“Nobembwa 30–Ritembwa 6. Moronaai 1–6: ‘Bwa a na Waaki n te Kawai ae Eti,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Nobembwa 30–Ritembwa 6. Moronaai 1–6,” Nakomai, Iriirai—Ibukin te Reirei n Tabati: 2020
Minerva Teichert (1888–1976), E Bwabetito Aramwa inanon te Ran are Moomon, 1949–1951, oil on masonite, 35⅞ x 48 inches. Brigham Young University Museum of Art, 1969
Nobembwa 30–Ritembwa 6
Moronaai 1–6
“Bwa a na Waaki n te Kawai ae Eti”
E tangiria Moronaai bwa baike e korei “ana bongana” nakoia ake a maeka inanon bong aika kaitira (Moronaai 1:4). Inanon am tai ni wareka Moronaai 1–6, tataromwaka ni iangoi baike a na rangi ni bongana nakoia ake ko reireiniia.
Korei Am Namakin
Kaungaa te Tibwatibwa
N tabetai kaain te kiraati a nakoraoi riki n tibwaua aia nonoori man aia kamatebwai ibon irouia ngkana iai te tai teutana ae anganaki ni iangoia bwa tera are a warekia. Tao ko na anaa tabeua te miniti n tain moanakin te kiraati n rinanoa atuun te mwakoro ibukin Moronaai 1–6. (Aio e konaa naba ni buokiia kaain te kiraati ake aki wareware ni mweengaia.) Ngkanne kaoiia kaain te kiraati ni kakaea ni mwakoro aikai te kibu ae e ringa nanoia ao a tangiria n tibwauaia ma kaain te kiraati.
Reirei te Reirei
Otenanti n te nakoanibonga a na riai ni karaoaki n te kawai are e tua iai te Uea.
-
Ngkana kaain am kiraati (ke kaain aia utu) a katauraoi ni butimwaea te otenanti n te nakoanibonga, e na rangi ni kakawaki manga rinanoana bwa tera are e reireia Moronaai iaon te otenanti inanon Moronaai 2–6. Kaain te kiraati a konaa ni kaitoatoa n karaoa te kaotioti iaon te bwai are e riki n aron aikai. (1) Tarim e nang katabuaki nakon te nakoanibonga. Tera taeka n reirei ae ko na anganna man Moronaai 3? (2) Raraom ae kaain te aro teuana e titiraki bwa e aera ngkai e riai n anaaki te toa ni katoa wiiki. Tera ae ko na taekinna? (taraa Moronaai 4–5). (3) E a kaan n roko ana tai ni bwabetitoaki natim te aine, ma e aki koaua raoi ngkana e tauraoi. Ko na kangaa ni buokia? (taraa Moronaai 6:1–3). Imwiin karaoan te kaotioti, a konaa kaain te kiraati ni marooro bwa tera ae a reiakinna imarenaia. A konaa naba n tibwaua aia koaua bwa e kangaa te otenanti n aron aikai n uotiia ni kaniia ma Tamare are i Karawa ao Iesu Kristo.
-
Ni kabwarabwara te marooro iaon te katauraoi nakon te bwabetito, ko konaa n tuangiia kaain te kiraati bwa a na taekini kawai ake a tia ni katauraoi ibukin te motinano ae kakawaki inanon maiuia, n aron te mition, te mare, te riki ni karo, ke te mwakuri ae boou. E kangaa te katauraoi anne ni katitaboaki ma te katauraoi ae kainnanoaki bwa ko aonga n tau nakon te bwabetito, n ae e kabwarabwaraki inanon Moronaai 6:1–3? (taraa naba Motiaea 18:8–10; RB 20:37). Bukin tera taian anua ake a karinanaki ni kiibu aikai a riai ibukin te bwabetito? Ti na kangaa n ataia ngkana ti a tauraoi nakon te otenanti aio? Kaungaia kaain te kiraati ni iangoia bwa e uara aron maiuakinan kainibaire aikai man te tai are a bwabetitoaki iai ao tera ae a konaa ni karaoia bwa a na kerake riki. Ko konaa naba ni kaoiia bwa a na korei aekaki n namakin ake a karekei ao n aki toki ni manga okiokirii n tatarai.
Tamneite ataeinaine e karekea te kakabwaiaOtenanti a karaoaki man mwaakan te nakoanibonga.
Anakin te toa e buokiira ni kanira nakon Iesu Kristo.
-
Te Kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu e anga iango ibukin te waaki ni kaineti ma te toa. Tao ko na bae ni kaoiia tabeman kaain te kiraati bwa ana kabwanina karaoan waaki aikai ni mweengaia ao n roko nakon te kiraati n tauraoi n tibwauaia bwa tera ae a reiakina. Tao ko na kaoiia naba kaain te kiraati n tibwauaia ibon imarenaia bwa tera ae a karaoia ni katauraoiia ao aia utu bwa e na reke te namakin ae tabu ma te toa.
-
Angiina maibuakora ti a tia n ongongo taekan tataron te toa n te tai ae mwaiti, ma ti iangoia raoi bwa tera ae e nanonaki n taeka akanne? Ni buokiia kaain te kiraati ni iangoi tataro aikai, ko konaa n anganiia te tai ae mwaiti bwa ana korei tataron te toa ake uoua man aia ururing. Ngkanne kaoiia bwa a na katitaboa are a tia ni koreia ma Moronaai 4:3 ao 5:2. Tera ae e rangi ni baiti uringakina? Tera ae e aki reke irouia? Iai te bwai ae a noria iaon tataro aikai ae aki nonoria mai imwaina? Kaoiia kaain te kiraati bwa a na tibwauai taeka ao kibuntaeka man tataron te toa ae taraa n rangi ni kakawaki nakoiia ke ae e buokiia n namakina tabun te otenanti aio. Ni kanenea aia kakaitau kaain te kiraati ibukin te toa, iangoia ni kaoa temanna kaain te kiraati n anenea ke ni katanga kunan te toa. Ko konaa naba ni kaota te witeo “Always Remember Him” (ChurchofJesusChrist.org).
Ana reirei Iesu Kristo a ibuobuoki i marenaia.
-
Iangoia ni kabongana te kabotau ni buokiia kaain te kiraati ni mataata ni kakawakin ae ko na “kamwarakeaki n ana taeka te Atua ae raoiroi” (Moronaai 6:4). Te katooto, tera te aekaki n amwarake ae e kainnanoaki ibukin te aroka ae e a tibwa karikirakeaki ke te ataei ae uarereke? Tera ae e na riki ngkana ko mwanuokina te bwai ae e kainnanoa kamwarakeana? A kangaa membwa n te Ekaretia aika a boou ao ake a tiba oki n titebo ma aroka ke ataei aika uarereke ni kainnanoa kamwarakeaia? Kaain te kiraati a konaa ni kakaea n Moronaai 6:4–9 ibukin iango bwa a na kangaa ni “kamwarakeia” imarenaia n te maiu n tamnei. A kona naba n nori iango inanon “Bwaai n Ibuobuoki Riki Tabeua.” Tao ko na tibwaua te taneiai ae temanna ana tia iriira te Uea e karaoa te ibuobuoki nakoim. Tao a na tangiria kaain te kiraati n tibwaua te taneiai ae aekakin naba anne.
-
Moronaai 6:4–9 e na kona ni buokiia kaain te kiraati ni mataata bwa ti kangaa ni kakabwaiaaki ngkana ti “warekaki i buakoia aomatan ana ekaretia Kristo” ao n irii bootakin te ekaretia. Ti na kangaa ni kabwarabwarai kakabwaia aikai nakon temanna ae e titiraki bwa e aera e kainnanoaki te ekaretia ae barongaaki? Tao a kona kaain te kiraati n ukoukori kiibu aikai ni kakaea te bwai ae a na konaa n tibwauaia. Ke a konaa n karinani tabeua kakabwaia ake a tia ni karekei ngkai a kaina te Ekaretia (taraa D. Todd Christofferson, “Why the Church,” Ensign ke Riaona, Nobembwa 2015, 108–11). Tera ae ti konaa ni karaoia ni kakoauaa bwa raora ni iriira te Uea a “uringaki ma ni kamwarakeaki n ana taeka te Atua ae raoiroi” ngkai ti “aki toki ni botaki”? (Moronaai 6:4–5).
Kaungaa te Kamatebwai n te Mweenga
A na ingainga kaain te kiraati ni kan wareka Moronaai 7–9 nakon te wiiki ae e na roko ngkana ko kabwarabwaraa bwa e kairaki ma uoua te reta ae koreaki iroun Moomon ni buoka natina te mwaane n teimatoa n onimaki n taai ni kaangaanga.
Bwaai n Ibuobuoki Riki Tabeua
Kamwarakeaki n ana taeka te Atua.
Unimwaane Jeffrey R. Holland e reirei: “Angiia aomata aki kaea te taromauri n ti taratarai tabeua koaua n te euangkerio aika boou ke n noriia raraoia, e ngae ngke a bon raraoi akanne. A roko ni kakaea te namakin ae a na karekea ni maiun tamneia. A tangira te rau. A tangira aia onimaki bwa e na kamanoaki ao aia kaantaninga ni kabouaki. A tangiria, n ae e uarereke, ni kamwarakeaki n ana taeka te Atua ae raoiroi, bwa a na kakorakoraaki man te mwaaka mai karawa” (“A Teacher Come from God,” Ensign, Meei 1998, 26).
E kabwarabwara Beretitenti Gordon B. Hinckley bwa kamwarakeaia ake a rairaki n ana taeka te Atua “bon te mwakuri ibukiia nikabane. Bon te mwakuri ibukiia taan reirei n te mweenga ao taan kakawari n te mweenga [ngkai tari ao titita ake taan karaoa te mwakuri n ibuobuoki]. Bon te mwakuri ibukiia bitioburiki, ibukin te kooram n te nakoanibonga, ibukin te Bootaki n Aine, te kairake n ataeinimwaane ao n ataeinaine, ao bon te Moanrinan.
“I mena ibuakon teuana te bootaki ni kaoti koaua n te Tabati ae nako. Te teinimwaane ae 15‑ ke 16‑ana‑ririki e tei imataia kaain te taromauri ao e taku bwa e a tia n iangoia bwa e nang bwabetitoaki.
“Imwiina temanna imwin temanna, ataeinimwaane man te kooram n tia reirei a waerake nakon te bwai n taetae ni kaota aia tangira nakoina, n tuanga bwa e bon karaoa te bwai ae eti, ao a kamatoa nakoina ae a na tei ma ngaia ao ni buokia. Bon te namakin ae tamaroa are e reke irou n ongo aia taeka ataeinimwaane akekei ni kakaitau ao ni kaunganano nakon raraoia. E bon ataia nanou bwa ni kabane ataeinimwaane akekei, ni ikotaki ma are e a tia ni bwabetitoaki n te wiiki ae nako, a na bon nako ni mitinare.
“N teuana te intawiu n te kaongora ae e a tibwa nako I titirakinaki, ‘Tera ae e anganiko te raunnano ae moan te korakora ngkai ko nora waakin te Ekaretia n te bong aei?’
“Au kaeka: Te kabanea ni karaunano ae I namakinna bon norana bwa tera ae e karaoia te euangkerio aio nakoia aomata. E anganiia aron iangoan te maiu n te kawai ae boou. E anganiia te taratara ae a tuai man namakin mai mwaina. E buokiia ni kakaai bwaai aika a rietaata ao ae mai iroun te Atua. A riki bwaai nakoia aika a kamiimi taraakiia. A taraa te Kristo ao a rangi ni kakamwakuri.’
“… I titiraki nakoimi n tatabemanii ngkami n taiaoka ni buoka aron te waaki ae wakinaki aei” (“Converts and Young Men,” Ensign, Meei 1997, 48).
Kanakoraoan Ara Anga reirei
Ukera oin Kairam mai iroun te Tamnei. Irarikin are taraakin kabwarabwara aikai bwa taian kairi aika ko riai n irii, kabonganai ni karekei iango ke ni waakina oin kairam iroun te Tamnei ibukin kainnanoia naake ko reireiniia.