Si Jesus ug si Maria

Babaye, Nganong Nagahilak Ikaw? ni Mark R. Pugh

Hulyo 27–Agosto 2

Alma 39–42

“Ang Mahinungdanon nga Plano sa Kalipay”

Ang mga pagtulun-an ni Alma diha sa Alma 39–42 puno sa mga doktrina ug naghatag og katin-awan sa importante nga mga kamatuoran. Samtang imong tun-an kini nga mga kapitulo, pamalandungi asa nga mga kamatuoran ang tingali mahimong mas makahuluganon sa imong klase ug unsay imong mahimo aron matabangan sila nga madiskubrehan kini nga mga kamatuoran.

Irekord ang Imong mga Impresyon

pagpaambit nga icon

Dapita ang Pagpaambit

Aron mahatagan og kahigayunan ang mga sakop sa klase sa pagpaambit sa ilang mga hunahuna ug mga panabut kabahin sa Alma 39–42, mahimo nimo silang dapiton sa daklit nga pagribyu niini nga mga kapitulo ug mangita og usa ka butang nga gisulti o gihimo ni Alma nga nakapadani kanila.

pagtudlo nga icon

Itudlo ang Doktrina

Alma 39

Ang sekswal nga sala usa ka salawayon diha sa panan-aw sa Ginoo.

• Unsa ang atong makat-unan gikan sa asoy sa kasinatian ni Corianton sa sala ug paghinulsol? Tingali ang mga sakop sa klase mahimong mobasa sa Alma 39:1–14, ang uban nila mangita alang sa unsay gibuhat ni Corianton nga sayop, ang uban mangita alang sa unsa kaha ang nakaaghat niya sa pagpakasala, ug ang uban mangita alang sa tambag nga gihatag ni Alma kaniya. Samtang sila mopaambit kon unsa ang ilang nakit-an, mahimo nilang hisgutan unsaon nato nga malikayan ang paghimo sa susamang mga sayop.

• Kon ang katawhan makahimo og sekswal nga mga sala, sila kasagaran adunay mga pagbati nga madismaya o mawad-an og paglaum ug mobati nga wala na kaayo silay bili. Unsa nga mga baruganan diha sa Alma 39–42 ang modasig sa mga sakop sa klase nga mobati og paglaum nga mopadulong sa paghinulsol? Ang pagpaambit sa pamahayag ni Sister Joy D. Jones diha sa “Dugang nga mga Kapanguhaan” makatabang sa mga sakop sa klase nga masabtan ang kalainan tali sa pagkahimong takus ug ang atong bili diha sa panan-aw sa Dios. (Tan-awa usab sa Lynn G. Robbins, “Kondili Kapitoan Ka Pito,” Liahona, Mayo 2018, 21–23.)

• Isip kabahin sa inyong panaghisgutan, tingali makatabang alang sa mga sakop sa klase ang paghisgut sa mga sumbanan sa Ginoo mahitungod sa pagkaputli. Ang inyong panaghisgutan siguro mas makatabang kon kini nakasentro sa mga baruganan kaysa diha sa listahan sa mga angay buhaton ug dili angay buhaton. Pananglitan, mahimo nimong dapiton ang mga sakop sa klase sa pagtino sa mga baruganan nga gitudlo ni Alma ngadto ni Corianton diha sa Alma 39. Agig dugang, mahimo nilang iribyu ang “Sekswal nga Kaputli” diha sa Alang sa Kalig-on sa Kabatan-onan nga anaay mga pangutana sa hunahuna nga sama niini: “Kon imong i-summarize ang tanan niini nga tambag sa usa ka baruganan, unsa man kini?” o “Unsa nga mga baruganan ang imong nakita dinhi nga nakatabang nimo nga mosunod sa balaod sa pagkaputli?” Ang mga sakop sa klase mahimo usab nga moribyu niini nga seksyon diha sa Alang sa Kalig-on sa Kabatan-onan, nga mangita alang sa mga panalangin sa pagsunod sa balaod sa kaputli ug ang mga sangputanan sa paglapas niini nga balaod. Sa unsang paagi nga kini nga mga baruganan lahi gikan sa unsay gitudlo sa kalibutan? Sa unsang paagi nga kini nga mga baruganan makaapektar sa paagi nga kita naghunahuna kabahin sa balaod sa kaputli? Ang imong klase tingali makabenepisyo pinaagi sa pagbasa sa pamahayag ni Sister Wendy Nelson diha sa “Dugang nga mga Kapanguhaan” samtang sila motubag niini nga mga pangutana.

• Usahay sayon ra ang pagtuo nga ang atong mga pagpili dili makaapektar sa uban—nga ang atong mga sala pribado. Unsa ang gitudlo ni Alma kang Corianton diha sa Alma 39:11–12 kabahin sa epekto sa iyang mga pagpili? Dapita ang mga sakop sa klase sa pagpamalandong kon kinsa ang tingali maapektuhan sa mga pagpili nga ilang gihimo, maayo man o dautan. Mahimo usab silang mopaambit kon sa unsang paagi nga ang mga binuhatan ug mga ehemplo sa uban nakatabang nila sa pagpili sa insakto.

Alma 40–42

Ang Pag-ula ni Jesukristo nakapahimo sa plano sa katubsanan nga posible.

• Si Alma mitudlo ni Corianton og mga kamatuoran nga kinahanglang masabtan natong tanan, lakip na ang mga kamatuoran kabahin sa katuyoan sa kinabuhi, sa kalibutan sa mga espiritu, pagkabanhaw, ug paghukom. Ikonsiderar ang pagpili og usa sa mga pagtulun-an ni Alma ug paghatag sa mga sakop sa klase og duha ka minuto sa pagsiksik sa Alma 40–42 (sa indibidwal o magpares) ug isulat ang bisan pila ka mga kamatuoran kabahin sa hilisgutan nga ilang makit-an. Ang mga sakop sa klase mahimo dayon nga mopaambit sa usag usa o uban sa klase kon unsa ang ilang nakit-an. Mahimo nimong balikon kini nga proseso alang sa ubang mga hilisgutan kon duna pay igong oras. Ngano nga kini nga partikular nga mga kamatuoran importante nga masabtan sa anak ni Alma nga si Corianton?

• Ang paghulagway ni Alma sa kahimtang sa mga espiritu human niini nga kinabuhi makatabang sa mga sakop sa klase nga masabtan ang kamahinungdanon sa pagduol ngadto sa Manluluwas ug paghinulsol sa atong mga sala niining kinabuhia. Mahimo nimong isulat ang Matarung (Mahinulsulon) ug Dautan (Dili mahinulsulon) diha sa pisara ug dapita ang mga sakop sa klase sa pagsiksik sa Alma 40:11–26 ug ilista diha sa pisara ang mga pulong o hugpong sa mga pulong nga gigamit ni Alma sa paghulagway sa kahimtang sa matag usa niini nga grupo sa katawhan human sila mamatay. Sa unsang paagi nga kini nga mga pagtulun-an makadasig kanato sa paghinulsol? Alang sa dugang pa kabahin sa unsay mahitabo didto sa kalibutan sa mga espiritu, tan-awa sa 1 Pedro 3:18–20; 4:6 ug Doktrina ug mga Pakigsaad 138:29–37.

• Unsa ang mosulod sa mga hunahuna sa imong mga sakop sa klase kon sila makadungog sa mga pulong nga “gipahiuli” o “pagpahiuli”? Dapita sila sa pagsiksik sa Alma 41 kon giunsa paggamit ni Alma kini nga mga pulong. Unsa ang iyang gipasabut niini? Unsa ang ipahiuli nganha kanato? Ngano nga makatabang man kaayo ang pagkonsiderar sa plano sa Langitnong Amahan isip usa ka “plano sa pagpahiuli”? (bersikulo 2).

• Pipila sa mga sakop sa imong klase mahimong mopaambit sa pangutana nga mura og naa sa hunahuna ni Corianton—makiangayon ba o patas nga ang usa ka mahigugmaong Dios mosilot sa Iyang mga anak? (tan-awa sa Alma 42:1). Tingali mahimo nimong hangyoon ang mga sakop sa klase sa pagpamalandung kon unsaon nila sa pagtubag niini nga pangutana ug mangita sa mga tubag diha sa Alma 42:7–26.

• Kon imong gibati nga angayang buhaton, ang mga sakop sa imong klase tingali makabenepisyo gikan sa pagpangita og bersikulo diha sa Alma 42 nga mahimo nilang ipakita pinaagi sa usa ka yano nga drowing o simbolo nga mopasabut ngano nga gikinahanglan nato ang Pag-ula sa Manluluwas. Ang mga sakop sa klase mahimong mopaambit kon unsa ang ilang gidrowing, ug ang uban diha sa klase mahimong mosulay sa pagpangita sa bersikulo nga girepresentaran niini. Dayon mahimo nilang hisgutan unsa ang ilang nakat-unan kabahin sa kamahinungdanon sa pagsakripisyo sa Manluluwas.

  babaye nga nag-ampo

  Mahimo kitang makadawat og pagpamatuod ni Jesukristo isip atong Manluluwas.

mga kapanguhaan nga icon

Dugang nga mga Kapanguhaan

Ang bili sa atong mga kalag mahinungdanon.

Si Sister Joy D. Jones nagtudlo:

“Tuguti ko sa pagpasabut sa panginahanglan sa paghatag og kalainan tali sa duha ka kritikal nga mga pulong: bili ug katakus. Dili kini pareha. Ang espirituhanong bili nagpasabut sa paghatag og bili sa atong kaugalingon sama sa paghatag og bili sa Langitnong Amahan, dili sama sa paghatag og bili kanato sa kalibutan. Ang atong bili natino na sa wala pa kita moanhi niini nga yuta. ‘Ang gugma sa Dios walay sukod ug kini mohangtud.’

“Sa laing bahin, ang katakus makab-ot pinaagi sa pagkamasulundon. Kon makasala ta, dili kaayo ta takus, apan dili gyud nga wala na tay bili! Magpadayon ta sa paghinulsol ug maningkamot nga mahisama ni Jesus uban sa atong bili nga bug-os. Sama sa gitudlo ni Presidente Brigham Young: ‘Ang pinakaubos, ang labing ubos nga espiritu ania na sa yuta … dunay bili sama sa mga kalibutan.’ Bisan unsa pa, kita bililhon kanunay sa mga mata sa atong Langitnong Amahan” (“Bili nga dili Masukod,” Liahona, Nob. 2017, 14).

Ang panglantaw sa kalibutan sa pagkasuod dili parehas sa panglantaw sa Dios.

Si Sister Wendy Nelson mikumparar sa unsa ang panglantaw sa kalibutan sa relasyong sekswal—“kalibutanong pakighilawas”— ngadto sa unsay iyang gitawag og “gi-orden sa Dios nga kasuod sa kaminyoon”:

“Sa kalibutanon nga pakighilawas, mahimo ang bisan unsa. Sa kasuod sa kaminyoon , gihimo ang talagsaong pag-atiman aron malikayan ang bisan unsa ug ang tanan—gikan sa sinultihan ngadto sa musika ngadto sa mga salida—nga makapasilo sa Espiritu, sa inyong espiritu, o sa inyong kapikas.

“Samtang ang kalibutanong pakighilawas puno sa kahigal ug mopatay sa gugma, ang kasuod sa kaminyoon makamugna og dugang nga gugma.

“Ang kalibutanong pakighilawas mopaubos sa kalalakin-an ug sa kababayen-an ug sa ilang mga lawas, samtang ang kasuod sa kaminyoon motahud sa kalalakin-an ug sa kababayen-an ug modayeg sa lawas isip usa sa dakong ganti sa mortal nga kinabuhi.

“Sa kalibutanong pakighilawas, ang mga indibidwal mobati nga gigamit, giabusaran, ug sa katapusan mas magul-anon. Sa kasuod sa kaminyoon, ang mga kapikas mobati nga mas nagkahiusa ug gihigugma, mas naamumahan ug nasabtan.

“Ang kalibutanong pakighilawas modaut ug sa katapusan moguba sa mga relasyon. Ang kasuod sa kaminyoon molig-on sa mga kaminyoon. Kini mosuporta, moayo, ug mobalaan sa kinabuhi sa mga kapikas ug sa ilang kaminyoon. …

“Ang kalibutanong pakighilawas nahimong hingpit nga obsesyon kay wala gayud kini makatuman sa mga saad niini. Ang gi-orden sa Dios nga kasuod sa kaminyoon mahimayaon ug magpadayon sa kahangturan alang sa mga bana ug mga asawa nga nagtuman sa pakigsaad” (“Gugma ug Kaminyoon” [tibuok kalibutan nga debosyonal, Ene. 8, 2017], broadcasts.ChurchofJesusChrist.org).

Pagpalambo sa Atong Pagtudlo

Pangandam daan. “Samtang mamalandong ka kon sa unsang paagi ang mga baruganan sa ebanghelyo nga imong gitudlo mopanalangin sa mga sakop sa imong klase, ang mga ideya ug mga impresyon moabut sa kada adlaw sa imong kinabuhi—samtang mopadulong ka sa trabaho, magbuhat sa mga buluhaton sa balay, o makig-istorya sa pamilya ug mga higala. Ayaw hunahunaa ang espirituhanong pagpangandam isip usa ka butang nga gahinan nimo og panahon apan isip usa ka butang nga kanunay nimong gibuhat” (Pagtudlo sumala sa Pamaagi sa Manluluwas, 12).