Si Nephi nga nag-ampo sa usa ka tore sa tanaman

Paghulagway ni Nephi diha sa usa ka tore sa tanaman pinaagi ni Jerry Thompson

Agosto 24–30

Helaman 7–12

“Hinumdumi ang Ginoo”

Giawhag ni Nephi ang iyang katawhan sa paghinumdom sa Ginoo. Makahimo ka usab niini alang sa imong mga gitudloan. Samtang magbasa ka sa Helaman 7–12, irekord ang imong mga impresyon kabahin kon unsaon nimo pagtabang ang mga sakop sa klase nga mahinumdom sa Ginoo.

Irekord ang Imong mga Impresyon

pagpaambit nga icon

Dapita ang Pagpaambit

Dapita ang mga sakop sa klase sa pagsulat diha sa pisara sa pipila ka baruganan sa ebanghelyo nga ilang nakit-an diha sa Helaman 7–12, uban ang mga pakisayran diin kini nga mga baruganan makit-an. Dayon mahimo ninyo nga matino isip usa ka klase kon asa niini nga mga baruganan ug mga bersikulo ang inyong hisgutan.

pagtudlo nga icon

Itudlo ang Doktrina

Helaman 7–11

Ang mga propeta mopadayag sa kabubut-on sa Dios ngadto sa katawhan.

• Aron matabangan ang imong klase nga makat-on gikan sa Helaman 7–11 kabahin sa mga tahas ug mga responsibilidad sa mga propeta, mahimo kamo nga magsugod pinaagi sa dungan nga pagbasa sa tala alang sa “Propeta” diha sa Giya ngadto sa mga Kasulatan (scriptures.ChurchofJesusChrist.org). Mahimong ilhon sa mga sakop sa klase ang mga tahas sa mga propeta nga nahisgutan ug ilista kini diha sa pisara. Mahimo dayon nimong hangyoon ang mga sakop sa klase nga magtinagsa sa pagribyu og usa ka kapitulo gikan sa Helaman 7–11. Hangyoa sila sa pagpangita kon giunsa ni Nephi sa pagtuman sa mga tahas nga nakalista sa pisara. Giunsa sa atong buhi nga mga propeta ug mga apostoles sa pagtuman niini nga mga tahas? Unsaon nato sila sa pagpaluyo sa ilang mga responsibilidad?

• Ngano nga ang mga propeta usahay kinahanglan way kahadlok sa pagpamulong sama sa gihimo ni Nephi? Ikonsiderar ang pagdapit sa mga sakop sa klase sa pagbasa sa Helaman 7:11–29, nga mangita sa mga pasidaan nga gihatag ni Nephi ug ang mga rason nganong kinahanglan siyang dili mahadlok sa paghatag niini. Unsa nga mga propetikanhong pasidaan ang nakadasig nato sa paghinulsol ug pagpaduol sa Ginoo? Diha sa “Dugang nga mga Kapanguhaan” makita nimo ang sambingay nga gigamit ni Elder Neil L. Andersen aron matabangan kita nga masabtan ang mga peligro sa pagbaliwala sa propetikanhong mga pasidaan.

Helaman 9:1–20; 10:1, 11–15

Ang hugot nga pagtuo kinahanglang matukod nga labaw pa sa mga timailhan ug mga pasidaan.

• Usa sa mga paagi nga mahisgutan kini nga mga bersikulo mao ang pagbahin sa klase ngadto sa duha ka grupo ug dapita ang matag grupo sa pagbasa sa Helaman 9:1–20 ug hunahunaon ang ilang kaugalingon nga naa sa kahimtang sa lima ba ka tawo o sa labaw nga mga maghuhukom. Unsa kaha ang gibati niini nga mga tawo? Unsa kaha ang nakaimpluwensya sa matag grupo sa magkalahi nga pagresponde sa pareho nga milagrusong panagna? Unsaon kaha nato sa pagsiguro nga ang mga milagro makalig-on sa atong pagpamatuod apan dili lamang maoy mahimong basihanan alang niini? Unsaon nato sa pagtino kon ang mga pulong sa propeta tinuod ba?

Helaman 10:1–12

Ang Ginoo mohatag og gahum niadtong kinsa mangita sa Iyang kabubut-on ug motuman sa Iyang mga sugo.

• Ang saysay kabahin sa Ginoo nga mipanalangin ni Nephi diha sa Helaman 10 makadasig sa mga sakop sa imong klase nga mahimong mas makugihon sa pagpangita ug paghimo sa kabubut-on sa Ginoo. Ang mga sakop sa klase mahimong mobasa sa mga bersikulo 1–12, nga mangita kon unsay gihimo ni Nephi aron maangkon ang pagsalig sa Ginoo ug giunsa siya sa pagpanalangin sa Ginoo. Mahimo dayon silang mopaambit og uban pang mga ehemplo sa mga tawo kinsa nangita ug mibuhat sa kabubut-on sa Ginoo “uban sa walay kaluya” (Helaman 10:4), gikan man sa mga kasulatan o sa ilang kaugalingong kinabuhi. Giunsa man pagpanalangin sa Ginoo kini nga mga tawo og gahum sa “[pag]paubos” (Helaman 10:9) sa gihulagway nga mga bukid sa ilang mga kinabuhi? Hatagi ang mga sakop sa klase og panahon sa pagpamalandong og mga paagi nga sila mas makapangita sa kabubut-on sa Ginoo ug motuman sa Iyang mga sugo.

Helaman 12

Ang Ginoo gusto nga kita mahinumdom Kaniya.

• Daghang sakop sa imong klase ang nakahimo og mga pakigsaad sa paghinumdom kanunay ni Jesukristo. Siguro mahimo silang mopaambit sa usag usa sa pipila ka mga butang nga makatabang nila nga sa “kanunay mahinumdom kaniya” (Moroni 4:3; D&P 20:77), sa panahon sa pagkamauswagon ug sa panahon sa kalisud. Dayon ang mga sakop sa klase mahimong mangita sa Helaman 12 alang sa mga rason nga ang katawhan lagmit makalimot sa Ginoo. Unsaon nato sa pagbuntog ang mga kalagmitan nga gihulagway niini nga kapitulo? Sa unsang paagi nga ang kalisdanan makatabang nato sa paghinumdom sa Dios? (tan-awa sa Helaman 11:4–7).

• Aron sa pagpakita sa panlimbasug nga gikinahanglan aron makahinumdom sa usa ka butang, mahimo nimong hatagan ang mga sakop sa klase sa paggahin og pipila ka minuto sa pagpakli sa Helaman 12. Dayon mahimo kang mangutana nila kabahin sa kapitulo aron susihon kon unsa ang ilang nahinumduman. Siguro makapaambit sila kon unsa ang ilang gihimo aron mahinumdom sa impormasyon alang sa usa ka pasulit. Sa unsang paagi nga kini kaparehas sa panlimbasug nga gikinahanglan aron “mahinumdom sa Ginoo”? (Helaman 12:5). Sa unsang paagi nga kini lahi? Dapita ang klase sa pagpangita og bersikulo o hugpong sa mga pulong gikan sa Helaman 12 nga pwede nilang i-display sa ilang balay o memoryahon aron mopahinumdom nila sa kaayo ug gahum sa Dios.

pagkat-on nga icon

Awhaga ang Pagkat-on diha sa Panimalay

Aron maawhag ang mga sakop sa klase sa pagbasa sa Helaman 13–16, mahimo nimong ipasabut nga ang mga panagna ni Samuel ang Lamanite sa mga panghitabo nga may kalabutan sa pagkatawo ug Paglansang sa Manluluwas makumparar sa mga panghitabo sa atong panahon nga mag-una sa Ikaduhang Pag-anhi sa Manluluwas.

mga kapanguhaan nga icon

Dugang nga mga Kapanguhaan

Paminaw sa giya sa mga propeta.

Si Elder Neil L. Andersen mipaambit sa mosunod nga kasinatian:

“Kadtong kinsa mipili sa pagsilbi sa Ginoo kanunay nga maminaw og maayo ug sa piho nga paagi ngadto sa Propeta. …

“… Tuguti ko nga mohulagway pinaagi sa usa ka kasinatian. Ang among pamilya nagpuyo sa daghang katuigan sa estado sa Florida. Tungod kay ang Florida taas og tigumanan sa balas, ang mga tugkaran didto gitamnan og dagko nga lapad og dahon nga sagbut nga gitawag namo og Saint Augustine. Usa ka delikado kaayo nga kaaway sa tugkaran sa Florida mao ang usa ka gamay, brown nga insekto nga gitawag og mole cricket.

“Usa ka gabii samtang ang akong silingan ug ako nagbarug sa hagdanan sa atubangan, nakabantay siya og gamay nga insekto nga milabang sa akong aseras. ‘Maayo siguro og imong bombahan ang imong tugkaran,’ mipasidaan siya. ‘Naa nay mole cricket.’ Gibombahan na nako ang tugkaran og insecticide mga pila pa lang ka semana ang milabay, ug gibati nako nga mora og wala na koy panahon ug kwarta sa paghimo niini dayon pag-usab.

“Sa kahayag pagkasunod buntag, akong gisusi og maayo ang akong tugkaran. Misupang kini ug nindot kaayo ang pagkalunhaw. Akong gitan-aw ang mga sagbut aron masusi kon makakita pa ba ko og gagmay nga mga insekto. Wala koy bisan usa nga nakita. Akong nahinumduman nga naghunahuna, ‘Ah, siguro katong gamay nga mole cricket miagi lang sa akong nataran padulong sa nataran sa akong silingan.’ …

“Ang istorya, hinoon, adunay subo nga katapusan. Migawas ko sa atubangan nga pultahan usa ka buntag, mga 10 ka adlaw human sa among pag-istoryahanay sa akong silingan. Makakurat, nga mora og nahitabo lang sa tibuok gabii, brown nga mga lama ang mitabon sa akong tugkaran. Midagan ko padulong sa tindahan sa mga tanaman, mipalit og insecticide, ug mibomba dayon, apan ulahi na kaayo. Naguba na ang tugkaran, ug aron mabalik kini sa iyang una nga kahimtang nagkinahanglan og bag-o nga tanom nga mga sagbut, taas nga mga oras sa pagtrabaho, ug dako nga gasto.

“Ang pasidaan sa akong silingan para sa kaayuhan sa akong tugkaran. Nakakita siya og mga butang nga dili nako makita. Nakahibalo siya og butang nga wala ko kahibalo. Nakahibalo siya nga ang mga mole cricket nagpuyo ilawom sa yuta ug aktibo lamang inig ka gabii, maong dili epektibo ang akong pagsusi sa adlawan. Siya nakahibalo nga ang mga mole cricket dili mokaon sa mga dahon sa sagbut kon dili nagkuha og kabaskug gikan sa mga ugat. Nakahibalo siya nga kini nga gagmay nga tag-usa ka pulgada nga mga nilalang mokaon og daghan nga ugat sa dili pa nako makita ang epekto sa ibabaw sa yuta. Mibayad ko og dako nga presyo sa akong garboso nga pagkinaugalingon. …

“… Adunay espiritwal nga mga mole cricket nga mokabkab ilawom sa atong mapanalipdanong mga bungbong ug moatake sa atong lumoy nga mga ugat. Daghan niini nga mga insekto sa kadautan mora og gamay lang, usahay hapit dili na makita. …

“Dili nato sundon ang sundanan nga akong gipakita sa pagsulbad sa akong mga mole cricket sa Florida. Dili gayud nato ibalewala ang mga pasidaan. Dili gayud nato ipasigarbo ang atong pagkinaugalingon. Kanunay kita nga maminaw ug magkat-on uban ang kamapainubsanon ug hugot nga pagtuo, matinguhaon nga maghinulsol kon gikinahanglan” (“Prophets and Spiritual Mole Crickets,” Ensign, Nob. 1999, 16–18).

Pagpalambo sa Atong Pagtudlo

Ipahayag ang gugma. “Depende sa inyong mga kahimtang, ang pagpahayag og gugma ngadto niadtong imong gitudloan mahimong magpasabut sa paghatag kanila og tinuoray nga mga pagdayeg, paghatag og interes sa ilang mga kinabuhi, pagpaminaw og maayo ngadto kanila, pagpaapil kanila diha sa leksyon, paghimo og mga buhat sa pagserbisyo alang kanila, o mainitong pagtimbaya kanila kon imo silang makit-an” (Pagtudlo sa Pamaagi sa Manluluwas, 6).