duha ka libo nga batan-ong manggugubat

Duha Ka Libo nga Batan-ong Manggugubat, ni Arnold Friberg

Agosto 10–16

Alma 53–63

“Gipanalipdan pinaagi sa Iyang Kahibulongan nga Gahum”

Samtang ikaw mosiksik sa mga ideya sa pagtudlo niini nga latid, hunahunaa ang mahitungod sa unsa ang mosalir sa imong klase, ug gamita o ipahaum ang mga kalihokan aron motakdo sa mga panginahanglan sa mga sakop sa klase.

Irekord ang Imong mga Impresyon

pagpaambit nga icon

Dapita ang Pagpaambit

Aron sa pagdasig sa mga sakop sa klase sa pagpaambit sa unsay ilang nakat-unan gikan sa Alma 53–63, pwede nimo silang hangyoon sa pagbasa og dali sa mga kapitulo ug mangita sa usa ka bersikulo nga ilang ikapaambit ngadto sa usa ka tawo nga nag-atubang og mga hagit. Dapita sila sa pagpaambit niini nga mga bersikulo sa usa ka tawo gawas sa klase.

pagtudlo nga icon

Itudlo ang Doktrina

Alma 53:17–21; 56:43–48, 55–56; 57:20–27; 58:39–40

Samtang kita mopakita og pagtuo ug pagsalig sa Dios, Siya mopalig-on kanato.

• Mahimo nimong dugangan ang gilawmon ug kalidad sa panaghisgutanay sa klase mahitungod sa mga manggugubat ni Helaman pinaagi sa pagtuki kon unsay nakat-unan sa mga sakop sa klase diha sa panimalay. Usa sa mga paagi sa paghimo niini mao ang pagdapit sa mga sakop sa klase sa pagpaambit og mga hiyas sa batan-ong mga manggugubat nga nakapadani nila (ang pipila niini makit-an diha sa Alma 53:17–21; 56:45–48; 57:20–21, 26–27; 58:40). Sa unsang paagi nga nakatabang kini nga mga hiyas sa batan-ong mga manggugubat atol sa ilang mga pakigsangka? Sa unsang paagi nga makatabang kini nato atol sa atong espiritwal nga mga gubat? Ang mga sakop sa klase mahimo usab nga mopaambit og mga istorya sa “batan-ong mga manggugubat” sa modernong panahon.”

• Ang mga ginikanan sa imong klase posibling nilaum nga ang ilang mga anak makapalambo og hugot nga pagtuo sama sa batan-ong mga manggugubat ni Helaman. Aron matabangan ang mga ginikanan ug umaabot nga mga ginikanan sa imong klase nga makat-on gikan niini nga istorya, mahimo ka nga moorganisar og usa ka pundok sa pipila ka indibidwal kinsa mopaambit og mga ideya kabahin sa pagpalig-on og pagtuo sa mga bata. Hangyoa kini nga sakop sa pundok sa pagbasa sa Alma 56:47–48 ug 57:20–27 sa dili pa magsugod ang klase ug mangandam sa pagpaambit og mga hunahuna kabahin sa unsay nakatabang sa batan-ong mga manggugubat nga nakalambo og hugot nga pagtuo. Hatagi ang mga sakop sa klase og panahon sa pagpaambit sa ilang mga hunahuna samtang ang mga sakop sa pundok mohatag og mga ideya. Ang uban nga mga kapanguhaan nga makapalambo niini nga panaghisgut naglakip sa mga pulong ni Sister Joy D. Jones sa Dugang nga mga Kapanguhaan ug ang mensahe ni Presidente Russell M. Nelson nga “Usa ka Hangyo ngadto sa Akong mga Igsuong Babaye” ( Liahona, Nob. 2015, 95–98). Sa katapusan sa panaghisgutanay, mahimo nimong hatagan ang mga sakop sa klase og pipila ka minuto aron mamalandong sa mga pangutana sama sa mosunod: Kinsa kaha ang tingali nagsalig sa imong pagpamatuod? Unsay inyong masulti ug mabuhat aron sa paglig-on kanila?

Mga batang Nephite kauban ang ilang inahan

Mga Bayani (Gitudloan sa ilang mga Inahan), ni Liz Lemon Swindle

Alma 58:1–12, 30–37; 61

Makapili kita sa paghunahuna sa pinakamaayo sa uban ug dili mahiubos.

• Ang reaksyon ni Helaman sa dihang ang iyang kasundalohan wala makadawat og suporta mahimong usa ka gamhanan nga ehemplo alang nato kon kita mobati nga napasakitan. Aron sa pagdasig og panaghisgutan kabahin sa iyang ehemplo, mahimo ka nga modapit og usa ka sakop sa klase nga moabut nga andam sa pag-summarize sa sitwasyon ni Helaman ug ang mga rason nga ang gobyerno wala makatubag sa iyang mga panginahanglan (tan-awa sa Alma 58:1–9, 30–37; 61:2–8). Mahimo nimong isulat sa pisara ang Tubag ni Helaman ug Uban nga posibleng mga tubag. Dayon dapita ang klase sa pagpangita sa Alma 58:1–12 ug 30–37 ug isulat ubos sa kada ulohan ang mga paghulagway sa unsay gihunahuna, gisulti, ug gihimo ni Helaman isip tubag sa iyang sitwasyon ug, itandi, unsa unta ang iyang gihunahuna, gisulti, ug gihimo. Unsa ang atong mahimo aron sa pagsunod sa ehemplo ni Helaman kon mobati kita nga napasakitan o napasagdan?

• Sa dihang gisaway ni Moroni si Pahoran diha sa Alma 60, mahimo untang pilion ni Pahoran nga mahiubos. Apan siya mitubag nga siya “wala masuko” ug “[nagmaya] diha sa pagkamapasayloon sa kasingkasing ni [Moroni]” (Alma 61:9). Aron matabangan ang mga sakop sa klase nga makat-on gikan sa ehemplo ni Pahoran, mahimo nimo silang hangyoon sa paghanduraw nga sila gihangyo nga mosulat og usa ka artikulo alang sa usa ka magasin sa Simbahan nga migamit sa ehemplo ni Pahoran diha sa Alma 61 aron sa pagtudlo kabahin kon unsaon nga malikayan nga mahiubos sa uban. Mahimo dayon nimong bahinon ang mga sakop sa klase ngadto sa mga grupo ug hangyoa sila sa pagbasa sa Alma 61:3–14 ug ilista ang pipila ka punto nga tingali iapil nila sa ilang mga artikulo. Ang tambag ni Elder David A. Bednar diha sa “Dugang nga mga Kapanguhaan” mahimo usab nga makatabang.

Alma 60:7–14

Aduna kitay responsibilidad sa pagdasig niadtong anaa sa atong palibut.

• Si Moroni misulat nga ang Dios mohimo ni Pahoran nga may tulubagon kon gituyo niya ang pagpabaya sa panginahanglan sa mga kasundalohan nga Nephite. Ikonsiderar ang pagdapit sa mga sakop sa klase sa pagbasa og dungan sa Alma 60:7–14 ug dayon hangyoa sila sa paghunahuna og usa ka tawo nga ilang nahibaw-an nga tingali nanginahanglan ug mibati nga napasagdan. Unsa ang atong mabuhat aron makabantay ug makatubag sa mga panginahanglan sa uban? Sa unsang paagi nga ang atong mga panginahanglan natubag sa uban, lakip na ang atong tigpangalagad nga mga kaigsoonan?

Alma 62:39–41, 48–51

Kinahanglang hinumduman nato ang Ginoo sa mga panahon sa kalisud ug kaharuhay.

• Ang mga reaksyon sa mga Nephite sa lisud ug haruhay nga mga panahon (tan-awa sa Alma 62:39–41, 48–51) nagpakita nga mahimo natong pilion nga mapainubsanon kon kita makasinati sa kalisud man o sa kaharuhay. Mahimo nimong dapiton ang mga sakop sa klase sa pagbasa niini nga mga bersikulo ug mopaambit kon unsay nakapadani nila. Mahimo nimo silang dapiton sa paghisgut sa ilang mga hunahuna nga magkapares sa dili pa mohangyo og pipila nga mopaambit sa tibuok klase.

pagkat-on nga icon

Awhaga ang Pagkat-on diha sa Panimalay

Aron sa pagdasig og interes diha sa Helaman 1–6, mahimo nimong ipasabut sa klase nga niining mga kapitulo ang mga Nephite nahimong dautan ug ang mga Lamanite matarung. Kini nga kabaliktaran sa ilang sitwasyon naghatag og importante nga mga leksyon alang kanato niining makuyaw nga ulahing mga adlaw.

mga kapanguhaan nga icon

Dugang nga mga Kapanguhaan

Paghimo sa atong mga anak nga mas makabatok sa sala.

Si Sister Joy D. Jones, Kinatibuk-ang Presidente sa Primary, mipaambit sa mosunod nga mga yawe sa pag-amuma og “usa ka henerasyon nga makabatok sa sala”:

“Sa pagsugod, … kinahanglan gayud nga atong tabangan ang [atong mga anak] nga mahibalo sa walay pagduhaduha nga sila mga anak sa atong mahigugmaong Langitnong Amahan ug Siya adunay balaang mga gipaabut kanila.

“Ikaduha, ang pagsabut sa doktrina sa paghinulsol importante aron mahimong makabatok sa sala. Ang pagkahimong makabatok sa sala wala magpasabut nga walay sala, apan kini nagpasabut nga kanunayng mahinulsulon, mabinantayon, ug takus. Tingali ang pagkahimong makabatok sa sala modangat isip panalangin gikan sa kanunay nga pagbatok sa sala. …

“… Ang ikatulong yawe sa pagtabang sa mga kabataan nga mahimong makabatok sa sala mao ang pagsugod sa sayo kaayo nga mga edad aron sa mapinanggaong paagi motudlo kanila sa nag-unang mga doktrina sa ebanghelyo—gikan sa mga kasulatan, sa Artikulo sa Hugot nga Pagtuo, sa Alang sa Kalig-on sa Kabatan-onan nga booklet, mga kanta sa Primary, mga himno, ug sa atong kaugalingong mga pagpamatuod—nga mogiya sa kabataan ngadto sa Manluluwas. …

“… Ang pagtabang sa kabataan sa pagsabut, paghimo, ug pagtuman og sagradong mga pakigsaad laing yawe. … Ang pagtudlo sa kabataan sa pagtuman og yanong mga saad samtang sila gagmay pa mohatag kanila og gahum sa pagtuman og balaang mga pakigsaad sa ilang pagdako.” (“Usa ka Henerasyon nga Makabatok sa Sala,” Liahona, Mayo 2017, 88–89).

Unsaon paglikay sa pagkasilo.

Sa iyang mensahe “Ug Walay Makapasilo Kanila” ( Liahona, Nob. 2006, 89–92), si Elder David A. Bednar mihatag sa mosunod nga tambag:

• Ilha nga ang masilo usa ka pagpili. “Ang pagtuo nga adunay tawo o butang nga makapahimo kanato nga masilo, masuko, masakitan, o maglagot mopaubos sa atong moral nga kabubut-on ug mohimo kanato nga mga butang nga aghaton pa sa paglihok. Isip mga tinugyanan, hinoon, kamo ug ako adunay gahum sa paglihok ug sa pagpili unsaon nato pagtubag sa usa ka makapasilo o sakit nga sitwasyon.”

• Tan-aw ngadto sa Manluluwas. “Ang Manluluwas ang pinakamaayong ehemplo kon unsaon nato pagtubag ang posibleng makapasilo nga mga panghitabo o sitwasyon” [tan-awa sa 1 Nephi 19:9].

• Magmasinabtunon sa mga kahuyang sa uban. “Usa sa pinakamahinungdanong timailhan sa atong kaugalingong espirituhanong kahingkod makita kon giunsa nato pagtubag ang mga kahuyang, mga pagkawalay kasinatian, ug posibleng makapasakit nga mga binuhatan sa uban.”

• Pagpahibalo sa direkta nga paagi. “Kon ang usa ka tawo para nato mosulti o mobuhat og makapasilo nga butang, ang atong unang obligasyon mao ang pagbalibad nga masilo ug dayon makigsulti sa pribado, matinuoron, ug direkta nga paagi sa mao nga tawo. Ang ingon nga paagi makadapit og inspirasyon gikan sa Espiritu Santo ug motugot sa mga sayop nga pagtan-aw nga maklaro ug ang tinuod nga tuyo masabtan.”

Pagpalambo sa Atong Pagtudlo

Mokuha og mga kasinatian gikan sa panimalay. Tungod kay ang panimalay mao ang sentro sa pagkat-on sa ebanghelyo, ikonsiderar kon unsaon nga ang inyong mga kasinatian sa klasehanan makakuha sa unsay nahitabo didto. Sama pananglit, mahimo nimong pasayunon ang daghan nga mga kalihokan diha sa Dali, Sunod Kanako—Alang sa mga Indibidwal ug mga Pamilya aron gamiton sa imong klase nga mosuporta sa personal ug pamilya nga pagtuon sa mga sakop sa klase.