“Ritembwa 21–27. Kiritimati: ‘E na Roko Nakon te Aonaaba bwa e na Kaboia Ana Aomata,’” ” Nakomai Iriirai—Ibukin te Reirei n Tabati: Ana Boki Moomon 2020 (2020)
“Ritembwa 21–27. Kiritimati,” Nakomai, Iriirai—Ibukin te Reirei n Tabati 2020
Noora ana Tibutetei te Atua, iroun Walter Rane
Ritembwa 21–27
Kiritimati
“E na Roko Nakon te Aonaaba bwa e na Kaboia Ana Aomata”
Ngkai ko kamatebwaia bungiakin Iesu Kristo n te wiiki aei, iangoia bwa ko na kangaa ni buoka am kiraati ni kakorakora aia koaua iaon Iesu Kristo ao Ana Mwakuri ni Kamaiu. Iango ake a koreaki n te te kabwarabwara iaon aei e kona n ibuobuoki.
Korei Am Namakin
Kaungaa te Tibwatibwa
Kaoiia kaain te kiraati bwa a na kaitoatoaiia ke ni karaoa te kurubu ae uarereke ao n tibwauaia bwa e kangaa kamatebwaian Iesu Kristo man Ana Boki Moomon n te ririki aei ae e a tia ni kakorakora aia onimaki Irouna ao Ana reirei.
Reirei te Reirei
1 Nibwaai 11:13–23; Ereman 14:1–13; 3 Nibwaai 1:4–22
E bungiaki Iesu Kristo bwa ara Tia Kamaiu.
-
Ko na kangaa ni kabongana Ana Boki Moomon n reiakiniia kaain te kiraati iaon kakawakin te bong are e bungiaki iai te Tia Kamaiu? Teuana te kawai bon kamaenakoaia kaain te kiraati inanon teniua te kurubu ao anganiia kurubu n tatabekurubu teuana man taian kibu ni koroboki aika tabu ni botaki ni warekii: 1 Nibwaai 11:13–23; Ereman 14:1–13; ao 3 Nibwaai 1:4–22. Tuangiia kaain te kurubu bwa a na maroroakiina bwa tera ae a reiakinaki ni kiibu aikai iaon bungiakin te Tia Kamaiu. Ngkanne kain te kurubu a konaa n tibwauaia ma tabeman aomata n te kiraati bwa tera are a maroroakinna. E aera bwa e kakawaki bwa Ana Boki Moomon n taekina koauan bungiakin te Tia Kamaiu?
-
Mataatam iaon bungiakin te Kristo e bon kakawaki, ma atakina bwa bukin tera E bungiaki e bon kakawaki atakina. Ko na kangaa ni buokiia naake ko reireiniia bwa a na iangoa mwaakan ana kamaiu Iesu Kristo? Ke a konaa kaain te kiraati n tibwauai tabeua karaki man kiibu ni koroboki aika tabu ake a kamatebwaia n te wiiki aei (taraa te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu). Kaungaia bwa a na tibwauaia bwa a kangaa bwaai ake a kamatebwai ni kakorakora aia kakaitau ibukin bungiakin te Tia Kamaiu ao Mwaakana ni kamaiu.
-
Ni moana te marooro iaon ana bwai n tangira te Atua are e a tia n anganiira rinanon Natina, ko konaa ni kaoiia tabeman kaain te kiraati n taetae iaon tabeua bwaai n tangira aika a okoro ake a karekei n tain te Kiritimati. Ti na kangaa ni kaota ara kakaitau ibukin bwai n tangira ake ti karekei? A konaa kaain te kiraati ni wareka te taeka mai iroun Beretitenti Thomas S. Monson ae kuneaki inanon “Bwaai n Ibuobuoki Riki Tabeua” ao maroroakini bwai n tangira aika aua are e taekin Monson. Tera taben te Tia Kamaiu ae karaoia n taian bwai n tangira aikai? Ti na kangaa ni kaota ara kakaitau nakon Tamara are i Karawa ibukin bwai n tangira aikai?
-
N riki bwa mwakoron am marooro iaon te Kiritimati, iangoia ae ko na kaoiia kaain te kiraati ni kaotioti ke n anenea kunan te Kiritimati. Ko kona naba n rinanoi bwai n ibuobuoki ake a koreaki inanon “Bwaai n Ibuobuoki Riki Tabeua.”
Te moan baa n te kabwarabwara n Ana Boki Moomon; te kabwarabwara n Ana Boki Moomon; 2 Nibwaai 25:23, 26; 33:4, 10
Ana Boki Moomon e taekina koauan Iesu Kristo.
-
Ibukina e a roko n tokina kamatebwaian Ana Boki Moomon inanon te Reirei n Tabati, tao ko na riai n anganiia kaain te kiraati aia tai are a na iangoi raoi baike a tia n reiakin iaon Iesu Kristo inanon Ana Boki Moomon n te ririki aei. Ni buoka aron moanakin te marooro, kam konaa ni bane ni wareka 2 Nibwaai 25:23, 26 ao 33:4, 10, ni ikotaki ma tabeua koroboki aika a rineaki man Kabwarabwaraan Ana Boki Moomon ao atuun te boki. Ko konaa naba n tibwaua te karaki ke kiibu man koroboki aika tabuare e a tia ni kairiko ni kaniiko nakon Iesu Kristo ao imwiina anganiia kaain te kiraati tabeua te miniti bwa a na tibwaua aia karaki ke te rongorongo. Kaota am koaua iaon Ana Boki Moomon, ao kaoiia kaain te kiraati tabeman bwa ana kaota naba aia koaua.
Kaungaa te Kamatebwai n te Mweenga
Ni kaungaia kaain te kiraati ni moana warekan Reirei ao Berita aika Tabu, ko konaa ni tibwaua te kibu ae mamate nanom iai ke te bwa ae ko a tia n rinanona ae kakawaki ngke ko kamatebwaia Reirei ao Berita aika Tabu.
Bwaai n Ibuobuoki Riki Tabeua
Bwaai n ibuobuoki iaon te Kiritimati.
-
Taian tamnei n te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao te Utu
-
“A Savior Is Born—Christmas Video” (video, ChurchofJesusChrist.org)
-
“Good Tidings of Great Joy: The Birth of Jesus Christ” (video, ChurchofJesusChrist.org)
-
Te Taromauri ni Kiritimati man te Moan Beretitentii (ChurchofJesusChrist.org/broadcasts/first-presidency-christmas-devotionals)
Te bwai n tangira ae te Tia Kamaiu.
E reirei Beretittenti Thomas S. Monson:
“I iangoa raoi te kaokoro iaon te Kiritimati. Bwaai n tangira aika bobuaka, ma niraia ae bobuaka ao a karauaki raoi n bwatiaaki, a roota neia ieta inanon taian kataroka aika a tia ni karaoaki ibukin katanoatakiia ma taekana ae kangai ‘Ibukin temanna are e reke irouna bwaai ni kabane.’ Iaon teuana te wareware I noora te mweenga ae aua tengaa te tikuea te buuti ae e niroaaki n te reben ae te kabanea ni bubura ao te kaati ni kamauri ae bane naba arona ae taku, ‘Merry Christmas.’ Tabeua riki bwaai iai naba kai n oro boro ae e tekebabaa iaon te taiman ibukin te tia kaobu, te kaibuke ae te Karabian ibukin te tia boborau, ao te mwananga ae bobuaka nakon te Swiss Alps ibukin te tia mwamwananga. Bwaintangira aikai a bon bane ni bootau ma te atuu ni iango iaon teuana te Kiritimati ae tamnein te kaatuun are e kaotiia Teniman Taan Rabakau ake a mwananga nako Betereem ma bwaoki ni bwai n tangira iaon aia kamero. Temanna e taku, ‘Taratarai ngkami, Balthazar, ti nang moana karaoan te bwai teuana ma bwai n tangira aikai ae a na akea ae konaa n tukia!’ …
“Inanon tabeua te tai, ti konaa ni mwaninga moa taekan taian kataroka ni Kiritimati, ma kabwarabwaraan bwai n tangira aika a kakaongora. Tao ti na tannako moa man te uee nakoia Tiina, te reitaki ae okoro ma Kaaro, taoree aika kakateke, te turein ae tangitang, te bwatika are e kariariaaki … ao ni kaetii ara iango nakon ana bwai n tangira te Atua ake a tiku n akea tokiia. I a tia n rinei aua mai buakon te karinan: …
“Te moan, te bwai n tangira ni bungiaki. E a bon tia n tabangakiki aio n anganakira n tatabemaniira nako. Bon ara bwai mai iroun te Atua ni kitana mweengara i karawa ni maeka n rabwatara ae mamate ao ni kaotia ni maiura bwa ti kororaoi ao n tau n oki n te bong teuana Nakoina, ma aika a rangi n tangiraki, ao te abaniuea ae te tiretio. … Ara bwai bon bukinakira ni kaota ara kakaitau man baike ti karaoi ni maiura. …
“Te kauoua, Te bwai n tangira n rau. Inanon te aonaaba ae kaberoro ae ti maeka inanona, karongoaan te kawai, te anainano ae kaebu man tabo ni kanako rongorongo, ao taian kaoriori aika mwaiti iaon ara tai—n aki konaa ni maninga kaangaanga n te aonaaba—e karika te maraki n atuu, ni karika te maraki, ao e anaa korakorara ni kaitaraa. …
“Teuare e a tia ni kamarakaki ma te nanokawaki ao n raonaki ma te rawawata e taetae nakoia ni kabane ake a rawawata nanoia ao ni katuka te bwai n tangira ae te rau. ‘I katuka te rau i roumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi, ao a na tai maaku’ (Ioane 14:27). …
“Te katenua, te bwaintangira n tangira. ‘Te tia reirei, te raa te kabanea ni kakawaki ibuakon tuua?’ e titiraki te rooia are e taetae nakon Iesu. E roko te kaeka ae waekoa: ‘Ko na tangira Iehova ae Atuam n nanom ni kabane, ao n tamneim ni kabanea, ao ni wanawanam ni kabanea.
“‘Aio te Moa n tua ae e korakora.
“‘Ao ai aron naba are te kauoua, are e kangai, Ko na tangira raom n ai aron tangiram i bon i roum’ (Mataio 22:36–39). …
“Te kaaua, te bwai n tangira n te maiu—n aron te maiu ae aki mamate. Ana babaire Tamara are i Karawa e kaotaki inanona te tangira ae koaua ae moan te rine. Te bwai are e rangi mate nanora iai, n aroia ara utu, raraora, kimwareireira, ara atatai, ara koaua, ana bane ni bua ngke arona bwa ti aki buokaki iroun Tamara are i Karawa ao Natina, te Uea ae Iesu Kristo. Mai ibuakon te iango ao te koroboki ae e rangi ni mateakinaki n te aonaaba aei bon te rongorongo ae koaua ae mai iroun te Atua: ‘Bwa e tangiia aomata te Atua n te aro are E anga Natina ae te riki temanna iai, bwa e aonga n aki mate ane onimakinna, ma e na reke irouna te maiu are e aki toki’ (Ioane 3:16)” (“Gifts,” Ensign, May 1993, 59–62).
Kanakoraoan Ara Anga reirei
E Raoiroi ngkana ko kangai, “I aki ataia.” Ngkai ko karaoa am kabanea ni konaa ni kaekai titiraki ake a titiraki iai kaain te kiraati ibukin te euangkerio, e aki kantaningaia te Uea bwa ko na atai bwai ni kabane. Ngkana ko aki ataia bwa ko na kangaa ni kaeka nakon te bwai teuana, taraia bwa ko kaeka ni kaoiia kaain te kiraati bwa kam na uaia n ukeuke ibukin te reke inanon koroboki aika tabu ao n tibwaua te bwai ae a kunea. (Taraa Reirei n Ana Kawai te Tia Kamaiu, 24.)