tē bapetizo nei Alama i te ta’ata i te pape nō Moromona

Minerva Teichert (1888–1976), Tē bāpetizo ra Alama i roto i te pape nō Moromona, 1949–1951, pēni hinu, 35⅞ x 48 initi. Brigham Young University Museum of Art, 1969

30 nō Novema–6 nō Tītema

Moroni 1–6

« E tāpe’ahia ai rātou i ni’a i te ’ē’a ti’a »

’Ua hina’aro Moroni ’ia riro te mau mea tāna i pāpa’i « ’o te faufa’ahia » te mau ta’ata e ora i te mau mahana hope’a nei (Moroni 1:4). ’A tai’o ai ’oe i te Moroni 1–6, e feruri nā roto i te pure i te mau mea e faufa’ahia te feiā tā ’oe e ha’api’i ra.

Pāpa’i i te mau mana’o e tae mai

ītona fa’a’itera’a

Tītau i te mana’o

I te tahi taime e mea ’ite maita’i a’e te mau pīahi ’ia fa’a’ite i te mea tā rātou i ’apo mai i roto i tā rātou iho tuatāpapara’a ’ia hōro’ahia ma’a taime nō te ha’amana’o i te mea tā rātou i tai’o. E nehenehe e rave ma’a taime i te ha’amatara’a o te ha’api’ira’a nō te hi’o i te mau upo’o parau pene o te Moroni 1–6. (E tauturu ato’a te reira i te mau pīahi tei ’ore i tai’o i te fare.) I muri iho e ani i te mau pīahi ’ia ’imi i roto i te mau pene i te hō’ē ’īrava tā rātou e tāpe’a mai ’e ’o tā rātou e hina’aro e fa’a’ite i te toe’a o te piha ha’api’ira’a.

ītona ha’api’ira’a

Ha’api’i i te ha’api’ira’a tumu

Moroni 2–6

E mea tītauhia ’ia fa’aterehia te mau ’ōro’a o te autahu’ara’a mai tei fa’auehia e te Fatu.

• Mai te peu tē fa’aineine ra te tahi mau pīahi (’aore rā tō rātou mau here iti) nō te fāri’i i te mau ’ōro’a o te autahu’ara’a, e mea maita’i paha ’ia hi’o i tā Moroni i ha’api’i nō ni’a i te mau ’ōro’a i roto i te Moroni 2–6. E nehenehe te mau pīahi ’ia ’ohipa piti piti nō te ha’uti ta’ata ora i te mau ha’uti mai teie i muri nei. (1) Te fātata ra tō ’oe taea’e i te fa’atōro’ahia i te autahu’ara’a. E aha te parau a’o tā ’oe e hōro’a iāna mai roto mai i te Moroni 3 ? (2) Tē uiui ra te mana’o o te tahi hoa nō te tahi fa’aro’o ’ē nō te aha e tītauhia ’ia rave i te ’ōro’a mo’a i te mau hepetoma ato’a. E aha tā ’oe e parau atu ? (hi’o Moroni 4–5). (3) Tē fātata ra tā ’oe tamāhine i te bāpetizohia, ’aita rā ’oia i pāpū roa ē, ’ua ineine ānei ’oia. Nāhea ’oe nō te tauturu iāna ? (hi’o Moroni 6:1–3). I muri mai i te ha’utira’a ta’ata ora, e nehenehe te mau piha e tāu’aparau i te mea tā rātou i ’apo mai terā ta’ata ’e terā ta’ata. E nehenehe ato’a tā rātou e fa’a’ite i tō rātou ’itera’a pāpū nō ni’a nāhea te mau ’ōro’a mai teie i ha’afātata ia rātou i te Metua i te Ao ra ’e ia Iesu Mesia.

• Nō te ha’amata i te hō’ē ’āparaura’a nō ni’a i te fa’aineinera’a nō te bāpetizora’a, e nehenehe e ani i te hō’ē pīahi ’ia fa’ata’a mai i te tahi mau rāve’a nō te fa’aineinera’a ’oia nō te tahi fafaura’a faufa’a rahi o tōnā orara’a, mai te misiōni, te fa’aipoipora’a, te metuara’a ’aore rā te hō’ē tōro’a ’āpī. Nāhea te reira fa’aineinera’a e fa’aau ai i te fa’aineinera’a e tītauhia nō te bāpetizora’a, mai tei fa’ata’ahia i roto i te Moroni 6:1–3 ? (hi’o ato’a Mosia 18:8–10 ; PH&PF 20:37). Nō te aha e tītauhia te huru i fa’ahitihia i roto i teie mau tuha’a nō te bāpetizora’a ? Nāhea tātou e ’ite ai ’ua ineine tātou nō terā ’ōro’a ? Fa’aitoito i te mau pīahi ’ia feruri e aha te huru tō rātou orara’a i teie mau fa’aturera’a mai tō rātou bāpetizora’a ē tae roa mai i teienei, ’e e aha te nehenehe e rave nō te ha’amaita’i atu ā. E nehenehe ato’a e ani ia rātou ’ia pāpa’i i te mau mana’o ato’a e tae mai ’e ’ia hi’o pinepine i te reira.

  e tamāhine e fāri’i ra i te hō’ē ha’amaita’ira’a

  Tē ravehia nei te mau ’ōro’a nā roto i te mana o te autahu’ara’a.

Moroni 4–5

E tauturu te ravera’a i te ’ōro’a nō te ha’afātata atu ā ia tātou ia Iesu Mesia.

• Tē hōro’a nei te arata’i ha’api’ira’a o teie hepetoma o te Mai pe’e mai—nō te ta’ata hō’ē ’e te ’utuāfare i te tahi mau ’ohipa tuatāpapara’a e tū’ati i te ’ōro’a mo’a. Penei a’e e nehenehe e ani i te tahi mau pīahi ’ia rave i teie mau ’ohipa i te fare ’e ’ia haere mai i te piha ha’api’ira’a ma te fa’aineine nō te fa’a’ite i te mea tā rātou i ’apo mai. E nehenehe ato’a e ani i te mau pīahi ’ia fa’a’ite i te tahi ’e te tahi i te mea tā rātou e rave nō te fa’aineine ia rātou iho ’e tō rātou ’utuāfare ’ia riro te taime nō te ’ōro’a ’ei ’ohipa mo’a.

• ’Ua fa’aro’o te rahira’a o tātou i te mau pure nō te ’ōro’a e rave rahi taime, tē feruri rahi ra ānei tātou i te aura’a o te mau parau ? Nō te tauturu i te mau pīahi ’ia feruri māite i teie mau pure, e nehenehe e hōro’a ia rātou i te tahi minuti nō te pāpa’i mai i nā pure mai te au i tā rātou e ha’amana’o ra. I muri iho, e ani ia rātou ’ia fa’aau i tā rātou i te pāpa’i i tei pāpa’ihia i roto i te Moroni 4:3 ’e te 5:2. E aha tā rātou i ha’amana’o ’ōhie mai ? E aha tei mo’e ia rātou ? ’Ua haru ānei tō rātou mata i ni’a i te hō’ē mea nō ni’a i teie nā pure ’aita tō rātou mata i haru a’enei ? E ani i te mau pīahi ’ia fa’a’ite i te mau ta’o ’e te mau parau i roto nā pure o te ’ōro’a mo’a tā rātou e hi’o ta’a ē nei, ’aore rā te mea e tauturu ia rātou ’ia putapū i te mo’ara’a o teie ’ōro’a. Nō te fa’ahōhonu atu ā i te māuruuru o te mau pīahi nō te ’ōro’a, e nehenehe e ani i te hō’ē pīahi ’ia hīmene mai ’aore rā ’ia ha’uti mai i te hō’ē hīmene ’ōro’a.

Moroni 6:4–9

E tāvini te mau pipi a Iesu Mesia i te tahi ’e te tahi.

• E nehenehe e fa’a’ohipa i te hō’ē fa’aaura’a nō te tauturu i te mau pīahi ’ia māramarama i te faufa’a rahi « ’ia fa’a’amuhia rātou i te parau maita’i a te Atua ra » (Moroni 6:4). ’Ei hi’ora’a, e aha te mā’a e tītauhia nō te hō’ē ohi ’āpī ’aore rā te hō’ē ’aiū ? E aha tē tupu mai te mea e tāu’a ’ore ’oe i te hō’ē mea tei tītauhia te mā’a nāna ? E aha te tū’atira’a i roto i te mau melo ’āpī ’e te mau melo e ho’i mai nei, ’e te hō’ē ohi ’aore rā te hō’ē tamari’i tei tītauhia te mā’a nāna ? E nehenehe te mau pīahi e ’imi i roto i te Moroni 6:4–9 i te tahi mau mana’o nō ni’a e nāhea e nehenehe ’ia rātou e « fa’a’amu » i te tahi ’e te tahi i te pae vārua. E nehenehe ato’a rātou e ’ite mai i te mana’o i roto i « Te tahi atu mau mātēria tauturu ». E nehenehe e fa’a’ite i te hō’ē ’ohipa i tupu i reira te hō’ē hoa pipi tāvinira’a ia ’oe. Penei a’e e hinaʼaro te tahi mau pīahi e fa’a’ite mai i te tahi mau ’ohipa mai te reira.

• E nehenehe te Moroni 6:4–9 e tauturu i te mau pīahi ’ia māramarama i te ha’amaita’ira’a ’ua « ’āmuihia rātou i te feiā o te ’ēkālesia a te Mesia » ’e te haerera’a i te mau purera’a. Nāhea tātou e nehenehe ai e fa’ata’a atu i teie mau ha’amaita’ira’a i te hō’ē ta’ata e parau nei ē e aha pa’i te faufa’a nō te ha’amau-roa-ra’a i te hō’ē ’ēkālesia ? Penei a’e e nehenehe te mau pīahi e ’imi i roto i teie mau ’īrava nō te hi’o mai i te hō’ē mea e nehenehe e parau atu. ’Aore rā e nehenehe tā rātou e tāpura i te mau ha’amaita’ira’a tā rātou i fāri’i ’ei melo nō te ’Ēkālesia (hi’o D. Todd Christofferson, « Nō te aha te ’Ēkālesia », Ensign ’aore rā Liahona, Nov. 2015, 108–11). E aha tā tātou e nehenehe e rave nō te ha’apāpū ē, e « ha’amana’ohia [tō tātou mau hoa pipi] ’e ’ia fa’a’amuhia rātou i te parau maita’i a te Atua ra » ’a « ’āmui pinepine » ai tātou? (Moroni 6:4–5).

ītona ’āpora’a ha’api’ira’a

Fa’aitoito i te ha’api’ira’a mai i te fare

E hina’aro rahi paha te mau pīahi e tai’o i te Moroni 7–9 i te hepetoma i muri nei mai te peu e fa’ata’a atu ’oe ē, tē vai ra e piti rata tā Moromona nō te tauturu i tāna tamaiti ’ia ha’apa’o maita’i noa i roto i te taime fifi.

ītona mātēria tauturu

Te tahi atu mau mātēria tauturu

Fa’a’amuhia i te parau a te Atua.

’Ua ha’api’i Elder Jeffrey R. Holland : « ’Aita te rahira’a o te ta’ata e haere mai nei i te ’ēkālesia nō te hō’ē noa mea ’āpī nō ni’a i te ’evanelia ’aore rā nō te fārerei i te mau hoa tahito, noa atu ā pa’i e mea faufa’a te reira. Tē haere mai nei rātou ma te ’imi i te hō’ē ’ohipa pae vārua. ’Ua hina’aro rātou i te hau. ’Ua hina’aro rātou ’ia ha’apūaihia tō rātou fa’aro’o ’e ’ia fa’a’āpīhia te tīa’ira’a. Nō te ha’apoto noa, ’ua hina’aro rātou ’ia fa’a’amuhia i te parau maita’i a te Atua, ’ia ha’apūaihia rātou e te mau mana o te ra’i » (« A Teacher Come from God », Ensign, Mē 1998, 26).

’Ua fa’ata’a te peresideni Gordon B. Hinckley ē, te fa’a’amura’a i te mau melo fa’afāriu i te parau a te Atua, e « ’ohipa ïa nō te tā’āto’ara’a. E ’ohipa teie nā te mau taea’e hāhaere ’e te mau tuahine hāhaere [i teienei te mau taea’e aupuru ’e te mau tuahine aupuru]. E ’ohipa teie nā te ’episekōpora’a, nā te mau pupu autahu’ara’a, nā te Sōtaiete Tauturu, nā te feiā ’āpī tamāroa ’e te feiā ’āpī tamāhine, ’e tae noa atu te Paraimere.

« Tei roto vau i te hō’ē purera’a ha’apaera’a mā’a ’e te ’īritira’a mana’o i te sābati i ma’iri a’enei. ’Ua ti’a mai te hō’ē tamāroa 15 ’aore rā 16 matahiti i mua i te ’āmuira’a ma te parau ē, ’ua fa’aoti ’oia e bāpetizo iāna.

« I muri iho, ’ua ’āpe’e hō’ē hō’ē mai te mau tamāroa nō te pupu ha’api’i i te micro nō te fa’a’ite i tō rātou here iāna, nō te parau iāna ē ’ua tano tāna fa’aotira’a, ’e nō te ha’apāpū iāna ē e ti’a mai rātou i pīha’i iho iāna nō te tauturu iāna. ’Ua riro te reira ’ei ’ohipa fa’ahiahia ’ia fa’aro’o i te mau parau aroha ’e te fa’aitoito a teie nau feiā ’āpī tamāroa i tō rātou hoa. Tē ti’aturi nei au ē, e haere teie nau tamāroa ato’a i tā rātou misiōni, ’e tae noa atu te taure’are’a i bāpetizohia i te hepetoma i ma’iri.

« ’Aita i maoro a’enei, ’ua uihia mai au ē : ‘E aha te mea tā ’oe e māuruuru roa a’e ’a hi’o ai ’oe i te ’ohipa a te ’Ēkālesia i teie mahana ?’

« Tā’u pāhonora’a : ‘Te mea māuruuru roa a’e nā’u, ’o te ’itera’a ïa i te mea tā teie ’evanelia e rave nei nō te mau ta’ata. Tē hōro’a nei te reira ia rātou i te hō’ē hi’ora’a ’āpī i ni’a i te orara’a. Tē hōro’a nei te reira i te hō’ē hi’ora’a ātea ’aita i ’itehia a’enei e rātou. Tē fa’ateitei nei te reira i tā rātou hi’ora’a i ni’a i te mau mea huru ari’i ’e te hanahaha. ’Ua tupu te hō’ē mea i ni’a ia rātou, e temeio mau ’ia hi’o i te reira. E hi’o rātou i te Mesia ’e e ora rātou’.

« … Tē ani nei au ia ’outou ’ia tauturu mai i roto i teie ’ōpuara’a rahi » (« Converts and Young Men », Ensign, Mē 1997, 48).

Ha’amaita’iraʼa i tā tātou ha’api’ira’a

’Imi i tō ’outou iho fa’aurura’a. ʼEiaha e faʼariro i teie mau faʼanahoraʼa ʼei mau arataʼiraʼa e tiʼa ia ʼoutou ʼia peʼe atu, e faʼaʼohipa rā i te reira nō te tītau i te mau manaʼo ʼaore rā nō te faʼatupu i tō ʼoutou iho fa’aurura’a ’a feruri ai ʼoutou i te mau hinaʼaro o tā ʼoutou mau pīahi.