“Aokati 31–Tebetembwa 6. Ereman 13–16: ‘Te Rongorongo ae Roiroi ae Moan te Kakimwareirei,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Aokati 31–Tebetembwa 6. Ereman 13–16,” Nakomai, Iriirai—Ibukin te Reirei n Tabati: 2020
Tamuera te I-Reimwnaite i aon te O, iroun Arnold Friberg
Aokati 31–Tebetembwa 6
Ereman 13–16
“Te Rongorongo ae Raoiroi ae Moan te Kakimwareirei”
Baikara ana reirei Tamuera te Reimwanaite ao ana taetae ni burabeti ae ko namakin ake a na rangi ni ibuobuoki nakoia kaain am kiraati? Ngkai ko kamatebwaia Ereman 13–16, iangoia ko na kangaa ni buokiia ni kakaei nanon mwakoro aikai.
Korei Am Namakin
Kaungaa te Tibwatibwa
Kaoiia kaain te kiraati bwa a na tibwatibwa ma toaia te bwai are a reiakinna, te bwai are a mataata iai, ke te bwai are a kamwakuria ngkai a wareka rongorongon Tamaurera te Reimwanaite n Ereman 13–16 te wiiki aei. Ngkanne katabeia bwa a na tibwatibwa nakoia kaain te kiraati ni kabane.
Reirei te Reirei
Ana toro te Uea a taetae ao ni mwakuri ni kaineti ma ana kaetieti te Atua.
-
Te Uea e tuanga Tamuera te Reimwanaite bwa iai te bwai ae a na karaoia are e tia n iangoaki riki are e taraa ni kaangaanga teutana: ni kabwarabwara nakoia aomata ake a tia ni kairoroa kitanan aia kaawa. Warekan Ereman 13:2–5 e kauringiia kaain te kiraati ibukin bwaai aika a kaangaanga are e tuangiia te Uea bwa a na karaoi. Kaungaia bwa a na tibwauai bwaai ake a rinanona. E kangaa ni buokiia aomata te Uea? N aron te katooto, tao a kona kaain te kiraati n tibwauai bwaai ake a tia n rinanona ngke iai te bwai ae e kaaki te Uea inanoia are E tangiria bwa a na taekinna nakon temanna (taraa te kibu 4). Tera kakabwaia ake a noori kaain te kiraati ngke a iriira ana kaetieti te Uea?
TamneiBeretitenti Russell M. NelsonTe burabeti e kairiira nakon Iesu Kristo.
-
E ngae ngke ana kauring Tamuera a kaeineti nakoia Nibwaite ake a matoata nanoia, Ereman 13 iai inanona tabeua reirei ibukira ni kabane. Ni buokiia kaain te kiraati bwa a na kakaea nanon ana taeka ae e onoti, ko kona ni kaoiia bwa a na kakaea Ereman 13 ibukin te rongorongo are e taraa ni kakawaki inanon waakin ara tai are ti maiu inanona. (INgkana, a kainnanoa te ibuobuoki, ko na wareki kiibu aikana imwiina iaon te burakibooti: 8, 21–22, 26–29, 31, ao 38.) Ngkanne a kona n tibwauai bwaai ake a kunei n te ikatoatoa, inanon kurubu aika uarereke, ke ma kaain te kiraati ni kabane. Tera rongorongo aika ti te arona ake a anganiira burabeti n te bong aei?
Kanikina ao kamimi a kona ni kakorakorai aia onimaki ake aki kamatoatoai nanoia.
-
Te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu n te iango bwa a na tarai kanikina are e a tia n anganiira te Uea “bwa [ti] aonga ni kakoaua arana” (Ereman 14:12). Tao a kona kaain te kiraati n tibwaua are a kunea ngkai a iangoa raoi te iango. Ko na ataia bwa ko na kabwarabwara bwa kanikina inanon maiura a karako bonganaia ao n onoti riki nakon kanikina ake e a kaman taekin Tamuera. Tera bukin kanikina ake tabeua ake a taekinaki n Ereman 14:28–30? A kona naba kaain te kiraati n tibwauai bwaai ake e a tia ni karaoi te Uea ni buokiia ni kakorakora aia onimaki Irouna.
-
Ni warekia bwa e kangaa ni kakoroaki bukin ana taetae ni burabeti Tamuera ni kona ni katea aia onimaki kaain te kiraati iroun Iesu Kristo ao Ana mwakuri. Tao a kona kaain te kiraati ni kabongana Ereman 14 ni karaoa te tiata are e karinani ana taetae ni burabeti Tamuera ibukin bungiakin Kristo ao matena n iterana are teuana ao taekan koroboki aika tabu are a koro bukiia iaon are te iterana. Tabeua taekan kiibu aikai a kairaki inanona kiibu man 3 Nibwaai 1:15–21 ao 3 Nibwaai 8:5–25. Bukin tera e kakawaki ibukira bwa ti na atai taetae ni burabeti aikai ao kakoroan bukiia?
-
A kona n nooria kaain te kiraati—n Ereman 16 ao taabo tabeua ni koroboki aika tabu—bwa noorakin kanikina ao kamimi e aki karika temanna bwa e na kakoaua Kristo. Kaoiia bwa a na tibwauai tabeua katooto man koroboki aika tabu ibukiia tabeman ake a noori kanikina ma a teimatoa n ak kakoauai. Ni kaineti ma Ereman 16:13–23, bukin tera ngkai angiina aomata n ana tai Tamuera te Reimwanaite a aki kakoauai kanikina ao taetae ni burabeti? E kangaa Tatan n anai nanoia aomata bwa a na “onimakina oin korakoraia ao … wanawanaia” n te bong aei? (Ereman 16:15). Tera ae ti reiakinna man te karaki aei are e kona ni buokiira n totokoi kaairua aika ti te arona?
Te Uea e boaia naake E tangiriia.
-
Ana taeka Tamuera iai inanona takutaku aika matoatoa, ma Ereman 15:3 e anga te nonoori ae onoti iaon te boaaki mairoun te Uea. Teuana te kawai ni buokiia kaain te kiraati n ota n te nonoori aei bwa kam na kaai ni wareka te kibu aei ao ni kaoiia bwa a na tibwauai kakoaua ake a noora iai ana tangira te Atua ao ana nanoanga n ana taetae ni burabeti ao ana kauring Tamuera. E kangaa te boaaki mairoun te Atua n riki bwa kaotan ana tangira?
-
Ni buokiia kaain te kiraati bwa a na ota raoi n te rongorongo n Ereman 15:3, ko kona n tibwauai teniua oin te kaantaninga n te boaaki are e taekinna Unimwaane D. Todd Christofferson (taraa “Bwaai n Ibuobuoki Riki Tabeua”). Bwenaua te kiraati inanon teniua te kurubu, ao ni butiia kaain te kurubu n tatabeua bwa a na maroroakina teuana oin te kaantaninga (koroboki aika tabu ao te witeo are e taekinaki inanon “Bwaai n Ibuobuoki Riki Tabeua” e kona n ibuobuoki). Ngkanne kurubu n tatabeua a kona n tibwauai atatai nako man aia marooro are e buokiia n ota bwa te Uea e boaaia naake E tangiriia.
Te burabeti e kairiira nakon te Uea.
-
N Ereman 16, tera ae ti reiakinna mairouia naake a butimwaea ana reirei Tamuera? Tera ae ti reiakinna mairouia naake a totokoia? E kona n anainano n ongora irouia kaain te kiraati n tibwauaia bwa a kangaa ni karekea aia kakoaua ibukin kakawakin iriirakiia burabeti aika maiu. A na bae n tibwauaia naba bwa a na kangaa ni kabongana Ereman 16 ke ana taeka Andersen ni “Bwaai n Ibuobuoki Riki Tabeua” ni kabwarabwara nakon temanna bukin tera a rineia bwa a na iriira te burabeti.
Kaungaa te Kamatebwai n te Mweenga
Ni kaungaia kaain te kiraati bwa a na wareka 3 Nibwaai 1–7 n te wiiki ae e na roko, ko kona n tuangiia bwa angiina burabeti ake a wareka rongorongoia n te wiiki aei e na korobukina ni mwakoro aikai.
Bwaai n Ibuobuoki Riki Tabeua
Oin te Kantaninga n te Boaaki mai ieta.
Unimwaane D. Todd Christofferson e tibwauai teniua oin te kaantaninga n te boaaki mai ieta (taraa “As Many as I Love, I Rebuke and Chasten,” Ensign ke Riaona, Meei 2011, 97–100):
-
“Ni kaumakiira bwa ti na rairi nanora.” Taraa Ita 2:14–15; Reirei ao Berita aika Tabu 1:27; 93:41–50; 105:6.
-
“Ni kaboouira ao ni katiakiira.” Taraa Motiaea 23:21–22; Reirei ao Berita aika Tabu 101:1–5; 136:31.
-
“Ni manga kaeti kawain maiura are e ataia te Atua bwa te kawai ae tamaroa.” Taraa ana rongorongo Beretitenti Hugh B. Brown ao te aroka ae maten ni matoatoa n te buakonikai n ana marooro Unimwaane Christofferson (iteraniba 98–99); “Ana Kantaninga te Atua” (witeo, ChurchofJesusChrist.org).
Ti kimwareirei ni karekea ara burabeti.
E reirei Unimwaane Neil L. Andersen:
“E aki tei te burabeti i marenam ma te Tia Kamaiu. Ma, e tei irakim ao ni kairiko nakon te Tia Kamaiu. Ana bwai n tangira te burabeti ae korakora nakoira bon ana kakoaua ni koaua, ana atatai ae nene bwa Iesu bon te Kristo. N ai aron Betero rimoa, ara burabeti e taekinna “[Bon ngaia] te Kristo, are Natin te Atua are e maiu.” [Mataio 16:16; taraa naba Ioane 6:69].
N te bong ae na roko, n tanrikaaki iaon maiura ae mamate, ti na kimwareirei bwa ti nakonako n te aonaaba n ana tai te burabeti ae maiu. N te bong anne, I tataro bwa ti na kona n taekinna:
Ti ongo irouna. Ti kakoaua. Ti kamatebwaia ana taeka ma te taotaonakinnano ao te onimaki. Ti tataro ibukina. Ti Katiteuanaki ma Ngaia. Ti bon nanorinano teutana n iriria. Ti tangiria” (“Ana Burabeti te Atua,” Ensign ke Riaona, Meei 2018, 27).
Kanakoraoan Ara Anga reirei
Kinaia naake ko reireiniia. Akea uoman aomata ae titebo tarakiia. Aomata n tatabemaniiia ake ko reireiniia iai rongorongoia ae onoti, aia nonoori, ao aia konabwai ae taneiai te aba iai. Tataro n ataia bwa ko na kangaa ni kabonganai kakaokoro aikai ni buokiia kaain te kiraati n reiakinaki. Ngkai ko ota raoi irouia naake a karaoi taai n anga reirei aika a uaana man kauringaaba. (Taraa Reirei n Ana Kawai te Tia Kamaiu,10.)