laj Alma nak’utuk chiru laj Korihor

Chixjunil li k’a’aq re ru naxk’ut naq wan jun li Dios (laj Alma ut laj Korihor), xb’aan laj Walter Rane

6–12 julio

Alma 30–31

“Xchaab’ilal li raatin li Dios”

Chirix rilb’al ru Alma 30–31 ut xsik’b’al li musiq’anb’il na’leb’ choq’ re aayu’am, k’e reetal li na’leb’ taak’ul chirix k’a’ruheb’ li esil li te’osob’tesinq reheb’ li komon sa’ laa tzoleb’aal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Wi nakaweek’a naq ch’a’aj b’ayaq li wotzok choq’ reheb’ li komon, naru taak’eheb’ junjunq k’asal re rilb’al wi’chik Alma 30–31 malaj yalaq aatin xe’xtz’iib’a naq yookeb’ chi tzolok sa’ rochocheb’ chiru li xamaan. Chirix a’an, te’ruuq chixwotzb’al rik’in jun rochb’een, malaj rik’in chixjunil li tzoleb’aal, jun chaab’il na’leb’ xe’xtaw.

reetalil li k’utuk

Xkʼutbʼal li tzolʼlebʼ

Alma 30:6–31

Laj tza naxsik’ qab’alaq’inkil rik’in li b’alaq’il tzol’leb’.

• Naq nakatk’oxlak chirix li neke’raj ru li tzolb’ileb’ aab’aan, ma te’tenq’aaq chixtawb’al ru lix jalanil li yaalil na’leb’ re li evangelio rik’in lix b’alaq’il na’leb’ laj Satanas wi taak’am chaq junjunq k’a’aq re ru re xk’utb’al chiruheb’ sa’ jun ch’ina k’anjel? Wi jo’kan, taaruuq taak’ut chiruheb’ junjunq li k’a’aq re ru li moko yaaleb’ ta, jo’ tumin malaj tzakemq, a’b’an yal b’atz’uuleb’, ut rochb’eeneb’ taak’ut ajwi’ li tz’aqal tumin ut tzakemq. Chan ru naru taqanaw ma yaal malaj ink’a’ li k’a’aq re ru moko yaal ta? Chirix a’an, eb’ li wankeb’ sa’ li tzoleb’aal te’ruuq chixtz’ilb’al rix k’a’ruheb’ li b’alaq’il na’leb’ re laj Korihor sa’ Alma 30:6–31. K’a’ru reheb’ li k’utum a’in li neke’aalenk qe? K’a’ru naxk’e qe li yaalil na’leb’ re li evangelio li ink’a’ naru naxk’e qe lix b’alaq’il k’utum laj Satanas? Kanab’eb’ li komon sa’ li tzoleb’aal chixwotzb’al li k’a’ru kitenq’ank re laj Alma chixtz’ilb’al rix b’ar wan li yaalil tzol’leb’ ut b’ar wan li b’alaq’il tzol’leb’ (chi’ilmanq Alma 30:32–54). K’a’ chik ru li na’leb’ xe’xtaw li komon sa’ li tzoleb’aal li naru ajwi’ tooxtenq’a?

• Re xtenq’ankileb’ li komon sa’ li tzoleb’aal chixtzolb’al chan ru xkolb’aleb’ rib’ chiru lix wankil li b’alaq’il tzol’leb’, taaruuq teetz’il rix li ch’olob’ank chirix k’a’ru jun aj xik’ ilonel re li Kristo sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. B’ar wankeb’ li raqal sa’ Alma 30:6–31 li neke’xk’ut naq laj Korihor a’an jun aj xik’ ilonel re li Kristo? B’ar wan reheb’ lix k’utum a’an chanchaneb’ li b’alaq’il k’utum sa’ li qakutankil laa’o? (chi’ilmanq Alma 30:12–18, 23–28). K’a’ru naru taqab’aanu re naq ink’a’ toob’alaq’iiq xb’aaneb’ li k’utum a’in?

Alma 30:39–46

Chixjunil li k’a’aq re ru wan naxch’olob’ xyaalal naq wan li Dios.

• Rik’in naq wanko sa’ jun ruchich’och’ chanchan li re laj Alma, b’ar wi’ wankeb’ li neke’xk’ut naq maak’a’ jun li Dios, lix nawom xch’ool laj Alma sa’ Alma 30:39–44 taaruuq tixtenq’aheb’ li komon sa’ laa tzoleb’aal. Taaruuq taakanab’eb’ chirilb’aleb’ ru li raqal a’in ut chixtz’iib’ankil chi tustu sa’ li pizarron eb’ li yaalil na’leb’ ut eb’ li eetalil naxk’e laj Alma li neke’xch’olob’ xyaalal naq wan jun li Dios. K’a’ chik ru li naxk’ut xyaalal chiqu naq yo’yo li Dios? Jo’ xkomon li aatinak a’in, k’oxla xwotzb’al li raatin li Awa’b’ej M. Russell Ballard wan sa’ “Xkomon chik li k’anjeleb’aal.” Taaruuq ajwi’ taake’ xb’oqb’al junaq chi chalk chi kawresinb’il re xb’ichankil jun li b’ich chirix lix chaab’ilal li Dios, jo’ “Jwal nim aawu” (Eb’ li B’ich, 46), malaj texruuq chixb’ichankil sa’ komonil.

• Naq laj Alma ki’aatinak rik’in laj Korihor, kixk’e reetal naq laj Korihor “xrisi chirix lix Musiq’ li Dios re naq maak’a’aq xna’aj rik’in” (Alma 30:42). K’oxla xpatz’b’al reheb’ li komon sa’ li tzoleb’aal naq te’sik’oq sa’ Alma 30:39–46 re xtawb’al xkomoneb’ chik li aatin chirix li Santil Musiq’ej. K’a’ru lix k’anjel li Santil Musiq’ej sa’ xch’olob’ankil chiqu xyaalalil li Dios ut li Jesukristo? Chan ru naru taqatenq’aheb’ li neke’wiib’an xch’ool malaj wankeb’ xpatz’om, re te’xsik’ li yaal rik’in li Santil Musiq’ej?

  laj Korihor na’aatinak rik’in laj Alma

  Laj Korihor naxyal ru laj Alma, xb’aan laj Robert T. Barrett

Alma 31

Wan xwankil li raatin li Dios chixk’amb’aleb’ xb’e li kristiaan sa’ tiikilal.

• Ma wankeb’ sa’ laa tzoleb’aal li te’ruuq chixwotzb’al jun hoonal naq “xchaab’ilal li raatin li Dios” (Alma 31:5) xtenq’aheb’ a’an malaj anihaq chik neke’xnaw ru chixjalb’al xyu’ameb’? Maare us raj aatinak rik’ineb’ li komon a’an chi rub’elaj re naq kawresinb’ilaqeb’ chixwotzb’al li k’a’ru xe’xk’ul. Waklesi xch’ooleb’ chixwotzb’aleb’ li raqal sa’ Alma 31 li neke’aatinak chirix li k’a’ru xe’xk’ul sa’ xyu’ameb’. Jalaneb’ chik li komon sa’ li tzoleb’aal te’ruuq ajwi’ chixwotzb’al chan ru naq li raatin li Dios “k’a’jo’ wi’chik xwankil sa’ xb’een xk’a’uxleb’ ” (Alma 31:5). Maare taak’anjelaq reheb’ li komon rilb’al ru xkomoneb’ chik li raqal sa’eb’ li loq’laj hu li neke’xch’olob’ xyaalal lix wankil li raatin li Dios (chi’ilmanq “Xkomon chik li k’anjeleb’aal” re xtawb’al junjunq li na’leb’).

• Naq eb’ li komon sa’ laa tzoleb’aal xe’xtzol Alma 31 chiru li xamaan a’in, maare xe’toch’e’ xch’ool rik’in chan ru naq laj Alma kitijok choq’ reheb’ laj Tzoramita. K’oxla xpatz’b’al reheb’ k’a’ru xe’xtzol sa’ li ch’ol a’in chirix xtenq’ankileb’ li komon sa’ li qajunkab’al malaj li qamiiw li elenaqeb’ sa’ xb’ehil li evangelio malaj li yookeb’ chi ch’a’ajko’k rik’in xpaab’aaleb’. Taaruuq ajwi’ taapatz’ reheb’ naq te’sik’oq sa’ Alma 31 sa’ komonil ut te’xtz’iib’a chi tustu chiru li pizarron li k’a’ru neke’ril chirix laj Alma li kitenq’ank re chixkolb’aleb’ laj Tzoramita. Chan ru naru taqoksi li raatin li Dios chi mas wi’chik sa’ xyalb’al qaq’e chixkolb’aleb’ li qas qiitz’in? (Re xtawb’al chik li na’leb’, taaruuq taawotz li raatin li Elder Jeffrey R. Holland wan sa’ “Xkomon chik li k’anjeleb’aal.”)

• K’a’ru neke’xtaw li komon sa’ Alma 31:30–38 li naru tixtenq’aheb’ li neke’raho’ xch’ooleb’ chirix xmaakeb’ jalan, jo’ kixb’aanu laj Alma.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li komon k’a’ruheb’ li tzol’leb’ malaj na’leb’ re li evangelio li te’xk’ut raj re xsachb’al xwankil li b’alaq’il na’leb’ kixtaw laj Alma sa’ xyanqeb’ laj Tzoramita. Ye reheb’ naq sa’ rilb’al ru Alma 32–35 te’xtaw chan ru naq laj Alma kiroksi li raatin li Dios re xtenq’ankileb’ laj Tzoramita chirilb’al naq tento te’xjal xyu’ameb’.

reetalil li kʼanjelebʼaal

Xkomon chik li kʼanjelebʼaal

Eb’ li raqal sa’eb’ li loq’laj hu chirix lix wankil li raatin li Dios.

• 2 Timoteo 3:15–17

• Hebreos 4:12

• 1 Nefi 15:23–24

• 2 Nefi 31:20; 33:4–5, 10

• Jakob 2:8

• Helaman 3:29–30

• Jose Smith—Mateo 1:37

Chixjunil li k’a’aq re ru naxk’ut naq wan jun li Dios.

Li Awa’b’ej M. Russell Ballard kixk’ut naq eb’ li “junelikil reetalil” kixk’e laj Alma naq wan jun li Dios “toj neke’xch’olob’ li yaal chiqu sa’ li kutan a’in” (chi’ilmanq Alma 30:44):

“Eb’ li astronauta li neke’ril li ruchich’och’ chalen chaq taqe’q neke’xye naq k’a’jo’ xchaq’alil ru ut chanchan naq yo’yo. Jun li senador aran Estados Unidos, laj Jake Garn xk’ab’a’, kitz’iib’ak chirix li kixk’ul aran taqe’q: “Maajo’q’e raj taaruuq tinch’olob’ lix chaq’alil ru li ruchich’och’. Jwal sachol ch’oolej, chaq’al ru, ut naxtoch’ li musiq’ej rilb’al li ruchich’och’ chalen chaq taqe’q naq yookat ajwi’ chi nume’k chi q’axal kaw chixsutam. Kinru ajwi’ chi ilok chiru li raak’ab’il li choxa ut chirilb’aleb’ li chahim, maak’a’jo’ rajlankileb’, li jwal wi’chik najt wankeb’. K’a’jo’ wi’chik xnimal li choxa re naq maajun naru tixtaw ru xnimal. A’b’an, laa’in kink’e reetal li ruq’ li Dios sa’ chixjunil li k’a’aq re ru. Kiweek’a lix wankil a’an chiruheb’ li wuqub’ kutan wankin aran taqe’q chixb’een li ruchich’och’. Laa’in ninnaw naq li Dios kixyo’ob’tesi li ruchich’och’ a’in jo’ ajwi’ li choxa. … Ninnaw naq yo’yo li Dios ut a’an aj Yo’ob’tesihom qe chiqajunil” (hu taqlanb’il rik’in laj M. Russell Ballard, 3 marzo 1988)” (“El amor de Dios y Sus creaciones,” Liahona, julio 1988, 56).

Xch’olaninkileb’ jalan rik’in li raatin li Dios.

Li Elder Jeffrey R. Holland kixk’ut:

“Ma chi yaal yooko chixch’olaninkileb’ li qasaaj ut li ak’ komon sa’ li Iglees rik’in li k’a’ru tixch’olaniheb’ naq te’chalq li yale’k-ix re li yu’am? Malaj ma yal yooko chixk’eeb’al reheb’ li k’a’ru chanchan jun li musiq’ejil kok’ kab’—k’a’ruhaq li maak’a’ na’ok wi’ choq’ re xchaab’ilal li musiq’ej? … Chiru jun hab’alq’e jwal ke junjunq chihab’ chaq, li Awa’b’ej Boyd K. Packer kixk’e reetal naq ke’kam naab’aleb’ li kej xb’aan xtz’okajikeb’ us ta nujenaqeb’ xsa’ rik’in ichaj. Re xtenq’ankileb’, eb’ lix taql li tenamit xe’xk’e chaq li yal taanujob’resinq sa’ej, ut ink’a’ li taa’ajmanq ru re naq yo’yooqeb’. Eb’ a’an ke’xk’eheb’ chi wa’ak li kej, a’b’an ink’a’ ke’xch’olaniheb’. …

“Ch’olch’o naq laj Satanas ink’a’ sa’ muqmu naxk’ut lix na’leb’, ut k’a’ut naq taqab’aanu laa’o? Maak’a’ naxye ma yooko chixtzolb’aleb’ li qakok’al sa’ ochoch malaj xaqxooko chiruheb’ li qakomon sa’ iglees, maajo’q’e chiwanq chi moko k’utk’u ta qapaab’aal. … Jultikahomaq aatin rik’ineb’ li na’leb’ neke’tawman sa’eb’ li loq’laj hu. K’utumaq li tzol’leb’ li k’utb’esinb’il chaq sa’ choxa” (“Venido de Dios como maestro,” Liahona, julio 1998, 27–28).

Xchaab’ilob’resinkil li qak’utum

Tenq’aheb’ li tzolb’ileb’ aab’aan chixtawb’al li yaal xjuneseb’. Jun reheb’ laa k’anjel jo’ aj k’utunel, a’an xk’amb’aleb’ xb’e li tzolb’ileb’ aab’aan re te’xtaw li yaal sa’eb’ li loq’laj hu. Jwal wi’chik te’xtaweb’ ru ut te’xraheb’ li na’leb’ wi te’xtaweb’ xjuneseb’ ruuchil yal rab’inkil jun aj k’utunel chi aatinak chirixeb’.