lix k’anjeleb’aal re xpo’jikeb’ xch’ool sa’ ch’och’, jo’ ke’xb’aanu laj Anti-Nefi-Lehi? K’oxla xtz’ilb’al rix Alma 23:5–7 sa’ komonil. K’a’ru junjunq li chaab’il na’leb’ kanab’anb’ileb’ qe li nokoxtenq’a li evangelio chixchaab’ilob’resinkil? K’a’ru wan sa’ li kutan wanko wi’ li chanchan jo’ “li k’anjeleb’aal re xpo’jikeb’ xch’ool” laj Lamanita? Chan ru naru “taqamuqeb’ sa’ xchamal li ch’och’ ”? (Alma 24:17). Kanab’eb’ li komon sa’ li tzoleb’aal chixk’oxlankileb’ li b’alaq’il na’leb’ malaj k’anjeleb’aal re xpo’jikeb’ xch’ool li tento te’xkanab’ re naq te’ruuq chixyu’aminkil chi tz’aqal li evangelio.

Alma 24:7–16

Rik’in lix tojb’al rix li maak xb’aan li Jesukristo, naru nakuye’ qamaak naq naqajal qak’a’uxl.

• Wi nakaweek’a naq usaq choq’ re li tzoleb’aal aatinak chirix li jalb’a-k’a’uxlej, jwal chaab’il li resileb’ laj Anti-Nefi-Lehi sa’ Alma 24 re xb’aanunkil a’an. Taaruuq taak’e jun raqal sa’ Alma 24:7–16 re li junjunq komon sa’ li tzoleb’aal re te’ril ru, ut taakanab’eb’ chixtz’iib’ankil chiru li pizarron li k’a’ru xe’xtzol chirix li jalb’a-k’a’uxlej sa’ li raqal xe’ril ru. Chirix a’an, te’ruuq chixtz’ilb’aleb’ rix li raqal a’in sa’eb’ li loq’laj hu re xtawb’al xkomon chik xna’leb’eb’ chirix li jalb’a-k’a’uxlej: Isaias 53:5–6; 2 Nefi 2:6–8; ut Mosiah 5:2.

Alma 24:13–15; 26; 29

Li evangelio naxk’am chaq sahil ch’oolejil.

• Sa’ Alma 23–29, li aatin “sahil ch’oolejil” natawman kaahib’ xka’k’aal sut, jo’kan naq eb’ li ch’ol a’in chaab’ileb’ re xtzolb’al chan ru naq xyu’aminkil li evangelio—ut xwotzb’al—naxk’am chaq li sahil ch’oolejil. Taaruuq taak’uub’ li tzoleb’aal sa’ kok’ ch’uut ut taakanab’eb’ li junjunq ch’uut chixtz’ilb’al rix junjunq reheb’ li raqal a’in re xsik’b’al k’a’ut naq ke’saho’ xch’ool laj Ammon, eb’ li ralal laj Mosiah, ut laj Alma: Alma 24:13–15; 26:12–22; ut 29:1–17. Eb’ li komon te’ruuq chixtz’iib’ankil li xe’xtaw chiru li pizarron. K’a’ru naqatzol sa’eb’ li raqal a’in chirix chan ru naq li evangelio naxk’am chaq xsahil qach’ool?

• Li Awa’b’ej Russell M. Nelson kixk’ut: “Naq naqajayali li qayu’am rik’in lix k’uub’anb’il na’leb’ li Dios re li kolb’a-ib’ … jo’ ajwi’ li Jesukristo ut lix evangelio, naru naqeek’a xsahil qach’ool a’ yaal k’a’ru li nak’ulman—malaj li ink’a’ nak’ulman—sa’ li qayu’am. Li sahil ch’oolejil nachal rik’in ut sa’ xk’ab’a’ a’an. A’an lix yo’leb’aal chixjunil li sahil ch’oolejil” (Li sahil ch’oolejil ut kole’k sa’ musiq’ejil,” Jolomil ch’utub’aj-ib’ re octubre 2016). Maare eb’ li komon sa’ li tzoleb’aal te’ruuq chixwotzb’al li k’a’ru xe’xk’ul sa’ xyu’ameb’ li xtenq’aheb’ chixtawb’al ru lix yaalalil li raatin li Awa’b’ej Nelson.

• Laj Alma ut laj Ammon ke’xtaw xnimal xsahileb’ xch’ool rik’in xwotzb’al li evangelio. Taaruuq taakanab’eb’ li komon sa’ li tzoleb’aal chixtawb’aleb’ li raqal sa’ Alma 26 ut 29 li te’ruuq chixwaklesinkil xch’ool jun saaj komon chi xik sa’ mision—malaj chixwaklesinkil xch’ool yalaq ani chixwotzb’al li evangelio rik’ineb’ li ras riitz’in. K’oxla xk’eeb’al hoonal re naq eb’ li komon te’xk’uub’ xna’leb’ chirix li naru te’xb’aanu re xwotzb’al li evangelio. K’e xb’oqb’aleb’ chixk’anjelankil li xe’xk’uub’, ut sa’ jun tzolok chalel taaruuq taapatz’ reheb’ naq te’aatinaq chirix li xe’xb’aanu.

• Naq laj Alma kixtenq’aheb’ jalan chixjalb’aleb’ xch’ool, kijultiko’ re lix chaab’ilal li Dios (chi’ilmanq Alma 29:10–13). Maare taaruuq taakanab’eb’ li komon chiru junpaat chixtzolb’aleb’ li raqal a’in ut chixtz’iib’ankil chi tustu li kijultiko’ re laj Alma. K’a’ru naxk’e chi jultiko’k qe lix chaab’ilal li Dios? Chan ru naqil lix chaab’ilal li Dios sa’ li qayu’am?

Alma 26–27

Naru toowanq choq’ k’anjeleb’aal sa’ ruq’ li Dios.

• Re xtenq’ankileb’ li komon sa’ li tzoleb’aal chixk’oxlankil k’a’ru naraj naxye li wank “choq’ k’anjeleb’aal sa’ ruq’ li Dios” (Alma 26:3), naru taak’ut junjunqeb’ li k’anjeleb’aal. Taaruuq ajwi’ taak’e xb’oqb’aleb’ li komon chixk’amb’al chaq junjunq li k’anjeleb’aal neke’roksi sa’ xyu’ameb’. Chan ru naq wan rajb’al li junjunq k’anjeleb’aal a’in? Chan ru naq chanchano k’anjeleb’aal sa’ ruq’ li Dios? Taaruuq taakanab’eb’ li komon sa’ li tzoleb’aal chixtz’ilb’al rix chan ru naq laj Ammon ut li rech aj misioneer ke’wan choq’ k’anjeleb’aal sa’ ruq’ li Dios (jo’ eetalil, chi’ilmanq Alma 26:1–5, 11–12). K’a’ru naqataw sa’ Tzol’leb’ ut Sumwank 4 chirix li wank choq’ k’anjeleb’aal sa’ ruq’? Eb’ li komon sa’ li tzoleb’aal te’ruuq ajwi’ chixwotzb’al resil jun hoonal naq xe’reek’a li sahil ch’oolejil li nachal rik’in li wank choq’ k’anjeleb’aal sa’ ruq’ li Dios.

reetalil li tzolok

Xb’oqb’aleb’ chi tzolok sa’ kab’l

Naab’al reheb’ li b’alaq’il na’leb’ li neke’jalb’ehink reheb’ li ralal xk’ajol li Dios sa’ li qakutan anajwan ke’tawman ajwi’ sa’ lix kutankil laj Alma. Ye reheb’ li komon sa’ li tzoleb’aal naq sa’ Alma 30–31 te’ril chan ru naq laj Alma ut xkomoneb’ chik ke’xsumeheb’ li b’alaq’il na’leb’ a’an.

reetalil li kʼanjelebʼaal

Xkomon chik li kʼanjelebʼaal

Li jalok ch’oolej choq’ re li Qaawa’.

Li Elder David A. Bednar kixk’ut:

“Lix tz’aqal ch’oolil lix evangelio li Jesukristo a’an jun jalaak chi junwaakaj rik’in tz’aqal aniho laa’o, li k’anjelanb’il ka’ajwi’ rik’in lix tojb’al rix li maak xb’aan li Kolonel. Li tz’aqal jalok ch’oolej naxk’am xjalb’al li qapaab’ahom, li qaam, ut li qayu’am re xk’ulub’ankil ut xyu’aminkil li rajom li Dios (chi’ilmanq Hechos 3:19; 3 Nefi 9:20), jo’kan ajwi’ jun rajom qach’ool chi wank choq’ xtzolom li Kristo.”

Chirix rilb’al ru Alma 23:6–8, li Elder Bednar kixye:

“Wiib’ li xninqal ru na’leb’ neke’ch’olob’aak sa’eb’ li raqal a’in: (1) xnawb’al li yaal, a’an nawb’il ajwi’ jo’ jun li xnawom ch’oolej, ut (2) li jalok ch’oolej choq’ re li Qaawa’ , a’an ajwi’ li jalok ch’oolej choq’ re li Kolonel ut lix evangelio jo’ nintaw ru laa’in. Jo’kan ut, lix junajinkil li xnawom ch’oolej ut li jalok ch’oolej choq’ re li Qaawa’ naxk’e li kawilal ut li xaqxookilal jo’ ajwi’ li kole’k sa’ musiq’ej.

“Maajo’q’e ke’xjalb’ehi rib’ ut ke’xkanab’eb’ “li k’anjeleb’aal re xpo’jikeb’ xch’ool, re ink’a’ chik ke’xpleeti li Dios.” Xkanab’ankil “li k’anjeleb’aal re xpo’jik qach’ool” jo’ li q’etq’etil ut li q’etok chaq’rab’ ink’a’ ka’ajwi’ naraj ru yal paab’ank ut nawok. Rub’elaj xkanab’ankileb’ li qak’anjeleb’aal re xpo’jik qach’ool tento taawanq li k’ehok ch’oolej, li tuulanil, li jalb’a-k’a’uxlej, ut li kanab’ank-ib’. Ma toj wankeb’ qik’in li k’anjeleb’aal re xpo’jik qach’ool li neke’xram xjalajik qach’ool choq’ re li Qaawa’? Wi wan, tento taqajal qak’a’uxl anajwan.

“K’e reetal naq eb’ laj Lamanita ink’a’ ke’jale’ xch’ool chirixeb’ li misioneer li ke’tzolok reheb’ chi moko chirixeb’ li chaab’il k’anjel neke’b’aanuman sa’ li Iglees. Ink’a’ ke’jale’ xch’ool chirixeb’ laj jolominel reheb’, chi moko re xk’uulankileb’ li na’leb’ kanab’anb’ileb’ reheb’ xb’aan li tenamit malaj lix yuwa’eb’. Ke’jale’ xch’ool chirix li Qaawa’—chirix a’an jo’ aj Kolonel, ut chirix lix santilal ut lix tzol’leb’—ut maajo’q’e ke’xjalb’ehi rib’ ” (“Convertidos al Señor,” Liahona, noviembre 2012, 107–109).

Xchaab’ilob’resinkil li qak’utum

Sik’ aab’eresinkil rik’ineb’ laj jolominel. Laa jolominel sa’ li tijonelil ut li k’anjenel ch’uut neke’raj naq chaab’il tat-elq. Patz’ reheb’ naq te’xk’e aana’leb’ naq yookat chixyalb’al aaq’e chixchaab’ilob’resinkil aawib’ jo’ aj k’utunel ut naq nakak’oxlaheb’ li rajomeb’ ru li ani tzolb’ileb’ aab’aan (chi’ilmanq Li k’utuk jo’ li Kolonel, 5).