« 23–29 nō Novema. Etera 12–15 : ‘Nā roto i te fa’aro’o e ti’a ai te mau mea ato’a’ », Mai, pe’e mai—nō te Ha’api’ira’a Sābati : Buka a Moromona 2020 (2020)
« 23–29 nō Novema. Etera 12–15 », Mai, peʼe mai—nō te Haʼapiʼiraʼa Sābati : 2020
Tē tāpuni ra Etera i roto i te hō’ē ana, nā Gary Ernest Smith
23–29 nō Novema
Etera 12–15
« Nā roto i te fa’aro’o e ti’a ai te mau mea ato’a »
Te fā o teie arata’i ha’api’ira’a, e ’ere ïa te fa’ahepora’a i te mea e tupu i roto i te piha ha’api’ira’a. E tauturu te reira—e ’ere i te mono—i tā ’oe iho heheura’a. Vaiiho i te Vārua ’ia arata’i i tā ’oe iho tuatāpapara’a ’e te fa’aineinera’a, ’ei reira e hi’o atu ai e tauturu ānei te mau ’ohipara’a i roto i teie arata’i ha’api’ira’a i te mau pīahi ’ia ’ite mai ’e ’ia fa’a’ite mai i te mau parau tumu faufa’a rahi i roto i te Etera 12–15.
Pāpa’i i te mau mana’o e tae mai
Tītau i te mana’o
Nō te tauturu i te mau pīahi ’ia fa’a’ite mai i tā rātou i ha’api’i mai i roto i tā rātou iho tuatāpapara’a ’aore rā te tuatāpapara’a ’utuāfare, e nehenehe e pāpa’i i ni’a i tāpura ’ere’ere i te mau parau mai teie « ’Ua ha’api’i mai au ē… » « E ’itera’a pāpū tō’u nō… » ’e « ’Ua ’ite au i te… ». E ani i te mau pīahi ’ia fa’a’ite mai i te hō’ē mea i roto i te Etera 12–15 e nehenehe e fa’ahope i te mau parau i ni’a i te tāpura ’ere’ere.
Ha’api’i i te ha’api’ira’a tumu
E fāri’i tātou i te ’ite nō te parau mau ’a fa’a’ohipa ai tātou i te fa’aro’o ia Iesu Mesia.
-
Nō te tauturu i te mau pīahi ’ia feruri i te aura’a nō te fa’a’ohipara’a i te fa’aro’o ia Iesu Mesia, e nehenehe e ani ia rātou e aha te hōho’a ’aore rā te parau tā rātou e mana’o ra ’ia fa’aro’o rātou i te ta’o ra fa’a’ohipa. (E nehenehe roa ato’a e hi’o i terā ta’o i roto i te fa’atoro parau.) E aha te tupu i ni’a i te tino e fa’a’ohipahia ra, mai te fa’a’eta’etara’a tino ? Nāhea i te fa’a’ohipa i te reira parau tumu nō te fa’aro’o ? Nāhea tātou i te « fa’a’ohipa i te fa’aro’o » i te Mesia ? E nehenehe te mau pīahi e ’imi i roto i te Etera 12:2–22 ’e e ’āparau nāhea te nūna’a tei fa’ahitihia i roto i teie mau ’īrava i fa’a’ohipa ai i te fa’aro’o. Nāhea e ti’a ai ia tātou ’ia peʼe i tō rātou hiʼoraʼa ? ’Ia au i teie mau ’īrava, e aha te mau fa’ahope’ara’a nō te fa’a’ohipara’a i te fa’aro’o ia Iesu Mesia ?
-
E mea au te mau hi’ora’a i roto i te Etera 12:7–22 nō te hi’o fa’ahou ā i te mau ’ā’amu fa’auru tei tuatāpapa-’āmui-hia i roto i te Buka a Moromona. Penei a’e e nehenehe te mau pīahi e fa’a’ite mai i te tahi atu ā hi’ora’a nō te fa’aro’o ’e te mea tā rātou i ’apo mai (e ’itehia vetahi i roto i te Hebera 11). E nehenehe ato’a tā rātou e fa’a’ite mai i te hi’ora’a nō te ha’apa’o maita’i nā roto mai i tō rātou ’ā’amu ’utuāfare ’aore rā tō rātou iho orara’a. Nāhea te reira mau hi’ora’a i te ha’apūai i tō rātou fa’aro’o ia Iesu Mesia ’e i te Metua i te Ao ra ?
-
’Ua ’ī te Etera 12 i te mau hi’ora’a ’e te mau parau mau nō ni’a i te fa’aro’o. E nehenehe te mau pīahi e hi’o mai i te mau ’īrava o teie pene e ha’api’i nei ia rātou nō ni’a i te fa’aro’o. I muri iho e nehenehe tā rātou e pāpa’i i ni’a i te tāpura ’ere’ere i te mea tā rātou i ’ite mai.
E arata’i te fa’aro’o i te « tīa’i… i te hō’ē ao maita’i roa ».
-
E nehenehe ānei te hō’ē pīahi e fa’ata’a mai nō te aha e mea faufa’a rahi te tūtau nō te hō’ē poti ? E nehenehe e fa’a’ite i te hōho’a nō te hō’ē poti ’e te hō’ē tūtau (’aore rā e pāpa’i hōho’a i te reira i ni’a i te tāpura ’ere’ere) ’e e ’āparau e aha te tupu nō te hō’ē poti ’aita e tūtau. E aha tē tupu nei nō tātou ’aita ana’e e tīa’ira’a ? I muri iho e nehenehe te mau pīahi e tai’o i te Etera 12:4 ’e e paraparau nō ni’a i te huru ’ua riro te tīa’ira’a mai te hō’ē « tūtau nō [tō tātou] vārua ». E nehenehe ato’a tā rātou e tai’o i te Etera 12:1–9, 28, ’e 32 ’e e fa’a’ite mai i tā rātou i ’apo mai nō ni’a i te tīa’ira’a. E aha tā tātou e tīa’i atu ? (hi’o Etera 12:4 ; Moroni 7:41 ; hi’o ato’a Ioane 16:33).
Nā roto i te aroha o Iesu Mesia e ti’a ai te mau mea paruparu e fa’a’eta’etahia.
-
Nō te tauturu i te mau pīahi ’ia fa’atano i ni’a ia rātou i te mau parau mau tā Moroni i ’apo mai nō ni’a i te mea paruparu ’e te mea ’eta’eta i roto i te Etera 12, e nehenehe e ani i te mau pīahi ’ia feruri i te hō’ē ta’ata e paruparu ra te mana’o nō tōna mau paruparu. I muri iho, e fa’aitoito i te mau pīahi ’ia ’imi i roto i te Etera 12:23–29 i te mau poro’i e nehenehe e tauturu i terā ta’ata. ’Āhani tei ’ō nei Moroni i teie mahana, e aha tāna e parau atu nō te fa’aitoito iāna ? E nehenehe ato’a te mau pīahi e fa’a’ite i te tahi mau ’ohipa tei tupu nō rātou iho i te tauturura’a te Fa’aora « e fa’ariro… i te mau mea paruparu ’ei mea ’eta’eta nō rātou » (Etera 12:27). E aha te ta’a-’ē-ra’a i roto i teie tauira’a ’e te mau tauto’ora’a ha’amaita’ira’a tā te hō’ē ta’ata e rave ma te tūru’i ’ore i ni’a i te Fa’aora ? Nō te tahi atu ā parau nō ni’a i teie tumu parau, e hi’o i te fa’ahitira’a parau a te peresideni Henry B. Eyring i roto i « Te tahi atu mau mātēria tauturu ».
-
Te ’ohipa i tupu nō Moroni, ’o te hō’ē ïa o te mau ’ohipa e rave rahi i roto i te mau pāpa’ira’a mo’a e fa’a’ite nei nāhea te aroha o te Fa’aora e nehenehe e taui i tō tātou mau paruparu ’ei mea ’eta’eta. E mea au paha ’ia vāhi i te piha ’ei pupu, e ani i te pupu tāta’itahi ’ia rave i te hō’ē ta’ata i roto i te mau pāpa’ira’a mo’a e paruparu tōna, ’e e paraparau atu ai nāhea te Fatu i te ha’apūaira’a i terā ta’ata. Tē vai nei te tahi mau mana’o i roto i « Te tahi atu mau mātēria tauturu ». E nehenehe ato’a e ani i te mau pīahi ’ia hi’o i te tātarara’a nō te aroha i roto i te Fa’atoro parau Bibilia ’aore rā te Mau Māite i te Fa’aro’o (mau ’api 77–78). Nāhea te mau hi’ora’a pāpa’ira’a mo’a tā rātou i tuatāpapa e fa’ahōho’a nei i te mana o te aroha o te Fa’aora ? Nāhea tātou e tītau i teie mana i roto i tō tātou orara’a ?
-
E peu mātau te fa’aaura’a i tō tātou mau paruparu i te pūai e ’itehia ra i roto i te tahi atu ta’ata ; ’ua nā reira ato’a Moroni i te hi’ora’a iāna i mua i te ’aravihi o te taea’e o Iareda (hi’o Etera 12:24). Nō te aha e ’ohipa ataata te fa’aaura’a ia tātou i te tahi atu mau ta’ata ? ’Ia au i te Etera 12:26–27, nāhea te Fatu e hina’aro nei ia tātou ’ia hi’o i tō tātou mau paruparu ? (hi’o atoa’ i te fa’ahitira’a parau a te peresideni Henry B. Eyring i roto i « Te tahi atu mau mātēria tauturu »). Nāhea ’oia e hina’aro ’ia hi’o tātou i te paruparu o vetahi ’ē ? (hi’o Etera 12:26).
E hōpoi mai te pāto’ira’a i te mau peropheta i te fifi pae vārua.
-
Nō te mau parau mau faufa’a rahi i ha’api’ihia i roto i te Etera 12, e’ita paha ’oe e fa’aea maoro i ni’a i te mau pene 13–15 i te taime nō te ha’api’ira’a. Terā rā, e mea maita’i paha ’ia ani i te hō’ē pīahi ’ia parau poto mai i te ’ohipa i tupu i roto i teie mau pene. Nō te tauturu i te mau pīahi ’ia ’ite i te mau poro’i e tāpe’a mai i roto i teie fa’ati’ara’a, e nehenehe e ani ia rātou ’ia fa’ahope i te pereota ra « ’E nō teie mau mea tē ’ite nei tātou ē… » ’e te hō’ē ha’api’ira’a tā rātou i ’apo mai i roto i te hi’ara’a o te mau ’āti Iareda. E aha te tū’atira’a i roto i tō rātou hi’ara’a ’e te hi’ara’a o te mau ’āti Nephi ? (hi’o, ’ei hi’ora’a, Etera 15:19 ’e Moroni 8:28). E aha te ha’api’ira’a tā te Fatu e hina’aro nei ia tātou ’ia ’apo mai i roto i teie mau fa’ati’ara’a, ’e e aha tā tātou e nehenehe e rave ’ia ’ore tātou e hi’a mai te mau ’āti Iareda ra ? E nehenehe ato’a te mau pīahi e hi’o nāhea te hope’a o te buka a Etera e tū’ati i te Omoni 1:19–22 ; Mosia 8:8 ; ’e te Mosia 28:11–18.
Fa’aitoito i te ha’api’ira’a mai i te fare
I te hepetoma i muri nei e riro te mau pīahi i te ha’amata i te buka a Moroni. E ’ana’anatae paha rātou ’ia ’ite ē, ’aita ’o Moroni i ’ōpua i te ha’amatara’a e pāpa’i fa’ahou i muri mai i te buka a Etera, ’ua ora maoro a’e rā ’oia i tāna i mana’o. I teie hepetoma, e riro rātou i te tai’o i te mau poro’i hope’a tei fa’auruhia ia Moroni e pāpa’i hou ’oia ’a pohe ai.
Te tahi atu mau mātēria tauturu
E tītau te haerera’a i mua i te pae vārua i te hi’ora’a i tō tātou mau paruparu.
’Ua fa’ahiti te peresideni Henry B. Eyring i te hō’ē parau nō ni’a i te Etera 12:27, ’ua ha’api’i ’oia : « ’Ua parau Moroni ē, i tōna ‘fa’aro’ora’a i taua mau parau ra’, ‘’ua māhanahana » ’oia (Etera 12:29). E nehenehe te reira e riro ’ei tāmāhanahanara’a ia tātou pā’āto’a. Te feiā e ’ore e ’ite i tō rātou paruparu, e ’ore ïa e haere i mua. ’Ia ’ite ’outou i tō ’outou paruparu, e riro ïa ’ei ha’amaita’ira’a, nō te mea, e tauturu te reira ia ’outou ’ia vai ha’eha’a noa ’e ’ia fāriu tāmau noa i ni’a i te Fa’aora. E’ita te Vārua e tāmāhanahana noa ia ’outou, nā roto ato’a rā ho’i iāna e fa’atupu ai te tāra’ehara i te hō’ē tauira’a i roto i tō ’outou nātura mau. E riro mai te mau mea paruparu ’ei mea pūai » (« ’O tō’u nei hau tā’u e hō atu nō ’outou », Ensign ’aore rā Liahona, Mē 2017, 16).
Mau hi’ora’a : ’ua ha’apūaihia tei paruparu.
-
Enoha (Mose 6:31–34 ; 7:13)
-
Mose (Exodo 4:10–12 ; 14:31)
-
Gideona (Tāvana 6:12–16 ; 8:22–23)
-
Petero (Luka 5:8–10 ; 22:55–62 ; Te ’Ohipa 4:13–21)
-
Moroni (Etera 12:23–29)
-
Iosepha Semita (Iosepha Semita—’Ā’amu 1:28 ; PH&PF 35:17 ; 135:3)
Ha’amaita’ira’a i tā tātou ha’api’ira’a
Ha’api’i i te « nō te aha ». I te tahi mau taime e uiui te mana’o o te mau pīahi—te feiā ’āpī ihoa rā—e aha te tū’atira’a ’o te mau tumu parau o te ’evanelia i ni’a ia rātou ’aore rā nō te aha e tītauhia ai ’ia ha’apa’o rātou i te mau fa’auera’a. Terā rā, mai te mea e māramarama rātou i te ’ōpuara’a mure ’ore a te Metua i te Ao ra nō te ’oa’oa o tāna mau tamari’i, e pāpū maita’i ïa ia rātou te mau tumu o te mau parau tumu o te ’evanelia ’e o te mau fa’auera’a ’e e rahi ïa tō rātou hina’aro ’ia ha’apa’o » (Ha’api’ira’a mai tā te Fa’aora, 20).