Te mau pahī o te mau ’āti Iareda i ni’a i te moana

E ’āfa’i mai au i tō ’outou mau pahī nō raro i te mau vāhi hōhonu, nā Jonathan Arthur Clarke

16–22 nō Novema

Etera 6–11

« ’Ia fa’a’orehia te ’ino »

E ha’amana’o ē, ’ua pāpa’ihia te mau pāpa’a parau i roto i te Buka a Moromona nō tō tātou nei ’anotau. ’A fa’aineine ai ’oe i te ha’api’i, ’a hi’o nā roto i te mau fa’ati’ara’a pāpa’ira’a mo’a i te mau parau tumu e nehenehe e ha’apūai i te mau pīahi i mua i te mau fifi o te orara’a.

Pāpa’i i te mau mana’o e tae mai

ītona fa’a’itera’a

Tītau i te mana’o

Nō te tauturu i te mau pīahi ’ia fa’a’ite mai i tā rātou i tāpe’a mai i roto i te Etera 6–11, e nehenehe e ani ia rātou ’ia feruri mai te huru ē tē hāmanihia ra te hō’ē hōho’a tāviri i teie mau pene ; e aha hō’ē pereota i roto i te Etera 6–11 tā rātou e mana’o ra nō te upo’o parau ? Vaiiho i te tahi taime ia rātou nō te feruri i te reira, i muri iho, e fa’a’ite mai rātou i tā rātou upo’o parau ’e te tātarara’a nō te aha rātou i mā’iti ai i te reira.

ītona ha’api’ira’a

Ha’api’i i te ha’api’ira’a tumu

Etera 6:1–12

E arata’i te Fatu ia tātou i ni’a i tō tātou tere tāhuti nei.

• Tē tu’u nei te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare i te mana’o e fa’aau i te tere o te mau ’āti Iareda nā ni’a i te moana i tō tātou iho tere i te tāhuti nei. E ani i te mau pīahi tei tāmata i te teie ’ohipara’a i te fare ’ia fa’a’ite mai i te mea tā rātou i ’apo mai. Nō te tauturu i te mau pīahi ’ia fa’ananea atu ā i te mau fa’aaura’a i roto i te piha ha’api’ira’a, e ani ia rātou ’ia hi’o i te Etera 6:1–12 nō te mau ha’amāramaramara’a nō ni’a i te tere ’o tē nehenehe e ravehia ’ei hi’ora’a parau (mai te mau ’ōfa’i ’ana’ana, te mau pahī ’e te mata’i) ’e e pāpa’i i te reira i ni’a i te tāpura ’ere’ere. I muri iho, e nehenehe te mau pīahi e ’ohipa piti piti ’aore rā e tāpupu nō te tuatāpapa i te mau ’īrava ’e nō te ’āparau e aha te nehenehe e fa’aau i te reira mau mea i roto i tō tātou nei orara’a. ’Ei hi’ora’a, e aha tō tātou « fenua i parauhia ra » ? (’īrava 8). Nāhea te Atua e arata’i ia tātou i ni’a i tō tātou tere ?

• E nehenehe e fa’a’ohipa i te Etera 6:1–12 nō te ha’amata i te hō’ē tāu’ara’a parau ē, nāhea te fāriura’a i ni’a i te Atua e tauturu ai ia tātou ’ia tupu i te rahi i roto i tō tātou mau tāmatara’a. ’Ei hi’ora’a, e nehenehe te fa’ahitira’a parau i roto i « Tahi atu mau mātēria tauturu » e tauturu i te mau pīahi ’ia fa’aau i te « mata’i rahi roa » e fa’ahitihia ra i roto i te mau ’īrava 5–8 ’e te mau ’ati o te orara’a nei. E aha tā te mau ’āti Iareda i rave i te « [ha’a’atira’ahia] rātou i te miti rahi » ? (’īrava 7). E nehenehe te mau pīahi e fa’a’ite mai i te tahi ’ohipa i tupu nō rātou ’e ’ua tūra’i te mau ’ati ia rātou i mua. Nāhea te huru tō rātou pāhonora’a i tō rātou mau fifi i tauturu ia rātou ’ia haere i mua i te « fenua i parauhia ra » ? Nāhea te Fatu i te tauturura’a ia rātou i roto i tō rātou mau fifi ? Fa’aitoito ia rātou ’ia fa’ahiti i te tahi ta’o ’aore rā pereota i roto i te Etera 6 ’a fa’a’ite mai ai rātou i te ’ohipa i tupu nō rātou ’e i tō rātou mau mana’o.

  te mau ’āti Iareda e rātere ra ’e te mau ’ānimara

  Te tere o te mau ’āti Iareda nā Asia, nā Minerva Teichert

Etera 6:7–18, 30 ; 9:28–35 ; 10:1–2

E ha’amaita’i te Fatu ia tātou ’ia fa’aha’eha’a tātou.

• Nō atu ā tē fa’ahōho’a nei te pae rahi o te ’ā’amu o te mau ’āti Iareda i te mau fa’ahope’ara’a ’ino o te te’ote’o ’e te ’ohipa parau-ti’a ’ore, tē vai ato’a nei rā te tahi mau tau o te ha’eha’a ’e o te manuia o tā tātou e nehenehe e ’apo mai i roto. Nō te tauturu i te mau pīahi ’ia ’apo mai nā roto mai i teie mau hi’ora’a au, e nehenehe e vāhi i te piha ’ei piti pupu ’e e hōro’a i te hō’ē pupu ’ia tai’o i te Etera 6:7–18 ’e 30 ’e i te tahi atu pupu ’ia tai’o i te Etera 9:28–35 ’e te 10:1–2. E ani ia rātou ’ia hi’o i roto i teie mau ’īrava i te mau fa’a’itera’a ē, ’ua fa’aha’eha’a te mau ’āti Iareda ia rātou—’aore rā ’ua fa’aha’eha’ahia e te mau ’ohipa i tupu i ni’a ia rātou—’e nāhea te Fatu i te ha’amaita’ira’a ia rātou i te hope’a. ’Ia nava’i te taime o te mau pīahi nō te ’imi mai, e ani i te mau pīahi o te mau pupu tāta’itahi ’ia fa’a’ite mai i tā rātou i ’apo mai. Nāhea te vai-ha’eha’a-ra’a e tauturu ai ia tātou ’ia ha’afātata atu ā i te Atua ? E nehenehe te hīmenera’a ’aore rā te fa’aro’ora’a i te hō’ē hīmene nō ni’a i te ha’eha’a, mai te hīmene ra « Hina’aro vau ia ’oe » (Te mau hīmene, n°50), e fa’ananea atu ā i teie ’ohipa.

Etera 7–11

E arata’i te feiā fa’atere parau-ti’a i te ta’ata i te Atua ra.

• ’Oia ato’a te mau ta’ata ’aita a’enei i amo i te ti’ara’a fa’atere, e nehenehe rātou e ’apo mai nā roto mai i te hi’ora’a o te mau ari’i ’āti Iareda parau-ti’a ’e te parau-ti’a ’ore ; e ti’a i teie mau fa’ati’ara’a e tauturu ia tātou ’ia riro mai ’ei feiā fa’atere maita’i a’e i tō tātou fare, i roto i te huira’atira ’e i roto i te ’Ēkālesia. Penei a’e e nehenehe e ha’amata i te hō’ē tāu’ara’a parau nō ni’a i teie tumu parau ma te ani i te mau pīahi ’ia feruri i te hō’ē ta’ata ’o tā rātou e hi’o nei ’ei ti’a fa’atere maita’i. E ani ia rātou ’ia fa’a’ite poto mai i te maita’i o terā ta’ata, ’e e hāmani i te hō’ē tāpura i ni’a i te tāpura ’ere’ere. I muri iho e nehenehe e fa’ata’a i te pīahi tāta’itahi ’ia ha’api’i mai nō ni’a i te hō’ē o te mau ari’i ’āti Iareda i roto i te Etera 7–11. (Tē vai nei hō’ē tāpura, ma te mau ’īrava, e fa’ata’a nei i tā rātou fa’aterera’a ari’i i roto i te arata’i ha’api’ira’a o teie hepetoma o te Mai, pe’e mai—nō te ta’ata hō’ē ’e te ’utuāfare.) E nehenehe te mau pīahi e fa’a’ite mai i tā rātou i ’apo mai nā roto mai i teie mau ari’i nō ni’a i te fa’aterera’a, e ’āmuihia te mau maita’i tā rātou e ’ite mai i roto i te tāpura i ni’a i te tāpura ’ere’ere. ’Ua tu’uhia te tahi atu maita’i au i roto i « Te tahi atu mau mātēria tauturu ». Nāhea e ti’a ai ia tātou ’ia fa’atupu i te reira mau maita’i ’e ’ia riro ’ei feiā fa’atere, noa atu ā ’aita tō tātou e pi’ira’a nō te fa’atere ?

ītona ’āpora’a ha’api’ira’a

Fa’aitoito i te ha’api’ira’a mai i te fare

Nō te tū’ama i te ’ana’anatae o te mau pīahi ’ia tai’o i te Etera 12–15, e nehenehe e parau atu ē, tē parau ra Moroni i roto i teie mau pene i tōna mau taiā ri’i nō ni’a i te mau pāpa’a parau tāna e ha’apa’o ra. E ti’a i te pāhonora’a a te Fatu e tauturu ia tātou i te taime e mau mana’o taiā tō tātou mai te reira.

ītona mātēria tauturu

Te tahi atu mau mātēria tauturu

Tē fa’aineine nei te mau fifi ia tātou ’ia fāri’i i te ora mure ’ore.

I te paraparaura’a ’oia i roto i te hō’ē ’āmuira’a rahi i te tau nō te Tama’i Rahi II o te Ao nei, ’ua parau Elder Charles A. Callis nō te pupu nō te Tino ’Ahuru Ma Piti ’āpōsetolo ē : « Tē parauhia nei ē, i te fa’arevara’a te mau ’āti Iareda i tō rātou mau pahī nō teie fenua i parauhia ra, ’ua tupu te mau vero pūai ’e te ri’ari’a. ’Ua pūpuhi te mau mata’i ’e e mea ataata roa nō rātou i ni’a i taua tere fifi ra. ’Ua turu te Atua ia rātou. ’E tē tai’o nei tātou ē, noa atu ā teie mau mata’i pūa’i ’e teie mau vero tā’iri, ’e te ha’amoura’a e ’āpe’e i te reira, tē tūra’i tāmau ra te mata’i ia rātou i te fenua i parauhia ra. ’E teie ho’i mau ’ati tā tātou e fa’aruru nei, teie mau tama’i hāhano ’e te mau ’ohipa hā’iri’iri ato’a e tupu nei, tei roto ïa i te mana o te Atua. E nehenehe tāna e tāpe’a i te reira i te taime tāna e mā’iti, i te taime ’ua tupu tāna mau ’ōpuara’a hanahana. ’Eiaha rā e mo’e ’ia tātou ē, i roto i teie moana ti’arepu, tō tātou mau ’ati, te mau ’ohipa e tupu tā tātou e rātere nei ’e ’o tā te Atua e rave nei nō tō tātou ïa maita’i, ’ia ha’apa’o ana’e tātou i tāna parau—e puhi atu teie mau mea ato’a ia tātou i te ha’apūra’a hau, i te ananahi hanahana, i te ora mure ’ore » (i roto Conference Report, ’Ēperēra 1943, 62).

Te mau maita’i o te feiā fa’atere parau-ti’a.

« I roto i te bāsileia o te Atua, te fāito rahi ’e te fa’aterera’a, ’o te hi’ora’a ïa ia vetahi ’ē i ni’a i tō rātou huru mau—mai tā te Atua e hi’o ra ia rātou—’a toro atu ai i te rima nō te tāvini ia rātou. Te aura’a ra, e ’oa’oa ’e o rātou e ’oa’oa ra, e ta’i ’e o rātou e ’oto ra, e fa’ateitei ia rātou i roto i te ’ati pe’ape’a ’e e here i tō tātou ta’ata tupu mai tā te Mesia e here nei ia rātou…

« E ’ere te fa’aterera’a i roto i te ’Ēkālesia i te fa’atere-noa-ra’a i te ta’ata, ’o te ineine rā ’ia arata’ihia e te Atua » (Dieter F. Uchtdorf, « Tei rahi ra i roto ia ’outou na », Ensign ’aore rā Liahona, Mē 2017, 79–80).

« I te ta’ata maita’i noa e roa’a ai te ’aravihi nō te fa’ateitei ’e nō te fa’aitoito i te tahi ’e te tahi, ’ia rahi atu ā te tāvinira’a, ’ia rahi atu ā te manuiara’a, ’ia rahi atu ā te pūai » (Te mau Ha’api’ira’a a te mau Peresideni o te ’Ēkālesia : Ezra Taft Benson [2014], 271).

« Tē ha’api’i nei tō te ao nei ē, ’e feiā pūai te mau feiā fa’atere ; tē ha’api’i nei te Fatu ē, e tītauhia ia rātou ’ia marū. E fāri’i te mau feiā fa’atere nō te ao nei i te mana ’e te fa’aurura’a nā roto i tā rātou tālēni, tō rātou ’ite ’e tā rātou faufa’a. E fāri’i te mau feiā fa’atere o te Mesia i te mana ’e te fa’aurura’a ‘nā roto i te tāparura’a, nā roto i te fa’a’oroma’i-noa-ra’a, nā roto i te marū ’e te ha’eha’a, ’e nā roto ho’i i te here mau ra’ [PH&PF 121: 41] » (Stephen W. Owen, « Te mau feiā fa’atere rahi a’e o te mau feiā pe’e rahi a’e ïa », Ensign ’aore rā Liahona, Mē 2016, 75).

Ha’amaita’ira’a i tā tātou ha’api’ira’a

E fa’aitoito e ’ia vai te tura i roto i te piha ha’apira’a. I tō ’oe mana’o, e mea ’ana’anatae ānei te ta’ata i roto i te piha ha’api’ira’a nō te fa’a’ite i te mana’o tā rātou i feruri ’e te mana’o o tō rātou ’ā’au ? « ’A tauturu i tā ’outou mau pīahi ’ia ta’a ē ’o rātou tāta’itahi ’o tē nehenehe e fa’ataui i te vārua i roto i te piha. E fa’aitoito ia rātou ’ia tauturu mai ia ’outou i te ha’amaura’a i te hō’ē vāhi e nehenehe te ta’ata ato’a e fa’a’ite i tō rātou mau mana’o, e ’itehia te here ’e te fa’atura, ’ia ti’a ho’i i te mau ta’ata ato’a ’ia fa’a’ite i te ’ohipa i tupu ia rātou, tā rātou mau uira’a ’e tō rātou ’itera’a pāpū » (Ha’api’ira’a mai tā te Fa’a’ora, 15).