jun iyaj sa’ ruq’ jun li al

13–19 julio

Alma 32–35

“Teeraw li aatin a’in sa’ lee ch’ool”

Maak’a’ naxye jarub’ sut ak xawil ru Alma 32–35, il ru wi’chik naq nakawresi aawib’ chi k’utuk. K’e aach’ool chixk’ulb’al li na’leb’ tixk’e li Musiq’ej.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xtenq’ankileb’ li komon sa’ li tzoleb’aal chixwotzb’al li k’a’ru xe’xtzol naq xe’ril ru Alma 32–35 sa’ rochocheb’, taaruuq taakanab’eb’ chiru junpaat chirilb’aleb’ wi’chik ru li ch’ol a’in ut chixtz’iib’ankil chiru li pizarron yalaq na’leb’ xe’xk’e reetal. Jo’ tzoleb’aal, aatinanqex chirix k’a’ut naq aajeleb’ ru li na’leb’ a’in.

reetalil li k’utuk

Xkʼutbʼal li tzolʼlebʼ

Alma 32:1–16

Naru taqasik’ ru xtuulanob’resinkil qib’.

• Re xb’eresinkil li aatinak chirix li tuulanil jo’ k’utb’il sa’ Alma 32:1–16, taaruuq taatikib’ rik’in xkanab’ankileb’ li komon chixyeeb’al junjunq k’a’ru naru natuulanob’resink re anihaq (sa’ Alma 32:2–5 natawman jun). Maare wankeb’ junjunq komon li te’wanq xch’ool chixwotzb’al junaq hoonal naq xe’xtzol li tuulanil. Chan ru naq li “k’ame’k chi tuulano’k qach’ool” (Alma 32:12) naru taawanq jo’ jun osob’tesihom? Eb’ li ch’ol aatin chirix li tuulanil sa’ “Xkomon chik li k’anjeleb’aal” naru te’tenq’anq chixtikib’ankil li aatinak. Jo’ tzoleb’aal, taaruuq teeril ru Tzol’leb’ ut Sumwank 112:10 malaj teeb’icha jun b’ich chirix li tuulanil, jo’ “Saʼ laa chʼool tuulan chatwanq” (Eb’ li B’ich, 73).

Alma 32:17–43; 33

Naqak’anjela li qapaab’aal chirix li Jesukristo rik’in rawb’al ut xch’olaninkil li raatin a’an sa’ li qaam.

• Wan naq naqak’oxla naq li loq’onink ka’ajwi’ b’aanunb’il sa’ jun na’ajej jo’ sa’ li iglees (chi’ilmanq Alma 32:5, 9, 11), a’b’an nim chik li ch’olob’anb’il xb’aan laj Alma chirix li loq’onink. Qayehaq, a’an kixk’ut naq xnimob’resinkil ut xk’anjelankil li paab’aal chirix li Kristo a’an jun paay chi loq’onink li naru taab’aanumanq yalaq b’ar. Re xtenq’ankileb’ li tzolb’ileb’ aab’aan chixtawb’al ru li na’leb’ a’in, taaruuq taayiib’ xjalam-uuch jun li iyaj ut jun li toon che’ chiru li pizarron ut tex’aatinaq chirixeb’ li patz’om jo’ a’in: K’a’ru nareetali li iyaj? (chi’ilmanq Alma 32:28; 33:22–23). Chan ru naru taqaw li iyaj—malaj li xnawom ch’oolej chirix li Jesukristo ut lix tojb’al rix li maak kixb’aanu—sa’ li qaam ut taqach’olani? (chi’ilmanq Alma 32:36–43; 33). K’a’ru naru taqawotz chirix chan ru naq rik’in xtaaqenkil li Kolonel xooru chi uuchinink chi chaab’il? Chan ru naq lix k’utum laj Alma naxjal chan ru naq naqaloq’oni li qaChoxahil Yuwa’ ut li Jesukristo?

• Li “yalok-ix” li kixch’olob’ laj Alma re xtenq’ankileb’ laj Lamanita chixnimob’resinkil lix paab’aaleb’ chirix li Jesukristo naru tooxtenq’a ajwi’ chixtzolb’al ma yaal xkomoneb’ chik li na’leb’ chirix li evangelio. Re xtenq’ankil li tzoleb’aal chixtawb’al ru li yalok-ix ch’olob’anb’il xb’aan laj Alma, taaruuq tat-aatinaq chirix k’a’ru jun yalok-ix. Maare wan anihaq sa’ li tzoleb’aal li xb’aanu jun yalok-ix ut taaruuq tixtenq’a chixch’olob’ankil k’a’ru a’an. Kʼaʼru aj-e jun li yalok-ix? Chan ru naq jun yalok-ix chanchan li k’a’ru b’oqb’ileb’ chixb’aanunkil li tenamit xb’aan laj Alma sa’ Alma 32:26–36? Maare eb’ li komon sa’ li tzoleb’aal te’ruuq chixwotzb’al junjunq paay chan ru “neke’xyal rix” li raatin li Dios. Chan ru xe’ok chixnawb’al naq “chaab’il li raatin [li Dios]”? (Alma 32:28).

• K’a’ raj ru tixye laj Alma re anihaq naraj xk’ulb’al malaj xkawob’resinkil jun xnawom xch’ool chirix li Jesukristo? Re xtz’ilb’al rix li patz’om a’in, taaruuq taak’uub’ li tzoleb’aal sa’ wiib’ ch’uut. Jun ch’uut taaruuq taaril ru Alma 32:26–36 re xtzolb’al li tixye raj laj Alma re anihaq li naraj xk’ulb’al xnawom xch’ool, ut li jun ch’uut chik taaruuq taaril ru Alma 32:36–43 re xtzolb’al li tixye raj re anihaq li xq’uno’ xnawom xch’ool. Chirix a’an, jun komon re li junjunq ch’uut taaruuq te’xk’e xhoonaleb’ re aatinak jo’ chanchan naq a’aneb’ laj Alma naq yoo chixtenq’ankil anihaq chixk’ulb’al malaj chixkawob’resinkil xnawom xch’ool.

Alma 31:13–23; 33:2–11; 34:17–29

Naru taqaloq’oni li Dios rik’in tijok, yalaq b’ar ut yalaq jo’q’e.

• Taaruuq ajwi’ taatenq’a li tzoleb’aal chirilb’al chan ru naq jalan lix k’utum laj Alma ut laj Amulek chirix li tijok ut li loq’onink rik’in li b’alaq’il na’leb’ reheb’ laj Tzoramita. Eb’ li komon sa’ li tzoleb’aal taaruuq te’ril ru Alma 31:13–23 sa’ junpaat ut te’xtz’iib’a chi tustu chiru li pizarron li ke’xpaab’ laj Tzoramita chirix li tijok ut li loq’onink. Chirix a’an taaruuq te’xsik’eb’ li yaalil na’leb’ sa’ Alma 33:2–11 ut 34:17–29 li neke’xka’pak’ali li na’leb’ a’in. K’a’ru neke’xk’ut li raqal a’in chirix chan ru naru taqachaab’ilob’resi li tijok ut loq’onink naqab’aanu?

• Taaruuq taawaklesi xch’ooleb’ chi aatinak chirix li tijok rik’in xtz’iib’ankileb’ aatin jo’ Ani? K’a’ru? Jo’q’e? B’ar? K’a’ut? ut Chan ru? chiru li pizarron. Eb’ li komon te’ruuq chi sik’ok sa’ Alma 33:2–11 ut 34:17–29 re xtawb’al xsumenkileb’ li patz’om a’in chirix li tijok. Qayehaq, te’ruuq chixsumenkileb’ li patz’om jo’eb’ a’in: B’ar naru tootijoq? K’a’ru naru tootijoq wi’? Te’ruuq ajwi’ chixtawb’al li sumeek sa’ raatinul jun li b’ich chirix li tijok, jo’ “Ma tijok xayal?” malaj “Xhoonal tijok, k’a’jo’ xsahil” (Eb’ li B’ich, 81, 83). Chan ru naru taqachaabʼilobʼresi li qatij?

Alma 34:9–17

Lix mayej li Kolonel re xtojb’al qix, a’an wan “chi maak’a’ roso’jik, ut chi junelik.”

• Laj Amulek kiroksiheb’ li aatin “maak’a’ roso’jik” ut “junelik” junjunq sut re xch’olob’ankil li mayej kixb’aanu li Jesukristo re xtojb’al rix li qamaak. Taaruuq taakanab’eb’ li komon chixtawb’aleb’ li aatin a’in sa’ Alma 34:9–14 ut chirix a’an chixsik’b’aleb’ sa’ jun xtusulal aatin. Chan ru naq maak’a’ roso’jik ut wan chi junelik lix mayej li Kolonel? (chi’ilmanq Hebreos 10:10; 2 Nefi 9:21; Mosiah 3:13). Jo’ naxye sa’ Alma 34:15–17, k’a’ru tento taqab’aanu re xk’ulb’aleb’ li osob’tesink re lix mayej li Kolonel? K’a’ru naraj naxye “xk’anjelankil laa paab’aal choq’ re li jalb’a-k’a’uxlej”? (Alma 34:17).

Alma 34:32–35

“Meebʼay xkutankil lix jalbʼal eekʼaʼuxl.”

• Jun jaljookil ru aatin jo’ a’in naru tixtenq’aheb’ li komon sa’ li tzoleb’aal chixk’oxlankil k’a’ut naq xiwxiw xb’ayb’al xkutankil lix jalb’al qak’a’uxl: ye reheb’ naq te’xk’oxla naq xe’xk’ul xb’oqb’al chi tz’aqonk sa’ jun k’anjel li naraj ru k’iila chihab’ re kawresink-ib’, jo’ tz’aqonk sa’eb’ li Juegos Olímpicos malaj li wajb’ank chiru k’iila kristiaan (sik’ ru k’a’ruhaq li taawanq rilom rik’ineb’ li wankeb’ sa’ laa tzoleb’aal), a’b’an taab’aanumanq li k’anjel a’in wulaj. Aatinan rik’in li tzoleb’aal chirix k’a’ut naq maare ink’a’ chaab’il te’elq sa’ li k’anjel a’an us ta te’xkawresi raj rib’ chiru chixjunil li kutan. Chan ru wan rilom li jaljookil ru aatin a’in rik’in lix q’usum laj Amulek sa’ Alma 34:32–35? K’a’ut naq xiwxiw xb’ayb’al qib’ chixjalb’al qak’a’uxl ut chixjalb’al qayu’am? Kanab’eb’ li komon sa’ li tzoleb’aal chi k’oxlak chirix k’a’ru naru te’xb’aanu re “xkawresinkil rib’ choq’ re li junelik q’e kutan” (raqal 33) ut te’xk’uub’ xna’leb’ re xb’aanunkil chi ink’a’ neke’xb’ay rib’.

reetalil li tzolok

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon chirilb’al ru Alma 36–38 chiru li xamaan a’in, taaruuq taaye reheb’ naq laj Alma “ra xchʼool xbʼaan xmaaʼusilal lix tenamit,” jo’kan naq kixch’utub’eb’ li ralal ut kixtzoleb’ “chirix li kʼaʼaq re ru re tiikilal” (Alma 35:15–16). Sa’eb’ li ch’ol neke’chal chirix a’in wan resil li kimusiq’aak laj Alma chixyeeb’al reheb’ li ralal.

reetalil li kʼanjelebʼaal

Xkomon chik li kʼanjelebʼaal

K’a’ru naraj naxye li wank chi tuulan qach’ool?

“Li tuulanil a’an xk’eeb’al reetal rik’in b’antioxihom naq tenq’anb’ilat junes xb’aan li Qaawa’—a’an xtawb’al ru naq rajlal nakawaj ru xtenq’ a’an. … Li tuulanil maawa’ jun reetalil xq’unal li metz’ew, xka’ch’inal li ch’oolej, chi moko li xiw; a’an b’an reetalil naq nakanaw anihat ut b’ar wan laa tz’aqal metz’ew” (Leales a la Fe [2004], 103).

Li Elder Quentin L. Cook kixch’olob’: “Naq chi yaal naqak’oxlaheb’ li Dios Yuwa’b’ej ut li Kristo li K’ajolb’ej, aniheb’ a’an, ut k’a’ru ak ke’xb’aanu sa’ qak’ab’a’, nokonujob’resiik rik’in oxloq’ink, sachok-ch’oolej, b’antioxink, ut tuulanil. … Li tuulanil a’an naraj ajwi’ naxye b’antioxink xb’aan li k’iila osob’tesink ut choxahil tenq’ naqak’ul. Li tuulanil maawa’ jun chaab’il b’aanuhom naru naqil chi moko jun numtaak sa’ xb’een li nimla ch’a’ajkilal. A’an jun reetalil li kawilal sa’ musiq’ej. A’an li q’unil xkawilal ch’oolej naq rajlal kutan ut rajlal hoonal naru taqakanab’ qib’ chiru li Qaawa’, naru took’anjelaq chiru, ut naru taqatz’aqob’resi ru li rajom a’an” (“Li junelikil wulaj wulaj,” Jolomil ch’utub’aj-ib’ re octubre 2017).

Eb’ li raqal sa’eb’ li loq’laj hu chirix li paab’aal.

• 1 Korintios 12:9

• Hebreos 11:1–6

• Santiago 2:14–18

• Eter 12:6

• Moroni 7:33; 10:11

• Tzol’leb’ ut Sumwank 63:9–11

Xchaab’ilob’resinkil li qak’utum

Jayali aawib’ rik’ineb’ li loq’laj hu. Us ta wankeb’ naab’al chik li k’anjeleb’aal li naru te’xchaab’ilob’resi li aatinak, chijultiko’q aawe naq eb’ li loq’laj hu a’aneb’ lix yo’leb’aal li tzol’leb’. Tenq’aheb’ li komon chixtawb’al li yaal sa’eb’ li loq’laj hu. (Chi’ilmanq Li k’utuk jo’ li Kolonel, 21.)