“Tebetembwa 7–13. 3 Nibwaai 1–7: ‘Tabekarake Atuum ao Kukurei,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Tebetembwa 7–13. 3 Nibwaai 1–7,” Nakomai, Iriirai—Ibukin te Reirei n Tabati: 2020
Teuana te Ngaian, Teuana te Bong, ao Teuana te Ngaina, iroun Jorge Cocco
Tebetembwa 7–13
3 Nibwaai 1–7
“Tabekarake Atuum ao Kukurei”
Te Tamnei ae Raoiroi e na kairiko bwa ko na kabotoa am taratara iaon reirei aika onoti man 3 Nibwaai 1–7 n tain te kiraati. Akanne tao bon tiireirei aika a na kakabwaia temanna ae e kainnano.
Korei Am Namakin
Kaungaa te Tibwatibwa
Ni buokiia kaain te kiraati n tibwaua tera are a reiakina ni mweengaia, tuangiia bwa a na korei iaon te moti ni bebwa koaua ake a kunei n 3 Nibwaai 1–7 ao kiibu man koroboki aika tabu ibukin te koaua anne. Katikui moti ni bebwa akanne inanon te konteina, ao anaa teuana imwiin teuana n maroroakinna n te kiraati. Ngkai a tibwatibwa kaain te kiraati, iangoia ngkana iai iango aika a irekereke inanon te kabwarabwara aio are e konaa ni kanenea te marooro ao ni kairekerekeia kaain te kiraati.
Reirei te Reirei
Te rairaki bon te kawai ae e riai ni karaoaki ae kainnanoa te kekeiaki ae korakora.
-
3 Nibwaai 1–7 e kabwarabwaraiia aomata ake a rairaki nakon Iesu Kristo ao Ana euangkerio ao te koraki naba ake aaki. Ni buokiia kaain am kiraati n nooria bwa tera te kaokoro imarenan kurubu aikai, ko konaa ni karaoa te tiata iaon te burakibooti ma atuun iango aikai: Koaua ao mwakuri ake a kamamaara te rairaki ao Koaua ao mwakuri ake a kakorakora te rairaki. Tibwai taian kibu man koroboki aika tabu i aoia kaain te kiraati, ao kaoiia bwa a na kanoaa te tiata ma kiibu ake a kunei (te katooto are e a tia ni katauraoaki ibukin te moan kibu).
-
3 Nibwaai 1:4–23, 29–30: E kamamaara te rairaki: aki kakoauai aia taeka burabeti ao ni bwainingareia aomata ake a raoiroi (kiibu 5–6). Kakorakora te rairaki: iai te onimaki n aia taeka burabeti ao n tataro ibukin te ibuobuoki (kiibu 8. 11).
Ti na kangaa ni kamatoa rairakira bwa e na korakora n aki tabe ma te kakaitara?
-
-
Tao a na bae n tangiria kaain am kiraati ni kakaea nako bwa e kangaa aron kakorakorakiia ake n 3 Nibwaai 1:27–30 are a aranaki bwa “te roro ae tabe n rikirake.” Tao ko na tuangiia kaain te kiraati bwa a na kakaea bukina ni kiibu aikai bwa bukin tera Nibwaite ao Reimwanaite aika kairake aki konaa ni totokoa te buakaka are e katobibiia. Aio e konaa ni kaira te marooro ibukin tabeua kakaewenako ake a kaitarai te roro ae rikirake ni bong aikai ao kawai aika tamaroa ni buokiia ni karikirakea aia onimaki iroun Kristo. Tabeua iango a kuneaki inanon “Bwaai n Ibuobuoki Riki Tabeua.”
Te Uea e na kakoroi nanon Ana taeka ni kabane.
-
Warekan te rongorongo n 3 Nibwaai 1:4–21 ao 5:1–3 e konaa ni kakorakora aia onimaki kaain am kiraati n ana berita te Uea. Tao a na konaa kaain te kiraati ni bane ni wareka 3 Nibwaai 1:4–7 ao ni koroia iaon te burakibooti bwa a na tera aia namakin ngke arona bwa ngaiia ake taan kakoaua ake a kabwarabwaraaki ni kiibu aikai. A konaa naba ni iangoi waaki ae aekakin aikai ake ti kona ni kaitarai ni bong aikai. Tera ae ti reiakina man 3 Nibwaai 1:8–21 ao 5:1–3 iaon te Uea ao Ana berita? Ni karababa nako te marooro, ko konaa n rinanon te anene n taromauri iaon onimakinan te Atua, n aron “When Faith Endures” (Anene n Taromauri, nambwa 128). Kaain te kiraati a konaa n tibwaua te bwai ae a a tia n rinanona ngke aia onimaki ao aia kakoaua iroun te Atua e reke kanuwangana, e ngae ngke iai te kakaitara.
3 Nibwaai 1:4–15; 5:12–26; 6:10–15; 7:15–26
Ngaira bon taan iriira Iesu Kristo.
-
E taekinna Moomon, “Nooria, bon Ngai ana reirei Iesu Kristo” (3 Nibwaai 5:13). Ni kakaea ma am kiraati bwa tera ae nanonaki n riki bwa te tia iriira te Uea, ko na bae ni kaoiia kaain te kiraati ni kakaea n 3 Nibwaai 1:4–15; 5:12–26; 6:10–15; ao 7:15–26, n nooria bwa tera te aroaro ae tau, koaua, ao ana mwakuri te tia iriira Kristo. Iangoia n anganiia kaain te kiraati tabeua te miniti ni iangoa ao ni korei baike a konaa ni karaoi bwa aonga ni konaa n riki bwa taan iriiira Iesu Kristo aika tamaroa.
3 Nibwaai 2:11–12; 3:12–26; 5:24–26
Ngkana a bootaki aika itiaki, te Uea e konaa ni kakorakoraia ao ni kamanoia.
-
Bukina tabeua ae Nibwaite a konaa ni tokanikai iaoia ana taan iraa Kateanton bon ibukina ae a bootia aia tanga ni buaka ma Reimwanaite ake a tia n rairaki ao n ira ana kairi ae e tamaroa Ratonati ni “bane ni ikotaki” i Taraemera (3 Nibwaai 3:22). Tera te reirei ae e na reke man aio n reiakinaia kaain am kiraati? Ko konaa n tuangiia bwa a na tibwaua te bwai ae a tia n rinanona ngke a kakorakoraki ibukiia aomata aika raraoi ake a mena irarikiia. Ko konaa ngkanne ni kaoiia kaain te kiraati n rinanoa 3 Nibwaai 3:12–26, ni kakaea bukin ae a bootaki Nibwaite ao te kakabwaia are a rinanona. Ti kangaa n rinanon te kakabwaia ae aekakin aikai ngkana ti bootaki ma ara utu ke ara mwaanga ao uoote? Tera ae ti konaa riki n reiakinna ibukin te bobotaki man 3 Nibwaai 5:24–26?
-
Warekan 3 Nibwaai 3 e konaa n reke bwa te tai ni buokiia kaain te kiraati n nooria bwa aekakira te korakora ngkana ti bane ni ikotaki n te raoiroi. Tao ko na bae n iangoa te anga reirei ae ko kabongana te bwai ae e konaa n nooraki ni kaota aron te bwai ae e memeere ae e riki ni korakora ngkana e ikotaki ma bwaai tabeua. Kaoiia kaain te kiraati ni iangoia ae angkoa a tuangaki bwa a na imanonoia Nibwaite n te bwai ae tamaroa ibukiia ngkana a ikotaki ni kabane, n aron are e kabwarabwaraki n kiibu 12–26. Tao a na konaa ni mwakuri n te kurubu ni maroroakinna bwa a na kangaa ni karaoa aei, ae boboto iaon te wareware are a warekia ni kiibu aikai. Kariaia bwa a na tibwaua aia iango. Ma kaain te kiraati, ko konaa ni maroroakin titiraki n aron aikai: Baikara kakaewenako ake ti taneiai iai are a konaa ni katiteboaki ma ana taan iraa Kateanton? Ti na kangaa ni karaoi mweengara ao ara uoote bwa taabo ni katantan?
Ti aki riai ni maaka Tatan.
-
Te reta are e koreaki iroun Kiteaenaai, te tia kairiiri irouia ana taan iraa Kateanton, bon te anga ni kakamakuia ao ni kamwaneia Nibwaite. Tao a na konaa kaain te kiraati n rinanoa ana taeka are e kuneaki n 3 Nibwaai 3:2–10 ao ni katitaboa ma a na kawai Tatan are e na kataia ni kekeweira iai ni bong aikai. Tera ae ti reiakinna man te bwai are e karaoia Ratonati, are te mataniwi n tia moti irouia Nibwaite?
Kaungaa te Kamatebwai n te Mweenga
Ni kaungaa nanoia kaain am kiraati bwa a na wareka 3 Nibwaai 8–11 ibukin te kiraati n te wiiki ae e na roko, tuangiia bwa 3 Nibwaai 11 iai inanona “te bwai ae riki ae moan te kakawaki”—ana mwakuri ni ibuobuoki Iesu Kristo i buoakoia Nibwaite (taraa te kabwarabwara n Ana Boki Moomon).
Bwaai n Ibuobuoki Riki Tabeua
Buoka katean te onimaki irouia te roro ae rikirake.
Unimwaane Valeri V. Cordón man te Itingaun e anga teniua kawai ni buokiia te roro ae rikirake n teimatoa n te euangkerio:
-
“Riki n Rangi n Taotaonanano ao n Tabeaianga n te Mweenga. … Te reirei ae e ringa te nano e bon rangi ni kakawaki ni kamatoan te euangkerio inanon ara utu, ao e kainnanoa te taotaonanano ao te kekeiaki. E a mwaiti te tai ae ti kaoaki iai bwa ti na karaoia bwa te katei kakaraoan ara kamatebwai n koroboki aika tabu n ara utu ao ibon iroura. Utu ake a kakaraoa aei a kakabwaiaki ni katoa bong ma te katiteuanaki ae korakora ao te kaniiaki nakon te Uea”
-
“Kakaotan te Aroaro ae Tamaroa n te Mweenga. … E bon aki tau ae tii te taetae nakoia natira ibukin kakawakin te mare n te tembora, te aki mamatam, ao kawakinan te bong ae te Tabati n tabuia. Ana riai n nooria bwa ti karekea ara tai inanon baike ti katei bwa ti na karaoi n nako naba n te tembora ni katoa tai n aron are ti konaa. Ana riai n noora ara motinano n aki mamatam ni katoa tai ao ni kawakina te bong ae te Tabati n tabuia.”
-
“Taian Katei. … N ara utu, ti riai ni katinanikui ara katei ake a na tukiira man kawakinan te bong ae te Tabati n tabuia ke karaoan ara kamatebwai ni koroboki aika tabu ni katoa bong ao te tataro n te mweenga. Ti riai ni kaini mataroan bwaai ake a maiu man teiti ni mweengara nakon te tamnei n tangako ao tabeua riki kariiri aika bubuaka. Ni kaitaraa katein te aonaaba n ara bong, ti riai ni kabonganai koroboki aika tabu ao bwanaia ara burabeti aika ngkai n reireiniia natira aron rikiia ae maiiroun te Atua, bukin rokoia n te maiu aei, ao a na mition Iesu Kristo ae mai- roun te Atua” (“The Language of the Gospel,” Ensign ke Riaona, Meei 2017, 56–57; a karinaki koroboki aika a kararikaki).
Kanakoraoan Ara Anga reirei
Kairekerekeia te koraki ake a rinanon te kaangaanga. N tabetai kaain te kiraati ake a rinanon te kaangaanga a tangiria ni kairaki bwa aonga n namakina ae a tangiraki. Iangoia n tuangiia bwa a na ira buakon te waaki n tain te reirei ae e na roko ke taraia bwa e na reke baoia nakon te taromauri. Tai kabwara nanom ngkana aki kaekako n aron am kekeiaki n te moan tai. (Taraa Reirei n ana Kawai te Tia Kamaiu, 8–9.)