“Ritembwa 14–20. Moronaai 10: ‘Nakomai nakon Kristo, ma ni Kakororaoaki Irouna,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Ritembwa 14–20. Moronaai 10,” Nakomai, Iriirai—Ibukin te Reirei n Tabati 2020
Bwa Kam Aonga n Ataia, iroun Gary L. Kapp
Ritembwa 14–20
Moronaai 10
“Nakomai nakon Kristo, ma ni Kakororaoaki Irouna”
Kaain am kiraati a bae ni iai baika a tia n rinanona aika uaana ni warekan Ana Boki Moomon n te ririki aei. Tiiku iaon taian taneiai aikai ni kaungaia ni kabane ake n te kiraati n kamatebwaii koroboki aika tabu.
Korei Am Namakin
Kaungaa te Tibwatibwa
Ko konaa ni kaoiia kaain te kiraati bwa a na iangoia ae aongkoa e roko Moronaai ni kawara te kiraati. Tera ae a na taekinna nakoina ibukin baike e korei inanon Moronaai 10? Iai taian kibu aika a nano nanoia irouia? Tao a kona kaain te kiraati n tibwauai taneiai ae a tia ni karekei man kiibu aikai.
Reirei te Reirei
I konaa n ataa te koaua man mwaakan te Tamnei ae Raoiroi.
-
Kaain te kiraati a konaa ni karekei aia nonoori aika boou ngkana a kamatebwaia Moronaai 10:3–5 n rinanona raoi. Ni buokiia, tao ko na korei kibu n taeka aika a kakawaki man taian kibu aikai iaon mwakorokoro ni beebwa ao anganiia kaain te kiraati n tatabemaniia ke kaain te kiraati n te kurubu. Kaoiia bwa a na iangoi ke ni maroroakinna bwa tera nanon taian kibuntaeka, ni ikotaki ma tera ae a konaa ni karaoia bwa a na karaoa nanona inanon maiuia. Imwina ko konaa ni wareka Moronaai 10:3–5 ma ngaiia, ao n toki ngkana ko roko n te kibu n taeka are e kamatebwaia temanna bwa aonga kaain te kiraati ni konaa n tibwaua ana iango teuannne ke neienne.
-
Ni kaungaia kaain te kiraati n tibwaua te bwai are a tia n rinanona ni karaoan te bwai are e kakao iai Moronaai ni kiibu aikai, ko konaa ni kaoiia bwa a na iangoia ae aongkoa a kataia ni kaungaa raraoia ke kaain aia utu ni karekea aia koaua n Ana Boki Moomon. A na kangaa ni kabongana Moronaai 10:3-7? Tera aia taneiai ae a konaa n tibwauaia? Ti na kangaa ni buokiia tabeman ni mataata bwa tera ae nanonaki n ataakin te bwai teuana “man mwaakan te Tamnei ae Raoiroi”? (Moronaai 10:5).
“Kam na aki kaakeaa ana bwai n tituaraoi te Atua.”
-
Bukin tera te taeka ni kauring “kam na aki kaakeaa ana bwai n tituaraoi te Atua” e rangi ni kakawaki riki n boong aika kaitira? (Moronaai 10:8). Kaungaia kaain te kiraati n iangoa te titiraki aei ngkai a wareka Moronaai 10:8–18. Ni buoka kakorakoraan aia koaua kaain te kiraati iaon ana bwai n tangira te tamnei, ko konaa ni kaoiia bwa a na tibwaua te katooto iaoia aomata ake a kabongana te bwai n tangira n aekakia nako ake a koreaki inanon Moronaai 10:9–16. Katooto a konaa n roko man koroboki aika tabu, man rongorongon te Ekaretia, ke man oin maiuia. (Katooto man Ana Boki Moomon a taekinaki inanon “Bwaai n Ibuobuoki Riki Tabeua.”) Ko konaa naba ni marooro bwa a kangaa bwai n tangira tabeua ake a kabwarabwaraaki inanon kiibu aikai ae a kaotaki ni kaotin Ana Boki Moomon. E aera ngkai e kakawaki ibukin temanna ae e ukoukora ana koaua iaon Ana Boki Moomon bwa e na kakoauai bwai n tangira man te tamnei? Bukin tera ngkai n tabetai ti karaoa ae ti karaoia n “aki tabeakinii” bwaai n tangira aikai inanon maiura? A kangaa bwaai n tangira aikai ni buokiira n “roko nakon Kristo, ma ni Kakororaoaki Irouna”? (taraa Moronaai 10:30–33).
-
Te kawai teuana n ukorii ana bwai n tangira te tamnei are e kabwarabwaraaki n taian kibu aikai bon korean titiraki iaon te burakibooti n aron aikai Tera bwain tangira n tamnei? A anganaki antai? Bukin tera ngkai a karekeaki? ao Ti kangaa ni karekei? Ngkanne kaoiia kaain te kiraati bwa a na ukoukora Moronaai 10:8–25 ni kakaei kaekaan taian titiraki. (Ana taeka Beretitenti Brigham Young ao Beretitenti Dallin H. Oaks n “Bwaai n Ibuobuoki Riki Tabeua” a konaa ni ibuobuoki.) Irarikin taian bwai n tangira man te tamnei are a koreaki inanon kiibu 9–16, baikara riki “ana bwai n tangira te Atua” ae ti a tia ni karekei ke ni kakabwaiaki iai? (Moronaai 10:8). Ko na tangiria ni kan tibwaua are e reirei iaona Unimwaane Bruce R. McConkie: “Bwaai n tituaraoi n te Tamnei aki kona ni warekaki ao ni kakaokoro aroia. Ake a tauaki mwiia n te taeka bon ti tamnein te akoi ae mimitong ae takaburinako are te Atua ae akoi E anganiia ake a tangiria ao a beku ibukina” (A New Witness for the Articles of Faith [1985], 371).
I kona ni kakororaoaki rinanon ana tangira Iesu Kristo.
-
Tera am namakin ibukin buokaia kaain te kiraati ni butimwaea ana kakao Moronaai bwa a na “nakomai nakon Kristo, ma ni kakororaoaki Irouna”? (Moronaai 10:32). Tao ni moanaki man te anene n taromauri iaon atuun te reirei aio, n aron “Come, Follow Me” (Anene n Taromauri, nambwa 116), e na konaa ni kaoa te Tamnei inanon am marooro, ao kaain te kiraati a konaa n tibwauai bwaai aika a noori aika a irekereke imarenan te anene n taromauri ao koaua ake a kunei inanon Moronaai 10:30–33. Tera ae ti reiakinna man kiibu aikai ao anenen te taromauri bwa tera ae e nanonaki n ae ti na nakomai nakon Kristo? Tera e nanonaki bwa ko na “kakororaoaki inanon Kristo”? (taraa naba RB 76:50–53, 69). Tibwaua am namakin bwa tera nanon ae ko na “kakororaoaki rinanon Iesu” (RB 76:69), ao kaungaia kaain te kiraati bwa a na tibwauai naba aia namakin.
-
Ibukina bwa aio ai bon te kabanea ni maroroakinan Ana Boki Moomon n te ririki aei, ko na tangiria n tuangiia kaain te kiraati bwa a na tibwauai tabeua baike a tia n namakin ao n reiakin inanon aia tai ni kamatebwaia te boki aio. Ni buokiia kaain te kiraati ni karaoa aei, ko konaa ni wareka Moronaai 10:32–33 ma ngaiia ao n tuangiia bwa a na kabanea tabeua te miniti ni iangoia bwa e kangaa Ana Boki Moomon n tia ni buokiia n roko nakon te Kristo. Ko konaa n titiraki: E kangaa Ana Boki Moomon ni buokiira ni karekea te tangira ae korakora ibukin te Atua? E kangaa ni buokiira ni katuka ara onimaki ae bwanin iaon ana tangira Kristo? E kangaa ni buokiira n “aki kaakeaa” mwaakan te Tia Kamaiu? Kaoiia kaain te kiraati bwa a na kaota aia koaua n Ana Boki Moomon ao a na kakoaua iaon Iesu Kristo.
Kaungaa te Kamatebwai n te Mweenga
Ni buokiia kaain te kiraati ni kaantaninga ma te ingainga ni kamatebwaia Reirei ao Berita aika Tabu nakon te ririki ae e na roko, ko konaa n rinanoa Moronaai 10:9–16 ao ni kabwarabwaraa bwa bwai n tangira aikai a bane ni kaoti inanon te Ekaretia n taai aikai. Ngkai ti wareka Reirei ao Berita aika Tabu, ti na noria bwa a kangaa bwai n tangira ao mwaakan te Atua n tia ni kabonganaaki ni waakina Ana mwakuri ni boong aika kaitira.
Bwaai n Ibuobuoki Riki Tabeua
Kaotakin taian bwai n tangira n te tamnei inanon Ana Boki Moomon.
-
A reirei ma te Tamnei: Nibwaai ao Riaai (Ereman 5:17–19)
-
Te onimaki ae moan te korakora: Aramwa, Amureki, Aamon, ao tabeman (Ita 12:13–22)
-
Te katoki aoraki: Aramwa (Aramwa 15:5–11)
-
Te kakai ae korakora: Taan reirei ake teniman (3 Nibwaai 28:19–22)
-
Te taetae ni burabeti: Riaai (2 Nibwaai 1:6–7)
-
Norakiia anera: Amureki (Aramwa 10:7-10)
-
Kabwarabwaraan nanon taian taetae: Motiaea (Motiaea 28:11–16)
Ana kakoaua Beretitenti Brigham Young iaon ana bwai n tangira te tamnei.
“Onimaki. Ngkana ko kakoaua te reirei n te Euangkerio ao ni karekei ni korakoram nakon te onimaki, are bon ana bwai n tangira te Atua, e na anga riki te onimaki, ni kabatiaa te onimaki nakon te onimaki. …
“Te Bwaintangira ni Katoki Aoraki. I mena ikai bwa N na taekina koauan te bwai ae riki nakoia bubua mwaane, aine, ao ataei ake a kamaeuaki man mwaakan te Atua, rinanon te katoka bai, ao a mwaiti aika I a tia n nooria ae a manga teirake ngke a kuri ni mate, ake a kaokaki man kaniian te maiu ae akea tokina, ao tabeman ake tamneia a tia ni bon kitana rabwataia, ni manga kaokaki. I kakoauaa bwa I a tia n noriia aoraki aika a kamaiuaki man te katokabai, n aron are e beritana te Tia Kamaiu. …
“Taeka ni Burabeti, Te Kaotioti, ao Te Ataibwai. Ni kabane mwaane ao aine tao taan kaotioti, ao iai aia koaua iroun Iesu, ake iai irouia ana kaotioti Iesu, ao a nora ana iango ao nanon te Atua ni kaeineti ibukiia, ni katinanikua te buakaka, ao n rinea are e raoiroi” (Teachings of Presidents of the Church: Brigham Young [1997], 252–53).
“N taui ni kabane bwaai n tangira aika raraoi.”
Beretitenti Dallin H. Oaks e taekinna bwa e kangaa kakaean ana bwai n tangira te tamnei ni kakabwaia tinana. “Ngkai e a tia ni bua kainabana, tinau are akea buuna e aikoa bwanin raoi arona. E kangaa aron ana tataro ibukin kainnanona ni kakoroa nanon mwiokoana ni karikirakeia natina teniman aika a uarereke! E ukeuke, e kororaoi, ao e kakabwaiaaki! E kaekaaki ana tataro n aanga aika mwaiti, ni ikotaki ma karekean ana bwai n tangira te tamnei. A rangi ni mwaiti, ma teuana ae e tiku n au iango bon ana bwai n tangira te tamnei ae te onimaki, te koaua, ao te ataibwai” (“Bwaai n Tangira n Tamnei,” Ensign, Tebetembwa 1986, 72).
Kanakoraoan Ara Anga reirei
Kaokoroa aia tai taan kamatebwai bwa a na tibwatibwa. “Ngkana a tibwatibwa taan kamatebwai bwa tera are a tia ni kamatebwaia, a aki tii namakina te Tamnei ao ni kakorakorai aia koaua, ma a kaungaiia naba tabeman kaain te kiraati ni kunei koaua i bon ibukiia” (Reirei n ana Kawai te Tia Kamaiu, 30).