te fāra’a Iesu i te mau ’āti Nephi

E ’ite ai ’outou, nā Gary L. Kapp

14–20 nō Tītema

Moroni 10

« E haere mai i te Mesia ’e ’ia maita’i roa ’outou iāna »

E mau ’ohipa paha tā te mau pīahi i tāpe’a mai i te tai’ora’a rātou i te Buka a Moromona i teie matahiti. E pa’epa’e i ni’a i te reira nō te fa’aitoito i te mau pīahi ato’a ’ia tuatāpapa i te mau pāpa’ira’a mo’a.

Pāpa’i i te mau mana’o e tae mai

ītona fa’a’itera’a

Tītau i te mana’o

E nehenehe e ani i te mau pīahi ’ia mana’o ē tē haere mai ra ’o Moroni i roto i te piha. E aha tā rātou e parau iāna nō ni’a i te mea tāna i pāpa’i i roto i te Moroni 10 ? E mau ’īrava ta’a ’ē ānei tā rātou i tāpe’a mai ? Penei a’e e nehenehe tā rātou e fa’a’ite mai i te ’ohipa i tupu ’e teie mau ’īrava.

ītona ha’api’ira’a

Ha’api’i i te ha’api’ira’a tumu

Moroni 10:3–7

E ti’a iā’u ’ia ’ite i te parau mau nā roto i te mana o te Vārua Maita’i.

• E ti’a i te mau pīahi ’ia ’apo mai i te tahi mea ’āpī ’ia tuatāpapa māite rātou i te Moroni 10:3–5. Nō te tauturu ia rātou, e nehenehe e pāpa’i i te mau pereota faufa’a rahi i roto i teie mau ’īrava i ni’a i te tahi mau pāpie ’e e hōro’a i te mau pīahi tāta’itahi ’aore rā i te hō’ē pupu pīahi. E ani ia rātou ’ia feruri ’aore rā ’ia tāu’aparau i te aura’a o tā rātou pereota, ’e te mea tā rātou e nehenehe e rave nō te fa’a’ohipa i te reira i roto i tō rātou orara’a. I muri iho e nehenehe e tai’o ’āmui i te Moroni 10:3–5, ma te tāpe’a i ni’a i te mau pereota i tuatāpapahia ’ia ti’a i terā pīahi ’ia fa’a’ite mai i tōna mana’o.

• Nō te fa’aitoito i te mau pīahi ’ia fa’a’ite mai i te ’ohipa i tupu nō rātou i te ravera’a i te anira’a a Moroni i roto i teie mau ’īrava, e nehenehe e ani ia rātou ’ia mana’o ē, tē tāmata ra rātou i te fa’aitoito i te hō’ē hoa ’aore rā i te tahi melo o te ’utuāfare ’ia noa’a tōna ’itera’a pāpū nō te Buka a Moromona. Nāhea rātou i te fa’a’ohipa i te Moroni 10:3–7 ? E aha te mea tā rātou e nehenehe e fa’a’ite ? Nāhea e ti’a ai ia tātou ’ia tauturu ia vetahi ’ē ’ia māramarama i te aura’a nō te ’itera’a i te hō’ē mea « nā roto i te mana o te Vārua Maita’i »? (Moroni 10:5).

Moroni 10:8–25

« ’Eiaha e huna i te mau mea e hōro’ahia mai e te Atua ».

• Nō te aha e mea faufa’a rahi teie fa’auera’a « ’eiaha e huna i te mau mea e hōro’ahia mai e te Atua » nō teie mau mahana hope’a nei ? (Moroni 10:8). Fa’aitoito i te mau pīahi ’ia feruri i teie uira’a ’a tai’o ai i te Moroni 10:8–18. Nō te ha’apūai i te ti’aturira’a o te mau pīahi nō te mau hōro’a pae vārua, e nehenehe e ani ia rātou ’ia fa’a’ite mai i te tahi mau ta’ata tei fa’a’ohipa i te hōro’a tāta’itahi i tāpurahia i roto i te Moroni 10:9–16. E nehenehe e hi’o mai i te hi’ora’a i roto i te mau pāpa’ira’a mo’a, i roto i te ’ā’amu o te ’Ēkālesia ’aore rā i roto i tō tātou iho orara’a. (’Ua tu’uhia te mau hi’ora’a o te Buka a Moromona i roto i « Te tahi atu mau mātēria tauturu ».) E nehenehe ato’a e tāu’aparau nāhea te tahi o te mau hōro’a tei fa’a’itehia i roto i teie mau ’īrava i te tupura’a i te taera’a mai te Buka a Moromona. Nō te aha e mea faufa’a rahi nō te hō’ē ta’ata e ’imi nei i te hō’ē ’itera’a pāpū nō te Buka a Moromona ’ia ti’aturi i te mau hōro’a pae vārua ? E aha tā tātou e rave i te tahi taime ’o tē « huna » i teie mau hōro’a i roto i tō tātou orara’a ? Nāhea teie mau hōro’a e tauturu ai ia tātou ’ia « haere mai i te Mesia ’ia maita’i roa… iāna » ? (hi’o Moroni 10:30–33).

• Te tahi rāve’a nō te hi’o i te mau hōro’a pae vārua i roto i teie mau ’īrava, ’o te pāpa’ira’a ïa i ni’a i te tāpura ’ere’ere i te mau uira’a mai E aha te mau hōro’a pae vārua ? ’O vai te ta’ata e hōro’ahia te reira ? Nō te aha e hōro’ahia te reira ? ’e Nāhea tātou i te fāri’i i te reira ? I muri iho e ani i te mau pīahi ’ia ’imi i roto i te Moroni 10:8–25 i te mau pāhonora’a. (E nehenehe te mau fa’ahitira’a parau a te peresideni Brigham Young ’e a te peresideni Dallin H. Oaks i roto i « Te tahi atu mau mātēria tauturu » e tauturu ato’a mai.) Hau atu i te mau hōro’a pae vārua i fa’ahitihia i roto i te mau ’īrava 9–16, e aha te tahi atu ā mau « mea i hōro’ahia mai e te Atua » tā tātou i fāri’i ’aore rā tei ha’amaita’i ia tātou ?(Moroni 10:8). E hina’aro paha ’oe e fa’a’ite i tā Elder Bruce R. McConkie i ha’api’i : « ’Aita e hōpe’ara’a tō te mau hōro’a pae vārua ’e te raura’a o te reira. Terā i fa’a’itehia i roto i te parau i heheuhia mai, e fa’ahōho’ara’a noa ïa nō te nīni’ira’a ’ōti’a ’ore o te aroha hanahana tā te hō’ē Atua aroha e hōro’a i te feiā e here ’e e tāvini iāna » (A New Witness for the Articles of Faith [1985], 371).

Moroni 10:30–33

E ti’a iā’u ’ia tae i te maita’i-roa-ra’a nā roto i te aroha o Iesu Mesia.

• I tō ’oe mana’o, e aha te tauturu i te mau pīahi ’ia fāri’i i te anira’a a Moroni « e haere mai i te Mesia ’e ’ia maita’i roa ’outou iāna » ? (Moroni 10:32). Penei a’e e nehenehe te ha’amatara’a ma te hō’ē hīmene nō ni’a i teie tumu parau, mai te hīmene « Mai, pe’e mai » (Te mau hīmene, n°58), e tītau manihini i te Vārua ’ia pārahi mai i roto i te tāu’ara parau, ’e e nehenehe te mau pīahi e fa’a’ite i te mau tū’atira’a ato’a tā rātou e ’ite i roto i te hīmene ’e te mau parau mau i roto i te Moroni 10:30–33. E aha tā tātou e ’apo mai i roto i teie mau ’īrava ’e teie hīmene nō ni’a e aha te aura’a e haere mai i te Mesia ? E aha te aura’a « ’ua maita’i roa… i te Mesia » ? (hi’o ato’a PH&PF 76:50–53, 69). E fa’a’ite i tō ’oe mau mana’o nō ni’a i te aura’a nō te « fa’ati’a-roa-hia nā roto ia Iesu » (PH&PF 76:69), ’e e fa’aitoito i te mau pīahi ’ia fa’a’ite mai i tō rātou.

• Nō te mea ’o te tāu’ara’a parau hope’a teie nō ni’a i te Buka a Moromona i teie matahiti, e nehenehe e ani i te tahi mau pīahi ’ia fa’a’ite mai i te mana’o e tae mai ’e tā rātou i ha’api’i mai ’a tuatāpapa ai rātou i teie buka. Nō te tauturu i te mau pīahi ’ia nā reira, e nehenehe e tai’o ’āmui i te Moroni 10:32–33 ’e e ani i te mau pīahi ’ia rave ma’a minuti nō te feruri nāhea te Buka a Moromona i te tauturu ia rātou ’ia haere mai i te Mesia. E nehenehe e ui atu : Nāhea te Buka a Moromona i te tauturu ia tātou ’ia fa’atupu i te here rahi a’e nō te Atua ? Nāhea te reira i te tauturura’a ia tātou ’ia tūru’i hope atu ā i ni’a i te aroha o te Mesia ? Nāhea te reira i te tauturura’a ia tātou « ’eiaha e huna » i te mana o te Fa’aora ? E ani i te mau pīahi ’ia hōro’a mai i tō rātou ’itera’a pāpū nō te Buka a Moromona ’e tō te reira ’ite nō Iesu Mesia.

ītona ’āpora’a ha’api’ira’a

Fa’aitoito i te ha’api’ira’a mai i te fare

Nō te tauturu i te mau pīahi ’ia ’ana’anatae i te tuatāpapara’a i Te Parau Ha’api’ira’a ’e te mau Parau Fafau i te matahiti i muri nei, e nehenehe e hi’o i te Moroni 10:9–16 ma te fa’ata’a ē, tē ’ite-pāpū-hia ra teie mau hōro’a i roto i te ’Ēkālesia i teie mahana. ’A tai’o ai tātou i Te Parau Ha’api’ira’a ’e te mau Parau Fafau, e ’ite tātou nāhea te mau hōro’a ’e te mana o te Atua i te fa’a’ohipahia nō te rave i tāna ’ohipa i roto i te mau mahana hope’a.

ītona mātēria tauturu

Te tahi atu mau mātēria tauturu

Te mau fa’a’itera’a o te mau hōro’a pae vārua i roto i te Buka a Moromona.

• Ha’api’i i te ta’ata nā roto i te Vārua : Nephi ’e Lehi (Helamana 5:17–19)

• E fa’aro’o rahi roa : Alama, Amuleka, Amona, ’e vetahi mau pu’era’a (Etera 12:13–22)

• Fa’aora i te ma’i : Alama (Alama 15:5–11)

• Mau temeio rahi : Nā pipi e toru (3 Nephi 28:19–22)

• Parau tohu : Lehi (2 Nephi 1:6–7)

• ’Ite i te mau melahi : Amuleka (Alama 10:7–10)

• ’Īriti i te parau nā roto i te tahi atu reo : Mosia (Mosia 28:11–16)

Te ’itera’a pāpū o te peresideni Brigham Young nō ni’a i te mau hōro’a pae vārua.

« Te fa’aro’o. ’Ia ti’aturi ’outou i te mau parau tumu o te ’evanelia ’e ’ua roa’a te fa’aro’o, ’o te hō’ē ïa hōro’a a te Atua, nāna ïa e ’āmui mai ā i te fa’aro’o, ma te ’āmui i te fa’aro’o i ni’a i te fa’aro’o…

Te hōro’a nō te Fa’aorara’a i te ma’i. Teie au e fa’a’ite atu nei ia ’outou e hānere ’e hānere taime tā’u i ’ite i te tāne, te vahine ’e te tamari’i i te fa’aorara’ahia ma te mana o te Atua, nā roto i te tu’ura’a rima, e rave rahi ho’i tā’u i ’ite i te fa’ati’ara’ahia mai mai te ’ūputa o te pohe mai, ’e ’ua fa’aho’ihia mai mai te ’ōti’a o te tau mure ’ore mai ; ’e te tahi pae, i fa’aru’e na ho’i ïa tō rātou vārua i te tino, ’e ’ua ho’i fa’ahou mai. Tē fa’a’ite pāpū atu nei au ē ’ua ’ite mata vau i te ma’i i te fa’aorara’ahia nā roto i te tu’ura’a rima, ’ia au i te fafaura’a a te Fa’aora…

« Te tohura’a, te heheura’a ’e te ’ite. » E ti’a i te tāne ’e te vahine ato’a ’ia riro ’ei heheu parau, ’e ’ia fāri’i i te ’itera’a pāpū nō Iesu, ’o te vārua ïa o te tohu, ’e ’ia ’ite i te mana’o ’e te hina’aro o te Atua nō rātou ra, ’e ’ia pāto’i i te ’ino, ’e ’ia mā’iti i te maita’i » (Te Mau Ha’api’ira’a a te Mau Peresideni o te ’Ēkālesia : Brigham Young [1997], 274–75).

« Tāmau i te mau mea maitata’i ato’a ra. »

’Ua parau te peresideni Dallin H. Oaks nāhea tē ’imira’a i te mau hōro’a pae vārua i te ha’amaita’i i tōna metua vahine : « Nō te mo’era’a tāna tāne fa’aipoipo, ’ua mo’emo’e ri’i ato’a tō’u metua vahine. ’Ua pure noa ’oia nō te mau mea tei tītauhia iāna nō te rave fa’aoti i tāna hōpoi’a e ha’apa’o i tāna e toru tamari’i ! ’Ua ’imi ’oia, ’ua vai ti’amā ’oia ’e ’ua ha’amaita’ihia ’oia ! ’Ua pāhonohia tāna mau pure nā roto i te mau rāve’a rau, ’e tae noa atu te fāri’ira’a i te mau hōro’a pae vārua. E rave rahi tāna mau hōro’a pae vārua, te mea rā tā’u e ha’amana’o rahi nei, ’o te mau hōro’a ïa nō te fa’aro’o, nō te ’itera’a pāpū ’e nō te pa’ari » (« Spiritual Gifts », Ensign, Tetepa 1986, 72).

Ha’amaita’ira’a i tā tātou ha’api’ira’a

Fa’ata’a i te taime nō te mau pīahi ’ia fa’a’ite mai. « ’Ia fa’a’ite ana’e mai te mau pīahi i te mea tā rātou i ha’api’i mai, e’ita rātou e putapū noa i te Vārua ’e e ha’apūai noa i tō rātou iho ’itera’a pāpū, e fa’aitoito ato’a rā rātou i te tahi atu mau pīahi ’ia ’ite i te mau parau mau nō rātou iho » (Ha’api’ira’a mai tā te Fa’aora, 30).