Նկարը՝ Ջոշուա Դենիսի

Հուլիսի 20-26-ը:

Ալմա 36-38

«Նայիր առ Աստված և ապրիր»:

Երբ պատրաստվում եք ուսուցանել, հիշեք, որ դասարանի անդամները հավանաբար իմաստալի փորձառություններ են ունեցել Ալմա 36–38 գլուխներն ուսումնասիրելիս: Ի՞նչ կարող եք անել, որպեսզի դասը կառուցեք այդ փորձառությունների վրա:

Գրի առեք ձեր տպավորությունները

Հրավիրեք կիսվել

Որպեսզի խրախուսեք դասարանի անդամներին կիսվել սուրբ գրություններից իրենց սովորածով, դասարանը բաժանեք երեք խմբի և յուրաքանչյուր խմբին Ալմա 36–38-ից մեկ գլուխ հանձնարարեք: Հրավիրեք յուրաքանչյուր խմբին իրենց գլուխներից գտնել և կիսվել մի ոգեշնչող հատվածով:

Ուսուցանեք վարդապետությունը

Ալմա 36

Մենք կարող ենք ծնվել Աստծուց, երբ խոնարհ ենք և ապաշխարող:

• Ձեր դասարանի որոշ անդամներ գուցե զարմանան, թե ինչո՞ւ նրանք Ալմայի նման երբևէ կտրուկ դարձի փորձառություն չեն ունեցել: Կարող է օգտակար լինել նրանց համար, եթե կիսվեք Երեց Դեյվիդ Ա. Բեդնարի ուսուցանածով. «Մեզանից շատերի համար դարձը շարունակական գործընթաց է, և ոչ թե մեկանգամյա իրադարձություն, որը հզոր և տպավորիչ փորձառության արդյունք է»: («Դարձ դեպի Տերը», Ensign կամ Լիահոնա, նոյեմբեր 2012, 107–8): Չնայած Ալմայի դարձի փորձառության վերաբերյալ որոշ բաներ անսովոր են, նրա փորձառությունն ուսուցանում է սկզբունքներ, որոնք մենք բոլորս պետք է կիրառենք մեր անձնական շարունակական դարձի առնչությամբ: Հրավիրեք դասարանի անդամներին հետազոտել Ալմա 36-ը, գտնել այդ սկզբունքները և գրել դրանք գրատախտակին : Ուրիշ ի՞նչն է օգնել մեզ լիարժեք դարձի գալդեպի Հիսուս Քրիստոսի ավետարանը:

• Ալման օգտագործել է «ծնվել էի Աստծուց» արտահայտությունը՝ իր դարձը նկարագրելու համար: Որպեսզի օգնեք դասարանի անդամներին հասկանալ այդ տեսակետը, կարող եք հրավիրել նրանց անհատապես կամ զույգերով կարդալ հետևյալ հատվածները, որոնելով, թե ինչ է նշանակում ծնվել Աստծուց. Ա Հովհաննես 4.7, Մոսիա 5.7, 27.25–26, և Ալմա 5.14-ը, 22.15-ը: Խնդրեք դասարանի անդամներին կիսվել իրենց սովորածով։ Ապա նրանք կարող են հետազոտել Ալմա 36-ը, որոնելով պատասխաններ հետևյալ հարցին. Ինչպե՞ս են մարդիկ զգում և գործում, երբ նրանք ծնվում են Աստծուց: Որպեսզի օգնեք դասարանի անդամներին խորհել, թե ինչպես են նրանք ծնվում Աստծուց, կարող եք կիսվել Նախագահ Էզրա Թաֆտ Բենսոնի մտքով, որը գտնվում է «Լրացուցիչ աղբյուրներում»։

Ալմա 37

Սուրբ գրությունները պահպանվել են «իմաստուն նպատակի համար»:

• Ալմայի խոսքերի ուսումնասիրությունը, երբ նա տվեց սրբազան հիշատակարանները իր որդի Հելամանին, գուցե կարող է օգնել դասարանի անդամներին կիսվել, թե ինչպես են իրենք զգացել սուրբ գրությունների զորությունն իրենց կյանքում: Խրախուսեք նրանց կրկնել Ալմա 37-ը` գտնելով ուղերձները, որոնք Ալման տվեց Հելամանին սուրբ գրությունների վերաբերյալ (տես հատկապես հատվածներ 1–19-ը և 43–47-ը): Ինչպե՞ս ենք ցույց տալիս, որ սուրբ գրությունները սուրբ են մեզ համար: Ինչպե՞ս կարող ենք Ալմայի նման ուսուցանել մեր սիրելիներին «պահել բոլոր այս բաները սրբորեն» (Ալմա 37․2): Ինչպե՞ս են սուրբ գրությունները ցույց տալիս մեզ [Աստծո] զորությունը (Ալմա 37․14):

• Սուրբ գրություններ ունենալու օրհնությունների մասին սովորելու ուղիներից մեկը ուսումնասիրելն է, թե ինչ ասաց Ալման Ալմա 37-ում սրբազան հիշատակարանների և մյուս առարկաների մասին, որոնք նա վստահեց Հելամանին: Դուք կարող եք սրբազան առարկաների վերաբերյալ մի ցուցակ կազմել գրատախատակին` Նեփիի թիթեղները և արույրե թիթեղները (Ալմա 37.2–20), Եթերի քսանչորս թիթեղները և մեկնիչները (Ալմա 37.21–37) և Լիահոնան (Ալմա 37.38–47): Դասարանի անդամները կարող են կարդալ այդ հատվածները, որպեսզի սովորեն, թե Ալման ի՞նչ ուսուցանեց այդ առարկաներից յուրաքանչյուրի մասին: Ինչպե՞ս կարող են սուրբ գրությունները մեծացնել մեր հիշողությունները (տես Ալմա 37.8): Ի՞նչ կարող ենք սովորել Ալմայի խոսքերից այսօր մեր կյանքում սուրբ գրություններն ունենալու օրհնությունների մասին:

  

  Սուրբ գրությունները մեզ սովորեցնում են, թե ինչպես հետևենք Աստծուն:

Ալմա 37․6-7, 41-42

«Փոքր և հասարակ բաներով են իրականացվում մեծ բաները»:

• Որպեսզի ուսուցանեք «փոքր և հասարակ բաների» կարևորությունը Աստծո աշխատանքում, Ալման տվեց երկու օրինակ. սուրբ գրությունները և Լիահոնան (տես Ալմա 37.6–7, 41–42, տես նաև 1 Նեփի 17.41): Այդ օրինակները կրկնելուց հետո, գուցե, դասարանի անդամները կիսվեն Աստծո աշխատանքում փոքր և հասարակ բաների մասին օրինակներով իրենց սեփական կյանքից: Գուցե կամենաք նախապես կապվելդասարանի մի կամ երկու անդամի հետ և խնդրեք նրանց դասարան բերել մի առարկա, որը փոքր է, բայց մեծ դեր է ունեցել իրենց կյանքում: Դուք կարող եք կիսվել Նախագահ Դալլին Հ․ Օուքսի հայտարարությամբ, որը տրված է «Լրացուցիչ աղբյուրներում»: Որպեսզի օգնեք ձեր դասարանի անդամներին անհատականացնել այս սկզբունքը, դուք կարող եք տալ նրանց այսպիսի հարցեր․ Ինչո՞ւ ենք երբեմն թերանում անել փոքր և հասարակ բաներ: Ինչպե՞ս կարող ենք ոգեշնչել ինքներս մեզ և մեր ընտանիքներին` հաղթահարել այդ միտումը:

Ալմա 37․38-47

Քրիստոսի խոսքերը կարող են առաջնորդել մեզ օրեցօր:

• Աստծո խոսքը համեմատելով Լիահոնայի հետ,դասարանի անդամները կարող են ոգեշնչվել ավելի ջանասեր և հետևողական լինել սուրբ գրությունները կարդալիս: Այս գաղափարի շուրջ քննարկում սկսելու համար դուք կարող եք խնդրել դասարանի անդամներին զույգերով կարդալ Ալմա 37․38-47 հատվածները` որոնելով նմանություններ Լիահոնայի և Աստծո խոսքի միջև: Դուք կարող եք կոչ անել նրանց նմանություն գտնել յուրաքանչյուր հատվածում: Ապա գրատախտակին կարող եք գրել յուրաքանչյուր հատվածի համարը և խնդրեք դասարանի անդամներին իրենց գտած նմանությունները գրել համարների կողքին: Ի՞նչ է հուշում այս համեմատությունը այն մասին, թե ինչպիսին պետք է լինի մեր մոտեցումը սուրբ գրությունների մեր ուսումնասիրությանը:

Ալմա 38

Հիսուս Քրիստոսի մասին մեր վկայություններով կիսվելը կարող է զորացնել նրանց, ում մենք սիրում ենք:

• Իր որդի Սիբլոնին ուղղված Ալմայի խոսքերը լավ օրինակ են հանդիսանում այն բանի, թե ինչպես զորացնել և խրախուսել նրանց, ում մենք սիրում ենք`ավետարանով ապրելու համար: Գուցե դասարանի անդամները կարդան այդ գլուխը և բացահայտեն, թե Ալման ինչպես զորացրեց Սիբլոնին Ալմա 38-ը կարճ է, ուստի կարող եք նույնիսկ որոշել կարդալ այն դասարանով: Ապա դասարանի անդամները կարող են կիսվել հատվածներով, որոնք նրանք իմաստալի են համարում, կամ որոնք նրանց գաղափարներ են տվել` իրենց սեփական ընտանիքներին և ընկերներին զորացնելու համար:

Խրախուսեք սովորել տանը

Արդյո՞ք դասարանի անդամները երբևէ հետաքրքրվել են, թե ինչպես խորհուրդ տան սիրելի մեկին, ով լուրջ սխալ է գործել: Բացատրեք, որ նրանք կգտնեն օգտակար գաղափարներ Ալմա 39–42:

Լրացուցիչ աղբյուրներ

Դարձը նման է նորից ծնվելուն:

Նախագահ Էզրա Թաֆտ Բենսոնն ուսուցանել է. «Երբ մենք ենթարկվում ենք այդ հզոր փոփոխությանը, որն առաջանում է միայն առ Հիսուս Քրիստոս հավատքից և մեզ վրա Հոգու ազդեցությունից, դա կարծես թե մեզ դարձնում է նոր մարդ: Այսպիսով այդ փոփոխությունը նման է նորից ծնվելուն: Ձեզանից հազարավորները ենթարկվել են այդ փոփոխությանը: Դուք լքել եք մեղսալի կյանքը, երբեմն խորը և վիրավորական մեղքի կյանքը, և Քրիստոսի արյունը կիրառելով ձեր կյանքում, դարձել եք մաքուր: Դուք այլևս տրամադրված չեք վերադառնալ ձեր հին ուղիներին: Դուք իրականում նոր մարդ եք: Սա այն է, ինչ նշանակում է սրտի փոփոխություն» (“A Mighty Change of Heart,” Ensign, Oct. 1989, 4):

Փոքր և հասարակ բաներ

Նախագահ Դալլին Հ. Օուքսն ուսուցանել է․

Ես հիշեցի, թե ինչ ուժ ունեն փոքր և հասարակ բաները ժամանակի ընթացքում, այն բանի միջոցով, որը տեսա այս առավոտ զբոսանքի ժամանակ: … Հաստ և ամուր բետոնե մայթը ճաքճքվում [էր]: Միթե՞ դա ինչ-որ մեծ և հզոր հարվածի արդյունքում է եղել: Ոչ, այս ճաքն առաջացել է հարակից ծառի արմատներից մեկի դուրս եկող դանդաղ, փոքր աճից:

Այդպես է ժամանակի ընթացքում փոքր և հասարակ բաների հզոր ազդեցությունը, որոնք ուսուցանվում են սուրբ գրություններում և ապրող մարգարեների կողմից: Մտածեք սուրբ գրությունների ուսումնասիրության մասին, որոնք մեզ սովորեցրել էին կիրառել մեր ամենօրյա կյանքում: Կամ մտածեք անհատական աղոթքների և ընտանեկան ծնկաչոք աղոթքների մասին, որոնք կանոնավորապես գործադրվում են հավատարիմ Վերջին Օրերի Սրբերի կողմից: Չնայած այս գործընթացներից յուրաքանչյուրը կարող է թվալ փոքր և հասարակ, ժամանակի ընթացքում դրանք կարող են առաջացնել հզոր հոգևոր վերելքներ և աճ: Սա տեղի է ունենում, որովհետև այս փոքր և հասարակ բաներից յուրաքանչյուրը հրավիրում է Սուրբ Հոգու՝ Վկայողի ընկերակցությունը, ով լուսավորում է մեզ և առաջնորդում մեզ դեպի ճշմարտություն» («Փոքր և հասարակ բաներ», Ensign կամ Լիահոնա, մայիս 2018, 90):

Բարելավել մեր ուսուցումը

Հրավիրեք սովորողներին միմյանց ուսուցանել։ Երբ դասարանի անդամները վկայություն են բերում կամ կիսվում գաղափարներով, նրանք գուցե կարողանան հասնել կամ ոգեշնչել մեկ այլ անդամի այնպես, ինչպես դուք չէիք կարողանա անել: (Տես Ուսուցանել Փրկիչի ձևով,30:)