“Tebetembwa 14–20. 3 Nibwaai 8–11: ‘Teirake ao Nakomai Nakoiu,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Tebetembwa 14–20. 3 Nibwaai 8–11,” Nakomai, Iriirai—Ibukin te Reirei n Tabati: 2020
Ngai bon Otan te Aonaaba, iroun James Fullmer
Tebetembwa 14–20
3 Nibwaai 8–11
“Teirake ao Nakomai Nakoiu”
Ngkai ko tanrikaaki nakon am namakin ake ko korei n am tai ni kamatebwaia 3 Nibwaai 8–11 e na kairaki iango n anga reirei. Iango ni ibuobuoki aika inano a konaa n anganiko tabeua iango.
Korea Am Namakin
Kaungaa te Tibwatibwa
Tabeman aomata a na rangi ni kukurei n tibwatibwa ngkana ko titiraki baike a rangi ni kaineti ibukiia. Te katootoo, ko kona ni kaoiia kain te kiraati n tibwai bwaai tabeua man 3 Nephi 8–11 are e a tia n reiiakiniia ibukin anuan Iesu Kiristo. Tao ko na anganiia te kakao aio tabeua te bong imwaiina bwa a aonga n tauraoi n tibwatibwa ngkana a roko.
Reirei te Reirei
Ngkana ti rairananora, te Tia Kamaiu e na boota, kamanoa, ao kamarurungira.
-
Mwakoro aikai iai inanoia taekan te kamaunaki ao te urubwaiaki, ma a bon reiakin naba reirei n te maiu n tamnei are e na buokiira ni kaniira ma Iesu Kristo. Tao ko na kamaenakoia kain te kiraati inanon teniua te kurubu ao karaoiia kurubu bwa a na kamatebwaia teuana te mwakoro man 3 Nibwaai 8–10, ni kakaei taeka ke kibu n taeka are e kabwarabwara bwa teraa ae a reiakina ao n rinanona aomata. Temanna man kurubu akanne e kona n tibwauaia ma kain te kiraati bwa teraa ae a tia ni kunea kain aia kurubu. Kaungaia kain te kiraati ni maroroakinna bwa a kangaa reirei n tamnei aikai ni buokiira ni kaniira ma te Tia Kamaiu.
-
Te rongorongo ae kakawaki inanon mwakoro aikai bwa te Tia Kamaiu e kanakoa baina nakoira ma te tangira ao te nanoanga e ngae ngke ti mena inanon taai ni kaangaanga. Tao ko na kaoia kain te kiraati bwa a na iangoa temanna ae a kinaa are e rinanon taai ni kaangaanga ao ngkanne kakaea ana taeka te Tia Kamaiu n 3 Nibwaai 9:13–22 ao 10:1–10 ni kakaei kibu n taeka ae a na konaa ni buoka te aomata anne. Tao a kona kain te kiraati n tibwauai taneiai man booki aika tabu aika a na kaota te reirei aei.
Te Uea e kainnanoa “te nano ae uruaki ao te tamnei ae raraoma.”
-
Imwain rokon te Tia Kamaiu, koraki ake a kakaonimaki n te aba ni berita a kawakina a na tua Mote, are iai inanona te anga karea n te man. Ni buokiia kain te kiraati bwa a na mataata n te tua aio, ko konaa n rinanona n te tai ae uarereke Mote 5:5–8. Bukin teraa ngkai a tuangaki ana aomata te Atua bwa a na anga karea n te man n taai ake rimoa? Teraa te tua ae boou are e anga te Tia Kamaiu n 3 Nibwaai 9:20, ao e kangaa ni kairiira Nakoina ao Ana anga karea? Te taeka are e a manga taekinaki iaon tuan te anga karea n “Bwaai n Ibuobuoki Riki Tabeua” ana konaa ni ibuobuoki.
-
Ko na kangaa ni buokiia kain te kiraati n ataia bwa tera ae nanonaki n te nano ae uruaki ao te tamnei ae raraoma? Tao ko konaa ni moana ni koreia iaon te burakibooti te taeka uruaki, raraoma, ao anga karea. Imwina ko konaa n tuangiia kain te kiraati bwa a na korea te tamnei are e tei ibukin taeka akanne ao teraa ae e nanonaki n taeka akanne irouia ke ni korei taeka ke kibu n taeka ake titebo nanoia ma taeka akanne. N aia tai kain te kiraati n tibwai aia tamnei, taeka, ke kibu n taeka, a konaa ni marooro bwa a kangaa baikai ni kaineti nakon te bwai are e tuangiira te Tia Kamaiu n 3 Nibwaai 9:19–22. Te rongorongo mairoun Unimwaane D Todd Christofferson inanon “Bwaai n Ibuobuoki Riki tabeua” e konaa naba ni ibuobuoki.
Iesu Kristo bon Otan te Aonaaba.
-
Kanoan te bwai ae riki are e kabwarabwaraaki n 3 Nibwaai 11:1–17 bon teuana mai ibuakon bwaai aika a tabu inanon Ana Boki Moomon. Iangoia n anganiia kain am kiraati tabeua te miniti bwa ana warekii kibu aikai inanoia. Tao ko konaa ni korei tabeua titiraki iaon te burakibooti ibukiia bwa a na iangoia inanon aia tai ni wareware, n aron aikai: Teraa ae ko na tia n namakina ngke arona bwa ko mena ibuakoia aomata aikai? Teraa ae e anaa nanom ibukin te Tia Kamaiu ni kiibu aikai? Teraa ae ko reiakina man ana katooto Iesu? ke Teraa te namakin ae ko karekea ae e anganiko te kakoaua bwa Iesu Kristo bon am Tia Kamaiu? Ko konaa ni kariaia kain te kiraati bwa a na tibwai tabeua aia iango ke aia namakin.
TamneiIesu e kaotii mwiin taian neraa iaon Baina nakoia NibwaiteTemanna imwiin Temanna, iroun Walter Rane
Iesu Kristo e barongaa Ana reirei ao Ana Ekaretia.
-
E na rangi n kakanongora n ata te bwai are e moan rineia n taekinna ao ni karaoia te Tia Kamaiu ngke e kaoti n te Aba ni Mari. Tao an a konaa kain te kiraati ni mwakena ke ni korei koaua ake a rinei man ana taeka ao aroaron te Tia Kamaiu n 3 Nibwaai 11:10–41. Kaoiia bwa a na tibwaua te bwai are a kunei. Tera ae ti reiakinna n rongorongon te Tia Kamaiu man kiibu aikai? Tera ae ti reiakinna n rongorongon Ana Ekaretia?
-
Ni iangoana bwa e na toki te aki boraoi ae e rangi n noraki imarenaia aomata ni kaeineti ma te bwabetito, te Tia Kamaiu e kaokii koaua aika a kakawaki ibukin te otenanti aei n 3 Nibwaai 11. Ni buokiia kain te kiraati bwa a na kunei koaua aikai, ko kona ni korei nambwan taian kubu iaon te burakibooti: 21–25, 26–27, 33–34. Kaoiia kain te kiraati n tatabemaniia bwa a na anaa teuana ke uoua te kibu ao n tibwaua te koaua are e reiakinaki ibukin te bwabetito.
Kaungaa te Kamatebwai n te Mweenga
An a bae n tangiria kain am kiraati n ataia bwa rokon te Tia Kamaiu ni kawariia Nibwaite ao Reimwanaite e rangi n rootiia n te aro ae korakora ngaia are aomata aikai ake taan kakaitara imarenaia ngkoa a maeka inanon te rau inanon 200 te ririki (taraa 4 Nibwaai 1). Aio e na kona ni kaungaia kain te kiraati ni kamatebwaia 3 Nibwaai 12–16 n reiakinna bwa teraa ae e a bon reireiniia aomata te Tia Kamaiu are e a karikia te aekaki ni bitaki ae korakora aei.
Bwaai n Ibuobuoki Riki Tabeua
Tuan te te anga karea.
Beretitenti M. Russell Ballard e kabwarabwaraa teuana te kawai ae ti maiuakina tuan te anga karea n taai aikai:
“Imwiin ana kabanea n anga karea te Tia Kamaiu, uoua bitaki ake a karaoaki n mwakuriakin [tuan te anga karea]. Te moan, te otenanti n te toa e onea mwiin te otenanti n te anga karea; ao te kauoua, te bitaki aio e kamwainga te taratara man te anga karea man ana man te aomata nakon ae bon te aomata. N taraana, te anga karea e bitaki man te angabwai nakon te tia angabwai …
“… N onea mwin are e na kantaningaia te Uea n ara man ke uaan kai ni amwarake, ngkai E a tangiriira bwa ti na anga nako n kabane bwaai ake aki raraoi. …
“… Ngkana ti tokanikai iaon ae bon oin nanora ao ni karimoa te Atua moa inanon maiura ao ni berita ni beku Ibukina n aki tabe bwa teraa mwina, tia maiuakina ngkanne tuan te anga karea” (“The Law of Sacrifice,” Ensign, Okitobwa. 1998, 10).
Unimwaane Neal A. Maxwell man te Kooram n Abotoro n te Tengaun ma Uoman e taku: “Te koau raoi, n ana anga karea temanna bon tiaki katokaan te man iaon te bao ni karea. E na oneaki, bwa te tatauraoi ni katuka te man are inanora iaon te bao ni karea ao ni kabuokaki ni kabane!” (“Deny Yourselves of All Ungodliness,” Ensign, Meei 1995, 68).
Te nano ae uruaki ao te tamnei ae raraoma.
E kabwarabwaraa Unimwaane D. Todd Christofferson bwa tera ae nanonaki ni karekean te nano ae uruaki ao te tamnei ae raraoma:
“Ko konaa n angan te Uea te bwai n tangira ae uruakin, ke rairan, nanom ao raraoman, ke ongotaekan tamneim. Ni koauana, bon te bwai n tangira ae boni ngkoe—bwa aekakira ngkoe ao ko riki bwa ai aron antai.
“Iai te bwai ae e mena inanom ke inanon maium ae e aki itiaki ke e aki kororaoi? Ngkana ko kanakoa, anne bon te bwai n tangira nakon te Tia Kamaiu. Iai te aroaro ae raoiroi ke te tamaroa ae e bua man maium? Ngkana ko rinei ao ni karikii bwa anuam, ko bon anga te bwai ni tangira nakon te Uea” (“When Thou Art Converted,” Ensign ke Riaona, Meei 2004, 12).
Kanakoraoan Ara Anga reirei
Uaia ni mwakuri ma kain te utu. “Aomata ake e korakora aia kakairi iaon temanna te aomata—n ae e raoiroi ke ae buakaka—bon koraki ake a mena ni mweengan teuaane ke neienne. Ibukina bwa te mweenga bon te tabo raoi ni maiuakinan ao reiakinan te euangkerio, korakoram ni kamarurunga temanna kain te kiraati e na rangi n namakinaki mwiina ngkana ko uaia ni mwakuri ma … kain te utu” (Reirei n ana Kawai te Tia Kamaiu, 8–9).