Jalam-uuch xb’aan laj Joshua Dennis

20–26 julio

Alma 36–38

“Tat-iloq wan wi’ li Dios ut taawanq aayu’am”

Naq nakawresi aawib’ re k’utuk, chijultiko’q aawe naq naru naq eb’ li komon sa’ li tzoleb’aal ak wan k’a’ru xe’xk’ul rik’in rilb’al ru Alma 36–38. K’a’ru naru taab’aanu re xnimob’resinkil li k’a’ru ak xe’xk’ul?

Xtz’iib’ankil li nakak’oxla

Xkanab’ankileb’ chi wotzok

Re xwaklesinkil xch’ooleb’ li komon sa’ li tzoleb’aal chixwotzb’al li k’a’ru yookeb’ chixtzolb’al sa’eb’ li loq’laj hu, k’uub’ li tzoleb’aal sa’ oxib’ ch’uut ut k’e re li junjunq jun reheb’ li ch’ol sa’ Alma 36–38. Kanab’ li junjunq ch’uut chixtawb’al ut chixwotzb’al jun musiq’anb’il raqal sa’ li ch’ol a’an.

Xkʼutbʼal li tzolʼlebʼ

Alma 36

Naru tooyo’laaq rik’in li Dios naq tuulan qach’ool ut naqajal qak’a’uxl.

• Junjunq reheb’ li tzolb’ileb’ aab’aan maare te’wanq xk’a’uxl chirix k’a’ut naq maajun wa xe’xk’ul jun nimla xjaljik xch’ooleb’ jo’ kixk’ul laj Alma. Maare usaq choq’ reheb’ wi taawotz li kixk’ut li Elder David A. Bednar: “Choq’ re xk’ihaleb’ qe, lix jalajik qach’ool a’an rajlal yoo chi uxmank ut ink’a’ na’ux yal jun sut rik’in jun xnimal ru numsihom naqak’ul” (“Convertidos al Señor,” Liahona, noviembre 2012, 107–108). Us ta li kixk’ul laj Alma naq kijale’ xch’ool ink’a’ na’ilman chi kok’ aj xsa’, li kixk’ul a’an naxk’ut junjunq na’leb’ li aajel ru choq’ qe chiqajunilo sa’ xjalb’al qach’ool. Taaruuq taakanab’eb’ li komon chi sik’ok sa’ Alma 36 re xtawb’aleb’ li na’leb’ a’in ut chixtz’iib’ankileb’ chi tustu chiru li pizarron. K’a’ chik ru natenq’ank qe chixnimob’resinkil lix jalajik qach’ool chirix lix evangelio li Jesukristo?

• Laj Alma kiroksi li ch’ol aatin “yo’laak rik’in li Dios” re xch’olob’ankil lix jalajik xch’ool. Re xtenq’ankileb’ li komon chixtawb’al ru li na’leb’ a’in, taaruuq taakanab’eb’ chirilb’aleb’ ru li raqal a’in xjuneseb’ malaj chi ka’kab’il re xsik’b’al li k’a’ru naraj naxye li yo’laak rik’in li Dios: 1 Jwan 4:7; Mosiah 5:7; 27:25–26; ut Alma 5:14; 22:15. Kanab’eb’ li komon sa’ li tzoleb’aal naq te’xwotz li k’a’ru xe’xtzol. Chirix a’an, te’ruuq chi sik’ok sa’ Alma 36 re xtawb’al xsumenkil li patz’om a’in: K’a’ru neke’reek’a ut k’a’ru neke’xb’aanu li kristiaan naq neke’yo’la rik’in li Dios? Re xtenq’ankileb’ li komon sa’ li tzoleb’aal chi k’oxlak chirix chan ru yookeb’ chi yo’laak rik’in li Dios, taaruuq taawotz li raatin li Awa’b’ej Ezra Taft Benson li natawman sa’ “Xkomon chik li k’anjeleb’aal.”

Alma 37

K’uulanb’ileb’ li loq’laj hu “choq’ re jun chaab’il ajom.”

• Maare xtzolb’al li raatin laj Alma naq kixk’eheb’ li loq’laj tz’iib’anb’il esil re laj Helaman, li ralal, naru tixtenq’aheb’ li komon chixwotzb’al chan ru naq xe’reek’a xwankileb’ li loq’laj hu sa’ xyu’ameb’. Waklesi xch’ooleb’ chixtz’ilb’al rix Alma 37 re xtawb’aleb’ li esil kixk’e laj Alma re laj Helaman chirixeb’ li loq’laj hu (che’ilmanq li raqal 1–19 ut 43–47). Chan ru naru taqak’ut naq loq’eb’ li loq’laj hu choq’ qe? Chan ru naru naq laa’o, jo’ laj Alma, taqak’ut chiruheb’ li raarookeb’ qab’aan naq “te’xk’uula xloq’al chixjunil li k’a’aq re ru a’in”? (Alma 37:2). Chan ru naq eb’ li loq’laj hu “neke’xk’utb’esi xwankilal li Dios” chiqu? (Alma 37:14).

• Re tzolok chirixeb’ li osob’tesink naqak’ul rik’ineb’ li loq’laj hu, naru xtzolb’al li kixye laj Alma sa’ Alma 37 chirixeb’ li loq’laj tz’iib’anb’il esil ut xkomon chik li k’a’aq re ru li kixq’axtesi re laj Helaman. Taaruuq taatz’iib’a chi tustu eb’ li loq’laj k’a’aq re ru loq’ chiru li pizarron: eb’ lix perel ch’iich’ laj Nefi (Alma 37:2–20), eb’ li kaahib’ xka’k’aal perel ch’iich’ re laj Eter ut li k’utleb’aal aatin (Alma 37:21–37), ut li Liahona (Alma 37:38–47). Eb’ li komon sa’ li tzoleb’aal te’ruuq chirilb’aleb’ ru li raqal a’in re xtzolb’al li kixk’ut laj Alma chirix li junjunq reheb’ li k’a’aq re ru a’in. Chan ru neke’ru li loq’laj hu chixnimob’resinkil li najultiko’ qe? (chi’ilmanq Alma 37:8). K’a’ru naru taqatzol rik’in li raatin laj Alma chirixeb’ li osob’tesink naqak’ul rik’in naq wankeb’ li loq’laj hu sa’ li qayu’am anajwan?

  

  Eb’ li loq’laj hu neke’xk’ut chiqu chan ru xtaaqenkil li Dios.

Alma 37:6–7, 41–42

“Rik’in li k’a’ru ka’ch’in ut moko nimob’resinb’il ta, nak’ehe’ chi uxmank li xninqal ru na’leb’.”

• Re xk’utb’al x’aajelil ru li “k’a’ru ka’ch’in ut moko nimob’resinb’il ta” sa’ lix k’anjel li Dios, laj Alma kixye resil wiib’ li k’a’aq re ru a’an: eb’ li loq’laj hu ut li Liahona (chi’ilmanq Alma 37:6–7, 41–42; chi’ilmanq ajwi’ 1 Nefi 17:41). Chirix rilb’al ru resileb’ a’in, maare eb’ li komon sa’ li tzoleb’aal te’ruuq chixwotzb’al k’a’ru li ka’ch’in ut moko nimob’resinb’il ta re lix k’anjel li Dios li xe’xk’ul sa’ xyu’ameb’ a’an. Maare taawaj raj aatinak rik’in jun malaj wiib’ li komon chi rub’elaj re xpatz’b’al reheb’ naq te’xk’am chaq sa’ li tzoleb’aal k’a’ruhaq li ka’ch’in li xk’e chi uxmank li xninqal ru na’leb’ sa’ xyu’ameb’. Taaruuq ajwi’ taawotz li raatin li Awa’b’ej Dallin H. Oaks sa’ “Xkomon chik li k’anjeleb’aal.” Re xtenq’ankileb’ li komon chixjuntaq’eetankil li na’leb’ a’in rik’in xyu’ameb’, taaruuq taawoksiheb’ li patz’om jo’eb’ a’in: K’a’ut naq wan naq nach’a’ajko’ chiqu xb’aanunkil li k’a’ru ka’ch’in ut moko nimob’resinb’il ta? Chan ru naru taqawaklesi qach’ool ut xch’ooleb’ li qajunkab’al chixq’axb’al ru li ch’a’ajkilal a’in?

Alma 37:38–47

Li raatin li Dios naru tixk’am qab’e wulaj wulaj.

• Xjuntaq’eetankil li raatin li Dios rik’in li Liahona naru tixwaklesi xch’ooleb’ li komon sa’ li tzoleb’aal re naq q’axal wi’chik k’eek’ookeb’ xch’ool chirilb’aleb’ ru li loq’laj hu chi rajlal. Re xb’eresinkil li aatinak chirix a’in, taaruuq taakanab’eb’ li komon chirilb’al ru Alma 37:38–47 chi ka’kab’il re xsik’b’al chan ru naq li Liahona a’an chanchan li raatin li Dios. Taaruuq taak’e xb’oqb’aleb’ naq te’xtaw jun na’leb’ sa’ li junjunq raqal. Chirix a’an, taaruuq taatz’iib’a li rajlil li junjunq raqal chiru li pizarron ut taakanab’eb’ li komon chixtz’iib’ankil li k’a’ru xe’xtaw chixk’atq li junjunq ajl. K’a’ru naxk’ut li ch’ina k’anjel a’in chirix chan ru tento tootzoloq sa’eb’ li loq’laj hu?

Alma 38

Xwotzb’al lix nawom qach’ool chirix li Jesukristo naru tixkawob’resiheb’ li ani naqara.

• Li raatin laj Alma re laj Xiblon, li ralal, naxk’ut chi chaab’il chan ru naru naqakawob’resi ut naqawaklesi ch’ooleb’ li raarookeb’ qab’aan chixyu’aminkil li evangelio. Maare eb’ li komon sa’ li tzoleb’aal te’ruuq chirilb’al ru li ch’ol a’in ut chixtawb’al chan ru naq laj Alma kixkawob’resi laj Xiblon. Moko nim ta Alma 38—maare taasik’ ru rilb’al ru sa’ komonil jo’ tzoleb’aal. Chirix a’an, eb’ li komon te’ruuq chixwotzb’aleb’ li raqal li xe’wulak chiruheb’ malaj li xe’xk’e xna’leb’eb’ chirix chan ru xkawob’resinkileb’ li komon sa’ lix junkab’aleb’ malaj li ramiiweb’.

Xb’oqb’aleb’ chi tzolok sa’ kab’l

Ma wankeb’ li komon sa’ li tzoleb’aal li xe’wan xpatz’om jun sutaq chirix chan ru xk’eeb’al xna’leb’ jun li raarookil komon li xb’aanu jun nimla maak? Ch’olob’ chiruheb’ naq te’xtaw li chaab’il na’leb’ sa’ Alma 39–42.

Xkomon chik li kʼanjelebʼaal

Li jalok ch’oolaj a’an chanchan li yo’laak chi ak’il.

Li Awa’b’ej Ezra Taft Benson kixk’ut: “Naq xqak’ul li nimla jalaak a’in, li k’a’ajwi’ na’uxman rik’in xpaab’ankil li Jesukristo ut rik’in lix wankil li Musiq’ej sa’ qab’een, chanchan naq ak’ kristiaano. Chi jo’kan, li jalaak chanchan li yo’laak chi ak’il. K’iila mil eere ak xek’ul li jalaak a’in. Ak xekanab’ eeyu’am re maak, wan naq eb’ li maak jwal ninqeb’ ut yib’eb’ ru, ut rik’in roksinkil lix kik’el li Kristo sa’ lee yu’am, santob’resinb’ilex chik. Ink’a’ chik nekeraj sutq’iik sa’ li xexwan wi’ junxil. Chi yaal naq laa’ex ak’ kristiaanex. A’an a’in li naraj naxye li jalok ch’oolej” (“Un poderoso cambio en el corazón,” Liahona, marzo 1990, 4).

Li k’a’ru ka’ch’in ut moko nimob’resinb’il ta.

Li Awa’b’ej Dallin H. Oaks kixk’ut:

“Xjultikaak we lix wankilal li k’a’ru ka’ch’in ut moko nimob’resinb’il ta chiru xnumik k’iila kutan xb’aan li k’a’ru xwil naq yookin chi b’eek jun eq’la. Li kawil tz’ak yoo chi k’atz’e’k. Ma xb’aan jun nimla metz’ew? Ink’a’, yoo b’an chi k’atz’e’k xb’aan jun ch’ina alab’te’ re jun xxe’ lix toonal li che’ li wan chixk’atq li tz’ak. …

“A’an ajwi’ lix nimla metz’ew li k’a’ru ka’ch’in ut moko nimob’resinb’il ta li nak’utman chiqu sa’eb’ li loq’laj hu ut sa’ xtz’uumaleb’ re li yo’yookil profeet. K’oxlahomaq li tzolok sa’eb’ li loq’laj hu li xk’utman chiqu naq taqab’aanu wulaj wulaj. Malaj k’oxlahomaq li tijok junes ut li tijok sa’ junkab’al li nekeb’aanuman rajlal sa’ xyu’ameb’ laj santil paab’anel tiikeb’ xch’ool. … Us ta naq chixjunileb’ a’in chanchan li k’a’ru ka’ch’in ut moko nimob’resinb’il ta, chiru xnumik k’iila kutan neke’xk’e chi uxmank xnimal ru waklesiik ut nimaak sa’ musiq’ej. Nak’ulman a’in xb’aan naq chixjunileb’ li na’leb’ a’in ka’ch’ineb’ ut moko nimob’resinb’ileb’ ta neke’xb’oq li rochb’eeninkil li Santil Musiq’ej, laj Ch’olob’anel li naxkutanob’resi li qak’a’uxl ut naxk’am qab’e rik’in li yaal” (“Li k’a’ru ka’ch’in ut moko nimob’resinb’il ta,” Jolomil ch’utub’aj-ib’ re abril 2018).

Xchaab’ilob’resinkil li qak’utum

Kanab’eb’ li tzolb’ileb’ aab’aan chixtzolb’aleb’ rib’ chirib’ileb’ rib’. Naq eb’ li komon sa’ li tzoleb’aal neke’xwotz xnawom xch’ooleb’ ut neke’xwotz xna’leb’eb’, naru te’xtoch’ malaj te’xwaklesi xch’ooleb’ li rech aj komon sa’ li tzoleb’aal jo’ maare ink’a’ naru nakab’aanu laa’at. (Chi’ilmanq Li k’utuk jo’ li Kolonel, 30.)